憑住一支〔AK47〕去開拓佢嘅夢想！

憑住一支〔AK47〕去開拓佢嘅夢想！

同一段警匪搏火嘅片段，分別配用〔緊張刺激版〕、〔溫情感性版〕同〔他鄉情懷版〕三種風格來旁述，各有特色，精彩惹笑。原來［亞視］曾經都係有創意嘅！

。驚心動魄版（石　修）
。哭泣森林版（顏聯武）
。尋找他鄉版（鍾景輝）



＊＊

驚心動魄版：［第一目擊 Feel］

喺1997年2月18號，喺加州一個繁忙嘅商業中心，好多人都如常咁工作，冇人會估到喺呢度將會有一場驚心勳魄嘅槍擊事件，喺佢哋第邊發生。一個悍匪打劫銀行之後，正與警方展開對峙，就連到場採訪嘅電視台攝影隊，亦都受到流彈嘅威脅，險象環生，悍匪用［AK47］向在場嘅警察亂槍掃射。對峙已經超過一小時，悍匪想揸車逃走，警方知道呢個係佢嘫最後嘅機會，所以第一時間衝上前，同悍匪展開死亡駁火。事件終於結束，悍匪難逃法網，警匪駁火，總共1100發子彈，9個警員受到槍傷。

驚心動魄半小時（石修）

驚心動魄半小時系列，係［亞洲電視］喺1998年至1999年製作嘅一個社會紀錄節目。節目由石修［陳碩修］做旁述，講述喺世界各地嘅驚心動魄故事。

＊＊

哭泣森林版：［哭泣惑性 Feel］

打劫銀行嘅故事，係一個無盡生與死嘅故事，內裡總有悲有喜，但結局總會叫人唏噓。呢間銀行，已經成為劫匪嘅目標，無辜嘅記者名純將會飽受虛驚，因為阿金相信，大自然弱肉強食嘅家律，所以就用AK47搶掠弱者嘅金錢。另一方面，虎視眈眈嘅警察，正等待機會捕獵阿金，絕望嘅槍聲，帶來陣陣嘅哀愁，阿金拚死掙扎，都難敵天意。喧嘩過後，大自然又回復平靜，不過我哋隱約聽到，城市正在哭泣。

哭泣的森林（顏聯武）

哭泣的森林系列，係［亞洲電視］喺1998年至1999年製作嘅一個野生動物紀錄節目。節目由顏聯武做旁述，講述一啲野生動物艱難生活嘅故事。

＊＊

尋找他鄉版：［鄉土情懷 Feel］

喺好耐以前，啲賊人認為，頭上有片瓦，腳下有塊土地喺唔夠嘅。所以佢地不惜離鄉別井，漂泊半生，走到遍遠嘅世界角落，去打劫銀行。攝製隊幾經辛苦，終於搵到阿金，佢憑住一支AK-47，去開拓佢嘅夢想。有賊嘅地方就有警察，而有警察嘅地方，就必然會駁火。喺打劫嘅過程，我哋固然見盡滄桑。而其實每一個賊嘅背後，都有一個〔盪氣迴腸〕嘅故事。喺聽晚，我哋再同大家尋找一個「流散失落」嘅賊人血淚史。

尋找他鄉的故事（鍾景輝）

尋找他鄉的故事系列，係［亞洲電視］喺1998年至2004年製作嘅一個資訊紀錄節目。節目由鍾景輝做旁述，講述喺世界各地海外華人嘅生活點滴。喺節目入面最多人熟悉嘅背景音樂係喜多郎作嘅《Dance Of Sarasvati》，而片頭嘅［尋找他鄉的故事］詞就係由［金庸］題嘅。

＊＊

原來［亞視］曾經都係有創意嘅！



亞洲電視 ATV，前身係［麗的電視］，1957年5月29號成立，係香港第一間電視台。因為收視幾乎舖舖都差過無綫，所以［亞視］亦都經常畀人叫做〔二奶台〕，而［無綫］就叫〔大婆台〕。

亞視喺2016年4月2日凌晨零時正式熄機，結束咗佢五十九年嘅廣播歷史，係喺［佳藝電視］之後，香港第二間停播嘅免費電視台。

＊＊

香港風情。廣東話資料館