2018年3月26日 星期一

香港[三合會]忠義堂


香港三合會組織,係源於清代南方嘅[三合會]。依家雖然冇直接嘅證據證明香港嘅三合會係由大陸南方三合會嘅分支同附屬,但係由香港三合會產生嘅時間,內部採用嘅入會儀式、組織制度,投票選舉坐館〔龍頭〕嘅方式,早期使用嘅禁條、誓詞、口號同暗語等等,完全可以話佢係由南方三合會輾轉移植而成,兩個地區確實係有好有密切嘅關係同淵源。

**

香港主要三合會組織

**

〔和〕字頭派系 和勝和〔老派〕   

和勝和,簡稱[勝和],佢嘅歷史可以追溯到1890年代,當時已經有好多廣東人來到香港打工,三邑人[南海/番禺/順德]、四邑人[新會/開平/恩平/台山]、客家人、圍頭人(佘佬)等團結成幫,佢哋一般自稱或者登記註冊為〔工人自助幫會〕、〔同鄉會〕、〔宗親會〕等等。喺1884年,第一個堂口正式成立,個名叫做〔和合圖〕,註冊為〔合法社團〕,歸類為〔工人自助幫會〕。

和字頭堂口:  和勝和、和勝義-勝義堂、和勇義、和義祥、

        和安祥、和安樂(水房)、和正樂、和群樂、

        和群義、和群英、合群英、和口英、和利群、

        和利和、和洪勝、和全勝、和聯勝、和勝堂、

        和義堂、和合圖(和合桃、硬殼)、和一平、

        和二平、和友和、和禾黃、和九指、和利廬、

**

〔14K〕洪發山忠義堂,簡稱〔洪門忠義會〕

全名:〔洪發山忠義堂,珠江水白雲香,廣州西關寶華路十四號〕

14K喺1947年由葛肇煌中將〔國民黨軍統頭領(戴笠)嘅得力助手〕建立。到1949年,因為國民黨喺大陸失去政權,由大陸走落香港再次成立,喺1960至1990年呢幾十年之間,14K曾經擁有近20萬會員,擴展成為全球華人三大幫會之一。

**

〔四大〕四大公司,泊碼頭。    

有道〔單馬聯同全港九〕或〔單義聯同全港九〕,即係幾個較為細形嘅幫會,結盟聯合起來保護自己社團嘅利益,唔畀大社圑瓜分。雖然佢哋並唔止四個社圑,但係合稱為〔四大公司〕。起初結盟係源於香港監房入面嘅擺檯制度,同一個社圑嘅囚犯會聚埋一齊,叫做〔一張檯〕。

四大公司堂口: 聯樂堂(單耳、單義)、

        馬交仔、

        同新和(老同)、同群英、同樂、

        聯英社(老聯)、聯順堂、

**

〔聯〕字頭派系 聯勝義、聯勝英、聯飛英、聯鴻英、聯桃英、

**

〔同〕字頭派系 同群英、同新和、同福堂、

**

〔東〕字頭派系 東聯社(老東)、東公社、東安堂、東英社、

        東安社、東安和、東福和、東群社、東群英、

**

〔潮州]、[鶴佬〕派系 新義安(老新)

新義安由向前〔民國安全局少將銜顧問〕喺1919年成立,1980年代會員人數有成20萬,90年代開始,唔少成員向大陸擴展,現時係香港第一大黑幫,成員估計約有25,000人。除咗香港外,新義安一般活躍喺英國、比利時、法國同荷蘭、東南亞等,同埋廣東。

潮州、鶴佬堂口:福義興(老福)、新義安(老新)、義勝堂、

        潮聯義、潮光社、三聖社、中秋月、大好彩、

        忠信堂、海陸豐互助社、敬義、義群、

**

〔新〕字頭派系 新興社(新記、新興)、新港堂、新華社(老作)、

**

〔廣〕字頭派系 廣聯勝(老廣、廣聯盛)、廣洪(廣雄)、

        廣聲堂、廣盛、

**

〔全〕字頭派系 全一志(老全)、全義軒、全志和、全合群、

        全聚英、全知然、

**



香港嘅三合會已經走入歷史階段,好多都經已畀政府瓦解,依家香港大約有57個三合會組織,大部分屬於細蚊型街頭幫派,絕大部份都係有名無實。不過,呢啲街頭幫派又開始蠢蠢欲動,接近20年幾乎冇出現嘅幫派掙地盤街頭火併,近年又好似有復辟嘅跡象。

**


http://lovelifecantonese.blogspot.hk/2018/01/blog-post.html

有人曾經講笑咁話,可能香港嘅〔三合會〕真係冇曬勢力同名全實亡,大幫大派嘅冇問題,同埋佢哋又已經上曬岸,但係細幫小派嘅就好淒涼囉,佢哋嘅幫眾同社團都要生存,都要搵出路,喺未來嘅日子,呢啲唔同派別嘅江湖中人,只有放棄之前(為忠義)做口號嘅〔三合會〕而走入歷史比較短(為公義)做口號嘅〔立法會〕。

**

譯:蕭南仁.2016年9月5日

**



**

香港風情。廣東話資料館

2018年3月22日 星期四

廣東音樂《賽龍奪錦》香港仔龍舟競渡[1937年]



賽龍奪錦,原本係一首絲竹樂曲,後來為咗表現樂曲嘅氣勢,就改編為吹打樂合奏形式,增加咗嗩呐同打擊樂器,使樂曲大為增色。全曲以開頭嘅音調來做基礎,加上唔停咁衍生同發展,重由表現龍舟比賽嘅內容出發,借鑒外來嘅作曲技巧,大量使用模進同變形等手法,係傳統樂曲之中比較少見嘅。



《賽龍奪錦》係描述南方端午節,龍舟競渡嘅嘅熱鬧情況。全支曲節奏輕快。開頭以嗩吶吹出號召性嘅引子,表示比賽開始。跟着係樂曲嘅主題,逐漸活躍,表現咗龍舟競發,生氣勃勃嘅景象。

然後係比賽正式開始,情緒逐漸熱烈,用彈撥同拉弦跳動嘅音調,配合鏗鏘嘅鑼鼓節奏,加入咗打擊樂,刻畫咗龍舟喺水上前進嘅形象。然後速度一路加快,節奏多變,就好似龍舟你追我趕,氣氛熱鬧。
最後吹響嗩吶象征比賽結束,結尾再現前一段嘅曲調,表現龍舟喺碧波上自由蕩漾,令人心怡。
**
1937年,香港仔龍舟競渡。





喺80年前,同今日嘅扒龍舟扒法唔一樣,似乎快啲,以前嘅人用快槳入淺水方式扒龍船,唔同依家嘅人,呢種扒法要每個人都要有好強壯嘅身體至可以。喺當時重未有公司贊助,亦未有制服,純粹係民間嘅傳統習俗,好多都係自發嘅競賽。

**
廣東音樂《賽龍奪錦》


 



《賽龍奪錦》又叫做《龍舟競渡》,係廣東音樂著名作曲家合柳堂嘅代表作。

**


賣菜歌[譜賽龍奪錦]1979年



主唱:李燕萍 填詞:潘焯

為求賺兩餐 隨街去賣菜 白菜 紹菜 重有西洋菜 玻璃生菜 與及塘蒿莧菜 芥蘭 菜心 重有香芹菜 貨式新鮮睇見都喝采 大檔擺開 任你挑選 各位有幫趁就嚟莫走開 每斤賣個零唧 微利也無礙
(微中取利,抵買抵食㗎老友) 新出菠菜 豆苗 喫落甜滑過韮菜 三兩斤仲大椰菜 畀番兩蚊 不須切開 幫襯我呢一個賣菜萍 你望發財你就發財 總之有鴻運到來
(幫趁吓啦先生,阿大嬸啊,認真又平又靚㗎) 啲芥蘭個六 抵食過西生菜 呢啲菜心個三 冇將價改 實際平賣 盼大眾前來 搵番多少米飯錢 就覺得心開 (公平交易,求其賺多少就算㗎喇。喂小姐,先生啊,幫襯吓喇) 啱啱新界運來 啲西芹與辣椒 洋葱芫茜韮菜 睇見的確令人愛 蘿蔔醃酸 炒鴨片 其實更加精彩 快手買啦塘蒿靚白菜 最抵買正式乾水嘅紹菜 少奶亞姑 洪哥亞彩 如果欲買菜 必須買新鮮靚菜 明碼實價 幫趁就快行來 咪避開

