藍田舊歲月［飛龍鬥水怪傳說］

舊藍田邨．第十五座〔飛龍鬥水怪傳說〕

喺以前舊藍田邨，一共有廿三座徙置大廈，喺一九六六年至一九七五年之間陸續起好。一九七零年之前叫做［鹹田徙置區］，第一至十四座係第四型徙置大廈，藍田邨係冇第九座嘅，原本第九座嘅位置用嚟起咗間學校，第十五至廿四座就係第六型徙置大廈，成個藍田邨要去到一九七五年先至起好曬。其中第十五座喺一九七零年左右起好，而大廈嘅外牆有一幅［飛龍］壁畫，根據政府官方嘅講法，呢條飛龍係當時工務司署慶祝起好第五百座徙置大廈而整上去嘅。不過，好似就唔係太多人相信呢個係事實嘞。

一九七零年，工務局為興建第五百座公屋落成舉行紀念儀式。

其實，喺舊藍田邨出現嘅［鬼怪傳說］都有好多個，亦有唔同人講唔同嘅版本。不過，講到最多人參與嘅奇異事件，就係藍田邨［飛龍鬥水怪傳說］嘞，當時連電視台都嚟埋做採訪㖭。

呢一個傳說，係發生喺舊藍田邨十五座下面嘅一個公園仔度嘅。

有一日，如常係落完雨之後，紅霞初現，當時天上面有好多細而散嘅雲。有個邨民〔肥佬亞伯〕話見到十五座對開半空度有一條龍同一隻妖怪喺度搏鬥，跟住又有個邨民〔白頭亞伯〕重話條金龍唔夠水怪打，又話金龍請出十二生肖嘅靈獸同佢聯手抗敵添。

其實係屋邨亞伯無聊口多呃細路，點知搞大咗！

最初係個亞伯無聊，同啲細路對住啲雲喺度吹水亂噏下，點知吹下講下，連附近幾座樓嘅住戶都紛紛湧出騎樓同走到樓下空地個公園仔度睇嘢［都應該係有啲細路返咗屋企報信］，當時真係堪稱公屋史上最靈幻同參與者最多嘅屋邨傳聞。喺第二日，又有人發現油咗冇耐嘅飛龍有彩漆剝落，重話條龍成身傷痕纍纍㖭。

記者搵料，成班齊齊走嚟睇真啲。

喺嗰日近晚，重有大小報館電視台走嚟採訪同報導。聽講話喺呢次之後，藍田一帶亦冇再發生豪雨成災嘅慘劇，邨民都相信係龍神有靈，將水妖驅走。而彩漆掉落嘅原因，專家相信係雨水濺落牆上而做成嘅，不過到依家仍然係眾說紛紜。



＊＊

資：《通學叁：香港傳說》亮光文化

https://www.signer.com.hk/product/sku/978-988-8716-78-4/

＊＊

藍田舊歲月

＊＊

廣東話資料館