2018年4月23日 星期一

廣州話.六字以上俗語.舉隅



廣州話.六字以上俗語.舉隅

廣州話俚語同俗語,係一種廣州人所熟悉、通俗流行嘅固定短語或者口頭禪,又叫做〔常言〕,〔俗話〕;呢啲係老百姓創造嘅,重喺民間口語之中流傳,具有口語性同通俗性嘅語言單位。

就因為係口語相傳,又冇書又冇信,有好多人都唔知原來嘅本字係點寫嘅,重加上各處鄉村各處講,所以喺坊間同喺網上都流傳咗好多唔同寫法,當中梗係會有好多係〔白字〕、〔別字〕同〔錯字〕喇。

下面嘅廣州話六字或以上嘅俗語,係喺網絡上搜集返嚟嘅,有興趣嘅,可以幫手修正同推廣下正確嘅寫法!

〔歡迎提供資料修正〕

〔六字俗語〕

十劃未有一撇(件事先至剛剛開始,毫無眉目,要做嘅事重有好多)

大雞唔食細米(大人物係做大事,唔做小事;或者大商家唔做啲生意仔)

山大斬埋有柴(形容每椿收穫唔多,但係積聚起來就好多)

手板眼見工夫(比喻工作範圍細,做法好簡單,一眼睇曬;
       功夫容易做,唔使有好高超嘅技術就可以做到)

有咁啱得咁蹺(太巧合,太意外,意想不到)

有得震冇得瞓(形容坐立不安,寢食難安,驚到震瞓唔著)

有爺生冇乸教(指人哋冇家教,即係有人生冇人教;有阿爸生但冇阿媽教)

有頭威冇尾陣(形容人做事虎頭蛇尾,有始冇終)

行得正企得正(指做人、行為光明正大)

使銅銀夾大聲(惡人先告狀;自己無知犯錯,重反過來鬧人唔啱)

呢頭遠嗰頭近(同咫尺天涯近義;係詛咒人嘅說話,嗰頭近,喺指將近死)

周身刀冇張利(比喻冇一技之長;樣樣都學啲,不過就冇樣精,樣樣半桶水)

指冬瓜畫葫蘆(依葫蘆畫瓢;比喻亂點一通)

番薯屎未屙淨(比喻嘲笑對方唔識新事物)

珍珠都冇咁真(真正是咁的;現代版有:堅過石堅呀)

相請不如偶遇(表示好客;有咁啱相遇就齊齊食一餐)

食碗底反碗面(忘恩負義,不仁不義,原本係:食碗面反碗面底;
       呢句嘢係吳楚帆喺一個電視節目度講出來,畀人廣為應用)

唔發火當病貓(形容人唔發嬲就當人冇到)

張天師遇鬼迷(指精於此道[捉鬼]嘅人,有時亦都會失手)

眼眉毛長過辮(比喻麻煩事多,憂慮多,又比喻無聊賴嘅等待;
       後句,做個食飯懒神仙;比喻人慣於安逸悠閒)

畫公仔畫出腸(形容人說話露骨;或者指揭示細節內幕)

買棺材唔知埞(人哋嘅行為將會引起好大危險,而本人就意識唔到)

搞出個大頭佛(指人闖禍;或者惹咗麻煩,有人寫:搞出個大頭鬼)

誓願當食生菜(比喻發誓容易,口是心非)

踩倒芋莢當蛇(芋莢,芋頭嘅葉柄;比喻大驚小怪、草木皆兵)

龍床唔似狗竇(再好再舒適嘅地方都比唔上自己嘅屋企)

擘大口得個窿(又叫O嘴,比喻啞口無言;或者無言以對)

講大話甩大牙(告誡啲細路仔唔好講大話,如果唔係就冇曬啲大牙)

爛泥扶唔上壁(底子差、質素差嘅人培養唔起,不堪提拔)

嘥心機捱眼瞓(嘥,浪費;指徒勞無功,白費心血)


〔七字俗語〕

一隻蜆殼一舊肉(一個蘿蔔一個坑;比喻一個人有一個位置,冇多餘嘅地方)

十個光頭九個富(形容光頭人具富相;或者剛好係第十個光頭嘅人唔好采)

上好沉香當爛柴(形容貴嘢當賤物,上句係:千金小姐當丫鬟,妹仔)

反轉豬肚就系屎(比喻人反面就唔講情義;冇義氣,冇情冇義)

天跌落嚟當被冚(天塌落來都頂得住;比喻做人樂觀,凡事向好嘅方面諗〕

手指拗入唔拗出(比喻對人對事都要處處為圍護著自己人;
        相反嘅就會畀人鬧句:手指拗出唔拗入)

出少句聲當幫忙(希望嗌交嘅人,其中一方唔好再出聲挑起矛盾)

打得更多夜又長(形容夜長夢多;走江湖賣武佬口白:夥記慢打鑼,打得鑼多鑼吵耳,
        打得更多夜又長,食得飯多肚又漲,飲得茶多夜尿長)

打完齋唔要和尚(鳥盡弓藏,兔死狗烹,過橋抽板)

打爛沙盆問到篤(一直問到底打;有人寫:爛沙盆璺到底)

好眉好貌生沙虱(形容人生得一副好容貌,但係本性就好壞;人品差)

有條大水喉射住(靠人扶持,要憑其他人嘅力經營致富)

有鬍鬚就系老竇(見貴見利就想攀奉嘅可恥心態)

老虎頭上釘虱乸(形容做啲好危險嘅事,或者去得罪啲唔可以得罪嘅人)

冷手執個熱煎堆(意外地撈一畢;或者係得到意外嘅機會)

含住金鎖匙出世(指二世祖,富二代,出世時已經註定佢會有好嘅將來)

畀個心肝當狗肺(不識好歹,辜負咗人哋一片好心)

姣婆撞見脂粉客(形容狼狽為奸;真係:冤豬頭都有盟鼻菩薩)

食得大頭沖菜多(嘲笑人嘅希望只係發白日夢)

唔食狗肉撈狗汁(雖然冇直接參與謀事,但做咗啲間接參與嘅事)

留返拜山先至講(唔想聽人囉囉嗦嗦講嘢,叫佢收聲)

偷雞唔到蝕揸米(比喻唔單只攞唔到便宜反而蝕低咗)

崩口人忌崩口碗(形容一啲有缺陷嘅人,通常會忌諱到類似嘅事)

眼眉毛都長成辮(形容時間好長,眼眉毛留長到都可以扎成辮)

屙屎唔出賴地硬(比喻失敗咗就只係強調客觀原因;有人寫:屙屎唔出賴地眼)

番薯屎未疴乾淨(諷刺鄉下人嘅土氣未除)

跌落地揦番揸沙(貪者到處都想撈一畢;或者失敗咗仲要嘴硬強辯)

電燈柱掛老鼠箱(形容一對情人一個好高一個好矮)

慳番啖氣暖下肚(指不屑;或者唔願同某啲人嗌交)

豬仔得食墟墟冚(形容啲小人得志,而得意忘形)

賣花姑娘插竹葉(為替人準備而自己冇得享受,又形容貧富差距;
        通常讚賞對方修為,只為他人著想,忘卻自我)

醫得頭嚟腳抽筋(病太多,醫得一種醫唔曬其它;比喻顧此失彼)


〔八字俗語〕

大隻擂擂跌落坑渠(形容人生得五大三粗,但係就非常愚鈍)

水浸眼眉都唔知死(形容有啲人死到臨頭都唔知道)

光棍佬遇著冇皮柴(想敲詐搵著數,但係就遇著個窮光蛋)

有碗話碗有碟話碟(說話直率,有嗰句講嗰句)

行路都踢親腳趾公(行衰運,衰到連行路都會受傷)

你做初一我做十五(以眼還眼,以牙還牙)

怕咗你先至怕米貴(畀人長時間糾纏,對佢表示無奈同煩厭)

是是但但豉油撈飯(面對選擇持隨便、悉從尊便嘅態度;求求其其炒碟鹵味)

雞春咁密都菢出仔(比喻冇絕對嘅秘密;就算嚴密到天衣無縫,始終都有敗露嘅時候;
         有人寫:雞膥咁密都菢出仔)


〔九字俗語〕

一時唔偷雞就做保長(經常做壞事嘅人,有一日唔做壞事就扮君子)

千揀萬揀揀個爛燈盞(挑三揀四,千挑百選,最後都係選中件唔好嘅;
          有人寫:千揀萬揀揀棵爛芥蘭)

著起龍袍都唔似太子(諷刺人唔理點樣包裝都唔似樣)



〔十字俗語〕

批個頭落嚟畀你當凳坐(堅信自己嘅判斷,打賭嘅說話)

食粥屙硬屎肚餓演胸行(虛張聲勢、死要面;比喻輸人唔輸陣,頂硬上〕

禾怕寒露風人怕老來窮〔比喻天有不測,人無不幸,事事作準備〕

擇日問地腳斟酒問提壺〔比喻唔清楚就問清楚,唔係估估嚇〕



〔十二字俗語〕

大食懶起身晏洗凍水噍冷飯(諷刺懶人;遲到懶做搵唔到食)

又姣又怕痛見人生仔又眼紅(形容妒婦;比喻見人成事又想成,但係又唔願付出代價)


〔十三字俗語〕

眼眉毛長過辮做個食飯懒神仙(比喻人慣於安逸悠閒;可能時間虛度,不過活得開心)


〔十四字俗語〕

講嚟講去三幅被度嚟度去二丈四(講來講去都係老話題,或者老套廢話)

**

編:黎詩詩.2016年12月23日

**



**

廣東風情。廣東話資料館

2018年4月22日 星期日

點樣至算係文明?


社會文明已經進展到就算踢儭隻貓都會畀萬人唾罵,有如過街老鼠,呢啲惡行會傳片網絡世界。但係呢班網絡上嘅文明人,佢哋一樣又會走去打獵,用槍殺死啲與世無爭嘅鹿,之後影相放上FB分享,重斬埋個鹿頭攞返屋企掛喺客廳度炫耀。

**

丹麥屬地法羅群島捕鯨節,一次過捕殺250條領航鯨!