**
資料:廣東音樂。廣東話資料館


**

香港記憶[清潔海灘1970s]廣告



**

廣東話生活雜記

2018年3月19日 星期一

廣東[南粵國]大事記


廣東[粵],又稱[越]同[嶺南],秦始皇攻佔南越之後,將佢劃為[南海郡],之後趙佗就喺度建立[南越國]。漢武帝征服南越國,又將再設南海郡,郡治喺[番禺]。喺五代十國時期,劉龑喺番禺(興王府)建立南漢[大越國]。宋太祖滅[南漢國],復置[嶺南道],之後設[廣南東路]。到咗元朝,廣東屬江西等處行中書省管轄,又設[廣東道]宣慰使。又到明朝,改廣東道為[廣東行省]。之後又將廣東行省改為廣東承宣布政使司,通稱[廣東省]。

**
——————————————————————————————————

廣東大事記[歡迎提供資料修正]



呢件係公元前200年之前嘅一個[越國]嘅雕塑;喺嗰時嘅嶺南地區重係南越族[百越族]嘅地頭。到咗公元前110年嗰陣,控制住嶺南地區同而家越南北部嘅古國[南越國],畀漢朝帝國打冧咗,令到呢笪地喺歷史上第一次做咗中原皇朝嘅領土。雖然係咁,嗰時已經有南越族嘅人喺呢一帶度住。

**
——————————————————————————————————

前222年,秦王政攻滅天下,[戰國時期]宣告結束。
前221年,六國統一,秦王政自號[始皇帝],史稱[秦始皇],建立[秦朝]。
前219年,秦始皇發動[百越之戰],進攻西甌,駱越人。
前214年,秦始皇統一嶺南,南越[粵]地區被劃為[南海郡],
      定番禺為郡治同埋修築[番禺城],史稱[任囂城]。
前210年,秦始皇病逝,秦二世[胡亥]即位,但秦二世受趙高擺佈。
前209年,秦朝長期暴政激起戍卒陳勝、吳廣等[揭竿起義]。
前207年,秦王子嬰發動政變,誅殺趙高,喺軹道向劉邦投降,秦朝亡。

  **
  ————————————————————————————————

  南越[南粵]事記

  

  前219年,秦始皇統一咗六國之後,就派[屠睢]做主將、[趙佗]為副將,
        帶兵五十萬攻取嶺南同閩越地區。攻戰四年, 不過屠睢受襲戰死。
  前214年,秦始皇再派[任囂]、[趙佗]率領秦軍重新發動攻勢,
        佢哋好快就擊潰[西甌],南越地區就咁入咗秦朝嘅版圖。
  前210年,秦始皇病逝,由秦二世即位。
  前209年,秦朝暴政激起咗陳勝、吳廣嘅農民起義。
  前207年,趙佗將佢個仔[趙仲始]入贅[甌駱國],之後出兵攻打安陽王。
  前206年,秦王子嬰向劉邦投降,秦朝滅亡。
  前203年,趙佗起兵成功兼并[桂林郡]同埋[象郡]。
        佢喺嶺南地區建立[南越國],自稱為[南越武王]。
  前202年,項羽喺烏江自刎,[楚漢戰爭]宣告結束。
  前196年,劉邦頒布詔書,分封趙佗為[南越王],重派遣[陸賈]出使南越國。
        喺漢使陸賈勸講之下,趙佗接受由漢高祖賜畀佢嘅[南越王印綬]。
        趙佗臣服漢朝,南越國就成為漢朝嘅一個藩屬國。
  前195年,劉邦去世,佢個仔劉盈[漢惠帝]即位,兩國仍然維持友好關係。
        趙佗自稱為[南越武帝],又出兵攻打[長沙國]。
  前188年,漢惠帝去世,由年幼嘅劉恭[漢少帝]即位。
        實際上,係由劉邦嘅老婆[呂后]掌握朝政。
  前181年,呂后頒布關閉同南越國交界嘅關卡同市場政令。
        禁止任何商人向南越國供應鐵器同其它物資品。
  前180年,呂后病死,漢朝軍隊停戰。[閩越]、[西甌]同[駱越]都歸屬南越。
        趙佗開始以皇帝嘅身份發號施令,同漢朝成為兩個外交姿態平等嘅政權。
  前179年,漢朝太尉[周勃]剷除呂氏集團黨羽,迎立劉恆[漢文帝]即位。
  前156年,漢文帝去世,劉啟[漢景帝]即位,漢越兩國仍然保持表面上友好關係。
  前137年,趙佗去世,王位由孫[趙眜]繼承。
        趙眜對漢朝自稱[南越文王],喺南越國內就稱[南越文帝]。
  前135年,閩越王[郢]趁機向南越國發動戰爭,趙眜致信漢武帝,請求處理此事。
        漢武帝隨後就將[閩越國]一分為二;
        立前任閩越王[無諸]孫丑為[越繇王],立余善為[東越王]。
  前125年,趙眜病重,喺漢朝做宿衛嘅仔[趙嬰齊]返去南越國繼承王位。
  前113年,趙嬰齊病死,諡號[南越明王]。太子[趙興]即位,母樛氏為太后。
        漢武帝派遣安國少季出使南越國。
  前112年,南越丞相[呂嘉]等人發動叛亂,殺死趙興、樛太后同漢朝嘅使者。
        改立趙建德為新任南越王。
  前112年,秋,漢武帝調遣十萬人兵分五路進攻南越。南越國屬下各郡縣,
        包括蒼梧王趙光,桂林郡監居翁,揭陽縣令史定等都不戰而降。
  前111年,冬,楊仆率領精兵攻破番禺城北門,南越軍戰敗。
        蒼梧,桂林郡,揭陽縣投降。呂嘉同趙建德出走,但畀南越國郎官擒獲。
        漢朝平定(攻佔)南越國,南越國滅亡。
  前110年,漢武帝喺平定南越國之後,將南越國嘅領地分設咗七個郡。
        包括:南海、蒼梧、鬱林、合浦、交趾、九真、日南。

  **
  ————————————————————————————————

  南越國文帝[絲縷玉衣]

  

  呢件叫做[絲縷玉衣],係南越國文帝趙眜[趙佗嘅孫]嘅殮服,
  喺現時出土嘅[西漢玉衣]入面,係唯一嘅一套絲縷玉衣。
  件玉衣係1983年喺廣州[南越王墓]入面發現嘅,
  依家放咗喺廣州嘅[西漢南越王博物館]。
  呢件玉衣長[1.73]米,由[2,291]塊玉片組成,
  分別有頭套、上身衫筒、兩個袖筒、一對手套、兩個褲筒同埋一對鞋,
  一共由十個部份,用絲線同絲帶編綴組合而成。

