所謂〔諺語〕，係話一啲流傳民間而言簡意賅嘅常語，通常係指一啲含有豐富知識、經驗，有思想，有教育意義嘅俗語。例如：〔留得青山在，那怕冇柴燒〕，〔一寸光陰一寸金，寸金難買寸光陰〕之類。呢啲係先民生活經驗同智慧嘅結晶，呢啲諺語流傳久遠，雖然都係用口語方式表達，但好多諺語對人嘅影響並唔低於四書五經！各地諺語嘅內容非常多，喺呢度主要係介紹流傳喺大眾口中嘅一啲經常聽到嘅諺語。
＊＊
01〔一分耕耘，一分收穫〕
係比喻為咗一件事，落咗幾多功夫，就會有幾多成果。
唐。李紳《憫農》
鋤禾日當午，汗滴禾下土。誰知盤中飧，粒粒皆辛苦。
［呢一首詩就充份咁表達出農民要做出一分耕耘嘅努力景況］
＊＊
02〔一寸光陰一寸金，寸金難買寸光陰〕
光陰即係時間；比喻時間係非常之寶貴，千祈唔好浪費。
唐。王貞白《白鹿洞》二首（其一）
讀書不覺已春深，一寸光陰一寸金。不是道人來引笑，周情孔思正追尋。
明。羅懋登《三寶太監下西洋記通俗演義》第十一回
可嘆一寸光陰一寸金，寸金難買寸光陰；寸金使盡金還在，過去光陰那裡尋？
＊＊
03〔一日為師，終生為父〕
即係話，師父就好似老竇一樣咁，佢永遠都係你嘅長輩，要尊重。
西周。姜太公《太公家教》
弟子事師，敬同于父，習其道也，學其言語。……忠臣無境外之交，弟子有柬修之好。一日爲師，終身爲父。
＊＊
04〔一粒老鼠屎，壞咗成煲粥〕
係比喻講，即使數量雖然係好少，但係佢嘅為害就極之大。
＊＊
05〔一人開井，萬人飲水〕
呢句話，係借指個人嘅功德，為公眾謀福利。
＊＊
06〔十個洋梅九個酸，十個做官九個貪〕
呢句係話，喺舊時做官嘅幾乎全部都貪污受賄，敲詐勒索。
＊＊
07〔人不可貌相，水不可斗量〕
呢句係講，個人嘅成敗得失，貴賤強弱，係唔能夠從人嘅外表去判斷嘅。
＊＊
08〔人往高處，水往低流〕
即係話，人同水相反，人總係追求進步，嚮往幸福嘅。
＊＊
09〔人生何處不相逢〕
即係話，人總有相逢嘅可能，大家應該保持友好關係。
明。吳承恩《西遊記》
一葉浮萍歸大海，人生何處不相逢。
＊＊
10〔人怕出名豬怕肥〕
豬肥就要畀人劏，人出咗名亦會畀賊佬劏；即係話，事情發展到一定嘅程度，就要適可宜止，唔係就好易有麻煩。
＊＊
11〔十年修得同船渡，百年修得共枕眠〕
兩個人能夠相聚實屬唔容易，即使係一面之緣，亦都係前世嘅緣份，更何況係同船、共枕呢。
＊＊
12〔三分天才七分學〕
呢句係講，成功除咗靠天份之外，最重要都係要靠自己後天嘅努力。
＊＊
13〔三百六十行，行行出狀元〕
喺各行各業之中，都有佢哋特殊嘅成就同供獻，只要能夠敬業樂業，就會有突出嘅成就。
＊＊
14〔山窮水盡疑無路，柳暗花明又一村〕
山嶺重疊橫阻，河流交叉縈繞，好似前面已冇去路，但係轉過去又見到一個綠柳成蔭，山花爛漫嘅村莊。係比喻人嘅處境幾乎到咗山窮水盡嘅地步，忽然又出現轉機。即係話，人嘅處境到咗將近絕望嘅時候，突然又出現咗啲希望，即係所謂嘅絕處逢生，天無絕人之路嘅意思。
