粵語流行曲 之〔不知點算好！〕

粵語流行曲 Cantopop，係指喺香港用粵語演唱嘅流行歌曲，由於喺香港粵語好多時畀人叫做〔廣東話〕，所以粵語流行曲又叫做〔廣東歌〕。一般講嘅係近代「粵語流行音樂」，係香港喺1970年代興起嘅，由香港［蓮花樂隊］嘅主音歌手［許冠傑］所帶動嘅一股潮流，之後蓬勃發展嘅粵語流行歌曲；呢個定義亦符合咗大部分1970年代或以後出生嘅香港人對「粵語流行歌曲」嘅認知範圍。好似其他流行音樂咁，粵語流行曲係一種商品；一種反映某段時期社會面貌同價值觀嘅商品。

而一般對香港粵語流行曲起源嘅講法，就要追溯到1950年代初期，但係確實嘅源頭仍然未有統一嘅，亦有好多唔同嘅意見同講法。初期嘅粵語流行曲脫胎嚟自［粵曲］入面嘅［小曲］，而呢個亦係冇爭議嘅事實。粵語小曲係傳統粵劇嘅過場樂譜，除咗原有嘅廣東譜之外，好多重套用咗容易上口同流行嘅國語時代曲、歐西流行曲同埋外省民歌，填上粵語曲詞，用咗粵曲嘅唱腔同配樂出現。



1950年代之前嘅香港社會結構大致可以分三為階層：
一）上層，係英國殖民政府高官、外資商行高層、一小撮華人商辦同富商；
二）中層，即係中產階級，只佔好少數；
三）下層，係傭工、文員、同埋佔大多數嘅勞動人口。
各個階層嘅交往同流動接觸唔多，涇渭分明，絕少互相溝通。到後來，大批新移民嚟到香港，喺呢班外來人口入面除咗少數嘅資本商家同專業人士之外，絕大部份都係講粵語嘅廣東農村移民，喺香港1950年代嘅初期，真正流行嘅音樂就係〔粵曲〕。



1960年代，亦係香港粵語電影流行嘅年代，唔少香港電影賣埠去東南亞市場都大受歡迎，［譚炳文］、［ 鄧寄塵］、［鄭君綿］同［蕭芳芳］等當時嘅電影演員都曾經推出過唱片。當時粵語流行音樂只係粵語電影嘅附屬品，重未係獨當一面成為啲藝人發展嘅事業。而且一般香港粵語片嘅粵劇風格唱腔亦唔易受年輕人嘅喜歡，重認為係老土同埋市井，好似「廟街王子」［尹光］就係其中嘅代表嘞。



1970年代，係粵語流行曲嘅發展期，當時開始流行睇港產電視劇，亦都同粵語流行曲加入咗強大嘅動力。電視劇嘅主題曲唔少都可以成為流行一時嘅經典。當中就以無線電視嘅音樂總監［顧嘉輝］嘅作曲最多人熟悉。好多喺1970年代尾至1980年代由［顧嘉輝］作曲、［黃霑］填詞嘅電視劇主題曲，到依家仍然畀人奉為粵語流行曲嘅經典作品。



1980年代，廣東歌成為咗香港樂壇嘅主流，偶像熱，［譚詠麟］、［張國榮］、［梅艷芳］，紅到爆燈；第二次樂隊熱，有［Beyond］、［太極］、［達明一派］；紅館演唱會熱，［譚詠麟］創出連開38場嘅記錄。呢個時期唔只係粵語流行曲百花齊放嘅時代，亦係香港樂壇嘅輝煌全盛時期，喺大陸同台灣嘅人就算唔識廣東話，亦都會聽粵語流行曲，甚至跟住唱［廣東歌］。



1990年代，係「四大天王」支配香港樂壇嘅時代，［張學友］、［劉德華］、［黎明］同［郭富城］壟斷咗當時四大電子傳媒音樂頒獎典禮嘅獎項。但係樂壇已經開始出現吹捧偶像而唔重實力嘅現象。當時有人認為，成個粵語歌壇嘅一線歌手只有［張學友］係以實力爲主發展嘅歌手。



2000年代，由於音樂界人才青黃不接，唱片公司陸續出現裁員同結業潮。唱片公司為咗搵錢而去邀請啲喺電影界受歡迎嘅演員，或者物色啲模特兒做歌手，攪到香港樂壇變得只係重視市場同形象而唔重視歌唱實力，好多只係有外表但係歌藝低到嚇死你嘅新人喺樂壇湧現，大部分喺呢個時期出道嘅新歌手都冇乜影響力，出道冇奈就好快〔唔見人〕銷聲匿跡。



2010年代，由於香港唱片製作只定位喺［青少年］為主道，而放棄大眾普及嘅方向，同時由於本地製作人同演繹者都過於自我，拒絕同內地合作發展，更令廣東歌市場導向更萎縮，只留喺本土之內，走唔出香港。而之前10年唱片業粗製濫造嘅惡果浮現，有愈來愈多香港歌手放棄逐漸萎縮嘅粵語流行曲市場，走去發展更超龐大嘅國語歌曲市場。

＊＊

張國榮〔愛慕〕



都只因你太好　找不到應走退路
我要進已無去路　進退　我不知點算好
不知點算好　心中只感燥暴
我似跳進八陣圖　模糊的探討

滴盡熱淚仍盡吐　心中絲絲愛慕
我已對你去盡了　心碎難補
但是現在還未到　雖則心聲寄掛號
我縱已耗盡了　我滿心

愛慕　是愛慕　愛慕　叫我心痛苦
愛慕　愛慕　達到瘋癲程度　

只因想得太好　不可啞忍你的態度
我冇怨你　我恨糊塗　此刻不知點算好
不知點算好　早經封鎖心的退路
要去我也覺無去路　情感已經迷路

愛慕　令我迷途　愛慕　叫我心痛苦
愛慕　愛慕　令我糊塗　心迷路

＊＊

香港粵語流行曲。廣東話資料館