打豹虎［老督最勁］！

五十幾年前，細路仔嗰陣嘅一種玩意［豹虎］，又叫做［金絲貓］，其實係一種［蠅虎科蜘蛛］嘅俗稱。喺嗰陣時，唔係好多嘢玩，一班人聚埋，啲大人就走去［鬥蟋蟀］，而細路仔梗係去［打豹虎］喇！



香港以前好多學校對出嘅士多，都有得賣［豹虎］，佢哋一直都係好受學生歓迎嘅玩意，好多時都會帯埋返課室度玩、記得當時重有好多特別覇氣嘅名添，例如：雷老虎、紅孩兒、方世玉、孫悟空、皇上皇、金花、老督等等，吾知大家以前有冇玩過呢？

＊＊


聽啲專家講，全世界嘅蠅虎科蜘蛛［豹虎］約有 5,000 種，而大陸地區都有 300 種以上。一般豹虎喺出世之後，就各走各路，各自獨立生活，而同性係唔會同居嘅。豹虎成形前可以係公又可以係乸，喺未到最後一次脫殼，都好難評定係公［篤］定係乸［撲］。

＊＊

豹虎［金絲貓］嘅品種有好多，喺香港玩開嘅都有幾十種，大致分為：王上王、老篤、紅孩兒、黑撲、黃撲、紅撲，常見嘅有：金花，大金花，金花篤等等。

＊＊

金　花：

金花，乸［撲］，體型細，冇乜戰鬥力，通常俾［紅牙兒］當係點心。 ＊＊ 金花篤：

金花篤，公［篤］，係由［金花撲］蛻變出來嘅。

＊＊

紅牙兒：

紅牙兒，乸［撲］，品種同顏色有好多，而品種就係以顏色同體型而定。不過主要顏色離唔開［紅撲］、［黑撲］、［黃撲］三種色。

＊＊

紅　撲：

紅撲，一般玩嘅就分３種：［青紅撲］、［朱砂紅］、［血紅頭］。

＊＊

青紅撲：

青紅撲，以兇狠見稱，但係耐力持久戰唔係佢嘅專長。

＊＊

朱砂紅：

朱砂紅，係［紅撲］之中比較好嘅品種，兇狠快速，戰鬥時就要置對方於死地。

＊＊

血紅頭：

血紅頭，佢嘅戰鬥法極為險惡，一見對手就撲埋亂咬，要咬到對手支體不全。
個性要速戰速決，但係冇乜耐力，擅攻唔擅守。

＊＊

紅撲黑螯：

紅撲黑螯，個性係攻守兼備，擅長打持久戰，遇強越強。
哩個品種比較多見，但係要分區域捉先至好打。

＊＊

黑　撲：

黑撲，哩個品種到處都有，要分地區捉先會有得打。

＊＊

黑黃撲：

黑黃撲，前身黑色，八肢粗長，尾係鮮黃色而尖幼為之好嘢。
屬優良品種，特徵係頭特別大，鬥志，耐力夠，絕唔欺場。

＊＊

全黑撲：

全黑撲，身形同雙螯粗長，頭四方，尾尖長，身披金線，毛色閃為佳品。哩個品種擅打持久戰，唔怕對手咬，屬於死纏難打一類。

＊＊

黃　撲：

頭大身粗尾尖，戰鬥力普通。

＊＊

老　篤：

老篤，［篤］即係公，係由［紅牙兒］蛻變出來。
一般分４種：［藍篤］、［黑篤］、［白花篤］同［紅篤］。
當［老篤］變身之後，就會即刻去搵［紅牙兒］交戰［配］。
因為［老篤］嘅生長期唔長，所以會主動覓偶。

＊＊

藍　篤：

藍篤，係［老篤］之中最佳品種，耐力夠。
螫長粗、頭大、身長、尾長、腳長，顏色鮮，就係上等貨。

＊＊

白花篤：

白花篤，又叫［飛撲篤］、［飛老篤］，比較少見。
個性凶猛，打法怪異，一見對手就飛撲攻擊，無論大細都照打。百花篤主要係銀粉偏多，以雪，基本型態上都係篤一樣。

＊＊

黃尾篤：



黃尾篤，係戰鬥力一般［好普通］嘅貨色。

＊＊

所有嘅［豹虎］、［金絲貓］、［跳蛛］；
不論係螯短、頭圓、身短、尾圓、腳幼，全部都屬劣質貨。

＊＊

＊＊

香港風情。廣東話資料館