  **
  ————————————————————————————————

前206年,秦朝亡,劉邦同項羽嘅[楚漢之爭]開始。
前204年,南海郡尉趙佗建立[南越國]定都[番禺]。
      南越國係以秦朝南海、桂林、象三郡基礎上建立。
前202年,楚漢之爭結束,最後劉邦正式稱帝,建立[漢]。
前196年,趙佗向劉邦稱臣,南越國成為西漢一個[外臣]。
前183年,趙佗開始稱帝,閩越、夜郎、同師等臣屬於南越國。
前181年,漢朝呂后頒布關閉同[南越國]交界嘅關卡同市場,
      禁止向[南越國]出售鐵器同其它物品嘅政令。
前179年,南越國與西漢修好,趙佗再次向西漢皇帝漢文帝稱臣。
前156年,漢文帝去世,劉啟即位,漢越兩國保持表面友好關係。
前137年,趙佗去世,太子趙始已死去,由孫趙眜即位。
前135年,閩越王[郢]向南越國發動戰爭,趙眜求漢武帝處理。
前125年,趙眜去世,於漢朝當警衛嘅趙嬰齊回國即位。
前118年,漢武帝廢半兩錢始鑄[五銖]錢,通稱[郡國五銖]。
前113年,南越呂嘉殺死趙興,立趙建德為新帝,與西漢對峙。
      漢元鼎四年鑄造[三官五銖]錢,成為全國統一貨幣。
前112年,漢武帝調遣十萬人兵分五路進攻[南越國]。
前111年,漢朝征服南越國,設立七郡,南海郡治設喺[番禺]。
     [南海、蒼梧、鬱林、合浦、交趾、九真、日南]
前110年,漢朝楊仆率軍從合浦郡徐聞縣渡海,占領咗海南島。
      設置[儋耳]、[珠崖]兩郡,同前七郡同隷屬交州刺史部。
前106年,漢朝將南海郡劃入[交州],包含越南北部全境。
前049年,漢宣帝時期,五銖錢於銅質、形制同錢文等更趨完善。

0008年,王莽迫孺子嬰退位,[西漢]結束。
0009年,王莽迫孺子嬰退位,篡漢自立[新朝]。
0023年,更始軍仍攻入長安,王莽死於未央宮漸臺,[新朝]亡。

0025年,劉秀[漢光武帝]建立[東漢]。
0036年,漢光武帝擊潰赤眉軍後一統天下。
    九真徼外蠻里張游,率種人慕化內屬,封為歸漢里君。
0189年,東漢靈帝死後,東漢長期混亂。
0192年,越南占族人區連建立[占婆國],以[順化]為界。
0203年,交趾正式改為[交州刺史部]。
0210年,建安十五年,孫權遣步騭為交州刺史,揮師南征。
0217年,三國時期,吳國交州刺史步騭將州治遷回[番禺]。
    步騭擴建城郭,後稱為[步騭城]。
0220年,漢獻帝禪讓,曹丕篡位,[東漢]結束。

0220年,曹丕迫漢獻帝劉協禪讓帝位,篡漢為[魏]。
0221年,劉備於成都稱帝,國號為[漢]。
0222年,孫權於吳國舊地稱帝,定國號為[吳]。
0223年,諸葛亮平叛南中之後派李恢領交州刺史,爭奪交州。
0226年,東吳將交州分為[交州]同「廣州]兩部分。
0229年,東吳孫權於南郊正式登基為帝,改年號為[黃龍]。
0265年,魏元帝曹奐禪位,[曹魏]亡。

0265年,司馬炎逼迫魏元帝曹奐禪位,改號為[晉]。
0280年,西晉滅[孫吳]而統一天下。
0281年,西晉大秦使者循海道由廣州登陸,到達京城洛陽。
    印度僧人[迦摩羅尊]來到廣州,建造佛寺仁王寺。
0316年,北方進入五胡十六國時期,[西晉]滅亡。

0317年,晉朝宗室司馬睿於建康稱帝,[東晉]建立。
0331年,東晉咸和六年,東莞立縣寶安,隸屬東官郡。
    香港屬寶安縣管轄,澳門屬新會郡封樂縣。
0420年,劉裕取代東晉政權建立[宋],[南朝]第一個朝代。
0439年,北魏統一,正式與南朝宋形成[南北兩朝]對峙。
0479年,南朝第二個朝代,為蕭道成所建。史稱[南齊]。
0502年,南朝南齊宗室蕭衍稱帝,改國號為[梁]。
0557年,南朝陳霸先[陳武帝]剛建立陳朝,面臨北朝入侵。
0581年,北周靜帝禪讓帝位於楊堅,[北周]亡。

0581年,北周靜帝禪讓帝位於楊堅,建國[隋]。
0588年,南朝陳禎明二年,復改東莞郡為東官郡。
0589年,隋朝滅南朝陳,統一天下,[南朝]結束。
0590年,隋朝開皇十年,廢新會郡,澳門改屬寶安縣。
0601年,隋朝仁壽元年,廣州因避太子楊廣之諱而改為[番州]。
0607年,隋朝大業三年,復置南海郡,屬[番州]。
0619年,唐朝王世充廢隋恭帝楊侗,[隋朝]亡,

0619年,李淵迫使隋恭帝禪位,建國[唐朝]。
0621年,唐朝武德四年,復置[廣州],
    初為[總管府],後改[都督府]。
0627年,唐朝貞觀元年,置嶺南道。
0661年,唐朝顯慶六年,廣州設市舶使,總管海路邦交同外貿。
0736年,唐朝開元廿四年,香港屬循州[惠州],設屯門軍鎮。
0757年,唐朝至德二年,廢寶安縣,澳門改屬東莞縣。
0758年,唐朝罷嶺南道採訪使,改設嶺南節度使,僅轄廣東地區。
0862年,唐朝咸通三年,嶺南分東、西二道,廣東屬嶺南東道。
0879年,唐朝乾符六年,黃巢軍攻占廣州,殺害廣州[蕃商]。
0907年,朱全忠迫唐哀帝禪讓,建國[後梁],[唐朝]亡。

  **
  ————————————————————————————————

  南漢[大越國]事記

  
  
  0894年,嶺南封州(廣東封開)刺史劉謙去世,劉隱繼承父職。
  0896年,劉隱出兵肇慶、廣州,成為兩廣地區最大割據勢力。
  0905年,劉隱任清海軍(嶺南東道)節度使。
  0907年,劉隱受朱全忠[後梁]封為[彭郡王]。
  0909年,劉隱被改封為[南平王]。
  0910年,劉隱又被改封為[南海王]。
      女兒[增城公主]嫁畀大長和皇帝鄭仁旻。
      女兒[清遠公主]嫁畀閩國太子王延鈞。
  0911年,劉隱去世,細佬劉龑(劉巖)襲封[南海王]。
  0917年,劉龑喺番禺(興王府)稱帝,國號[大越]。
  0918年,劉龑以漢朝劉氏後裔嘅身份改國號為[漢],史稱[南漢]。
  0937年,南漢交州兵變,屬將矯公羨殺死主管官員,割據一方。
  0938年,交州矯公羨兵變,屬將吳權領兵攻打矯公羨,矯公羨求救於劉龑,
      劉龑封佢個仔[劉洪操]為[交王],然後領兵進攻打吳權。
  0939年,吳權打敗漢軍,佔據交州稱王建立吳朝,即[越南吳朝]。
  0941年,劉龑病逝,三仔劉玢[劉弘度]即位。
  0943年,劉玢去世,細佬劉晟[劉弘熙]即位。
  0958年,劉晟去世,大仔劉鋹[劉繼興]即位。
  0970年,宋朝派潭州防禦使潘美攻打南漢。
  0971年,宋軍節節進逼,劉鋹投降,南漢亡。