法羅群島捕鯨活動,用海豚驅獵嘅形式,迫使長肢領航鯨[巨頭鯨]擱淺之後就將佢哋宰殺,同日本嘅捕鯨,加拿大嘅捕獵海豹活動齊名。


**

有啲文明人,佢哋一車車去到所謂嘅野生大自然,拍片分享啲動物之間嘅自然捕獵,例如獅子殺牛、鱷魚食馬、野豹捕鹿等,話係要記錄低一啲自然生態嘅歷史,要教育人類唔好去干預野生動物。但係佢哋就隨車帶住幾支獵鎗,話要以防萬一,自由自在咁入到草原荒野。



**

有啲文明人,要推動保護地球氣候,避免啲北極熊會餓死,佢咃又會拍攝同向各地播放一啲關於北極熊生活慘況嘅紀錄片。影片入面會重點介紹下啲北極熊同出生地需要嘅氣候環境,又會介紹佢哋點樣養育可愛嘅北極熊BB咁。當然重會介紹一下,北極熊係點樣獵殺啲大海豹同埋啲好得意嘅海豹BB啦。





加拿大商業捕殺大海豹同海豹BB!



**

有啲文明人,開口就指責一啲食魚翅嘅人殘忍,令到啲鯊魚頻臨絕種,重影響咗海洋環境同生態平衡,而走去捕捉鯊魚嘅漁民就係野蠻幫凶。但係呢班文明人又可以容忍啲數量比鯊魚少嘅鯨魚畀啲文明商人大量捕殺攞來食同攞來做製品[例如係:香水、魚肝油]。





日本政府用科學研究為理由,大型研究船捕殺鯨魚後包裝鯨肉,送去畀日本嘅本土人做試食,研究鯨肉嘅質量同味道對人體嘅官感反應!



**

有人認為,社會分化係有人故意將呢啲人同動物趕埋一齊。最少肯定嘅係,佢哋為咗要保護自己設定嘅環境,有啲為傳統、有啲係為自然、有啲係為理想有啲係為利益,唔理任何理由,只要有把獵鎗喺手以防萬一,佢哋就可以坐喺無頂嘅吉普車上面去拍 cheeta.........



**

鯊魚又係魚,吞拿魚都係魚。點解食魚趐會畀人鬧野蠻?點解食拖羅又會畀人話高尚?唔通真係怕咗啲鯊魚有牙?




**

2010 奥斯卡最佳紀錄片 - The Cove(日本漁民屠殺海豚)



**

蕭南仁。2018年4月

**

無聊通識科。廣東話資料館

廣州話.五字俗語.舉隅


廣州話.五字俗語.舉隅

廣州話俚語同俗語,係一種廣州人所熟悉、通俗流行嘅固定短語或者口頭禪,又叫做〔常言〕,〔俗話〕;呢啲係老百姓創造嘅,重喺民間口語之中流傳,具有口語性同通俗性嘅語言單位。

就因為係口語相傳,又冇書又冇信,有好多人都唔知原來嘅本字係點寫嘅,重加上各處鄉村各處講,所以喺坊間同喺網上都流傳咗好多唔同寫法,當中梗係會有好多係〔白字〕、〔別字〕同〔錯字〕喇。

下面嘅廣州話五字俗語,係喺網絡上搜集返嚟嘅,有興趣嘅,可以幫手修正同推廣下正確嘅寫法!

〔歡迎提供資料修正〕

一匹布咁長 (說來話長,唔係三言兩語就講得清楚)

一天都光曬 (雲開霧散,度過危機,大快人心)

人情緊過債 (欠人情比欠債重要緊張)

十問九唔應 (屢問屢不答,問極都唔應)

三九唔識七 (互不認識、互不相干、絕無關系;另有:三唔識七)

口水多過茶 (比喻說話太多、太長;同口若懸河咁上下)

口爽荷包𥹉 (講就大方豪爽,實際銀紙欠奉)

大石砸死蟹 (小人物、好低級、冇地位、冇權勢;
       畀啲大人物、上級利用地位、權勢強制或壓迫)

大話怕計數 (講大話、報大數,就怕人揭穿、算帳)

小數怕長計 (數目雖然細,但日積月累都好可觀)

女大十八變 (形容啲女仔成長多變)

心靜自然涼 (心態平靜自然會感到涼快)

水蛇春咁長 (形容文章、講話、戲劇等過長而令人生厭)

牙齒當金使 (說話要算數,講誠信)

牛死送牛喪 (比喻一拍兩散 ,一齊攬住死)

冇雷公咁遠 (好遠嘅地方;就算雷公都未必去到咁遠)

仔大仔世界 (兒孫自有兒孫福,比喻仔女大咗有自己嘅天地)

生人唔生膽 (拍人冇膽量,膽小怕事)

生骨大頭菜 (種壞曬,比喻寵壞咗嘅細路仔)

禾稈冚珍珠 (比喻扮窮;或者有錢冇人知)

各花入各眼 (蘿蔔青菜,各有所愛,情人眼裡出西施)

好心著雷劈 (唔領情,好心反畀人當惡意)

有風駛盡艃 (比喻喺得勢嘅時候仗勢淩人,或者比喻得理不饒人)

有麝自然香 (好嘢自然有人識欣賞 ,唔使周圍揚)

死牛一便頸 (指性格剛強,唔肯改變,死硬派)

死雞撐飯蓋 (形容人唔知錯;或者明知錯咗仍然死頂、硬撐)

百足咁多爪 (百足即蜈蚣,比喻好多門路)

老人成嫩仔 (返老還童,越大越年輕)

老大成细蚊 (返老還童,隔面話人老懵咗)

呃鬼食豆腐 (比喻騙人、呃人,咪呃人喇)

扮豬食老虎 (表面裝傻,其實野心勃勃)

事急馬行田 (形容喺危急形勢之下,採用非常規嘅應對辦法)

周身唔聚財 (成身唔舒服、唔自在;精神恍惚,六神無主)

抵冷貪瀟湘 (為圖展現好身材而挨凍)

狗瘦主人羞 (形容一個人自己食好著好;
       但家人就食唔飽著唔暖,呢啲都會令自己蒙羞)

返鄉下耕田 (對蠢笨、成日做錯嘢,又教極唔改嘅人嘅諷語;生意失敗嘅自嘲)

返歸執豬屎 (返鄉下耕田同義)

後䪴生得薄 (後枕,後腦枕,後尾枕;比喻冇福氣)

相嗌唔好口 (嗌文梗係唔好口架啦,勸人唔好嗌交嘅說話)

相打唔好手 (勸人唔好打交嘅說話)

苦瓜噉嘅面 (形容愁眉苦臉;好似苦瓜咁)

食人隻車咩 (想要人哋條命咩,比喻貪得無厭)

食人唔舌累骨(非常兇殘,連骨都食埋)

唔系人噉品 (唔系人,冇人性;好惡好野蠻)

唔使問阿貴 (唔使講;如假包換)

粉絲當魚翅 (以假亂真,用劣貨充好貨)

臭罌出臭草 (比喻冇家教;同出一轍)

馬死落地行 (順應環境、形勢,隨遇而安)

執人口水尾 (拾人牙慧,講人哋講過嘅話)

魚翅當粉絲 (比喻唔識貨,唔識寶)

喉嚨伸只手 (比喻非常飢餓;好喉擒)

貼錢買難受 (形容花錢;或者花精力買罪受)

賣仔莫摸頭 (摸頭眼淚流,比喻唔捨得)

跑馬射蚊鬚 (指好難成功嘅事;現代版有:踩單車射烏蠅何B仔)

落手打三更 (形容一開始、一動手就遇到困難或犯錯)

趕狗入窮巷 (比喻做人做事太過分,唔留餘地)

臨天光瀨尿 (差唔多要嬴或者成功,但係臨尾因為唔小心衰咗;比喻衰收尾)

臨屎急開坑 (事到臨頭先至想辦法應付,手足無措)

臨急抱佛腳 (事前毫無準備,臨急先至想應對)

孻仔孻心肝 (最細嘅仔就係心肝寶貝;有人寫:孻仔拉心肝)

孻女孻五臟 (最細嘅女亦都係心肝寶貝,佢有事就令父母坐食難安)

離天隔丈遠 (比喻山長水遠,千里迢迢)

羅漢請觀音 (形容多人集資請一個人飲宴或者食飯)

蟻多摟死象 (比喻人多力量大或者細小嘅力量集合亦可以打敗強敵)

咸豐年咁耐 (比喻年代久遠;咸豐年前嘅事,唔好提喇;
       咸豐年代令廣東多災多難,咁傷心嘅事,唔好提喇)

逳不得其正 (形容動彈不得,想逳都逳唔到)

揦手唔成勢 (形容措手不及、手忙腳亂)

攞景定贈慶 (指人喺某啲場合嘅所作所為令人難堪)

**

編:黎詩詩.2016年12月4日

**

老闆話:[我要打十個!]



