俗語，就係生活上嘅慣常用語，指［約定俗成］，廣泛流行喺某時某地嘅口語。由廣義來睇，俗語包括咗［諺語］、［歇後語］引註語、常用嘅［成語］，但係唔包括唔通俗而古雅嘅［書面語嘅成語］，或名著中嘅［名言警句］；從狹義嘅來睇，俗語係具有地區特點嘅語言。俗語嘅來源好廣泛，既來自民間群眾嘅口頭創作，又有同詩文名句、格言警語、歷史典故等嘅有關連。
＊＊
一）留返拜山先講
情景：若果有人唔停嘴咁講啲你冇興趣嘅嘢，你又好想叫佢停嘴。我而家唔得閒聽你講嘢，有嘢留返拜山先講啦。
——時間很趕，有什麼以後再說吧。
解釋：傳說話，喺拜山時講嘢係百無禁忌，乜都可以講，所以就有句〔有嘢留返拜山先講〕嘅講法。字面解釋係〔有什麼話留到清明祭祖時再說〕，但實際上係［唔想聽你講，你要講就喺拜山時自己講個夠］嘅意思。
＊＊
二）掂過碌蔗
情景：描述一種非常順利或順景嘅情況。
新年一過，就升職加薪，又揾到女朋友，今年運程掂過碌蔗。
——新年一過，就升職加薪，又找到女朋友，運程好得不得了。
解釋：甘蔗好直（廣東話〔掂〕有直嘅含意）有順景嘅意思；甘蔗又好甜，廣東話〔甜］同［掂〕係近音，所以甘蔗好〔掂〕。若果有嘢比甘蔗重要甜〔掂〕，咁就確實甜〔掂〕過碌蔗嘞。
＊＊
三）冇咁大個頭唔好帶咁大頂帽
情景：指有啲人［不自量力］處事。
人工月得嗰三幾千蚊就學人養車供樓，冇咁大個頭就唔好帶咁大頂帽喇。
——月薪只有三幾千元就學人家供車供樓，沒有這樣的能力就不應該勉強。
解釋：若果你戴上一頂比自己個頭大好多嘅帽，就會好唔合襯，而且戴得好辛苦，呢句俗語係一個生動嘅比喻。另外，〔學人……〕喺廣東話入面係好常用嘅，亦係指有人做咗啲本身唔係咁適合做嘅事，例如：細路仔〔學人拍拖〕、〔學人食煙〕。
＊＊
四）行路唔帶眼
情景：有個年青人撞倒個老人家，老人家就怪佢唔小心。
後生仔，乜你行路唔帶眼架。
解釋：普通話都有〔走路不帶眼〕嘅講法。呢度要講嘅係廣東話入面〔行〕同〔走〕嘅區別，〔行〕就係正常速度嘅步伐前進，而〔走〕就用係接近跑步嘅快步前進。清楚呢點嘅話，就好容易明白〔未學行先學走〕嘅意思。
＊＊
五）扮嘢
情景：椓穿人哋嘅［假面目］。
唔使扮嘢喇，我唔會再信你。
——不要裝模作樣了，我不會再信你。
最憎人喺我面前扮曬嘢。
——我最討厭別人裝蒜。
解釋：〔嘢〕書面語係［東西］，但所謂嘅〔扮嘢〕，並唔係指［扮東西］，而係扮裝喺某一種嘅狀態，例如：［扮窮］、［扮斯文］、［扮好學］……當然，有時〔扮嘢〕亦指［扮人］，某個電視台嘅綜藝節目就有一個〔扮嘢環節〕，專門模仿其他明星同名人。喺國語入面嘅〔裝蒜〕同廣東話嘅〔扮嘢〕幾乎完全對應。而〔裝蒜〕廣東話就直叫［扮蒜頭］。廣東話入面重有一句叫［蒜頭扮水仙］，真係夠曬扮嘢。
＊＊
六）嗱嗱聲／嗱嗱臨
情景：老闆吩咐下屬趕工，要求佢哋做事要快手。
阿儀，嗱嗱聲同我打呢份快勞出嚟。
——阿儀，趕緊幫我打這份文件出來。
