狀王〔宋世傑〕身世之迷

宋世傑（1820年－1913年），又名〔宋士傑〕，字〔家傑〕，係清朝末年著名嘅文人，廣東南海灣頸人。喺同治元年（1862年）考中舉人，之後就主要喺廣東同香港寫狀書同打官司〔訴訟〕搵食〔為生〕，佢為人生性詼諧，文筆頗佳，傳聞佢同當時嘅陳夢吉、劉華東、潘鏡泉並稱為〔廣東四大狀師〕。

．
．．
．．．

以上資料，全屬虛構！

＊＊

有人話，宋世傑係明朝嘅〔四大進士〕之一，又有人話佢係清朝嘅〔四大狀師〕之一，重有話宋世傑其實係清未山西大同革命黨嘅〔四大天王〕之一添。

宋世傑，原名〔宋士傑〕，係明朝嘉靖年間嘅〔鼓詞］《紫金釵》入面，只係飾演一個二打六嘅角色。之後，有人將個故仔改編成京劇《四進士》，又叫做《節義廉明》。喺早期，宋士傑過到來《四進士》嗰度依然都係做二打六嘅閒角，行行企企，食皈縛味，而主角仍然係其他四個朝官，佢哋分別係按察院大人、江西巡撫、道台、河南知縣。


［鼓詞，係一種喺北方流行嘅曲藝，用鼓同三弦等嘅樂器來做說唱］

後來到咗由［周信芳］演嘅京劇《宋士傑》入面，宋士傑先至由茄呢啡變成舞台主角。另外，有位京劇大師［馬連良］亦有演過宋士傑呢知角色，而佢嘅劇本同劇名依然係叫《四進士》。其實佢哋兩個演嘅劇本都係一樣，唔同嘅係佢哋表演嘅風格，馬連良做得瀟灑飄逸，而周信芳就演得穩重大方，各有所好。

喺京劇入面嘅［宋士傑］，只係一個前道台衙門嘅刑房書吏，主角係清官按察院大人〔毛朋〕同佢嘅三個同科，江西巡撫〔田倫〕、道台〔顧讀〕、河南上蔡縣知縣〔劉題〕，佢哋合稱為〔四進士〕。後來，劇目將宋士傑由配角轉變成為主角，可能係因為當時嘅觀眾由寄望有一位好似毛朋嘅清官轉為希望有個好似宋士傑咁樣嘅正義人物。而宋士傑幽默機智嘅性格，再加上佢不畏強權嘅形象，贏得好多觀眾嘅熱愛，亦成為一個膾炙人口嘅英雄，後來呢個故仔又畀人改編成為粵劇《審死官》。而且呢套《審死官》喺廣東、香港同澳門一帶都非常流行。粵劇名伶［馬師曾］亦都飾演過［宋世傑］呢個角色。



到咗清朝末年，聽講話喺山西大同有一個革命黨人叫做宋世傑〔宋天王〕，因為〔世〕同官話個〔士〕同音，而佢又同戲曲入面嘅宋士傑又一樣經常大鬧貪官，加上清末時期喺廣東民間傳說又出咗四個好出位嘅狀師〔陳夢吉〕、〔潘鏡泉〕、〔何淡如〕、〔劉華東〕，佢哋畀人稱為〔廣東四大狀師〕，可能〔何淡如〕經常或者固定喺香港搵食嘅關係，於是部份區域嘅民間逐漸將佢同清末嘅［宋世傑］同［宋士傑］撈亂成為同一個人，〔宋世傑〕就由明朝嘅熱心人物變成清朝嘅正義狀師，重畀人誤以為係〔廣東四大狀師〕嘅其中之一添。

＊＊

京劇《四進士》劇情

呢套京劇係描寫明朝嘉靖年間，河南上蔡縣人［楊素貞］，因為妯娌［田氏］爭奪家產，殺害佢嘅夫婿［姚廷美］，又畀佢個唔生性嘅大佬［楊青］出賣，喺柳林嗰度將楊素貞賣咗畀過路嘅［楊春］做老婆。好采呢個楊春為人正直，喺佢知道呢個冤情之後，就同楊素貞結拜做兄妹，重為個契妹挺身而出走去申冤。佢哋又喺柳林嗰度遇到微服出巡嘅河南八府巡案［毛朋］代佢哋寫狀紙。之後，佢哋唔好釆又喺林中遇到強盜，走到去西門，識咗個仗義打走強盜嘅［宋士傑］同佢老婆［萬氏］，又收咗楊素貞做契女，重為佢狀告信陽知州［顧讀］。

宋士傑曾經做過刑房書吏，仗義善辭，因為咁得罪咗上級而畀人革走，冇得撈。之後就喺西門嗰度開咗間旅館為生，生意郪算唔錯嘅。



為爭家產嘅［田氏］，係江西巡按［田倫］嘅家姐，知道官府要捉人，就走去求細佬田倫寫信畀同年［顧讀］，重有賄銀三百兩。剛啱田倫嘅公差路經宋士傑嘅旅館投宿。宋士傑知道咗，就趁機喺夜晚偷咗份書信，重知道埋有賄情。宋士傑就將份書信照抄一份收埋，放反封原信。顧讀收咗賄銀之後，就將楊素貞打為被告，田氏就取保候审。宋士傑走嚟伸冤，顧讀詏佢唔過，就索性唔理佢。宋士傑冇曬辦法，只有搵楊春向八府巡按［毛朋］攔轎告狀，重改告埋［顧讀］、［田倫］、［劉題］三個人。

原來毛朋、顧讀、田倫、劉題四個人係同一年考到進士嘅，而當年佢哋幾個畀奸臣［嚴嵩］排擠，好在得到［海瑞］保薦而做到官嘅，呢四個人曾經喺雙塔寺盟誓，唔准官吏過柬，匿案准情。若果有貪贓枉法，各備棺材一副送自己返鄉下。事隔好多年，田倫做咗江西巡按，因為守父孝未去上任，包庇親人行賄；顧讀係信陽知州，貪贓收賄；劉題係上蔡縣丞，唔理民冤；只有河南八府巡案毛朋，重係清官一個。

毛朋收到狀之後，革走縣承劉題，捉埋貪贓枉法嘅田倫、顧讀。毛朋重新開堂審案，捉咗田氏、田氏夫姚廷春、楊青，放咗楊素貞，而告官嘅宋士傑就要發配邊疆。最後楊春同楊素貞認出喺柳林幫僭哋寫狀紙嘅人就係毛朋，宋士傑知道咗後就返去搵毛朋算帳，毛朋又係詏佢唔過，亦只得放人唔使發配邊疆，皆大歡喜。

＊＊

《審死官》



《四進士》嘅粵劇版叫做《審死官》，主角嘅名就寫做［宋世傑］，而馬師曾主演版極富盛名，重畀人改編為幾部影視作品添。但係呢啲電影同電視版本都將背景改為清朝，例如電影《審死官》、《新九品芝麻官》，電視劇《狀王宋世傑》、《新九品芝麻官》等。

＊＊

譯：蕭南仁．2016年8月

＊＊

＊＊

廣東風情。廣東話資料館