老闆,又稱做當家、東主、頭家、老大,廣東話叫做老世/腦細、事頭、波士、米飯班主、衣食父母等等。叫得做[老闆],當然係有權指派工作、審查下屬嘅工作表現同成績評核啦,而呢啲嘢都關係到人工[薪水]嘅增減或者職位嘅升遷同調動嘅。而喺人事同工作安排上,老闆同伙記係構成一個工作團隊嘅組合。

**

廣州話俗語。廣東話資料館

香港[那些年]1980年代以後



香港係全球重要嘅國際金融、服務業同航運中心,連續幾年蟬聯全球最自由經濟體,重有以優良治安、廉潔社會、簡單稅制同埋健全嘅法律制度而聞名於世,因為咁有[東方之珠]嘅美譽。而[亞洲國際都會]就係官方定位推廣嘅香港品牌。香港現時亦係全球其中一個最安全、經濟最發達、生活水平最高、競爭力最高、最適宜居住同人均壽命最長嘅大都會。不過喺千禧之後,空氣污染、生態環保、貧富懸殊、政制發展等就成為媒體針對嘅主要社會問題。

**

1980年代
香港嘅80年代,係歷史上一個重要嘅時代,喺呢10年之間,中、英兩國為香港嘅前途做出決定,兩國簽訂《中英聯合聲明》,香港嘅主權將會喺[1997年7月1日]由英國移交至中國。喺經濟上香港屬於全面起飛,成為亞洲其中一個最發達城市,喺亞洲地區仍然同南韓、台灣、新加坡,合稱[亞洲四小龍]。



[1980年代,無牌小販賣上湯魚肉]

**

1990年代
香港嘅90年代,社會發展同改變,由1984年《中英聯合聲明》嘅簽訂,香港嘅主權由大不列顛及北愛爾蘭聯合王國(英國)轉移到中華人民共和國(中國)。1997年6月30日夜晚,香港主權移交到中國嘅儀式開始,為長達155年嘅香港殖民地歷史畫上句號。香港喺7月1日零時零分成為咗中國嘅第一個特別行政區。喺90年代後期,[亞洲金融風暴]喺亞洲各地爆發,香港經濟由高峰跌至谷底。主權移交後嘅首任行政長官董建華受到評擊,社會普遍對新特區政府表示不滿,社會畀香港嘅媒體引帶着怨聲載道嘅情緒度過90年代。



[1997年,香港主權移交]


**

2000年代
香港嘅千禧年代,喺香港特區政府管治下嘅第一個十年。香港人對主權移交悲觀嘅心態,隨着回歸之後嘅[一國兩制、高度自治]實行而逐步改觀,好多已經移民他國嘅香港人真正咁回歸。隨着1997年爆發嘅[亞洲金融風暴]延續達6年,經濟不景、失業率高企、政府施政失效,媒體怨態不斷攀升,加上2003年初爆發大型奪命瘟疫[沙士],原本低迷嘅經濟更係雪上加霜,各行各業大受打擊,失業率升至高位,遂觸發出回歸紀念日50萬人上街遊行。不過同年年中開始,中央政府開放內地遊客到香港[自由行]同推動[更緊密經貿關係]政策等,令香港經濟得到迅速復原。2005年行政長官董建華以[腳患]為由辭職,由前港英政府時期嘅高官曾蔭權繼任。2008年受到由美國次按危機觸發嘅[金融海嘯]席捲全球,香港亦不能倖免,原本復甦咗5年嘅香港經濟再受重創,裁員、結業此起彼落,香港人對前景又再感到徬徨。



[2003年,香港七一大遊行]

**

2010年代
香港嘅千禧十年之後,香港特區政府開始嘅第二個十年。雖然香港經濟走出[金融海嘯]之後有增長,但係香港人同時面對社會貧富懸殊加劇、年輕一代上流困難、持續通漲、樓價高企、政制爭議、中港紛爭等嚴峻社會問題;另外,隨着年青人對政治參與意識日漸提高,亦受媒體[吹捧]促使唔少嘅大型社會運動同動亂產生,例如:2010年反高鐵事件、2012年反對國民教育科運動、2013年葵青貨櫃碼頭工潮、2014年雨傘革命[佔領中環]、2016年旺角騷亂。



[2016年,旺角魚蛋騷亂]

**

救世者[泰迪羅賓]



其實正邪 好似日同夜 
難望兩立 總有一邊要扯 
晚黑一過 天光總會好啲
可惜天光後 好快入夜

*含怒再問 真理點樣寫
其實法律 好似一把雨遮
你肯擔起 忠奸都敢遮
幾多冤枉事 點去推卸

咪當你系救世者 啲新聞鮮血寫
你當你系救節者 點解監倉滿瀉

邊個定正邪 短嘆輕嗟 
系天真抑夢幻 分正定邪

作詞:鄭國江 

**

香港記憶[清潔效野1990]廣告



**

廣東話資料館

2018年4月21日 星期六

香港[那些年]1930s - 1970s



由清廷戰敗後,將香港土地割讓畀英國起,英國人就開始發展香港。喺英國嘅統治之下,香港從一個荒蕪、地瘠山多、天然資源又缺乏嘅漁村仔,逐漸發展成為一個轉口港,亦成為歐洲各國商船向大陸進口鴉片同出口其他商品貿易嘅樞紐,而且重唔受清朝末年嘅亂局影響。香港除咗秉承以往嘅轉口貿易之外,香港工業亦開始發展,喺第一次世界大戰之後,歐洲工業生產受到影響,使香港曾多咗唔少嘅工廠,而喺九龍一帶為多。

**

1930年代
香港嘅30年代,係一個緊張嘅時代。
隨着日本[九一八事變]之後,日本軍隊佔領咗東北三省,香港就開始要面對日本嘅威脅,使英軍都要考慮加強對香港嘅防衛。而當時亦係全球經濟大蕭條同銀本位貨幣制度受到衝擊,都對香港經濟構成一定嘅影響。

1931年8月1日,香港經歷咗5個鐘頭嘅[十號颶風信號],造成16死4傷,沉船百幾艘,包括渣甸船廣生號。

1932年,香港裸體運動協會註冊成立,主要係戶外集體全裸嘅球類活動、日光浴同游水等,會長係拉脫維亞人林伯[H. E. Lanepart],成立初期,活動主要喺大圍香粉寮進行,每星期一次。

1933年,英國政府實施專利權制度,作為殖民地嘅香港就一定要跟隨。

1933年6月11日,香港政府批出為期15年嘅巴士專營權,九巴[九龍巴士]就有九龍同新界巴士嘅專利權,而中巴[中華汽車]就有香港島嘅專利權,其他公司就不獲保留,全部要執。

1935年,香港推行一項禁娼政策,分兩個階段嚟禁止啲雞[妓女]做生意[營業]。

1937年,大陸嘅[抗日戰爭]正式爆發,除咗令大量難民湧入香港之外,亦代表日軍嘅威脅更接近一步。之後日軍喺大亞灣登陸,重好快速咁攻佔咗廣州同附近地區,之後再南下至深圳河北岸,再越過英軍地界。

1937年,港元正式成為香港法定貨幣,又叫[港幣]。

1938年,日軍登陸廣東,重好快咁佔領埋廣州同附近嘅地方。之後,香港同各地嘅唐人都發起支持抗戰運動,出錢又出力。

1939年12月3日,旺角發生香港21年來最慘烈嘅火災,焚燬上海街478、480同482號3幢大樓,造成53死26傷。



[1939年,宋慶齡於香港與送交香港之救護車留影]

**

1940年代
香港嘅40年代,係一個動盪嘅時代。

1941年,日本偷襲珍珠港之後,同盟國向日本宣戰,香港就捲入太平洋戰爭裡面。香港保衛戰開始,英軍同華藉英兵,來香港支援嘅加拿大軍隊,不列顛印度軍隊,同日軍發生多場激戰。雖然話係激戰,其實只係畀日軍扲住打。

1941年12月25日,由於駐港軍隊太少同戰略失利,令香港好快畀日軍攻陷。當時嘅香港總督楊慕琦喺駐港英聯邦軍隊奮戰十幾日之後,最終宣佈向日軍投降。香港人就稱呢一日為[黑色聖誕節 Black Christmas]。而[三年零八個月]嘅香港日佔時期[佔領香港]正式開始。

1942年,[香港占領地政府]正式成立,由日軍磯谷廉介中將出任香港總督,結束軍政府時期。政府總部就設喺中環滙豐總行大廈,而半島酒店就改為日軍軍方總部。香港占領地總督部成為當時香港最高嘅行政機關,亦係日本戰時內閣嘅直轄機構之一。

1945年,日本投降,英國宣佈恢復行使香港主權。當時國共內戰再次展開,國民政府無暇向英國政府取回香港。

1946年,國民政府一度喺聯合國大會要求收回香港,但係礙於國共內戰已經開始,國民政府又未得到美國嘅支持,無力向英國政府取回香港。

1949年,中華人民共和國成立,國共雙方就香港問題達成非正式協議:北京無意取回香港主權,亦唔干預民國政府公民同軍人喺香港活動,用來換取英國政府承認中華人民共和國嘅地位。



[1942年,[香港占領地政府]正式成立。]

**

1950年代
香港嘅50年代,喺二次大戰勝利同國共內戰嘅背景之下展開。

1950年,國民政府退守台灣,數以萬計嘅人為咗逃避共產黨政府而由大陸走難來到香港。

1951年,香港人口由1947年嘅175至180萬,增加至201萬。逃港潮嘅新移民,為香港提供咗一批廉價嘅勞動力,更重要嘅係同時都將技術同資金帶來香港。

1952年,九龍東頭村大火,引致15,000人無家可歸。

1953年,喺韓戰期間,聯合國宣佈向大陸實行禁運,本來只係做轉口業嘅香港搖身一變成為生產製造業中心。

1953年,聖誕夜九龍深水埗區石硤尾發生寮屋區大火,接近6萬災民無家可歸。港督葛量洪制定緊急房屋計劃。香港政府會喺火災原址附近,儘快起徙置大廈來安置啲災民。

1954年,因為共產黨推行[公私合營]政策,跟住又將合營公司實行[完全國有化]政策,唔少公司都將辦事處由大陸各大城市搬到香港。呢啲都為香港經濟迅速發展創造有利嘅條件。

1955年,政府喺李鄭屋村起徙置大廈嘅時候,無意中發現咗一個東漢時期嘅墓穴,呢個就係李鄭屋漢墓,又叫[李鄭屋邨古墓]。

1956年10月10日至12日,喺九龍同荃灣等地發生由香港親中華民國人士,同三合會人士為支持民國政府,而對抗港英政府嘅[雙十暴動]。由最初嘅工人運動同示威,演變成後來嘅打砸搶燒等暴力襲擊行動。

1957年,北角邨入伙,係香港公共房屋設計上作出好多突破,包括每戶都有獨立嘅廚房同廁所,大廈重設有升降機。

1957年5月29日,香港[麗的映聲]啟播,成為香港至全球華人地區嘅第一間電視台。

1958年,中環天星碼頭搬往愛丁堡廣場碼頭,成為當時中環嘅著名地標之一。

1959年8月26日,商業電台成立,係香港第一間商業廣播電台。



[1950年代,香港徙置區天臺學校]


**

1960年代
香港嘅60年代,係跟隨過去十年嘅步伐,繼續發展同擴張轉口貿易同生產製造業。強勁嘅經濟增長令香港成為[亞洲四小龍]之一,同新加坡、南韓、台灣等國家地區齊名。