宋。陸游《遊山西村》
莫笑農家臘酒渾，豐年留客足雞豚。山重水復疑無路，柳暗花明又一村。
＊＊
15〔山高自有客行路，水深自有渡船人〕
正所謂，人係無處不到嘅，即使係遇到困難都能夠克服。
＊＊
16〔大魚食細魚，細魚食蝦米〕
呢句係講，細嘅畀大嘅食咗，比喻恃強凌弱，弱肉強食嘅意思。
＊＊
17〔大難不死，必有後福〕
呢句係形容一個人遭遇到生命危險，都能夠平安渡過，咁之後必會帶來更大嘅幸運。
＊＊
18〔夫妻本是同林鳥，大難來時各自飛〕
喺日常生活之中，係好難去鑑別一對夫妻嘅真情，惟有喺危難困苦嘅時候，先至知道呢對夫妻嘅真情流露。
＊＊
19〔不聽老人言，吃虧在眼前〕
即係話，唔識得去接受有經驗嘅人嘅勸告，就好容易吃虧〔蝕低〕同上當〔比人呃〕。
＊＊
20〔唔怕一萬，只怕萬一〕
即係話，做任何事，都要時時刻刻小心謹慎。
＊＊
21〔經一事，長一智〕
呢句係話，如果冇自己親身經歷過嘅事，就算聽過好多次，都唔會真正增長自己嘅見識阱同經驗。
＊＊
22〔心裡光明是天堂，心裡黑暗是地獄〕
即係話，光明、黑暗，都係喺自己心入面嘅意念。
＊＊
23〔生死有命，富貴在天〕
呢句係話，或生或死，都係命運注定嘅；呢啲係消極嘅想法，通常係安慰人嘅話。
＊＊
24〔出門睇天色，入門睇眼色〕
呢句係比喻，做人處世，最重要嘅就係要學識察言觀色。
＊＊
25〔只准州官放火，唔准百姓點燈〕
喺古時，放燈只能夠講放火。以前有個郡官叫田登，當時喺元宵放燈，因為登燈同音，自諱其名，於是個官就出咗一張告示，上面寫著話：「本州依例放火三日。」成句嘅意思係話：〔只係畀自己橫行霸道，唔畀人哋有正當嘅要求。〕
＊＊
26〔有志者，事竟成〕
有堅決志向嘅人，做事必能夠成功；意思就係講：［只要立定志向，努力不懈，必有成功嘅一日］。
＊＊
27〔有理走遍天下，無理寸步難行〕
即係話，有理由嘅人就咩嘢都唔怕，無理由嘅人就算去到邊度都行唔通嘅。
＊＊
28〔有緣千里來相會，無緣對面不相逢〕
意思係話，兩個人可唔可以互相認識，唔喺距離遠近嘅問題，而係睇下佢哋有無機緣嘞。
＊＊
29〔有眼不識泰山〕
泰山咁大咁出名，居然唔識。係借指有啲人連一啲重要人物都認唔出。
＊＊
30〔吉人自有天相〕
呢句係話，有啲人運氣好；借指好人自有好人相幫。
＊＊
31〔在家靠父母，出外靠朋友〕
即係話，喺屋企就有父母照顧，喺外面就要靠朋友幫助嘞。
＊＊
32〔吃人一口，報人一斗〕
就算得到人哋少少嘅利益好處，都要重重咁回報答謝，唔好因為小利而失大義。
＊＊
33〔吃人嘴軟，拿人手短〕
即係話，一個人如果接受咗人哋嘅利益，咁佢講嘢同做事嘅時候，就唔容易堅持原則。
＊＊
34〔自己跌倒自己爬，望人扶持都係假〕
即係話，自己遇到困難，就要自己解決，希望人哋嘅扶持，咁係靠唔住嘅，一個人應以自立為重。
＊＊
35〔你走你嘅陽關道，我過我嘅獨木橋〕