  **
  ————————————————————————————————

0907年,朱溫篡位建[後梁],[五代十國時期]開始。
0917年,五代十國時期,劉龑建立[南漢國],定都[興王府]。
0939年,吳權打敗漢軍,佔據交州稱王建政,即[越南吳朝]。
0960年,趙匡胤發動兵變,強迫後周末帝禪讓,建立[北宋]。
0971年,北宋太祖趙匡胤滅[南漢國],廢興王府,復稱廣州。
    復置[嶺南道],重喺廣州設立市舶司。
0979年,北宋太宗消滅北漢,統一中原,[五代十國時期]結束。
0997年,北宋設廣南東路,廣州屬之並為治所。
1038年,大慶三年,党項人李元昊獨立稱帝,建立[西夏]。
1115年,松花江流域女真族[滿族],建立[金國]。
1125年,金國滅遼國。
1127年,靖康元年,金國攻破北宋首都汴京,[北宋]滅亡。
1170年,乾道六年改為廣東路廣州府。
1276年,南宋端宗趙昰登基,改元[景炎],逃到香港南澳島。
    香港九龍城嘅宋王臺同侯王廟都係紀念宋端宗而建。
1278年,南宋景炎三年,宋端宗喺碙洲梅尉(香港梅窩)病逝,
    陸秀夫帶幼主[宋帝昺],逃至新會至南海一帶。
1278年,元朝至元十五年,江西行中書省轄廣東道同廣州路治。
1279年,至元十六年,崖山之役後,[南宋]滅亡。

1279年,元朝統一,之後又確立[廣州]地區統治。
1280年,至元十七年,改翔龍府為廣東道廣州路。
1286年,至元二十三年,廣州恢復市舶司設置。
1368年,明軍攻陷元大都,元惠宗北逃,[元朝]結束。

1368年,朱元璋於[應天府]登基,國號[大明]。
    明朝洪武元年,改廣州路為廣州府,為廣東布政使司。
1369年,明朝洪武二年,改廣東道為廣東行省。
1376年,廣東行省改為廣東承宣布政使司,通稱[廣東省]。
1514年,明朝正德九年,葡萄牙派兵攻佔香港屯門。
1521年,正德十六年,明軍向葡萄牙開戰,史稱[屯門海戰]。
1567年,明朝隆慶元年,開放海禁,廣州專為外商服務。
1574年,明朝喺蓮花莖設立關閘,由海防副使管理。
1608年,廣東香山縣令蔡善繼為加強管理頒布《制澳十則》。
1630年,明將袁崇煥以通虜謀叛罪名遭判凌遲,死於北京甘石橋。
1644年,李自成攻入北京,明思宗煤山上吊自殺,[明朝]滅亡。

1644年,女真人入關驅逐李自成,進入北京,建立[清朝]。
    明朝馬士英擁護福王喺應天府稱帝,[南明]成立。
1646年,南明隆武二年,新安一帶發生大饑荒。
    南明桂王朱由榔喺廣東肇慶稱帝,即[永曆帝]。
1647年,清順治四年,設兩廣總督,政權分省、道、府、縣四級。
    南明永曆元年,清兵攻陷廣州屠城,新安縣歸清統治。
1654年,南明永曆八年,李定國三攻新會,鄭成功軍隊失期未至。
1661年,南明永曆十五年,永曆帝去世,南明正式滅亡。
1662年,清康熙元年,下遷界令,加上海禁,廣東受嚴重影響。
1669年,清康熙八年,朝廷允許弛禁,原有宗族陸續遷回,
    清朝廣東省政府鼓勵外來宗族遷入廣東。
1731年,清朝喺澳門前山寨設立縣丞衙門,為香山縣派駐機構。
1744年,清朝又設立澳門海防軍民同知指揮縣丞衙門同澳門駐軍。
1749年,清朝頒布《澳夷善後事宜條議》,加強對澳門全面管治。
1757年,清朝下令鎖國,廣州成為對西方國家開放通商港口,
     史稱[一口通商],由[廣州十三行]壟斷對外貿易。
1822年,廣州十三行街大火,有四千萬兩白銀化為烏有。
1840年,第一次鴉片戰爭爆發,英國遠征軍封鎖廣州珠江口。
1841年,清廷同英國草擬《穿鼻草約》。
1841年,廣州城郊三元里發生民眾抗擊英國侵略者鬥爭。
1842年,清政府戰敗,簽訂《南京條約》,開通廣州港口通商。
    香港割讓畀英國之後,闢為自由港。
1856年,第二次鴉片戰爭爆發,英軍炮轟廣州城。
1858年,英法聯軍攻陷廣州,廣東巡撫投降。
    外人委員會成立,廣東政府成為傀儡政府。
1860年,第二次鴉片戰爭戰敗,清政府簽下《中英北京條約》,
    九龍半島南部連同鄰昂船洲永久割讓畀英國。
1861年,廣州沙面島畀英法兩國占領。
1898年,英清簽訂《展拓香港界址專條》一系列租借條約,
    租借九龍半島、新界同兩百多個島嶼,租期99年。
1910年,倪映典領導嘅[燕塘起義]失敗。
1911年,黃興發起嘅[黃花崗起義]失敗。
1912年,袁世凱迫使宣統帝溥儀頒布退位詔書,[清朝]結束。

1912年,中華民國成立後,廢除[廣州府],成立廣東軍政府。
1917年,孫中山抵達廣州準備另立軍政府。
1918年,廣州市政宣布拆除廣州城牆,將舊城牆基開闢為馬路。
1921年,中華民國政府成立,選孫中山為大總統,喺廣州就職。
1922年,廣州市政廳成立,廣州正式建市,成為中國第一個市。
1924年,廣州舉行國民黨[第一次全國代表大會]。
    黃埔軍校成立,蔣中正任校長,周恩來作政治部主任。
1925年,省港大罷工爆發,示威被鎮壓,史稱[沙基慘案]。
    中華民國國民政府喺廣州正式成立。
1926年,廣州東校場內,蔣中正帶領國民革命軍誓師北伐。
1927年,廣州四一二事件發生,李濟深宣布戒嚴。
    廣州起義事件發生,中共首次建立紅色政權。
1930年,廣州升格為特別市,但同年改回省轄市。
1936年,陳濟棠發動[兩廣事變],最後失敗走咗去香港。
    粵漢鐵路修通。
1938年,日軍進攻廣州,唔到半個月廣州就淪陷。
1942年,香港淪陷後發生糧荒,又有超過46萬人回[穗]。
1945年,中華民國國軍進入,廣州光復。
1947年,廣州灰復為院轄市(直轄市)。
1949年,中華民國政府從南京南遷廣州,廣州成為臨時首都。

1949年,中華人民共和國人民解放軍進駐廣州,廣州被解放。
    廣州成為新中國中央直轄市、廣東省人民政府駐地。
1954年,廣州被改為省轄市。
1956年,廣州推行公私合營,所有私人經營嘅商號都要被充公。
1957年,廣州開始舉辦[中國出口商品交易會 Canton Fair]。
    漢語拼音方案出台後,廣州名被改為[Guangzhou]。
1966年,文化大革命發生,廣東境內陷入混亂狀態,
    廣東地區經濟近乎癱瘓,名勝古蹟遭到毀壞。
1978年,習仲勛擔任[廣東省]省委書記。
1984年,廣州被劃為國家計劃單列城市。

**
——————————————————————————————————

廣州省城內外仕圖



廣州,呢個名由三國時期東吳起出現,喺呢個名嘅之前同之後,亦經歷過先秦時期嘅[南武城]同[楚庭]秦代嘅〔番禺城〕亦稱[任囂城]同[趙佗城]、晉代嘅[五羊城]、唐代嘅〔廣州府〕、五代時期嘅南漢〔興王府〕、宋代嘅[翔龍府]明代復用[廣州府]等名字嘅變遷,而事實上,兩千幾年之前,喺南國嘅呢座城市就喺越秀山麓、珠江河畔出現咗!