1962年3月2日,位於香港中環嘅[香港大會堂]由當時嘅香港市政局正式啟用,成為香港第一座公共文娛中心。

1962年,颱風[溫黛]吹襲香港,導致130人死,72,000人無家可歸,創咗香港最低氣壓、最高每小時平均同最高陣風嘅風速紀錄,係吹襲香港最具災難性嘅颱風之一。

1963年,葵涌同荃灣嘅衛星城市發展完成之後,開始向西邊嘅屯門同北邊嘅沙田發展。隨著香港經濟嘅急速發展,加上政府亦積極發展基礎建設同公共房屋,香港居民嘅生活質素普遍有咗改善。

1963年10月17日,香港中文大學成立,係香港第一間用中文做教學語言嘅大學,獲得政府承認,香港法例《香港中文大學條例》亦表示中大嘅[主要授課語言為中文]。

1963年同1967年,因為香港出現嚴重旱災,又加上食水供應人口急劇增長,香港需要實施限制供水政策,每四日只有四個鐘頭供應食水,每次供水市民都要排隊攞水,自已儲存四日份量嘅食水。

1964年,港英玫府要求中國大陸出售食水,雙方正式簽訂協議。由1965年3月開始,港英玫府為增加食水來源而進行東深供水工程。

1964年,香港革新會建議將中文設為法定語言,當時市政局議員貝納祺為呢件事提出動議。而喺1967年9月尾,新界鄉議局亦向政府提出相似建議。呢兩件事件畀人視為係中文運動嘅先聲。

1965年,洋紫荊正式被定為香港市花。

1966年,因為天星小輪加價事件,香港爆發[六六暴動]。同時又受到大陸嘅唔穩定因素影響,香港社會又累積咗唔少嘅民怨,導致喺66同67年出現有兩場騷動。

1967年,喺[六六暴動]平息之後唔夠一年,香港又發生另一場更嚴重嘅[六七暴動]。當時香港嘅左翼共產份子,為響應共產黨發起嘅[文化大革命],佢哋左手執毛語錄,一邊示威一邊高叫口號,抗議英國殖民地政府嘅管治。但喺騷動過後,香港人[大多數為商界名人]亦開始積極研究點樣改善香港華人嘅民生問題,為未來十年嘅民生政策改革向英國政府提出意見。

1967年11月14日,連接九龍塘同沙田區嘅[獅子山隧道]正式啟用,成為香港最早通車嘅行車隧道。

1967年11月19日,香港[無線電視]正式啟播,成為第一間提供免費電視廣播嘅公司,使電視喺香港逐漸普及化,重對當時另一個收費電視廣播[麗的映聲]開始構成威脅。

1968年,香港爆發流行性感冒,呢個病隨後傳到美國。

1969年,橫跨維多利亞港連接香港島灣仔同九龍紅磡嘅[香港海底隧道]落實興建,喺同年9月1日正式開始動工。

1969年,香港正式訂立婚姻[一夫一妻]制。



[1960年代,香港山寨廠]

**

1970年代
香港嘅70年代,係香港貪污最猖獗嘅時代。
警察喺偵查罪案之前,或者消防員喺救人救火之前,佢哋經常都會係先[攞茶錢]後[做嘢],好公然咁拷詐市民嘅金錢。而唔少探長重係同黑社會合作發大財嘅㖭。佢哋嘅大名到依家都重喺啲老一輩人嘅記憶入面;而佢哋嘅故事亦成為潮流電影嘅題材。當年有唔少英籍警察[鬼頭],亦牽涉喺呢啲貪污交易入面。

1971年,麥理浩出任香港總督。

1971年,香港政府推出小一至小六嘅[六年免費教育],再喺1978年擴展至中學三年級嘅初中教育,喺十年之間做到9年免費同強逼嘅義務教育。

1971年8月中,颱風[露絲]由南向北橫過大嶼山中部重掠過屯門龍鼓灘,為香港帶來嚴重嘅破壞,天文台亦喺8月16日至17日需要發出[十號風球],掛咗接近6個鍾頭。露絲吹襲香港期間,重導致110死286傷,5,664人無家可歸。

1972年,鍾士元成為第一個喺立法局會議使用[中文]嘅議員。

1972年6月18日,連場大雨,導致秀茂坪同港島半山區發生嚴重山泥傾瀉同泥石流事故。其中旭龢道嘅山泥傾瀉,塌下嘅山泥重將一幢12層高嘅住宅大廈推至倒塌。兩宗事故同連日暴雨合共釀成156死117傷,超過5,000人無家可歸。

1972年8月2日,香港[海底隧道]通車。

1973年,恆生指數大幅暴瀉,最高跌幅達九成。

1974年2月14日,港督麥理浩爵士了解到香港警隊嘅貪污問題嚴重,就成立咗個 ICAC[總督特派廉政專員公署]。對大批警務人員進行調查同拘捕,令成個警隊大地震同好嬲,佢哋抗議廉署嘅行動,重曾經試過喺一次抗議示威入面衝擊廉署總部。港督恐防警隊會因為咁而發動罷工甚至係暴亂,最後發出咗[特赦令],喺限期之前犯過貪污罪嘅警察唔會被拉[拘捕],而較高級嘅探長就唔喺特赦之列。呢批因為貪污發大財出名嘅華探長就潛逃到同香港冇引渡協議嘅台灣。

1974年,中文成為香港嘅法定語言,香港政府立法通過[中文]同[英文]享有同等法律地位。

1975年,恆生指數又大幅暴瀉,最高跌幅達90%。

1975年5月4日,第一批越南船民隨貨輪[長春號]來到香港。

1976年,香港實施[居者有其屋]計劃。

1977年,香港[海洋公園]開幕。

1978年,香港實施[九年免費教育]。

1978年,司徒華擔任中文運動聯合委員會主席,發起第二次中文運動,爭取中學用中文教學。

1978年,王霖成為香港第一位可以喺立法局使用[粵語]嘅非官守議員。

1978年10月7日,[沙田馬場]落成啟用。

1979年8月2日,颱風[荷貝]由東向西橫過新界,喺嗰日下晝層經懸掛十號風球接近4個鐘頭,造成12死260傷。

1979年10月1日,香港地下鐵路 MTR[地鐵]通車。



[1970年代,香港嘅超級巨星。]

**

香港記憶[清潔海灘1970s]廣告



**

廣東話資料館

粵曲。客途秋恨[胭脂扣片段]張國榮。梅艷芳



《客途秋恨》係廣東南海人葉瑞伯喺清代道光年間寫成嘅南音曲,描述文人繆艮[字兼山,號蓮仙子]同妓女麥秋娟嘅愛情故事。1920年代由編劇家黃少拔改編成粵劇《客途秋恨》。白駒榮係詮釋呢首歌嘅代表人物,新馬仔、張國榮亦曾演唱過呢首曲。

**

涼風有信,秋月無邊;

虧我思嬌情緒,好比度日如年。

小生繆瑾乃係蓮仙字;

為憶個多情妓女,嗰位麥氏秋娟。

唉見佢聲色與共性情,堪我贊羨;

佢重更兼才貌兩雙全。

今日天隔一方與佢難見面;

是以孤舟愁寂,對住晚景涼天。

睇下夕陽對住重有對雙飛燕;

虧我斜倚在篷窗我重思悄然。

我耳畔又聽得秋聲桐葉落;

又只見平橋衰柳,鎖住寒煙。

唉我呢種情緒悲秋同宋玉;

況且在客途抱恨,你話對乜誰言。

正系舊約、舊約難渝潮有信;

新愁深似海闊無邊。

唉第一觸景更添情懊惱;

虧我懷人愁對,呢個[愁對]月華圓。



又記得青樓邂逅,嗰一晚中秋夜;

我共佢並肩攜手,重拜月嬋娟。

唉我亦記不盡、記不盡許多情與義;

總系纏綿相愛,又復相憐。

姐呀共你肝膽、肝膽情投,將有兩個月啦嘛;

又嚸想同群催趲叫我整歸鞭。

唉嗰陣幾回眷戀,共你難分舍;

都只為緣慳嗰兩個字,共你拆散段離鸞。

唉嗰陣淚灑西風紅豆樹;

情牽古道白榆天。

嬌呀你杯酒、杯酒臨歧,你話同我餞別;

在嗰處望江樓上,重設離筵。

你重牽衣至囑,講及嗰段衷情話;

叫我要存終始,叫我兩心堅。

唉今日言猶在耳,嚸想成虛負囉;

屈指如今又隔年。

~選段

**

粵曲。客途秋恨[南音] 張國榮



涼風有信,秋月無邊,思嬌情緒好比度日如年。

小生繆姓蓮仙字,為憶多情妓女麥氏秋娟。

見佢聲色性情人讚羨,更兼才貌的確兩相全。

今日天隔一方難見面,似孤舟沉寂晚景涼天。

你睇斜陽照住個對雙飛燕,獨倚蓬窗思悄然。

耳畔聽得秋聲桐葉落,又只見平橋衰柳鎖寒煙。

第一觸景更添情懊惱,虧我懷人愁對月華圓。

**

廣東風情。廣東話資料館

2018年4月20日 星期五

歷代官方[通語]語音變化,您聽得到幾多朝代呢?



歷代[通語]語音變化,您聽得到幾多朝代呢?