呢句係講，每個人嘅思想唔同，喺決定處事路向嘅時候，可能就要分道揚鏢，各走各嘅路。
＊＊
36〔良言一句三冬暖，惡語傷人六月寒〕
每個人都鍾意人哋嘅贊賞，只要用得貼切，對任何人都係適合嘅；但係尖酸刻薄嘅說話，就係好容易令人心寒嘞。
＊＊
37〔兒孫自有兒孫福，莫為兒孫作馬牛〕
所謂〔一滴露珠一株草〕。一個人嘅生活方式同生存條件，做上一輩嘅亦無須太過為下一輩嘅擔憂。
＊＊
38〔男也勤，女也勤，麥如黃金棉如銀〕
意思係講，人係要用勤力同勞力嚟創造財富同未來嘅。
＊＊
39〔近朱者赤，近墨者黑〕
呢句係話，環境影響一個人係非常之大嘅，跟著啲好人就學好，跟著啲衰人就容易學壞。
＊＊
40〔秀才遇到兵，有理說不清〕
意思係話，一個好叻咬文嚼字嘅人，遇到一個蠻不講理嘅人，真係有乜理由都講唔通。
＊＊
41〔風大就涼，人多就強〕
呢句係比喻，集合多人嘅時候，就會有好大嘅力量。
＊＊
42〔若非一番寒徹骨，那得梅花撲鼻香〕
意思係話，一個人必須要經得起考驗，先至能夠有大嘅成就。
＊＊
43〔活到老，學到老〕
意思係指，人只要生存同進步，就唔能夠停止學習；主要係強調學習嘅重要。
＊＊
44〔英雄難過美人關〕
呢句嘢係指，有一啲好傑出嘅英雄人物，有時都會為咗女人而犯錯。
＊＊
45〔平生不做虧心事，半夜敲門也不驚〕
即係話，做人做事要問心無愧，就算遇到怪事都會處之泰然。
＊＊
46〔皇天不負苦心人〕
呢句係講，一個人做事，如果肯畀啲心思，落啲功夫，總會有收穫嘅。
＊＊
47〔酒逢知己千杯少，話不投機半句多〕
意思係話，人與人之間共事，最緊要係志趣要相投。
＊＊
48〔酒係穿腸毒藥，色係刮骨鋼刀，財係惹禍根苗，氣係下山虎豹〕
人生嘅四大害，就係〔酒色財氣〕。豪飲有損健康，而且損財誤事；色字頭上一把刀，可能毀滅自己，又會傷人；財多身子弱，錢越多越愛錢，為咗錢，有人迷失本性；氣就係修養嘅問題。若果能夠克服呢四個字，正常發展，可以免卻唔少災禍。
＊＊
49〔為人為到底，送佛送到西〕
即係話，既然係要幫人，就一定要幫到底，唔好半途而廢。
＊＊
50〔留得青山在，那怕冇柴燒〕
意思係話，只要係你個人重係生存，咁以後重會有好多機會嘅。
＊＊
51〔得饒人處且饒人〕
即係話，做人做事都要有分寸，唔好逼人太甚。
＊＊
52〔清官難審家庭事〕
呢句係話，人哋屋企嘅家事，係好難分誰是誰非嘅。
＊＊
53〔萬丈高樓從地起〕
意思係話，人要做幾大嘅事同計劃，都係要由基礎開始。
＊＊
54〔萬般都是命，半點不由人〕
呢句係話，一個人嘅命運係已經整定，就算用好多辦法都無法改變。
＊＊
55〔船到橋頭自然直〕
即係話，唔使擔心，唔會有問題嘅，到時就有辦法解決。
＊＊
56〔越坐越懶，越食越饞〕
意思係話，一個人好食懶做，佢繼續發展落去會好危險。
＊＊
57〔畫虎畫皮難畫骨，知人知面不知心〕
意思係比喻，要去了解一個人嘅心思，係絕對唔容易嘅。