解釋：好多形如〔？？聲〕嘅詞都係表示迅速，例如〔含含聲〕、〔雪雪聲〕等，另外重可以用〔嗱嗱臨〕、〔迮迮臨〕代替，意思相同。〔快勞〕係英文單詞［file］嘅譯音。
＊＊
七）唔好嘈
情景：叫啲人安靜，唔好大聲嘈鬧。
我睇緊書，你哋唔好嘈天巴閉啦！
——我正在看書，你們別在那裡吵鬧！
解釋：〔嘈吵〕一詞，廣東話攞個前字〔嘈〕，普通話就攞個後字〔吵〕，實際上係表示相同意思。〔嘈到拆天〕、〔嘈天巴閉〕、［嘈喧巴閉］、〔嘈嘈閉〕、〔嘈生曬〕嘅意思都係差唔多，核心都係在於一個〔嘈〕字。當然，亦可以直接講〔你哋靜啲啦！〕
＊＊
八）你就認真［開胃］
說明：廣東話講嘅〔開胃〕有兩種用法。
我今餐好開胃，食咗三碗飯。
——我這頓飯胃口很好，吃了三碗飯。
幾十萬就想買呢區嘅樓？你真係開胃！
——區區幾十萬就想在這一區買房？你倒想得美！
解釋：兩個〔開胃〕嘅意思唔同，前句係指胃口好，係呢個詞本來嘅意思；後句嘅〔開胃〕係由本來意思引申而來，形容有啲人嘅過分要求或者理想，帶有啲［不滿］嘅意味。就好似歌仔斬有唱： 噏親加薪塊面挪起惡睇［扭下計］你就認真開胃。
＊＊
九）批個頭落嚟畀你當凳坐
情景：意思係指有人堅信自己嘅判斷。
如果北極隊今次入到世界盃決賽週，我批個頭落嚟畀你當凳坐！
——要是北極隊這次能衝出北極圈進入世界盃決賽週，我把頭割下來讓你坐！
解釋：〔批〕喺廣東話入面係〔切、削〕嘅意思，例如：〔批蘋果〕。有膽用自己個頭來打賭，證明講嘢嘅人必定對自己嘅判斷好有信心。如果唔係，我就批個蘋果畀你食。
＊＊
十）跟你姓
情景：係有人堅信自己嘅判斷，因為咁而發誓。不過，通常都會有啲微調嘅。
如果佢入到呢次面試，我就跟佢姓／我就乜都得／我就切！
——若他竟然可以進入面試，我就跟他的姓／叫我幹啥也行／我就自宮！
解釋：呢種表達通常前句係一個假設句式，而且喺講嘅人心目中，呢個假設條件係唔可能成立嘅。上面所講嘅〔切〕，實際上係〔切除某重要器官〕嘅簡寫，廣東話入面通常係用一個〔切〕字代替。不過，都係會有好多微調嘅。
＊＊
十一）相嗌唔好口
情景：喺有人嗌交嗰時，去勸籲佢哋停止再嗌。
大家一人少句啦，相嗌唔好口啊。
——大家別再吵了，吵架對大家都沒好處。
解釋：所謂〔一人少句〕，就係〔每個人都講少一句〕，就係想叫大家停口。而〔相嗌〕就係相互［嗌交（吵架）］。
＊＊
十二）出少句聲當幫忙
情景：希望嗌交嘅其中一方唔好再出聲挑起矛頭。
你唔好再同佢嘈喇，出少句聲當幫忙啦。
——你就當幫我個忙，少說兩句吧。
解釋：嗌交緊係要出聲講嘢啦，〔出少句聲〕即係〔停口〕嘅另一種表達。廣東話入面表示［爭吵］嘅詞有好多，例如：〔嘈〕、〔嗌交〕、〔嗌霎〕、〔鬧交〕等。
＊＊
十三）留返啖氣暖下肚
情景：係指有人不屑於同對方做無謂嘅爭拗。
同佢嘈都嘥氣啦，不如留返啖氣暖下肚。
——跟他爭吵完全沒意義，還不如省口氣。
解釋：呢個係一個幾生動嘅表達，講明同對方爭拗嘅價值重不如自己肚入面嘅一口暖氣。與其〔嘥（浪費）氣〕，不如〔留返啖氣〕好過。
＊＊
十四）怕咗你先怕米貴