[讀音片段只係提供參考用]

官話通語,最早係對官方標準話嘅稱呼,現代嘅官話又畀官方定為係漢語族群嘅一種語言。官話係以前做官嘅人所使用嘅一種[共同語],可以方便入朝做官嘅人能夠互相溝通,上朝奏疏等。後來亦流行喺民間,演變成一種各地嘅共同用語。官話嘅[共同語]唔係指某一地嘅語言,而係音調有唔同嘅官方語言。

周代嘅官方標準語稱為[雅言],秦漢時代亦沿用[雅言]。漢晉年代標準語就稱做[通語],唐宋時期亦沿用[通語]稱呼。元代嘅官方標準語稱為[天下通語],為域內各個民族嘅[共同語]。明代官方標準語稱為[南京官話],清朝時期稱為[北京官話]。1909年大清政府定稱為[國語],民國政府沿用[國語]稱呼。1956年大陸政府改稱[普通話]。而[官話]一詞,就喺新中國政府定義由[官方語言]演變為[官話方言]嘅含義。

〔歡迎提供資料修正〕

上古時期:

。夏 朝 []
 上古時代,五帝時期同後來嘅夏朝時期,中原黃河流域係華夏先民嘅主要活動地帶。

。商 朝 []
 商代同以前嘅語言具體形式已經無可考證,據傳當時嘅標準語係周代標準語嘅前身。

。周 朝 [雅言]  《詩經》
 周代嘅標準語言,一般認為就係《詩經》用嘅語言,稱為[雅言]。
 《論語。述而第七》:[子所雅言,《詩》、《書》、執禮,皆雅言也。]

。春秋時代[雅言]  《周易》
 周天子嘅諸侯政治權威動搖衰落,造成學在官府嘅局面被打破,創開私學之風氣。

。戰國時期[雅言]  《楚辭》
 出現咗諸子百家嘅情況,係當時思想、學術發展嘅黃金時期,史稱[百家爭鳴]。

。掃六合 [雅言]
 古風[秦皇掃六合]
 秦皇掃六合,虎視何雄哉。飛劒決浮雲,諸侯盡西來。
 明斷自天啓,大略駕羣才。收兵鑄金人,函谷正東開。
 銘功會稽嶺,騁望瑯琊臺。刑徒七十萬,起土驪山隈。
 尚採不死藥,茫然使心哀。連弩射海魚,長鯨正崔嵬。
 額鼻象五嶽,揚波噴雲雷。鬐鬣蔽青天,何由覩蓬萊。
 徐巿載秦女,樓船幾時迴。但見三泉下,金棺葬寒灰。

。秦 朝 [雅言]
 秦代嘅官方標準語已無可查考,一般認為秦朝嘅標準語係沿用周朝時代嘅[雅言]。
 秦朝文字係採用[小篆]與[隸書],從小篆到隸書嘅演變過程就稱為[隸變]。
 隸書主要將篆書圓轉筆劃改為方折,書寫速度更快,後來漢朝採用,而成漢隸。

。楚漢戰爭[雅言]
 秦朝滅亡後,項羽同劉邦之間為爭奪統治權力嘅戰爭,一直到項羽於烏江邊自刎結束。
 楚漢戰爭結束秦末民變之後嘅短暫分裂局面,係繼秦滅六國之後又一次統一嘅戰爭。

。西 漢 [雅言]
 漢朝嘅標準語承襲先秦時代嘅雅言讀音,稱為[正音]、[雅言],又稱[通語]。
 漢初朝廷所崇信嘅學術,除黃老之外,就係申韓法學學說,對於儒家思想並唔重視。

。東 漢 [通語]
 東漢帝王親自倡導儒家經典研讀,太學同郡國官學都得到發展,東漢私學亦繁盛一時。
 漢代童蒙教育進步,學習成績優異嘅會得到[聖童]、[奇童]、[神童]嘅稱號。
 東漢時期,報仇嘅風氣極為盛行,只要有人侮辱父母或者師長嘅就可以[殺無赦]。

。三國時期[通語]  《聲類》
 《聲類》係歷史上最早嘅樂書,由三國時期魏國人李登所著,書已佚失。

中古時期:

。西 晉 [通語]  《韻集》
 西晉承襲漢代,以[洛語]為標準通語。
 《韻集》係喺《聲類》之後嘅早期古代韻書,由西晉時期呂靜所著,書已佚失。
 《魏書。江式傳》:[晉呂靜仿品登之法作《韻集》五卷,宮商角徵羽各為一篇。]

。東 晉 [吳音通語]
 東晉遷都建康(南京),由洛語同吳語結合形成[金陵雅音],又稱[吳音]。
 之後為南朝時期沿襲嘅官方標準語。

。南北朝 [吳音通語]《木蘭詩》《孔雀東南飛》
 南北朝時期嘅標準語稱呼好多,唔同朝有唔同叫法,有[雅音]、[漢音]等。
 南朝就沿襲由東晉時期由洛語同吳語結合形成嘅[金陵雅音]。
 敘事長詩方面以北朝嘅《木蘭詩》同南朝嘅《孔雀東南飛》為當時嘅代表。
 民歌方面,由於南北文化唔同,呈現出唔同嘅色彩同埋情調。

。隋 朝 [通語]  《切韻》
 隋朝統一,陸法言編《切韻》五卷,用[金陵雅音]同[洛陽雅音]為基礎正音。
 由雅音演變出來嘅基礎正音,再同南北朝時期嘅官音融合形成咗長安官音[秦音]。
 《切韻》一般指敦煌出土嘅唐人傳抄《切韻》同故宮博物院館藏《刊謬補缺切韻》。

。初 唐 [通語]
 唐承隋制,隋唐嘅標準通語稱為[漢音]或[秦音]。
 隋唐都長安,以洛陽為東都,中原同關中漢音喺各民族交融之後有所演變。

。盛 唐 [通語]  《唐韻》
 《唐韻》係由唐人孫愐著嘅音韻書,係《切韻》嘅一個增修本,原書已佚失。

。中 唐 [通語]
 唐朝文學成就以詩歌最為發達,唐代係[「胡風]盛行的時代。
 所謂[胡風],係指流行於唐朝社會各階層嘅種種並非漢族原有嘅社會風習。

。晚 唐 [通語]
 唐朝後期因為安史之亂、藩鎮割據與黃巢之亂嘅戰亂因素,使得北方人口流移南方。

。五代十國[通語]
 五代時期交迭頻繁,北方戰火始終未能平熄,北方經濟比較落後,人口持續大減。
 南方十國擺脫北方經濟負擔,重視生產,發展出多個城市為中心嘅文化同經濟區域。

近古時期:

。北宋遼朝[正音通語]《廣韻》
 宋代嘅標準通語稱為[正音]、[正語]、[雅音]。
 《廣韻》全名係《大宋重修廣韻》,宋真宗大中祥符元年陳彭年等人奉詔修訂。
 《廣韻》係根據更早期嘅《切韻》、《唐韻》等韻書修訂成嘅一部韻書。

。南宋金朝[通語]  《五音集韻》
 宋代音系指宋朝時期流行喺中原(開封、洛陽)嘅漢語音系,可能係當時嘅基礎。
 宋室南渡之後,陪都臨安(杭州)可能亦係通行類似嘅語音。
 《五音集韻》係金朝韓道昭所作嘅一部韻書。韓道昭字伯暉,真定松水人。

。宋元戰爭[通語]  《古今韻會》
 《古今韻會》係黃公紹編著嘅一部好注重訓詁嘅書。
 《古今韻會舉要》熊忠參照劉淵嘅《壬子新刊禮部韻略》而編成。

。元 朝 [天下通語]《蒙古字韻》《中原音韻》
 元代法定嘅標準通語,係以元大都[北京]漢語語音為標準音,稱為[天下通語]。
 《蒙古字韻》又稱《八思巴字韻》,係元代蒙古字(八思巴字母)為漢語編寫嘅韻書。
 《中原音韻》係元代周德清所作嘅一本韻書,反映咗當時嘅實際語音。

近代時期:

。明 初 [中原之音]《洪武正韻》
 明滅元初、定都南京之後,用南京音為基礎音系,當時南京官話成為明朝標準通語。
 《洪武正韻》係明太祖洪武八年樂韶鳳、宋濂等十一人奉詔編成嘅一部官方韻書。

。明中期 [南京官話]
 永樂年間遷都北京,南京音成為當時北京語音基礎,而南京官話就通行於整個明朝。

。明清戰爭[南京官話]
 明清戰亂時期嘅官話仍然係南京官話,民間亦係好通用嘅語方言。

。清 初 [南京官話]
 清代早期,南京官話仍然係標準語,雍正時期清政府設立正音館,推廣北京音官話。

。清中期 [北京官話]《佩文韻府》
 清代中葉以後,北方官話先至逐漸取代江淮語系嘅南京官話,成為官方標準通語。
 《御定佩文韻府》係康熙命張玉書、陳廷敬、查士昇等二十幾人編纂嘅一本韻母詞典。

。清 未 [北京官話]
 1909年清政府設立咗[國語編審委員會],將當時通用嘅官話正式命名為[國語]。

現代時期:

。民 國 [國語]  《中華新韻》
 1912年以後,中華民國建立法定國語體系,主要由北京官話同南京官話混合創造。
 最初擬[以北京話為主,兼顧南北差異],即係民國初年嘅國語(老國音)。
 1918年公佈第一套國音[注音字母],以[折中南北牽合古今]為原則包括保持入聲。
 發生[京國之爭]之後,最終決定國語僅以北京話為基礎,即係現用嘅(新國音)。
 《中華新韻》係依照現代標準漢語音韻結構整理嘅韻母分類書,可用於詩詞創作。

。共和國 [國語/普通話]
 1949年中華人民共和國成立以後,繼續沿用民國大陸時期[國語]嘅稱法。
 1955年將國語改稱為[普通話],之後嘅幾年官方文字用[簡體字]代替[正體字]。

現代漢語之內嘅各種語言同方言語音,同埋日語、韓語、越南語嘅漢字讀音都係源自呢啲中古標準音。按照對中古標準音入聲字嘅繼承方式唔同進行分類,係漢語分類嘅方法之一。

**



歷史如果由古代第一次成體系甲骨文或陶文嘅文字出現嘅[商朝]中期計起來約有3,300年;由考古學上第一個王朝[二里頭文化]計起約有3,700年;由[西周]文獻中傳說中嘅[夏朝]計起就有4,100年;由孔子所講嘅、有著[三皇五帝]嘅傳說時代計起來就有4,700年;由[盤古]、[上帝]、[女媧]等唔確定嘅神話時代計起來就有成「五千年」,呢啲都係傳統民間認知上嘅長度;由標誌著文明萌芽嘅[新石器時代][磁山文化]計起就有10,000年;由人類開始脫離原始生活嘅[舊石器時代][藍田猿人文化]計起就有80萬年嘅歷史。

**

無聊通識科。廣東話資料館

2018年4月19日 星期四

廣州話.四字俗語.舉隅



廣州話.四字俗語.舉隅

廣州話俚語同俗語,係一種廣州人所熟悉、通俗流行嘅固定短語或者口頭禪,又叫做〔常言〕,〔俗話〕;呢啲係老百姓創造嘅,重喺民間口語之中流傳,具有口語性同通俗性嘅語言單位。

就因為係口語相傳,又冇書又冇信,有好多人都唔知原來嘅本字係點寫嘅,重加上各處鄉村各處講,所以喺坊間同喺網上都流傳咗好多唔同寫法,當中梗係會有好多係〔白字〕、〔別字〕同〔錯字〕喇。

下面嘅廣州話四字俗語,係喺網絡上搜集返嚟嘅,有興趣嘅,可以幫手修正同推廣下正確嘅寫法!