**
——————————————————————————————————



香港嘅歷史可以追溯至新石器時代。但係由一條香港村轉變成一個大城,就要由1840年大清國同英國打鴉片戰爭講起。

1841年,清廷戰敗,英國人由水坑口登陸,正式佔領香港島。
1842年,清廷簽咗《江寧條約》,正式割香港島畀英國。
1843年,香港開始發展,仲計劃起一座[女皇城],初譯做[域多利城]。
1845年,英國派人來香港開始規畫同設計起新城,譯名為[維多利亞城]。
1860年,清廷再簽《北京條約》,再割埋九龍半島畀英國。
1898年,清廷又簽埋《展拓香港界址專條》,租新界畀英國99年。

於是,香港、九龍、新界,三地合埋就係依家嘅「香港」。

**
——————————————————————————————————

歷史風情。廣東話資料館

香港記憶[香港華探長]


香港記憶[香港華探長]

1923年,香港刑事偵緝處[CID]成立,除咗負責偵緝調查罪案同拘捕疑犯之外,同時又要管理部分香港市民嘅政策事務。當時,警隊嘅英籍警官都係駐守喺中區總部,俗稱〔大館〕,即係舊〔中區警署〕,主要負責安排文件同下達命令等案頭事務。環頭差館嘅雜差房亞頭基本上係探長;環尾差館嘅雜差房亞頭多數係探目或者高級探目。

呢啲探長喺當時嘅數目係非常少,佢哋直接負責成個環頭嘅治安,對各個環頭,即係依家叫〔警區〕嘅社團都非常熟悉。就係咁,各環頭探長就制衡著各大幫會同埋社團。探長同地區人士嘅關係好微妙,喺相互配合之下,建立起另類嘅默契,所以當時極少發生嚴重罪案。只要地區人士唔去騷擾工商業界同中上層嘅市民,例如謀殺、持械行劫同綁架等嘅嚴重罪行,佢哋嘅[偏門]生意就唔會受到太大嘅壓制。

1949年,警隊為方便管理就增設咗總探長職級,將當時表現最為出色嘅探長[姚木]同[李就勝]分別晉升成為香港同九龍區首兩位總探長,直接向獨立運作嘅刑事偵緝處處長〔大鬼頭〕負責,總探長有權力調度全體嘅偵探人員,使到權力更為集中。探員嘅數目亦有增加,多數由表現出色嘅軍裝部轉任。

**

四大探長〔原裝組合〕

香港喺1950年代,有四位探長負責處理三合會問題。由於所有嘅地區勢力都唔敢挑戰呢四位探長,所以佢哋係當時極受地區華人嘅敬畏。

呢四位探長包括:

。劉 福:1949年升任為九龍區探長,駐守油麻地警署。
     1952年獲得晉升為香港島、九龍、新畀三區總探長。

。黎民祐:1956年升任做探長,1969年提早退休。
     曾經駐守灣仔、深水埗、黃大仙、油麻地等雜差房。

。梁德霖:曾經駐守深水埗警署,1964年喺大澳警署時退休。

。呂 樂:1956年升任新界區探長,駐守荃灣警署。
     1962年升做香港島區總探長。

**

四大探長[風雲組合]

香港喺六七十年代警隊入面曾經出現嘅四個華籍探長,呂樂、顏雄、韓森、藍剛,佢哋都係因為以權謀私,包庇[黃、賭、毒]貪污發達。收尾喺1977年一次特別嘅行動入面,佢哋同埋其他幾十個華探長一齊畀 ICAC 通緝,全部都搞到要走路或者坐監收場。



**

呂樂,又名[呂慕樂],人稱[樂哥]、[阿叔],廣東汕尾海豐鶴佬人。

1940年加入香港警隊,初時做軍裝,冇耐之後轉咗做便衣,喺雜差房駐守時得到探長陳立賞識同提攜,喺1951年由散仔升做沙展,同時又調去深水埗警署。1962年升做香港島區總華探長,任職期間估計身家累積至5億,畀人叫佢做〔五億探長〕。佢喺1968年退休,1973年移民加拿大,1974年畀廉記[ICAC]通緝,叫佢做[呂老虎],但係無辦法將佢引渡返來香港。之後嘅30幾年,呂樂多數都係住喺台灣,喺2010年因為胃癌喺加拿大病逝。

**

顏雄,喺香港保衞戰之後加入香港警隊,曾經跟過呂樂。

1941年加入香港警隊,喺九龍城寨駐守時受到賞識,畀呂樂拔擢。佢對城寨嘅毒犯非常熟悉,佢唔只貪污,自己重做埋毒販,1972年轉做警署警長。廉政公署喺1974年成立之後2年內,查出警隊入面20幾個貪污集團,有幾個警司畀廉記拘捕。廉記重查到販毒集團喺1975年3月開始喺油麻地果欄一帶活動。當時喺油麻地警署嘅顏雄知道大限將至,就用旅遊嘅名義出境走佬去泰國,之後廉記喺1977年1月正式通緝顏雄。

**

韓森,人稱[長洲仔]、[肥仔B],籍貫廣東東莞,香港長洲出生。

1940年加入香港警隊,喺1950年成功破解一單警察運金案。喺1966年升任探長,駐守喺油麻地同旺角區。1969年升做新界區總華探長,由於當時嘅總督麥理浩有意嚴厲打擊貪污,而只係做咗兩個幾月總探長嘅韓森收到風,隨即就申請提前退休,諗住離開香港。1974年廉政公署成立之後就通緝韓森,為咗逃避拘捕,佢喺1974年移民加拿大,之後再走去到台灣,喺1999年8月病逝。但係香港政府冇放過佢喺貪污返來嘅資產,喺2006年,韓森嘅後人同廉記達成庭外和解協議,佢哋向香港政府交出值1億4千萬嘅資產來做交換條件,結束拖拉咗成30年嘅官司。

**

藍剛,原名[藍文楷],綽號〔無頭〕,因為鍾意〔無厘頭鬧人〕。

1947年加入香港警隊,四大探長之中佢加入行比較遲,但係升職就好快,其中一個原因係佢有[拼命三郎]嘅精神,做事從來都係有前冇後。而且重聽聞話佢槍法好準,喺警隊入面有神槍手嘅稱號。1962年升做九龍兼新界區探長,只係低呂樂一級。1968年,藍剛得到英女皇頒授勳章,1969年退休。佢知道時勢唔對就走咗去外地避下風頭,1974年畀廉記[ICAC]通緝。1989年因為心臟病喺泰國逝世。

**



**

刑事偵緝甲級高級警長〔總華探長〕:俗稱[總警長、總咩、老總、三柴半]

姚 木:又名姚佑邦,廣東潮陽縣城人〔綽號:石鬼仔〕    
    1919年加入警隊,1949年升任香港區總探長;
    1951年退休,1956年中風右邊身癱瘓,1957年用自衛手槍自殺。

李就勝:[]
    1949年升任九龍區總探長。

劉 福:廣東東莞人[佢嘅侄係前南華守門員劉建中]
    1949年升任九龍區探長;
    1952年升任全香港、九龍同新界三區總探長。

呂 樂:廣東汕尾海豐人〔綽號:樂哥/呂老虎〕
    1940年加入警隊,1962年升任香港區總探長,1974年畀廉記通緝;
    1973年偕同老婆重有8個仔女移民加拿大,之後又到臺灣住。 

藍 剛:香港出生〔綽號:無頭〕
    1947年加入警隊,1962年升任九龍區總探長,1977年畀廉記通緝;
    1969年提前退休同埋以出境旅遊為名走到泰國避風頭。

鄧 耘:廣東開平人〔綽號:斯文探長〕
    1946年加入警隊,1969年升任香港區總探長,1977年畀廉記通緝;
    1974年退休,最先走到澳門避風頭,攞到葡國護照之後一家去咗巴西。

韓 森:廣東東莞人,香港長洲出生[綽號:長洲仔]
    1940年加入警隊,1971年升任新界區總探長,1974年畀廉記通緝;
    1974年一家移民加拿大,之後佢再潛逃去到臺灣。

劉振斯:[]
    1981年6月畀廉記查而走去臺灣,係香港最後一個總探長。

**

刑事偵緝高級警長〔華探長〕:俗稱[警長、咩喳、老虎、新郎哥]