情景：畀某啲人長時間纏繞之後，對佢表示無奈同埋厭煩。
我怕咗你先怕米貴，最後幫埋你呢次，以後唔好再嚟煩我！
——我算是怕了你，最好幫你這次忙，以後別再煩我！
解釋：［米］係生活嘅必需品，平凡人固然係怕米價升高，但若果怕某啲人嘅程度多過怕米貴嘅話，咁就講明佢真係好可怕。〔先〕係書面語〔才〕嘅意思。
＊＊
十五）孻仔拉心肝
說明：要表達〔最細嘅仔係最得疼愛嘅〕，廣東話有一句獨特嘅俗語。
偉仔喺屋企排最細，所謂〔孻仔拉心肝〕，阿媽最惜嘅就係佢。
——小偉在家裡排行最小，所謂〔最小的兒子最親〕，媽媽最疼的就是他。
偉仔乜都肯同我哋講架，孻仔拉心肝吖嘛。
——小偉什麼都跟我們說的，最小的兒子最貼心嘛。
解釋：完整嘅版本係〔孻仔拉心肝，孻女拉五臟〕，但通常都係只講前半句。〔孻〕喺廣東話入面係指最後嘅一個，例如：［孻女］、［孻叔］、［孻屘（mei1）〕，而〔拉心肝〕就係表示心肝相連（貼心）。由於〔孻〕、〔拉〕同音，所以有好多人會錯寫成〔拉仔拉心肝〕。
＊＊
十六）生骨大頭菜
說明：形容［寵壞］嘅細路仔，廣東話亦有獨特嘅俗語去表達。
呢個細路真係生骨大頭菜，屋企所有大人都遷就曬佢。
——這小孩真的被嚴重寵壞了，家裡所有大人都遷就他。
解釋：［大頭菜］嘅菜莖係軟嘅，嗰啲種壞咗嘅，手感就會好硬，就叫〔生骨〕。廣東話裡面〔種〕、〔縱〕係同音，所以［生骨大頭菜］係形容畀人縱壞（慣壞）咗而品行唔好嘅細路仔。有時亦可以講〔生曬骨〕，例如：〔你個皇帝仔縱到生曬骨，冇得教架喇。〕
＊＊
十七）擺上臺
說明：若果唔滿意畀人推出來做［出頭鳥］，可以點樣表達呢？
呢個項目我根本就唔清楚，你而家話我係負責人，即係擺我上臺啫。
——這個項目我根本不清楚，你現在說我是負責人，不是分明想陷害我嗎？
解釋：所謂〔擺上臺〕，就係〔擺上檯面〕，顧名思義就係將某個人推到前面來做箭靶，包含〔陷害〕嘅意思。又例如：嗰兩個鬼佬教練都係畀足協擺上臺嘅（兩位洋教練都是足協的替死鬼）。
＊＊
十八）放飛機
說明：講好咗去做，又唔去做而令人覺得畀人呃嘅行為，廣東話又叫〔放飛機〕。
Ａ：你咁早返嘅？唔係約咗阿雲踢波咩？
——你怎麼這麼早回來？不是約了阿雲踢球嗎？
Ｂ：唔好提喇，佢又放飛機！
——不要提了，他又爽約！
如果你今次再放我飛機，以後朋友都冇得做！
——要是你這次再失約，以後連朋友也不做了！
解釋：〔放飛機〕相當於書面語嘅〔爽約〕。喺〔放〕同〔飛機〕之間，可以加上畀人〔放飛機〕嘅受害對象，例如：〔放佢飛機〕、〔放老世飛機〕等。
＊＊
十九）大頭佛
說明：闖禍或惹出麻煩事，有種生鬼嘅講法叫〔搞出個大頭佛〕。
嗰單拆遷工程本來話系想改造舊城區，點知搞出個大頭佛。
——那項工程本來說是想改造舊城區，哪知搞成一團糟。
特首唔易做，派生果金都差啲派出個大頭佛。
——特首不易當，派老年津貼都差點出亂子。
