鬥蟋蟀［蟋蟀格鬥 ＭＭＡ］

蟋蟀，又叫做［促織］、［蛐蛐］、［蜻蛚］、［蹔𧉆］，係直翅目昆蟲嘅一科，佢哋會食植物嘅莖葉、種實同埋根部，其實都係一種農業害蟲。全世界約有 900 幾種蟋蟀，最普通嘅係［中華蟋蟀］，身長大約七分至一寸［20毫米］，一年生一代。

蟋蟀嘅顏色通常郊係由黑色至褐色，喺個頭部有兩條長觸鬚，後腿比較粗大。蟋蟀公就特別好爭鬥，兩邊翼翅可以摩擦發聲，蟋蟀乸就唔會發聲。蟋蟀一般係［晝伏夜出］嘅為多，佢哋生性孤僻，通常係一穴一蟋蟀。喺發情期嗰時，蟋蟀公會招攬蟋蟀乸一齊住［同居］。每種蟋蟀嘅叫聲都有唔同，為咗方便聽到蟋蟀公嘅求偶聲，喺蟋蟀乸嘅前腳關節下面生有耳鼓，方便收集情報。

＊＊

蟋蟀、蝗蟲、螽斯，三種都係直翅目昆蟲，［蛐蛐］係指［蟋蟀］，［蚱蜢］係指［蝗蟲］，［蟈蟈］係指［螽蟴］，其實佢哋嘅身形體態就好唔同。

蟋蟀，同螽斯都係依靠對翼嘅摩擦發聲。蟋蟀係右翼疊喺左翼上面，螽斯通常係左翼疊喺右翼上面，而蝗蟲就係用佢嘅後腿摩擦對翼發出聲嘅。

蝗蟲，佢嘅觸鬚就比較最短，而螽斯嘅觸鬚又比蟋蟀嘅長。有啲螽斯嘅觸鬚長度甚至比起自己嘅身體更長。



螽蟴同蝗蟲通常係生活喺草地、草叢之間，都有綠色同褐色兩種，而蟋蟀就多數生活喺地面石礫之間，佢哋嘅顏色趨於暗褐色多。

＊＊

鬥蟋蟀，係指兩隻雄性［公］蟋蟀相鬥，係一項流血嘅動物格鬥運動。聽講話，喺唐代就已經有［鬥蟋蟀］呢樣活動，重係大官貴人至玩嘅。喺唐朝天寶時期，當時長安啲富貴人家，會用好多錢去買同養自己嘅心頭好，有啲重會請埋專人來打理添。

最出位玩蟋蟀嘅人，就係宋朝嘅宰相賈似道，傳聞佢周時喺屋企同班妾侍跪喺地下度鬥蟋蟀。而更加荒唐嘅，係佢重帶埋啲蟋蟀返工［上朝議政］添。聽聞佢曾經發生過喺上緊朝嘅時候，有隻蟋蟀喺佢嘅水袖入面跳咗出來，最後跳到去皇帝鬍鬚上面嘅鬧劇。

賈似道鍾意玩蟋蟀鍾意到寫咗一本書叫做［促織經］嘅書，帾入面係講述佢自己［養蟋蟀］同［鬥蟋蟀］嘅經驗心得，重介紹埋蟋蟀嘅捕捉、收買、餵養、鬥勝、醫傷、治病、繁殖等嘅方法。

鬥蟋蟀風氣最頂盛嘅時期就係明朝，喺宣宗朱瞻基時代，家家戶戶都有捕養蟋蟀，嗰啲鬥蟋蟀場重開到周圍都係。而當時啲富二代［二世祖］，成日無所事事，都好鍾意聚埋一堆鬥蟋蟀賭錢，傳聞一鋪［格鬥］嘅上落，可以輸曬老竇副身家。

蒲松齡［聊齋先生］都有寫過幫宣德皇帝搵蟋蟀《促織》嘅故事。

依家嘅大陸同台灣，喺一啲地方都有啲專門嘅蟋蟀協會，佢哋每年都會喺入秋嘅時候，舉辦下一啲熱鬧嘅［鬥蟋蟀大賽］。

＊＊

有關［蟋蟀］嘅書籍：

《促織經》　宋代。賈似道［依家見到嘅係明代周履靖嘅續增本］　 《促織經》　明代。周履靖［促織經續增本］ 《畜促織》　明代。袁宏道 《促織志》　明代。劉侗著 《促織經》　清代。金文錦 《蟋蟀秘要》清代。石　蓮 《蟋蟀譜》　清代。朱翠庭輯 《促織經》　清代。金六（音伊）廠刪定 《蚟孫鑒》　清代。朱從延纂輯、林德垓、莊樂耕重訂 《蟋蟀譜》　近代。李文翀，1930年出版 《蟋蟀譜》　近代。李石孫、徐元禮，1930年出版 ＊＊ 唧唧吱、唧唧吱…… 每年金秋時節，喺石缝之中，墙角裡就傅來［蛐蛐］嘅叫聲。



聽講古人總結出蟋蟀有五德：

。鳴不失時，信也。

。遇敵即鬥，勇也。

。重傷不降，忠也。

。敗則哀鳴，知耻也。

。寒則進屋，識時務也。

＊＊

陳真經典對白！



「我少讀書，你唔好呃我！Samsung Galaxy 同 iPhone 邊隻正啲！」

＊＊

香港風情。廣東話資料館