＊＊
58〔將相本無種，男兒當自強〕
做大事嘅人，唔係遺傳得來嘅，只要能夠奮發圖強，任何人都有出人頭地嘅一日。
＊＊
59〔無事不登三寶殿〕
意思係話，去佛寺自然係人有所求，專程來到搵你，緊係有目的嘅。
＊＊
60〔貴人事忙〕
係形容一個人好多嘢做好忙，有能者多勞嘅意思，係一句客套說話。另外，亦有人講［貴人多忘］同〔貴人善忘〕，即係話，高貴嘅人，比較容易忘記事情。
五代。王定保《唐摭言》卷二
倘也貴人多忘，國士難期，使僕一朝出其不意，與君並肩台閣，側眼相視，公始悔而謝僕，僕安能有色於君乎？
61〔道高一尺，魔高一丈〕
呢句係借指句，意思係話，壓迫愈深，反抗愈烈，每種事都有辦法應付。
＊＊
62〔善有善報，惡有惡報，若然不報，時辰未到〕
意思係話，善惡到頭終有報，雖然目前仲未有遭受報應，都只係時間未到啫。
＊＊
63〔善惡到頭終有報，高飛遠走也難逃〕
意思都係話，善有善報，惡有惡報，雖然依家重未有報應，都只係時間未到啫。
＊＊
64〔塞翁失馬，焉知非福〕
塞翁失咗一匹心愛嘅馬，你點知唔係佢嘅福氣呢？呢句係用嚟安慰一啲遭遇損失嘅人；表示呢次嘅損失，可能係第日會對你有好處。
＊＊
65〔嫁雞隨雞，嫁狗隨狗，嫁著馬騮隨山走，嫁著窮鬼眼淚流〕
意思係話，女人出嫁之候，無論嫁嘅對象係邊個，都必然要終身廝守。
＊＊
66〔跟著好人學好人，跟著獅虎學咬人〕
即係話，如果跟著個好人就會學好，跟著個壞人就會學壞囉。
＊＊
67〔遠水不能救近火，遠親都不如近鄰〕
意思係話，要靠喺遠方嘅親友幫助，就好似同向遠道攞水一樣咁無濟於事嘅。
＊＊
68〔福無雙至，禍不單行〕
呢句話係講，人遇到好嘅事唔多，但係壞嘅事就遇到唔少。即係指接連遇到唔好嘅事。
＊＊
69〔種瓜得瓜，種豆得豆〕
係比喻，種咩嘢［因］，就會得咩嘢［果］嘅意思。
＊＊
70〔踏破鐵鞋無覓處，得來全不費工夫〕
即係非常之好運，一樣係好難搵嘅嘢，居然可以喺偶然嘅機會得到。
＊＊
71〔薑係老嘅辣，茶係後來釅〕
意思係話，人喺對某啲事情，年紀大嘅就會比較有經驗。
＊＊
72〔醉翁之意不在酒〕
原文係北宋歐陽修《醉翁亭記》嘅一句，全句係［醉翁之意不在酒，在乎山水之間也］；意思係指醉翁［某人］另有用意，別有企圖。
＊＊
73〔靜坐當思己過，閒談莫論人非〕
即係話，得閒嘅時候，要經常反省自己嘅過失；同朋友吹水嘅時候，千祈唔好涉及人哋嘅私隱同是非。呢啲係做人處世嘅道理。
＊＊
74〔龍生龍，鳳生鳳，老鼠生仔會打洞〕
意思係話，上一輩係點樣嘅人，佢嘅下一代，亦都係會有啲遺風嘅。
＊＊
75〔禮多人不怪〕
意思係話，一個人對人嘅禮貌做多咗，都唔會畀人覺得怪，亦唔會畀人責怪，即係做人要有［禮貌］。
＊＊
譯：蕭南仁．2014年12月13日
＊＊
小莫小於水滴，匯成大海汪洋； 細莫細於沙粒，聚成大地四方。
＊＊
香港語文。廣東話資料館
謝謝
回覆刪除