解釋：〔大頭佛〕源於過時過節嘅［舞獅］習俗，由於後面經常跟著一大班敲鑼打鼓嘅人，所以畀人比喻為一堆麻煩事。〔大頭佛〕除咗可以〔搞〕出來，有時又可以跟其他動詞用，例如：上面嘅〔派〕。另外，亦可以用〔搞到一鑊泡〕呢個近義詞替換。
＊＊
二十）七國咁亂
說明：以下嘅對話，係示範用廣東話表達〔亂〕嘅一種生動講法。
Ａ：我想去你間新屋參觀下。
——我想到你的新居參觀一下。
Ｂ：而家重裝修緊，入面七國咁亂，你都係遲啲先嚟啦。
——現在還在裝修，亂糟糟的，你還是遲點再來吧。
解釋：俗語〔七國〕係指西漢初年嘅［七國之亂］，當時吳、楚、趙、膠西、膠東、菑川、濟南嘅七國亂勢，〔七國咁亂〕就係亂到一塌糊塗。廣東話嘅詞彙豐富，意義相近嘅重有〔立立亂〕、〔亂曬坑〕、〔亂曬龍〕等，可以交替使用。
＊＊
二十一）你鋪話法（吖）
說明：唔同意人哋講嘅嘢，有時重可以用下面嘅方式。
而家嘅汽油都係之前高價入返嚟嘅，所以唔應該減價。
——現在的汽油都是（汽油公司）以前高價買回來的，所以現在不應該降價。
你鋪話法（吖）！噉以前低價買入嘅汽油又唔見低價賣返畀消費者？
——你的說法很有問題，那以前低價買進的汽油怎麼又不低價賣給消費者？
解釋：〔你鋪話法〕實際上係〔你鋪話法要戒喇〕嘅省略形式，用喺完全否定對方嘅觀點，意思係〔你呢種講法唔啱〕或〔你唔好咁樣講〕。加上〔吖〕之後，否定語氣就更加強烈。
＊＊
二十二）話齋
說明：上題講過否定人哋觀點嘅方法，呢次講下讚同兼引用人哋嘅觀點。
學你話齋，做人最緊要係開開心心。
——就如你說的，做人最重要是開開心心。
正如蔡生話齋，錢係買唔到健康嘅，所以你揾錢之餘都要注意身體。
——正如蔡先生說的，錢是買不到健康的，所以你掙錢的同時也要注意身體。
解釋：由於〔話齋〕通常係引用人哋嘅話或者觀點，所以前面通常搭配〔學〕、〔正如〕等詞。注意喺上面第二句入面，〔所以〕後面嘅分句並唔係引用嘅內容，係講嘅人自己嘅意見。〔話齋〕重有個近義詞叫〔話事偈（gai2）〕，不過依家用嘅人已經唔多。
＊＊
二十三）事急馬行田
說明：喺危急嘅形勢之下，採用非常規嘅應對辦法，可謂〔事急馬行田〕嘞。
Ａ：司機，我老婆就生得喇，唔該開快啲啦！
——司機，我妻子快生產了，請開快點吧！
Ｂ：老世，前面紅燈啊，阿Sir 會抄牌架。
——老闆，前面是紅燈，員警會抄牌的。
Ａ：照衝過去啦，事急馬行田啊，有咩後果我負責！
——照衝過去吧，事情來得緊急，沒辦法了，我負責一切後果。
解釋：〔事急馬行田〕來自象棋，指形勢危急時馬走田字，而唔照規矩走日子。〔生得〕廣東話又叫〔蘇得〕，都係〔可以生〕嘅意思。類似嘅用法重有〔走得〕、〔食得〕等。
＊＊
二十四）擺明車馬
說明：形容顯而易見嘅事情，可以用〔擺明車馬〕或者佢嘅簡化形式〔擺明〕。
你上司喺呢個時候安排你出差，擺明（車馬）係唔想你接手玉嬌嗰單官司。
——你上司這個時候安排你出差，顯然是不想讓你接手玉嬌那樁官司。
嗰個乜乜委又開聽證會，擺明（車馬）又準備調高油價。
——那個什麼委又開聽證會，看來又要調高油價了。