石 堆:東莞寮步田心村人[]
    1911年加入香港警察隊,1923年獲晉升為探目,1932年升做探長。
    駐守油麻地差館,負責指揮九龍區,兼且管理新界區華人偵探隊。

黎民祐:[]
    1935年加入警隊,1956年升任做探長,1969年提早退休;
    1976年廉記重開調查黎民祐,1979年畀法庭裁坐監兩年。

梁德霖:[]
    1964年喺大澳警署時退休。

黃 水:[]
    退休之後皈依,喺灣仔開咗間齋菜館。

曾啓榮:廣東梅州五華人,香港出生[]
    1940年加入警隊;1975年畀廉記拘捕,1976年潛逃去咗臺灣。

陳志超:[]
    1940年加入警隊。

顏 雄:廣東潮汕人,香港出生[]
    1942年加入警隊,1972年轉任警署警長,1977年畀廉記通緝。
    1975年顏雄發現世色唔對,就以旅遊名義出境,潛逃去泰國。

陳 立:[]
    1951年提攜呂樂由探員升任為探目。

陳 強:[綽號:師傅強]駐守荃灣

鄧 生:〔]
    詠春體育會創辦人,1969年成立中國國術總會。

張榮錦:[]
    1952年升任九龍區探長。

周雲川:[]

陳 殷:[]

石 磊:[]

鄧 耕:[]

王明星:[]

鍾長有:[]

何成端:[]

尹 濤:[]

黃 明:[]

張榮樹:[]

馬文亮:[]

劉昌華:[]

黎 兆:[]

**

軼聞[想升職就要向英國高層獻金]

當時想升為探長,除咗要有資歷、才幹、功績同埋人際關係之外,必須嘅係要向嗰啲尸位素餐嘅英國高層獻金。所以同啲偏門人士關係好嘅高級頭,就比較容易得到各大幫派嘅資助用嚟升級。一旦成功升咗做探長之後,從此就互相關照,畀多少特權嚟作為報酬。啱啱上位嘅探長,因為需要功積嚟證明佢嘅能力,通常都會同啲黑社會有〔買案〕嘅交易嘅。

**

咩叫[洗太平地]?



其實呢句係港式粵語,原意係講1894年喺香港爆發嘅一場嚴重鼠疫。當時疫情爆發最厲害嘅地區,就係上環太平山街一帶。為咗消滅鼠疫,政府採取咗嚴厲嘅清潔措施,用好大量嘅殺菌消毒藥水,為太平山街嘅居民洗地,又逐家逐戶用硫磺熏屋,最後先至撲滅鼠疫。

喺當時,重有兩句說話係好流行嘅:
。過街老鼠,人人喊打
。電燈杉掛老鼠箱

而[洗太平地]呢句話,後來又畀人借來比喻警察掃蕩[黃、賭、毒、黑]嘅行動,意思係指掃蕩之後,社會就會重新[太平]嘞。

製作:香港電台電視部

**

香港風情.廣東話資料館

2018年3月16日 星期五

老公使用手冊[V-2016 版]



老公使用手冊 Husband User's Manual V-2016

鑒於有好多女性對於〔老公〕嘅選擇、相處同使用不當嘅問題,本公司〔好人有限公司〕特別編寫咗一份針對老公使用嘅說明書,係用嚟介紹喺日常生活上一般〔老公〕嘅功能、相市處方式同安全性,以免啲女性使用者周圍亂揀同濫用感情,造成冇法估計嘅後果。

**

【產品名稱】

民間俗稱:老公、衰佬、亞仔老竇。

街邊通稱:前世、死佬、寃氣鬼。

文學名稱:丈夫、夫君、先生。

古代通稱:相公、官人、外子。

誇獎名稱:大爺、老爺。

大陸通稱:愛人。

動物學稱:麻甩佬。

生物學稱:已婚男性。

技術名稱:專用活動提款機。



**

【混合成分】

水、蛋白質、脂肪、核糖核酸、碳水化合物,多種礦物質、香料等。

老公具有七情六慾,外加防腐劑[表面比女性老得慢一啲,但係條命就短一啲]。



**

【化學性質】

1]四大含量元素:氧、氫、碳、氮,佔總重量96%左右。

2]七種補充元素:磷、硫、鈣、鎂、鉀、鈉、氯,佔總重量3.95%。

以上11種又叫做〔宏量元素〕,其中氧、氫組成〔水〕,水約佔總重量70%;氧、氫、碳、氮、磷、硫組成〔蛋白質、脂肪和核酸〕;鈣組成〔骨骼、牙齒〕,而鎂、鉀、鈉、氯組成血液同各種體液。

除咗以上11種宏量元素之外,重有50幾種微量元素(佔總重量0.05%〕,其中鐵、銅、鋅、鈷、錳、錫、鉻、鎳、鉬、硒、鍶、釩、碘、氟、硼、矽16種微量元素組成〔酶、輔酶、激素〕等。



**

【理化性質】
老公呈現鹼性,氣味酸中帶鹹、重有啲濕味;好易溶喺風花雪月,有花天酒地嘅可能;唔易溶喺面對現實,比較沉迷於生活過情多過接受結果。

**

【產品特徵】
老公為細長條塊狀糖衣生物,內有高密度鈣化物支撐,內部五臟俱全,獨欠〔膽量〕唔夠。表面經常塗上〔衣冠楚楚〕,〔甜言蜜語〕等物質。除咗外衣,就呈現白斬雞之肉色,外觀同之前略有差異;老公又會隨著時間演變,會出現〔鮪魚肚〕、〔駱駝背〕同〔禿鷹頭〕等現象,但仍然可以勉強繼續使用。

**

【產品功能】
老公主治〔單身恐懼〕同〔母愛氾濫〕等精神官能嘅絕症。對〔失戀〕、〔相思病〕、〔欠食症/冇啖好食〕都有特別顯著嘅療效。

**

【用法用量】
老公僅為外用,建議一生一件,要用〔細心〕、〔浪漫〕、〔溫柔〕、〔體貼〕嘅方式使用,嚴禁〔日照三餐〕、〔朝三暮四〕使用。千祈唔好使用遙遠控制模式,老公喺遠距離容易失控,安全控制距離為[一丈]。

**

【儲藏細則】
通常喺常溫之下即可保存,室內有通風處更佳。如果喺室外,就要避免喺女性成群嘅地方存放。使用期間,尤忌將老公放喺外邊過夜儲藏。

**

【包裝資料】
各種西裝、休閒衫褲,要隨季節變化而隨時更換。最重要嘅係老公嘅包裝只要舒適保暖即可,切勿過度裝飾,會引起其他女性動物對老公有過敏反應,尤其係〔路邊野花〕同埋〔黃皮樹了哥〕。

**

【有效限期】
老公嘅使用限期,視乎安全同幸福程度而定,使用期最長可達90年,最短嘅一日就玩完。

**

【注意事項】
老公僅適用喺成年單身女性。使用時,須要小心謹慎。如使用期間導致使用者出現〔鼻青臉腫〕、〔精神不振〕等現象,就必須馬上停止使用,重要攞埋相關文件,向法院同保險公司申訴理賠。

**

【禁忌須知】
無論咩時候,都唔可用說話刺激老公嘅〔核心〕價值,例如講佢〔好短〕同〔冇用〕等之類,呢啲說話會令老公自信同自尊嚴重受創,容易做出不忠同火車轉灣〔出軌〕嘅行為。