〔歡迎提供資料修正〕

一岩一窟 (凹凹凸凸;唔光滑,唔整齊,凹凸不平)

一揫一棱 (一束束或一串串,形容拎著好多嘢;有人寫:一揫二棱〕

一褲都係 (嚇到瀨尿,搞到一褲都係,更嚴重嘅係-瀨屎)

一腳都係 (踏中地雷,踏屎;最常見嘅有狗屎同牛屎)

一戙都冇 (冇曬符弗,一啲辦法都冇)

一仆一碌 (行路跌跌撞撞,連翻帶爬咁走)

七國咁亂 (形容環境零亂,情況混亂;亂七八糟)

九唔搭八 (講啲嘢完全脫離主題,對答唔上;即係牛頭唔答馬咀)

人細鬼大 (年紀細細,但係思想老成)

又乜又物 (形容好麻煩,又想三又要四;又呢個又嗰個;粗啲講:又乜又七)

又呢又嘮 (形容好鬼麻煩,又呢樣又嗰樣;有人寫:又呢又路)

三口六面 (三頭對案,對住人哋面前,講清講楚)

三姑六婆 (形容多管閒事嘅女人,有人話佢哋就係:八婆)

三長兩短 (指意外事故,同生死有關,係死嘅代稱)

也文也武 (貪威逞強,耀武揚威,不可一世嘅樣)

大安旨意 (形容過分放心而放任不管,任由其他人處理)

大步檻過 (指逃過厄運;或者苦難之後迎來光明)

大隻騾騾 (比喻生得高大健壯,通常都係啲天真儍戇;所謂:大隻騾騾跌落坑渠)

牛高馬大 (比喻人生得高大強壯;最適合幫人做牛做馬)

心大心細 (形容揸唔定主意,唔知點最好)

手騰腳震 (形容手腳發震,驚慌失措嘅樣)

水過鴨背 (指一啲事情過咗之後就全部唔記得)

水盡鵝飛 (形容靜瑩瑩,烏蠅都冇隻;有人寫成:水靜河飛)

冇乜兩句 (形容兩個人關係生疏;或者關係唔多好)

冇尾飛砣 (一走出去就唔知去咗邊;比喻成日東奔西走蹤影難覓嘅人)

冇弇雞籠 (即係冇蓋嘅雞籠;比喻隨便自出自入嘅地方)

他他條條 (形容從容不迫,唔趕唔急)

冬瓜豆腐 (指意外事故;同三長兩短嘅意思)

古靈精怪 (形容稀奇古怪;新奇嘅主意多多〕

蠱蠱惑惑 (形容擅於迷惑人,蠱惑人心;有人寫成:古古惑感)

打雀噉眼 (形容目不轉睛、全神貫注咁盯著;特別係指望住女仔)

生安白造 (指捏造事實,無中生有;冤戾好人)

坐定粒六 (形容穩操勝卷;實食冇黐牙;食硬)

田雞過河 (各有各撐,各走各路)

同煲同撈 (形容親密合作、患難與共)

好人好姐 (指一啲好正常嘅人)

好衰唔衰 (形容咁啱撞正衰運,遇上倒霉)

有紋有路 (形容似模似樣,有條不紊)

死死地氣 (形容無可奈何;唔係好甘心情願)

死蛇爛鱔 (話啲人好鬼死懶,郁都唔郁吓)

死曬籠雞 (形容將件事情全部搞砸;全軍覆沒)

老貓燒須 (指有經驗嘅人一時失手)

扚起心肝 (形容發奮,要有決心)

吹鬚睩眼 (形容嬲到抖大氣吹住啲鬚,同睩大雙眼)

夾手夾腳 (指一齊動手,合力做好)

把心唔定 (形容人定唔到決心;類似心大心細)

走夾唔抖 (形容遇到意外情況拚命逃走)

身水身汗 (形容成身都出曬汗)

奀挑鬼命 (形容人瘦到唔成人樣)

依牙傍哨 (形容人咧著嘴笑;或者比喻嗰啲圍觀捉棋者喺一旁亂咁指點)

依牙鬆鋼 (依起排牙;一方講情緒表達、另一方面指講嘢,表達意見〕

定過抬油 (形容非常之鎮定同有信心)

狗咬狗骨 (形容內部自相殘殺;或者互相詛咒)

狗屎垃圾 (指冇用、畀人睇唔起嘅人或者物)

初嚟步到 (形容初來乍到;來到一個陌生嘅地方)

阿狗阿貓 (拍求其一個人;又有人講:阿豬名痞)

亞貓亞狗 (是但一個,求其一件)

阻頭阻勢 (形容諸多阻撓,妨礙其他人做事)

姣屍躉篤 (指啲女人上下擺動臀部,賣弄風騷;
      重有寫成:姣屍扽篤、姣斯炖篤、姣屍躉督、姣思撉篤)

拜五臟神 (指肚餓要食嘢;有人話:拜神先要拜五臟)

祭五臟廟 (指肚餓要食嘢;祭神先祭五臟,香港粵語)

沙塵白霍 (形容張揚擺闊,行為囂張,好不可一世咁)

砂煲兄弟 (指貧賤之交、患難之交,情如兄弟)

砌生豬肉 (指捏造陷害;生安白造)

紅粉緋緋 (形容臉色紅潤,好面色,好開心嘅樣)

苦過弟弟 (形容景況非常困苦,淒涼)

衫長褲短 (指意外事故,同三長兩短嘅意思)

郁身郁勢 (形容個身喺度動來動去;企唔正坐唔定;坐立不安)

飛起嚟咬 (指開高價錢,亂收費用等)

飛擒大咬 (指開高價,亂收費等,香港粵語)

食大茶飯 (形容做大生意,做大買賣;即係:大雞唔食細米)

耷頭耷腦 (形容垂頭喪氣嘅樣;即係:頭耷耷咁)

倒米壽星 (指專門破壞人家好事嘅人;專搞亂人哋嘅好事)

倒瀉籮蟹 (形容場面混亂,難以收拾;比喻手忙腳亂)

唔嗅米氣 (比喻幼稚無知,唔識人情世故)

唔嗲唔吊 (形容慢吞吞,愛理不理)

唧都唔笑 (形容人個性木訥寡言)

捐窿捐罅 (指到處亂鑽,同圍亂搞)

烏哩馬岔 (指字跡潦草、凌亂,冇個四正嘅)

烏哩單刀 (稀里糊塗,形容一塌糊塗)

神神化化 (形容神態有啲唔正常;癫癫得得)

衰到貼地 (比喻認真倒霉,衰到頂)

鬼五馬六 (形容古古怪怪,神神化化)

乾手淨腳 (形容乾淨利落,唔會拖泥帶水)

偷呃拐騙 (指不務正業,招搖撞騙,呃錢)

巢咪媽錳 (形容皺皺;或者皺紋多)

眼闊肚窄 (指食物貪占多,但又食唔曬)

荷包燶丁 (指錢包裡面冇錢,形容貧窮)

掂過碌蔗 (形容非常順利,運程好到不得了)

掗掗拃拃 (指盛氣凌人、十分霸道)

單料銅煲 (指精於交際;或者缺乏城府而同人接觸好快就熟絡)

單單打打 (形容含沙射影、指桑罵槐咁講風涼話)

惡死睖登 (指好凶恨咁怒目而視,凶神惡煞)

揀飲擇食 (形容偏食挑喝;又指食嘢好挑剔)

棚尾拉箱 (走得就走,形容好狼狽,走得好急好快;
      或者設計呃人,得手後即走,受害人仍懵然不知)

游離浪蕩 (形容無所事事,到處遊蕩)

無端白事 (指唔知點解,無緣無故)

無理頭尻 (頭尾不分;有人認為正寫係:莫釐頭尻)

短筒闊封 (形容身材又肥又矮;望落去肥肥矮矮咁)

貼錯門神 (指夫婦、情人、朋友之間失和,互不理睬)

開明車馬 (指開門見山,講明意圖)

擺明車馬 (指開門見山,講明意圖,香港粵語)

飲飽食醉 (形容酒足飯飽;完滿結束)

黑口黑面 (形容唔高興嘅樣,好似嬲咗成村人咁)

黑古勒特 (形容黑不溜秋,黑鼆鼆)

慶過焫雞 (形容氣結,好嬲,好火滾)

勢凶夾狼 (指來勢洶洶,胃口好大)

當佢冇嚟 (指唔放佢在眼內;有人寫成:當佢冇蒞)

落雨絲濕 (形容雨淋淋嘅天氣,因為落雨而潮濕;
      重有寫成:落雨斯濕、落雨施濕、落雨細濕)    

話口未完 (指一句說話都仲未講完就)

話頭醒尾 (形容領悟力強,一講就明)

煲電話粥 (指長時間傾電話,有人叫做:煲冇米粥)

嘈喧巴閉 (形容吵吵嚷嚷,吵鬧)

趕喉趕命 (形容又急又趕嘅樣;有人寫:趕頭趕命)

撐亂戈柄 (指隨便插嘴打斷人家說話)

論論儘儘 (形容窩窩囊囊;或者行路踉踉蹌蹌;有人指係:龍龍鍾鍾)

醃尖聲悶 (指鍾意挑剔,乜嘢都睇唔順眼)

疏離籠統 (離行離列;疏疏落落)

餓狗搶屎 (形容爭搶激烈,貶義)

煠熟狗頭 (形容人笑得呲牙咧嘴)

整色整水 (指做出一啲姿態來掩飾真實嘅意圖)

頭都大埋 (形容好傷腦筋;有人會講:頭都大曬)

臨急開坑 (指平時唔用功,關鍵時先王用力)

臨時臨急 (形容冇做好準備,臨時匆忙去做事)

闊佬懶理 (形容不理不睬,唔管唔顧)

雞手鴨腳 (指做事手忙腳亂、笨手笨腳)

雞毛鴨血 (一塌糊塗;情況混亂、不可收拾)

雞仔媒人 (指有啲人好做中介人、多管閒事嘅人)

雞同鴨講 (形容言語上好難溝通;或者分歧好大)

雞啄唔斷 (指有啲人說話講極都講唔完)

雞腸鴨肺 (形容人家小氣,唔夠大方)

騎牛搵馬 (比喻先湊合,再搵過好啲嘅)

攝高枕頭 (念清楚,好好掂量、認真想想;有人認為係:揳高枕頭)

霸王雞乸 (指野蠻唔講理嘅女人;掁雞婆)

疊埋心水 (形容一心一意,集中精神)

躝屍趌路 (躝開;死開,死開啲喇;係鬧對方係死人,早走早著)

噏得就噏 (形容講嘢口沒遮攔;或者責備人說話冇根據,造謠生事)

**

編:黎詩詩.2016年11月27日

**

最利害嘅成語:



成語泰斗要考下你咩係最佳成語形容詞,腦筋真係要急轉彎嘞!