解釋：呢個俗語入面，〔車〕讀〔居〕音，而唔讀〔ce1〕音。〔乜乜〕，相當於〔什麼什麼〕、〔所謂的什麼〕，帶有一種不屑嘅感情。〔擺明〕有近義詞〔明框〕，例如：佢明框呃你！（他顯然是騙你！）。
＊＊
二十五）食人隻車
說明：若果覺得對方要求過分，貪得無厭，就可以對佢使用呢句俗語。
兩個爛鬼獸頭銅像賣到成億蚊，食人隻車咩！
——兩個破獸首銅像賣到上億元，太離譜了！
Ａ：你快啲陪返部新電腦畀我！
——你快點賠我一台新電腦！
Ｂ：嘩！我整爛你個鼠標，你要我賠成部電腦畀你，想食咗我隻車啊？
——哇！我弄壞你的滑鼠，你要我賠你一整台電腦，這不是搶嗎？
解釋：呢個俗語亦係出自象棋嘅，所以〔車〕亦係讀〔居〕，其中嘅〔人〕字可以替換成第一人稱嘅〔我〕。意思同用法相近嘅表達方式重有〔你唔好去搶？〕、〔想攞命咩！〕等。
＊＊
二十六）車大奅／扯大奅
說明：〔講大話〕喺廣東話入面有一個特別嘅俗語，氣勢上比〔吹牛〕更厲害。
Ａ：尋晚我去咗志雲個飯局。
——昨晚我去了志雲的飯局。
Ｂ：你唔好車大奅啦，志雲今朝先由英國返嚟。
——你別胡扯了，志雲今早才從英國回來。
阿女，以後唔好同振聰交往咁多，呢個人專車大奅，信唔過嘅。
——女兒，以後別跟振聰交往太多，這個人專會吹牛，信不過的。
解釋：好多人寫成〔車大砲〕，其實本字係〔扯大奅〕，不過依家〔車〕已經衍生出〔胡亂說話〕嘅意思，類似北方話嘅［侃］，例如：〔車天車地〕，所以寫成〔車大奅〕亦可。
＊＊
二十七）執笠
情景：早一段時間，周時都聽到有公司倒閉嘅消息，［倒閉］廣東話叫［執笠］。
林伯間電視台長期蝕本，如果唔儘早改善經營策略，實聽執笠。
——林老先生的電視台長期虧本，要是不儘早改善經營策略，就等著倒閉。
Ａ：以前呢度有間雲吞麵店，點解而家唔見咗？
——以前這兒有一件餛飩麵店，怎麼現在不見了？
Ｂ：最近市道唔好，上個月執咗笠啦。
——最近市道不好，上個月結業了。
解釋：〔執笠〕可以加上一啲時態助詞，例如：〔咗〕、〔緊〕，好似〔執咗笠〕，有時亦可以省略成〔執咗〕。〔實聽〕有〔必定會］、［遅早會〕嘅意思，例如：噉打法實聽輸波（這樣打下去準會輸球）。
＊＊
二十八）弊傢夥／大鑊
說明：形容好麻煩［糟糕］嘅情況，有好多種表達方式。
弊傢夥，唔記得帶鎖匙添！
——糟了！忘記了帶鑰匙！
唔小心刪咗成個文件夾，今次大鑊喇！
——不小心把整個文件夾都刪了，這次問題可大了！
解釋：喺一般情況下，兩個詞都可以互換，但係亦有啲差別，〔弊傢夥〕一般係指特發嘅情況，而〔大鑊〕主要係強調事件嘅嚴重性，唔一定係特發，例如：〔我隻腳好大鑊，韌帶撕裂〕一句，就唔可以換成〔弊傢夥〕。廣東話嘅〔弊〕本身就係［糟糕］嘅意思，由佢衍生出另外幾個相似嘅俗語：〔弊一弊都冇咁弊〕、〔弊家了（liao1）〕、〔弊曬〕。
＊＊
二十九）同人唔同命
說明：形容人同人之間命運際遇嘅唔同，通常包含一種無奈感嘆嘅情緒。
Ａ：人又叫澤楷，我又叫澤楷，點解人哋老竇有幾百億身家，我老竇就得幾百蚊一個月嘅生果金？