**

【產品規格】
老公通常為140至165磅左右,如果出現特殊情況,請搵健康嘅家庭醫生處理。身體偏重或超標嘅使用人士,唔會影響使用功能。

**

【批准文號】
見有效〔結婚證書〕或見〔鑽戒說明書〕內頁。

**

【生產日期】
見有效〔出世紙〕或〔身份證〕。

**

【生產企業】
老爺、奶奶,或唔正常人類基因工程集團(地球)分公司。

**



**

【特別提示】

1]未婚女性請喺使用前必須仔細閱讀本手冊。

2]老公要按照使用手冊規定或者喺婚姻專家嘅指導之下使用。

3]對老公有過敏者忌用,可能會引致傷心流淚,情緒失控等。

4]正喺度使用緊其他同類愛人而且尚未停用前者,絕對禁用,會好危險。

5]老公為非處方類生物,所以冇絕對保證。

6]老公喺登記結婚之前,需要出示若干有效證件。

7]對重感情或者感情豐富嘅女性,要特別小心使用。

8]如不當使用,老公可能會引起使用者經常出現現象。
  包括:心亂、心痛、心寒、心力交瘁、痴痴地等嘅症狀。



**

註:本手冊唔會隨產品附送,使用手冊係由使用者自行編寫。

  (男人好多時都會當自己係超人)



**

編:廣東話攪攪震出版社.2016年

**



**

男歡女愛辦公室.廣東話資料館

老婆使用手冊[V-2016 版]


老婆使用手冊 Wife User's Manual V-2016

鑒於有好多男性對於〔老婆〕嘅選擇、相處同使用不當,本公司〔好人有限公司〕特別編寫咗呢一份專針對老婆使用嘅說明書。主要係用嚟介紹,喺日常生活上一般〔老婆〕嘅功能、相處方法同人生安全性,以免啲男性使用者周圍亂揀同濫用感情,造成本身冇法估計嘅後果。

**

【產品名稱】

民間俗稱:老婆、衰婆、亞仔老母。

文學名稱:妻子、夫人。

古代通稱:拙荊、內子、娘子、堂客、賤內。

誇獎名稱:賢內助、半邊天。

恩愛俗稱:我女人[民間]

大陸通稱:愛人、愛妻。

動物學稱:老虎乸、河東獅。

生物學稱:已婚女性。



**

【顏色編碼】

夜間編碼:黑天哦。

日間編碼:白天哦。

廿四小時:黃面婆、常哦。

老婆係一種無價同自願跟您通山走嘅女人,既冇抽獎,亦冇得退換。



**

【混合成分】

水、蛋白質、脂肪、核糖核酸、碳水化合物,多種礦物質、香料等。

老婆氣味幽香、重具有[七情六慾]同[胡思亂想]嘅特質。



**

【化學性質】

1]四種含量元素:(佔重量 96.2%)
  氧65%、碳18.5%、氫9.5%、氮3.2%

2]七種次量元素:(佔 重量 3.7%)
  鈣1.5%、磷1.0%、鉀0.4%、硫0.3%、鈉0.2%、氯0.2%、鎂0.1%

3]五十幾種微量元素:(佔重量 0.1%)
  其中16種微量元素組成〔酶、輔酶、激素〕
  包括:鐵、銅、鋅、鈷、錳、錫、鉻、鎳、鉬、硒、鍶、釩、碘、氟、硼、矽



**

【理化性質】

老婆屬陽酸性,好易呷醋;易溶喺蜜語甜言;唔溶喺無名無份。

性質包括:佔有慾[40%]、善變[20%]、膚淺[20%]
     神經質[15%]、狂熱[5%]

(百分比會因產地,年份,使用者關係而有所唔同)



**

【產品性狀】

老婆為凹凸狀糖衣生物,表面塗層一般喺粉底、口唇膏等化妝品,落妝之後呈現淺黃色,外觀同落妝前略有差異;對鑽石、鉑金俱有磁性作用。使用時,如擁有名車、豪宅效果更佳。

老婆怕醜時會面紅,發嬲時會竇雞兼發瀾渣,初用時手感柔軟細膩,存放時間耐咗之後會出現黃斑,肥膩、起皺,鬆馳等現象,均屬正常,但唔影響繼續使用同感情。



**

【產品功能】
老婆主治單身恐懼症、傳宗接代等頑疾,對失戀、單思病亦有明顯效果。係適用喺燒淘洗買、照顧細路仔同老人嘅家居至寶。

**

【副作用】
使用者容易產生氣管炎、耳仔軟、視覺疲勞、思覺失調、行為受阻等。嚴重不良反應者,更可能會導致皮肉損傷,但大部份都唔會有生命危險。

**

【用法用量】
老婆適宜口服兼外用,最好係一生一件,放喺個心入面使用效果更佳。對使用無效者,可以暫時停用並向婚姻專家諮詢,或者隔一段時間之後重新開啟使用。

**

【注意事項】
老婆僅適用於單身嘅成年男性。使用時需小心謹慎,細心觀察有冇不良反應,如有不適必須馬上停止使用,如果冇特別敏感,就可以繼續使用。若忌煙酒等不良習慣,會使功能更佳。

**

【貯藏細則】
老婆應該喺常溫之下妥善保存,室內陰涼之處最佳;如果喺室外,就需避免強烈陽光直射。貯藏期間,特忌隨意放喺一邊唔理。重要避免同其他女性共同存放。嚴禁同朋友喺外邊過夜。

**

【包裝資料】
各種纖維類時裝、泳衣、鞋帽、首飾、手袋,重要隨季節變化隨時更換。切勿過度裝飾,會引起其他男性動物對老婆有過敏反應,尤其係〔狂蜂浪蝶〕同埋〔花花公子〕之類。

**

【有效限期】
視乎老婆對您嘅滿意程度而定,最長可達一生一世;最短,三兩日亦可能失效。

**

【禁忌須知】
無論咩時候,都唔能夠講老婆『唔靚』!同時使用兩件或以上者,恐怕會出現不良反應,嚴重情況會導致失效過期兼可能冇命。

**

【注意事項】
腎功能不全人士,特別要小心使用。

**

【產品規格】
通常喺90至120磅左右,如果出現特殊情況,請搵健康醫生處理。身體偏重或超標人士,唔會影響使用功能。

**

【批准文號】
見有效[結婚證書]或[鑽戒說明書]內頁。

**

【生產日期】
見有效身份證。

**

【生產企業】
岳父、岳母,或唔正常人類基因工程集團(地球)分公司。



**

【特別提示】

1]喺取老婆之前,使用者必須同未來老婆進行情感交流,以保證同老婆日後有更好嘅協調功能。

2]使用老婆之前,請仔細閱讀本手冊,要按照手冊內規定或喺婚姻專家嘅指導下使用。

3]正喺到使用緊其他同類愛人,而且尚未停用前者,必須禁止使用新款型號。

4]老婆為非處方類生物,但係喺登記結婚之前,需要出示若干有效證件。

5]老婆具有同使用者唔一樣嘅生理同生活習性,而且受到法律保護。嚴禁對老婆〔毆打〕、〔叱鬧〕等不良習慣。特別唔好喺藥後使用,以免嚴重損壞。情況嚴重者將會被處於刑法。

6]老婆具有聰明才智,並且知道使用者只能擁有一個,老婆會使用種種方法畀使用者知道使用者只能擁有佢一個。

7]喺使用者接觸其他同類時,盡量唔好畀佢知道,特別係使用者嘅通訊工具例如手提,盡量做到信息睇完後就刪除、返屋企手機就關等良好習慣。

8]強烈建議你入門口之前,確保你身上冇其他味道同毛髮!

