［驚蟄］打小人秘笈

驚蟄，係廿四節氣入面嘅第三個，喺陽曆嘅三月五號、三月六號或者三月七號，亦即係太陽喺黃經［345°］嗰日。呢日啲昆蟲會開始生猛。而喺香港又會有打小人嘅習俗。

打小人，係一種流行喺廣東、香港嘅民間巫術儀祀文化，一啲人希望咁樣可以趕走同報復所謂嘅〔小人〕。最多人打小人嘅時候，會喺〔驚蟄〕呢段日子，而香港最出名打小人嘅地方就係喺〔鵝頸橋〕下面，即係喺香港銅鑼灣同灣仔嘅〔堅拿道天橋〕底嘞。

＊＊

打小人用嘅道具［架生］



———————————————————————————————

。三支香枝［用嚟供奉神靈］

。兩支香燭［用嚟供奉神靈］

。生　果　［用嚟供奉神靈］

。五鬼紙　［印有豬、蛇、虎、朱雀、鎖鏈、掃把嘅圖案］

。黃老虎紙［黃色有黑斑紋，口角有一對獠牙］

。肥豬肉　［用嚟祭白虎，塞住白虎口唔再作惡害人］

。小人公仔［用嚟代表小人嘅人形紙］

。舊　鞋　〔用名牌新鞋效果更好〕

。磚　頭　［用嚟對付啲仇口大嘅小人］

。聖　杯　［打完小人後，擲杯來代表神靈嘅意願］

。米　粒　［打完小人後，用嚟化解］

。五色豆　［打完小人後，用嚟化解］

———————————————————————————————
＊＊

打小人儀式［可分為八個部分］



———————————————————————————————

一］奉神：
利用簡單嘅香燭供奉天地神明。

二］稟告：
將委託人嘅姓名、生辰八字等寫喺百解靈符上。如果想打特定嘅小人，就將特定小人嘅姓名、生辰八字、照片、衣物等可以代表特定小人身份嘅物件或放置喺小人紙上。

三］打小人：
利用各種象徵物品，例如委託人或施術者嘅鞋、宗教象徵武器甚至係香枝或煙仔等毆打、傷害小人紙。小人紙分為：小人紙、男人丁、女人丁、五鬼紙等。

四］祭白虎：
若喺驚蟄日打小人就需要祭白虎。用黃色嘅紙老虎代表白虎，紙身畫有黑色斑紋，口角則畫有一對獠牙。祭祀一般憬使用小塊生豬肉沾上豬血，放入紙製嘅白虎口中（餵紙老虎），當老虎食飽之後就唔會再傷害人。而拜神婆亦會用肥膩嘅生豬肉抹喺紙老虎嘅口上，使紙老虎口中充滿油水，使佢唔能夠再張口傷人。有啲地方祭完白虎之後會將紙製白虎燒咗或用銅劍將紙製白虎嘅頭切咗。

五］化解：
將一切污衊、災害等用撒芝麻、豆等小物體或燒紙船、百解靈符等以消災解厄。

六］祈福：
用紅色嘅貴人紙為委託者祈求貴人幫助。

七］進寶：
將元寶、金銀紙等焚化供奉鬼神。

八］擲聖杯：［擲筊］
將兩個半月形，一面平坦、一面向外彎出嘅木塊擲出。兩塊平坦向上則為陽杯，向下則為陰杯，一下一上為聖杯。出現聖杯表示儀式完成。

———————————————————————————————
＊＊

打小人嘅 〔婆仔版〕咒語



———————————————————————————————

打你個小人頭，打到你有氣冇埞唞。
打你個小人腦，打到你成世乜都無。
打你個小人額，打到你一世冇發達。
打你隻小人眼，打到你成日都撞板。
打你隻小人耳，打到你做人冇大志。
打你個小人口，打到你成日係咁嘔。
打你個小人鼻，打到你索嘢無晒味。
打你個小人腮，打到你成世無飯開。
打你排小人牙，打到你有飯唔識扒。
打你條小人脷，打到你要去做娼妓。
打你個小人喉，打到你一世冇自由。
打你條小人頸，打到你瞓到唔知醒。
打你個小人肩，打到你跑馬係咁先。
打你個小人胸，打到你成世無老公。
打你個小人心，打到你去見葉利欽。
打你個小人肝，打到你成日心慌慌。
打你只小人脾，打到你唔敢番屋企。
打你個小人肺，打到你冇錢交學費。
打你個小人腎，打到你成世行衰運。
打你個小人膽，打到你相眼唔識眨。
打你個小人肚，打到你飲水嘔白泡。
打你條小人腰，打到你聽日發高燒。
打你個小人胃，打到你見人就要跪。
打你條小人腸，打到你放屁特別響。
打你個小人肛，打到你賭錢輸清光。
打你層小人皮，打到你唔死就出奇。
打你隻小人手，打到你有嘢唔識偷。
打你隻小人腳，打到你有鞋唔識著。

———————————————————————————————
＊＊

打小人嘅〔精裝版〕咒語



———————————————————————————————

打你個膝頭髁，打到你成日係咁屙。
打你個蒸排骨，打到你成日俾人屈。
打你嚿豬腩肉，打到你食嘢又中毒。
打你嘅左右臂，打到你談情骨都痺。
打你條小食道，打到你炒股捉錯路。
打你個上下邊，打到你絕後兼嘔電。
打你個左右腭，打到你傷心又寂寞。
打你條左右腿，打到你係咁流口水。
打你個二頭肌，打到你一世生癩痢。
打你條背脊骨，打到你成世要行乞。
打你條甲狀腺，打到你乜都睇唔見。
打你條腦神經，打到你沽空係咁升。
打你條支氣管，打到你食飯打爛碗。
打你嘅嗰一度，打到你晚晚唔係度。

———————————————————————————————
＊＊

打小人嘅〔珍藏版〕咒語



———————————————————————————————

打你個小人頭，等你有氣冇埞唞，日日去撼頭。
打你個小人面，等你全家中非典，成世都犯賤。
打你個小人眼，等你成世都撞板，日日被人斬。
打你個小人耳，等你日日痾爛屎，抿屎用手指。
打你個小人鼻，等你索野無晒味，鼻涕流到地。
打你個小人口，等你講嘢有得唞，食飯都會嘔。
打你個小人頸，等你周身都有病，花柳兼淋病。
打你個小人胸，等你頭暈兼中風，後門被人通。
打你個小人手，等你有錢唔識收，有樓變喳兜。
打你個小人腳，等你日日敷中藥，有鞋冇腳著。
打你個小人肚，等你惡運行到老，日日被人告。

———————————————————————————————
＊＊

打小人嘅〔英文版〕咒語



———————————————————————————————

Beat your little eye, very soon you die.
Beat your little mouth, you always have bad result.
Beat your little hand, your good luck come to the end.
Beat your little foot, everything is no good.

———————————————————————————————
＊＊

香港風情。廣東話資料館