——別人叫澤楷，我也叫澤楷，為什麼別人的老爸有幾百億身家，我老爸卻只有一個月幾百塊錢的長者金？
Ｂ：呢地啲咪叫［同人唔同命］囉。
——這就叫“同人不同命”嘛。
解釋：第一句嘅〔人〕係〔人哋〕嘅簡寫，表示〔別人〕嘅意思，例如：〔人有我有〕、〔人不犯我我不犯人〕。〔同人唔同命〕重有押韻嘅下句〔同遮唔同柄〕，人嘅命運各有唔同，正如同樣係［遮（傘）］，遮嘅［柄］都有唔同。
＊＊
三十）買棺材唔知埞
說明：形容人嘅行為將會引起好大嘅危險，而佢本人一啲都意識唔到，就可以用呢句俗語。
天雨路滑又大霧，你重開到成百公里時速，係咪買棺材唔知埞？
——天下雨，路濕滑，霧又大，你還開到上百公里的時速，你不怕死嗎？
明知呢條巷多賊仔，佢重夠膽死一個人帶住十幾萬現金行入去，真係買棺材唔知埞。
——明知道這條巷多賊，他還膽敢一個人帶著幾十萬現金走進去，真的不知死活。
解釋：〔埞〕係指〔地方〕，去邊度買棺材都唔知道，就係對死一啲觀念都冇，亦係廣東話所講嘅〔唔知死〕、〔唔識死〕。而〔夠膽死〕入面嘅〔死〕字係冇特別意思，純粹加強語氣，相當於〔竟然夠膽……〕。
＊＊
三十一）唔知個［？］字點寫
說明：同上題嘅意思相同嘅俗語有〔唔知個死字點寫〕，引申開去其他意思，就係〔唔知個？字點寫〕。
你個衰仔，擒到咁高，係咪［唔知個死字點寫］？
——你這不聽話的傢夥，爬到那麼高的地方，是不是不怕死？
嗰個芙碌姐姐，成日擺自己啲艷照上網，都［唔知個醜字點寫］嘅。
——那個芙碌姐姐，老是擺自己的艷照上網，連什麼叫羞恥都不知道。
解釋：唔知個［？］字點寫，相當於〔唔怕？］或［唔會？〕，例如：〔唔知個輸字點寫（贏定）〕，〔唔知個驚字點寫（未驚過）〕。〔擒〕係指用手腳一齊攀爬，例如：〔擒牆〕、〔擒高擒低〕。
＊＊
三十二）得個吉
說明：〔得個吉〕就即係〔一場空〕嘅意思，形容希望落空。
嗰日去咗六間公司見工，結果搞咗成日得個吉，一份都見唔成。
——那天到過六間公司求職，結果白廢一整天，一份工都找不成。
今晚等流星雨等咗成晚，點知得個吉，半粒流星都見唔到，流鶯就見到幾隻。
——今晚等了一整晚的流星雨，誰知道希望落空，半顆流星都見不到，流鶯倒見到幾隻。
解釋：由於廣東話嘅〔空〕、〔兇〕係同音，覺得（唔吉利），所以〔得場空〕就避諱成〔得個吉〕。〔成〕係強調一個整體，例如：〔成晚〕、〔成身〕、〔成個國家〕。
＊＊
三十三）得個［？］字
說明：〔得個〕之後唔係單單可以接個〔吉〕字，重可以接上各種各樣嘅〔字〕。
東亞嘅日本，韓國，朝鮮都入咗南非世界盃決賽週，而我哋嗰班［大牌］國腳，到時就淨係［得個睇字］。
——東亞的日、韓、朝都進了南非世界盃決賽週，而我們那幫［大牌］國腳，到時候就只有看的份兒。
車展有咩好去？嗰啲車你又買唔起，［得個恨字］。
——車展有什麼好去的？那些車你又買不起，只有羨慕的份兒。
解釋：〔得個？字〕嘅［？］通常係動詞，〔得個〕就係〔只能〕，〔只有……嘅份〕，又例如：〔得個講〕、〔得個做〕。〔恨〕，除咗〔痛恨〕，喺廣東話裡頭重有〔非常想得到〕、〔渴望〕嘅意思，例如：〔恨嫁〕、〔好恨食榴蓮〕。