9]老婆重係一部功能超強嘅數錢機器,佢能夠準確無誤咁數出你每個月嘅所有收入,重能夠根據你嘅情況測算出你可能嘅額外收入,一但畀佢發現,你必需如數歸倉,如果唔係,佢可以令你喺攞錢時遇到麻煩,重喺一段時期內拒絕向你提供一切服務,令你嘅生活產生混亂。

10]老婆喺使用期內需要進行日常護理,用呢個絲啊嗰個露嘅嚟搽喺身體表面,重有咩嘢液呀某某丹呀用嚟畀老婆內服。

11]喺平時嘅日常護理,老婆具有自主維護能力無須使用者操心。但係唔建議使用者同意老婆進行局部嘅改造同升級,以免影響部分使用功能。

12]使用者需要用啲啲甜言蜜語,點滴嘅浪漫細心,同埋專一嘅關懷愛護,即刻可以使到老婆發揮最佳使用效能同延長有效使用期限。



**

註:本手冊唔會隨結婚證書附送,使用手冊係由使用者自行抄寫。

**

編:廣東話攪攪震出版社.2016年

**



**

男歡女愛辦公室。廣東話資料館

2018年3月15日 星期四

狐狸精使用手冊[V-2015 版]


狐狸精使用手冊 Mistress User's Manual V-2015 

鑒於有好多男性對於〔狐狸精〕嘅選購同使用不當嘅問題嚴重,本公司〔好人有限公司〕特別編寫咗一份針對於狐狸精嘅使用說明書,主要用嚟介紹喺市面上一般〔狐狸精〕嘅功能同安全性。為以免有啲男性使用者周圍亂買同濫用,造成冇法估計嘅後果;亦針對一啲女性使用者,可以攞嚟去警誡老公同男朋友唔好周圍去攪〔狐狸精〕之用嘅。

**

【產品名稱】

民間俗稱:二奶、阿三。

文學名稱:第三者。

古代通稱:小姘、寵婢、寵妓。

誇獎名稱:情人、情婦、女神。

恩愛俗稱:蜜糖[Honey甜心[Sweetheart]。

大陸通稱:小三。

動物學稱:脊索動物門.哺乳綱.食肉目.犬科狐狸精。

生物學稱:雌性動物。


**

適用人群

1]有車有樓,有財有勢嘅男士,例如係[狂蜂浪蝶]同[花花公子]

2]有能力將[原配]換咗嘅男士,例如係豪門大亨。

3]有能力承受媒體非聞攻擊嘅男士。


**

【混合成分】

水、蛋白質、脂肪、核糖核酸、碳水化合物,多種礦物質、香料等。

狐狸精氣味幽香、重具有[七情六慾]同[胡思亂想]嘅特質。


**

【化學性質】

1]四種含量元素:(佔重量 96.2%
  氧65%、碳18.5%、氫9.5%、氮3.2%

2]七種次量元素:(佔 重量 3.7%
  鈣1.5%、磷1.0%、鉀0.4%、硫0.3%、鈉0.2%、氯0.2%、鎂0.1%

3]五十幾種微量元素:(佔重量 0.1%
  其中16種微量元素組成〔酶、輔酶、激素〕
  包括:鐵、銅、鋅、鈷、錳、錫、鉻、鎳、鉬、硒、鍶、釩、碘、氟、硼、矽



**

【理化性質】

狐狸精屬陽酸性,極易呷醋;易溶喺蜜語甜言;唔溶喺無名無份。

性質包括:佔有慾[40%]、善變[20%]、膚淺[20%
     神經質[15%]、狂熱[5%

(百分比會因產地,年份,使用者關係而有所唔同)



**

【產品性狀】

狐狸精為凹凸狀糖衣次級生物,表面塗層一般喺粉底、口唇膏等化妝品,落妝之後呈現淺黃色,外觀同落妝前略有差異。對鑽石、鉑金俱有極強磁性作用;如有名車、豪宅等,功能效果更佳。重有升級版添(自己估下)。

狐狸精怕醜時唔會面紅,發嬲時會竇雞兼發瀾渣,初用時手感柔軟細膩,存放時間耐咗之後會出現黃斑,肥膩、起皺,鬆馳等現象,均屬正常,但唔影響繼續使用。



**

【產品功能】
畀你枯燥無聊嘅生活帶嚟驚險、刺激,滿足使用者嘅生理需求。令使用者充滿活力同幹勁,滿足使用者嘅虛榮心同不堪一擊嘅自信。

**

【副作用】
使用者容易產生氣管炎、耳仔軟、視覺疲勞、思覺失調、行為受阻等。嚴重不良反應者,更可能會導致破財,皮肉損傷,嚴重嘅可能會有生命危險。

**

【用法用量】
狐狸精適宜口服兼外用,最好係一次一件,放喺金屋入面使用效果更佳。對使用無效者,可以暫時停用並向婚姻專家諮詢,或者隔一段時間後重新使用。

**

【注意事項】
狐狸精對〔原配〕具有好強嘅替代性,同埋會要求使用者具有專一性。當使用者唔能夠滿足狐狸精嘅操作要求時,除咗會自動報廢之外,亦會隨意對使用者產生傷害,因此使用時需特別注意使用安全,免生危險。

**

【貯藏細則】
狐狸精應該喺常溫之下妥善保存,室內陰涼之處最佳;如果喺室外,就需避免強烈陽光直射。貯藏期間,特忌隨意放喺一邊唔理。重要避免同其他親朋好友共同存放。

**

【包裝資料】
各種纖維類時裝、泳衣、性感內衣,鞋帽、首飾、手袋,重要隨季節變化隨時更換。切勿過度裝飾,會引起其他男性動物對使用者擁有嘅狐狸精有過敏反應,尤其係嗰啲〔狂蜂浪蝶〕同埋〔花花公子〕等。

**

【有效限期】
視乎狐狸精對您嘅滿意程度而定,最長可達一生一世;最短,三兩個月亦可能拜拜。

**

【禁忌須知】
對四處留情嘅使用者絕對禁用。對攪唔掂〔原配〕嘅人慎用。同時使用兩隻或以上者,恐怕會出現不良反應,嚴重情況可能會致命。

**

【注意事項】
腎功能不全人士及怕老婆人士,特別要小心使用。

**

【產品規格】
通常喺90120磅左右,如果出現特殊情況,請搵健康醫生處理。身體偏重或超標人士,唔會影響使用功能。

**

【批准文號】
見有效[鑽戒說明書]內頁。

**

【生產日期】
見有效身份證。

**

【生產企業】
世伯、伯母(通常唔會見到),或唔正常人類基因工程集團(地球)分公司。

**



**

【特別提示】

1]得到狐狸精之前,使用者必須事先進行情感交流,以保證日後有好嘅協調功能。

2]使用狐狸精之前,請仔細閱讀本手冊,要按照手冊內規定或婚姻專家嘅指導下使用。

3]正喺到使用緊其他同類狐狸精,而且尚未停用前者,必須禁止使用新型號。

4]狐狸精為非處方類生物,冇保證擁有權,亦冇法律保障。平時嘅日常護理,狐狸精具有自主維護能力無須使用者操心。

5]狐狸精具有同使用者唔一樣嘅生理同生活習性。嚴禁對狐狸精毆打、叱鬧等不良習慣。特別唔好喺藥後使用,以免嚴重損壞。情況嚴重者可能會爆您大鑊。

6]狐狸精對〔原配〕具有好強嘅替代性,同埋要求使用者具有專一性。

7]狐狸精有敏銳嘅心理探測功能,諗著玩玩吓心態嘅使用者,畀佢探測到你嘅真實意圖之後,好容易會遭到直接攻擊。

8]狐狸精具有自動啟動黑暗追擊模式嘅功能,使用時好可能會遇到唔受控制嘅情況。

9]狐狸精重係一部功能超強嘅數錢機器,如果唔能夠滿足佢嘅操作要求除咗會自動報廢之外,可能會拒絕向你提供一切服務,令你嘅生活產生麻煩同混亂。

10狐狸精存有強烈嘅隱形殺傷力,所以使用者切勿觸及產品嘅怒氣機關掣。



**

註:本手冊唔會隨產品附送,使用手冊係由使用者自行編寫。

**

編:廣東話攪攪震出版社.2015年

**



**

男歡女愛辦公室。廣東話資料館