。最短嘅季節[ ]
。最孤寒嘅人[ ]
。最大嘅手術[ ]
。最快嘅閱讀能力[ ]
。最重分量嘅語言[ ]
。最難煮嘅飯[ ]
。最大嘅瀑布[ ]
。最繁忙嘅機場[ ]
。最高明嘅醫術[ ]
。最有本事嘅賊仔[ ]

演出:黃俊英。何寶文
製作:廣州相聲藝術團

**

廣東風情。廣東話資料館

2018年4月8日 星期日

中文韻書目錄


韻書,係古代按照音韻編排嘅字典。記錄咗每個字嘅意義之餘,又用反切記錄咗每個字嘅讀音。而[韻書]同[韻表]唔同嘅地方係韻表會依照一個既定嘅格式,將每個字按著音、韻、調來排列。最初,韻書編纂嘅目的係為咗文學創作,方便啲詩人依照音韻寫詩。但係,韻書又起到字典嘅作用,可以按照字嘅讀音查到佢嘅意義。

**

上古時代,五帝時期同後來嘅夏、商時期,中原黃河流域地區係華夏先民嘅主要活動地帶。周代以前漢語嘅具體形式已無可考,據傳聞當時嘅標準語係周代標準語嘅前身。

周代嘅標準語,一般認為就係《詩經》嘅語言,即係雅言。雅言主要流行喺黃河流域嘅中原地區。《論語。述而第七》:[子所雅言,《詩》、《書》、執禮,皆雅言也。]

秦代嘅官方標準語已無可查考,一般認為秦朝嘅標準語係沿用周朝時代嘅[雅言]。

漢朝嘅標準語承襲先秦時代嘅雅言之音,稱[正音]、[雅言],亦稱為[通語]。

三國時代嘅《聲類》,係最早出現嘅一本韻樂書,由魏國李登編著嘅。

晉代嘅《韻集》,係由呂靜編著嘅韻書。《魏書。江式傳》記載:「晉呂靜仿品登之法作《韻集》五卷,宮商角徵羽各為一篇。」。但係呢兩本韻書已經一早就冇咗。

隋代嘅《切韻》,亦係古代最早嘅一本韻書,由陸法言喺仁壽元年(公元601年)編成。全書用韻目為綱,共分195韻。

唐代嘅《唐韻》,係受官方推廣嘅一本韻書,由孫愐修定《切韻》改為《唐韻》。王仁昫嘅《刊謬補缺切韻》又係《切韻》嘅一個增修本,比《唐韻》更加早。但係孫愐曾利用朝廷擴大《唐韻》嘅影響,所以《唐韻》雖然係孫愐嘅私人著作,但係個書名就帶有官方性質,係當時押韻嘅標準。《唐韻》有206個韻,其中定咗某啲韻可以同用,實際只係有112個韻。喺孫愐嘅《唐韻》之後,重有一本《廣唐韻》。

宋代嘅《廣韻》,喺宋真宗臺年,由陳彭年等人奉詔根據《切韻》、《唐韻》等嘅韻書修成《大宋重修廣韻》,即係《廣韻》。《廣韻》就成為古代頭一部由官方主修嘅韻書。宋仁宗景祐四年,即《廣韻》頒行之後29年,宋祁、鄭戩給仁宗上書,批《廣韻》多數用舊文,「繁省失當,有誤科試」。另外根據王應麟《玉海》記載,賈昌朝亦同時上書批評宋真宗景德年間編嘅《韻略》係「多無訓釋,疑混聲、重疊字,舉人誤用」。所以仁宗下令由丁度等人重修呢兩部韻書。結果喺景祐四年當年就完成《禮部韻略》,兩年後喺寶元二年完成《集韻》。《集韻》係《廣韻》嘅修訂本,而《禮部韻略》就係《韻略》嘅修訂本。因為《禮部韻略》喺收字同字嘅注釋方面都為科舉應試考慮,比起《廣韻》、《集韻》都簡略,所以叫做《韻略》。又因為當時嘅科舉考試用嘅官韻,而官韻由唐代開始以來就由主管考試嘅禮部頒行,所以叫《禮部韻略》。《廣韻》《集韻》《禮部韻略》又將某幾個韻同用,雖然有206個韻,但係合併之後可以同用嘅韻就剩108個韻。



金代嘅平水書籍(即係山西平水地方管理圖書印刷嘅官員)王文鬱編《新刊韻略》併舊韻為106個韻,後嚟劉淵刻書刊行新嘅壬子新刊《禮部韻略》共107韻(呢本書已經冇咗,只係由元初黃公紹、熊忠嘅《古今韻會舉要》瞭解到一啲概況)。同宋仁宗景祐四年發佈嘅206韻嘅科舉考試用官韻《禮部韻略》唔同,新嘅壬子新刊《禮部韻略》同王文鬱嘅106韻嘅平水《新刊韻略》係一致嘅。106韻同107韻嘅區別只係喺上聲「拯」、「迥」兩部份係咪合併。元初陰時夫著嘅《韻府群玉》定名106韻嘅版本係「平水韻」。明代以後嘅文人就沿用106韻。

元代嘅《蒙古字韻》又稱《八思巴字韻》,係元代蒙古字(八思巴字母)為漢語編寫嘅韻書。又有《中原音韻》,係元代周德清所作嘅一本韻書,反映咗當時嘅實際語音。

明代嘅《洪武正韻》,係明太祖洪武八年樂韶鳳、宋濂等十一位人士奉詔編成嘅官方韻書,共有16卷。《洪武正韻》喺明代有好多次翻刻,影響好大。



清代嘅《佩文詩韻》,喺康熙四十三年至五十五年期間編輯成書,共106韻,係清代科舉用嘅官方韻書,完全取代咗《洪武正韻》。好似非格律詩,啲詞係依煦《詞林正韻》押韻,而散曲就係依照《中原音韻》押韻。



**

〔韻書〕同〔韻圖〕。〔歡迎提供資料修正〕。

上古漢語韻書:

。三國.聲 類 [李 登,???年]魏國韻樂書,歷史上最早嘅樂書,已佚失。

。晉代.韻 集 [呂 靜,???年]西晉時期韻書,已佚失。

**

中古漢語韻書:

。隋代.切 韻 [陸法言,601年]最早出現嘅一部韻書,被稱為[韻書之首]。

。唐代.補缺切韻[王仁昫,???年]全稱《刊謬補缺切韻》,為《切韻》增修本。
   .唐 韻 [孫 愐,732年]為《切韻》一個增修本。
   .廣唐韻 [佚 名,???年]為《唐韻》之後出現嘅韻書。
   .韻 詮 [佚 名,???年]為一部秦音韻書。
   .韻海鏡源[顏真卿,769年]以《切韻》為主嘅韻書。

。宋代.韻 略 [佚 名,1007年]粵語音系韻書。
   .廣 韻 [陳彭年,1008年]全稱《大宋重修廣韻》粵語音系韻書。
   .禮部韻略[丁 度,1037年]為《韻略》修訂本。
   .集 韻 [丁 度,1039年]為《廣韻》修正本。
   .切韻指掌[司馬光,1054年]為《切韻》一個增修本。
   .切韻指掌圖[司馬光,1086年]為《切韻》增修本。
   .七音略 [鄭 樵,1152年]漢語中古音韻書。
   .韻 鏡 [佚 名,1161年]五代時期韻圖。
   .等韻源流[趙陰棠,1176年]等韻學歷史韻書。
   .四聲等子[佚 名,????年]為南宋以前嘅韻圖。
   .切韻指掌圖[董南,1203年]為《切韻》增修本。
   .平水韻 [佚 名,1223年]為宋代以後使用嘅詩韻系統。
   
。金朝.五音集韻[韓道昭,1212年]漢語中古音韻書。
   .新刊韻略[王文鬱,1252年]漢語中古音韻書。
   .壬子新刊禮部韻略[劉 淵,1252年]漢語中古音韻書。

**

近代漢語韻書:

。元代.古今韻會[黃公紹,1292年]一部好注重訓詁嘅書。
   .古今韻會舉要[熊 忠,1297年]參照《壬子新刊禮部韻略》編成。
   .切韻指南[劉 鑒,????年]為《切韻》增修本。
   .韻府群玉[陰時夫,1307年]漢語中古音韻書。
   .中原音韻[周德清,1333年]以《廣韻》為標準嘅韻書。
   .中州韻類[卓從之,????年]全稱《中州樂府音韻類編》元朝大都話語音韻書。
         又稱《中州音韻》、《中州韻》、《音韻類編》、《北腔韻類》。
   .蒙古字韻[不 祥,16??年]又稱《八思巴字韻》。
         係元代蒙古字[八思巴字母]為漢語編寫嘅韻書。

。明代.洪武正韻[樂韶鳳、宋濂...等十幾人,1375年]以中原雅音為正嘅官方韻書。
   .韻畧易通[蘭 茂,1442年]明朝初期官話語音韻書。
   .中州音韻[王文璧,????年]為《中原音韻》增修本。
   .五車韻瑞[凌稚隆,????年]第一部華英字韻書。
   .六音字典[陳 相,1515年]閩北方言韻書。
   .八音字義[不 祥,15??年]全稱《戚參將八音字義便覽》福州話音韻書。
   .西字奇蹟[利瑪竇,15??年]拉丁字母標註漢字讀音韻書。
         意大利人,天主教耶穌會傳教士,學者。
   .西儒耳目資[金尼閣,16??年]拉丁字母標註漢字讀音韻書。
          法蘭西人,天主教耶穌會會士,漢學家。