＊＊
三十四）做個樣［係噉意／係咁意］
說明：為咗應付某啲事情而做個樣界人睇，廣東話叫〔係噉意〕。
外母呢排心情唔多好，今日煮嘅餸好難食，我［係噉意］扒咗兩啖飯就算數。
——丈母娘近日心情欠佳，今天做的菜很難吃，我隨便吃了兩口飯應酬過去。
新年大頭，［係噉意］畀封利是你！
——新年好日字，給個紅包你，意思意思。
解釋：喺〔係噉意〕入面，〔意〕要轉調讀成〔椅〕。
〔算數〕唔係指［算術］，而係［罷了］、［算了］嘅意思。
例如：我唔會就噉算數（我不會就此罷休）。
＊＊
三十五）話之你／話知你
說明：表示對某啲事漠不關心嘅態度，意思係〔唔關我事（管你那麼多）〕。
Ａ：我又失戀啊！——我又失戀了！
Ｂ：話之你，唔好嘈住我上網！
——才不關我的事，別打擾我上網！
邊個犯咗法都要受到制裁，話之佢係乜嘢高官有錢佬。
——誰犯了法都要受到製裁，不管他是什麼高官或有錢人。
解釋：一般視乎對象，可以用〔話之你〕第二人稱，或者〔話之佢〕第三人稱。另外，〔話之你／佢〕又可以引出條件句，相當於〔唔理、不管、無論〕嘅意思，例如：上面最後一句。
＊＊
三十六）十劃未有一撇
說明：係比喻事情先至啱啱開始，毫無頭緒／眉目。
Ａ：聽講你準備開公司喎，開業嗰日記住叫埋我。
——聽說你準備開公司，開業那天記得叫上我。
Ｂ：到時先算啦，而家十劃未有一撇。
——到時再算吧，現在離成事還很遙遠。
解釋：〔劃〕係指〔筆劃〕，呢句俗語本來叫〔十字未有一撇〕，以前練寫字，一般從橫、豎開始，所以好多人選〔十〕字來寫。當練咗好長時間，重只係寫緊橫、豎，未開始寫〔撇〕，所以〔十字未有一撇〕係用來比喻事情剛剛開始，以後要做嘅事重有好多。
＊＊
三十七）水蛇春咁長
解釋：形容事物過長而令人生厭，可以用俗語〔水蛇春咁長〕。
Ａ：得閒就嚟我個微博睇睇，呢個係網址。
——有空就來我的微博看看，這是網址。
Ｂ：個網址水蛇春咁長，邊記得住啊？
——網址這麼長，哪記得住？
嗰個領導講話水蛇春咁長，有成半人瞓著咗。
——那領導說話又長又悶，有過半人都睡著了。
解釋：〔卵〕喺廣東話叫做〔春〕，據講水蛇嘅［卵］係連成一條又相當長嘅，所以〔水蛇春咁長〕就比喻冗長而且令人生厭嘅嘢，有時可以用〔又長又臭〕代替。
＊＊
三十八）一匹布咁長
解釋：若果有某件事情說來話長，唔係三言兩語就可以講得清楚嘅話，就可以用〔一匹布咁長〕來形容。
Ａ：點解明哥同鵬仔咁大仇口嘅？
——為什麼明哥跟鵬仔結了這麼大的怨？
Ｂ：講起就一匹布咁長喇。
——說來就話長。
解釋：〔水蛇春咁長〕同〔一匹布咁長／成匹布咁長〕都係有〔長〕嘅意思，但係前句係指單一而簡單事情嘅冗長，而後句係指牽涉嘅事情多或者關係複雜，兩句係有啲差別嘅。
＊＊
三十九）攞命
說明：喺〔酒後駕車會攞命〕呢句入面，〔攞命〕攞佢嘅本意〔奪命〕，除此之外，重有其他嘅意思。
Beyond 嘅《情人》呢首歌，有幾句歌詞好攞命。
——Beyond 的《情人》這首歌，有幾句歌詞很令人動容之極。
攞命咯！要喺三十幾度高溫之下排幾個鐘隊先至入得場。
——真要命！要在三十多度高溫下排幾個小時的隊才能進場。
解釋：呢度嘅〔攞命〕大致係表示〔要命］、［接受唔到〕嘅意思，但係可以分別表示好嘅事情（第一句）同唔好嘅事情（第二句），亦都有人用〔攞膽〕來代替〔攞命〕嘅。
＊＊
四十）攞景定贈慶
說明：當責怪人哋喺某啲場合做出一啲事令人難堪，就會用到［攞景定贈慶］。
阿麗啱啱失戀，你兩個就喺佢面前曬恩愛，攞景定贈慶啊？
——阿麗剛失戀，你們倆就當她面表現得如此恩愛，這不是故意讓她難受嗎？
阿爺個展覽會開張大吉，寒少就大講隔籬間幼兒園嘅劈人事件，都唔知佢攞景定贈慶。
——爺爺的展覽會剛開張，寒少就大談隔壁幼兒園的砍人事件，分明是讓爺爺難堪。
解釋：〔攞景定贈慶〕呢句話用喺制止唔適當嘅行為，其中〔攞景〕係有意做嘅，而〔贈慶〕係湊熱鬧，呢兩種行為有時會引起其他人唔開心。〔曬〕有〔炫耀、擺顯〕嘅意思，例如：〔曬命〕、〔曬身家〕、［曬恩愛］等。
＊＊
四十一）打醒十二分精神
說明：表示〔格外留神，特別小心〕，可以用〔打醒十二分精神〕。
呢段路成日出事，你要打醒十二分精神摣車。
——這段路總是出事，你要非常小心開車。
搭車嘅時候一定要打醒十二分精神，隨時有賊仔伸手落你個袋。
——乘車的時候一定要格外留神，隨時有小偷把手伸進你的口袋。
解釋：［十分］已經係［滿分］，十二分就係超過滿分，強調要全神貫注，唔可以有半分走神。〔搭車〕同〔坐車〕嘅區別就係前者唔一定有位坐，所以對於企喺度〔搭車〕嘅人就更要〔打醒十二分精神〕防賊、防意外。
＊＊
四十二）甩底
說明：因為某啲人嘅變故而搞壞定好嘅計劃或者約定嘅事情，就可以形容嗰個人〔甩底〕。
林書記應承搞我個仔入重點學校讀書，點知最後甩底。
——林書記答應搞我兒子進重點學校讀書，誰知最後沒有幫忙。
為咗唔甩你底，我推曬今日所有約會。
——為了不失約於你，我推掉今天所有的約會。
解釋：瓦煲［鍋］一旦發生甩底（底部脫落）意外，裡面煮好嘅食物都會浪費曬，因為咁〔甩底〕比喻原來嘅計劃全盤打亂，意思近似〔放飛機〕，但係［甩底］帶有一定客觀因素，而且未必係指赴約，意思更加廣泛。
＊＊
四十三）一句講曬
說明：當講完一番話之後，可以用〔一句講曬〕來引出中心論點或者核心問題。
一句講曬，你肯唔肯幫我？
——說白了，你肯不肯幫我？
我講咗咁多，一句講曬，都係唔想你畀人呃。
——我說了那麼多，無非是不希望你被人欺騙。
解釋：〔一句講曬〕係插入語，根據對話嘅上下文可譯成唔同嘅書面表達方式，例如：〔總而言之〕、〔一言以蔽之〕、〔一句話〕、〔說白了〕，等等，跟喺佢之後嘅都係〔一句話就講完〕嘅總結性內容。
＊＊
小莫小於水滴，匯成大海汪洋； 細莫細於沙粒，聚成大地四方。
＊＊
譯：蕭南人．2012年3月28日
原：九唔搭八．2011年2月23日
＊＊
廣東話資料館
沒有留言:
張貼留言