。清代.佩文韻府[張玉書、陳廷敬、查士昇...等廿幾人]全稱《御定佩文韻府》。
   .佩文詩韻[張玉書、陳廷敬、查士昇...等人,1711年]
   .珠玉同聲[康熙年間]全稱《太史林碧山先生珠玉同聲》福州話音韻書。
   .詞林正韻[戈 載,????年]滿州話詞韻書。
   .切韻考 [陳 澧,????年]為《切韻》增修本。
   .江湖尺牘[虞學圃,????年]適合行走江湖嘅書信用字書。
   .分韻撮要[溫岐石,????年]清朝初期粵語語音韻書。
   .戚林八音[晉 安,1749年]福州話音韻書。
         為《戚參將八音字義便覽》與《太史林碧山先生珠玉同聲》合訂本。
   .江湖分韻[佚 名,1782年]全稱《江湖尺牘分韻撮要合集》粵語語音韻書。
         為《江湖尺牘》與《分韻撮要》合訂本。
   .彙音妙悟[黃 謙,1800年]福建泉州音南安腔閩南語音韻書。
   .李氏音鑒[李汝珍,1805年]北京話音系韻書。
   .同音畧解[佚 名,????年]清代江淮官話抄本韻書。
   .英華分韻撮要[衞三畏,1856年]英文解釋粵語字韻書。
           美國公理會差會傳教士,漢學家,語言學家。
   .清本六音字典[陳家箎,1894年]閩北方言韻書。
   .韻學源流[莫友芝,18??年]語音歷史韻書。
   .圓音正考[無名氏,????年]清朝官話語音韻書。

**

現代漢語韻書:

。民國.中華新韻[國民政府,1941年]現代標準漢語音係韻書。

**

〔漢語辭書〕

古代漢語辭書:

。字典.爾 雅 [佚 名,????年]
   .小爾雅 [佚 名,????年]
   .方 言 [揚 雄,????年]西漢,全稱《輶軒使者絕代語釋別國方言》。
   .說文解字[許 慎,????年]東漢。
   .釋 名 [劉 熙,????年]東漢。
   .廣 雅 [張 揖,227年]三國時期。
   .玉 篇 [顧野王,????年]南朝梁。
   .干祿字書[顏元孫,????年]唐代字樣學字書。
   .埤 雅 [陸 佃,????年]北宋。
   .爾雅翼 [羅 願,????年]宋朝。
   .龍龕手鑑[釋行均,????年]遼代。
   .駢 雅 [朱 謀,????年]明代萬曆時期。
   .通 雅 [方以智,????年]明代。
   .字 彙 [梅膺祚,????年]明代。
   .正字通 [張自烈,????年]明代。
   .康熙字典[張玉書,陳廷敬...等廿八人,????年]清代大型字典。
   .别 雅 [吳玉搢,????年]清代。
   .比 雅 [洪亮吉,????年]清代。
   .叠 雅 [史夢蘭,????年]清代。

現代漢語辭書:

。字典.中華大字典 [陸費逵、歐陽溥存,1915年]
   .新華字典  [魏建功,1953年]
   .國音字典  [汪 怡,1959年]
   .漢語大字典 [徐中舒,1986年]
   .大學字典  [林 尹,1987年]
   .中華字海  [冷玉龍、韋一心,1994年]

。詞典.辭 源     [陸爾奎,1915年]
   .辭 海     [舒新城,1936年]
   .國語辭典    [教育部,1936年]
   .教育部國語辭典 [教育部,1945年]
   .現代漢語詞典  [呂叔湘、丁聲樹,1965年]
   .中文大辭典   [佚 名,1973年]中華學術院
   .新華詞典    [佚 名,1980年]商務印書館
   .大辭典     [佚 名,1985年]三民書局
   .國語日報辭典  [何 容,1986年]
   .漢語大詞典   [羅竹風,1986年]
   .國語活用辭典  [周 何、邱德修,1987年]
   .新學友國語辭典 [張文彬,1989年]
   .現代漢語規範詞典[李行健,2004年]
   .現代漢語大詞典 [阮智富、郭忠新,2006年]

**



**

垃雜舊書攤.廣東話資料館

2018年4月3日 星期二

港鐵的邂逅[遇見嘅九類人]


地下鐵邂逅她,車廂中的唱談最受用.........]陳百強〈幾分鐘的約會〉嘅歌詞;[今時今日咁嘅歌仔,已經無得唱啦。]套用劉德華嘅金句口吻,因為呢啲詩情畫意嘅橋段,喺依家嘅港鐵入面都好難以復見。呢一切,都係由遺失耳筒開始,畀我由音樂嘅世界,返到嚟現實嘅港鐵車廂入面。男神又搵唔到,繆思女神就自到幾件。

以下就係我坐港鐵遇到嘅有趣搭客:

**

1)舉手投足都散發著[加拿大]氣息

喺夏天嘅日子,稍為逳動下就會大汗疊細汗,自然就會散發出男人味,呢啲都係人之常情嘅事。但係滿第汗味嘅人,情不自禁將對手舉起,任由啲涼風輕輕吹送到,俏然進了你衣襟.........[你個隔甩底]嘅話,嗰種好似鹹魚咁嘅氣息,足夠迷暈方圓三米內嘅女性,比起哥羅芳更加有效,亦會畀啲減肥人士可以控制下食慾,有人話係一舉兩得。

**

2)重複又重複咁車廂今日講多啲

搭港鐵嗰陣,坐喺旁邊嘅人講電話,總係講:[我聽唔到你講乜話,再講多次。];又有啲人嘅懶音太勁就會講成:[喂~禾聽湖到梨港咩話!];又或者講:[吓~梨港嘜話?];通常問呢句嘢嘅人,都唔會得到答案嘅,於是就會唔停咁大聲重重複複講:[我聽你唔到...我聽你唔到...]睇到佢咁個樣鬼辛苦,真係想攞佢個電話過來,幫佢聽下對方喺度講乜鬼。問那星點解要照耀,千秋也未疲倦.........

**

3)雞啄唔斷嘅現場[直播]追擊

間唔中喺車廂度,又會聽到啲人大聲講是講非同埋盡吐心中情,有啲重公開埋人哋嘅私隱添。雖然話一個人坐車難免會覺得好孤單,心裏頭想大叫心中冰凍未能移動我空虛、我寂寞、我凍.........。但係全程大聲講電話,由上車講到落車,未免太[口水多過浪花]囉。啦....啦....~數著浪花一朵朵.........

**

4)滔滔江水綿綿不絕咁大聲傾偈兼爆粗

每個爆過粗嘅人都知道,同朋友講緊親戚、內臟同埋器官嗰時,大聲用來加強語氣係在所難免嘅。不過,每句說話都硬係要加插啲祖先、娘親同埋五臟六腑,感覺就係用粗口來重組句子,如果將佢哋嘅溝通講嘅嘢閂曬啲粗言穢語嘅話,佢地基本上,係冇嘢好講。重有喺車廂入面講嘢或者問候人嗰陣時,都係將音量收細啲比較好。長夜空虛使我懷舊事,明月朗相對念母親.........

**

5)肆無忌憚喺度開喇叭傾偈打機睇片

喺車廂入面,聽到啲人用電話嗰時開埋喇叭,真係有啲衝動遞個耳筒畀佢,可惜我冇呢份勇氣。真係好佩服呢班人嘅專注力,能夠漠視旁人嘅怒啤嘅眼神,全程投入喺電話度嘅虛擬世界。就算默然不語,我都深深記住,因你的眼神,使我心裡著迷......... 

**

6)成人都市故事[柱男柱女]

入到車廂度,有啲人一睇到支[不銹鋼]扶手就好似嚿磁石咁,用膊頭、背脊或者屁股貼實支扶手。若果非繁忙時間嘅話都可以接受,但喺繁忙時間咁多人使用扶手,將個背脊夾硬壓喺條柱,好令人討厭;更甚嘅係有啲女人將個心口貼埋條柱度,呢種霸氣真係令人折服,冇人敢伸手埋去。看著眼前的人漸散,而在那喧嘩過後,只有忽然倦透的,是我的一對手.........


**

7)港鐵車廂障礙賽[閃避行李篋]

喺車廂入面,遇到行李黨係幾正常嘅事,但係可以喺一瞥間敏捷咁避開行李篋,唔會畀啲篋s 〔冇錯,係有(s)嘅,係眾數;黃子華嘅口吻〕轆過對腳嘅人,總係寥寥無幾。佢地應該接受過[少林寺]摺櫈同人行嘅專業訓練,先至練得一身好功夫。馬龍蛇,獅彪象,豹共虎,猴與鶴,十套武功,懾服妖法神巫.........


**

8)細路仔一邊追,一邊練普通話

車廂入面喺唔多人嘅時候,有時會遇到啲細路仔好高速咁跑,或者係圍住支扶手追住走。而下一秒嘅事,就有人出聲話啲細路仔,不過佢哋嘅家長就好似睇唔到咁。一追再追,只想追趕生命裡一分一秒,原來多麼可笑,你是真正目標.........

**

9)瞓覺。發呆。低頭族

其實喺車廂入面,不論坐定企,大部份嘅人都係沉默嘅一群,佢哋都喺度上網睇新聞、打機、恰眼瞓同發吽哣咁,好都市、好智能、好羊群。每天幾分鐘,共你心聲已互通,旅程何美麗,如在愛情小說中.........。喺車廂入面嘅熱鬧氣氛,會畀人彷彿置身喺流動機鋪。〈幾分鐘的約會〉入面浪漫嘅場景,學董建華話齋:[已經唔存在啦。]

**



身處喺港鐵嘅車廂入面,最幸福嘅事唔係遇到啲男神/女神,而係擁有一個隔音良好嘅耳筒,畀你隔絕塵世間嘅煩囂。

依家我都做咗低頭族,而您你妳又係邊一類人呢?

譯:蕭藍仁.2014年8月30日
原:Littledraw.2014年8月28日

**



**

香港風情。廣東話資料館