廣東四大狀師［第尾才子］何淡如

狀師，又叫〔訟師〕，貶稱就叫做〔訟棍〕，係舊時社會入面扮演〔律師〕角色嘅文化人物。狀師嘅工作就係代人寫訴訟用嘅書狀，俗稱〔狀紙〕，而寫書狀係有一定嘅格式。喺以前，一般老百姓大多數都係文盲嘅，就算識字，又多數都唔曉法律，想寫都寫唔掂。如果要打官司，就多數要靠嗰啲出身科舉又喺官場撈得唔係幾掂嘅士人來代勞嘞。

喺清朝時期嘅廣東，民間傳說話當時有幾個出名嘅狀師，分別係〔陳夢吉〕、〔潘鏡泉〕、〔劉華東〕、〔何淡如〕，啲人就將佢哋合稱為「廣東四大狀師」。不過，可能〔何淡如〕經常或者固定喺香港搵食嘅關係，比較少喺省城出現，於是部份地區嘅民間故事逐漸將佢同清末嘅戲劇角色［宋世傑／宋士傑］撈亂成為同一個人，將〔宋世傑〕由明朝嘅［四進士］熱心人物變成清朝嘅［審死官］正義狀師，重畀人誤以為係〔廣東四大狀師〕嘅其中之一㖭。

＊＊

陳夢吉［扭計祖宗］

陳夢吉（1820年 - 1888年），有人話佢係廣東順德人，又有人話係新會人，佢曾經得過功名（秀才），係清朝嘅著名狀師。傳說話佢個人嘅性格諧趣，文筆璨美，因為鬼主意多，所以被戲稱為［橋王之王］。傳聞重話佢經常為啲貧苦人士代筆訴訟，以鋤強扶弱得到平民百姓嘅愛戴，佢好多時都同另一個著名狀師潘鏡泉［荒唐鏡］鬥法嘅。

到底嶺南傳奇人物陳夢吉係點嘅呢？聽啲老人家話〔大良斗官〕就係陳夢吉，佢係個好有錢嘅二世祖，人好聰明，依家喺大良嘅清暉園就係當年佢屋企嘅花園，園入面有棵係大清皇帝賜嘅樹㖭。喺順德，有一句歇後語〔陳村種．洗腳唔抹腳〕，又有啲老人家話，呢個〔陳村種〕就係指陳夢吉嘞。

陳夢吉嘅處世哲學就係［使天下人信之，必使先自信］，佢對個［信］嘅理解就係［騙］，即係［呃］。要喺公堂上面駁倒青天大老爺同埋悠悠眾口，就係要所有人都認為自己講嘅嘢就係真理，一萬個正確，就算自己講嘅係太陽由西邊出來，都要講到天花亂墜，人人都要俯首拜服為止。

＊＊

潘鏡泉［荒唐镜］

潘鏡泉（1845年－1900年），廣東新會外海潮蓮人，係清朝末年著名狀師，曾經考到舉人。潘鏡泉係廣東民間傳說入面係一個好鬼刁鑽精怪嘅人，出咗名嘅衙門師爺，人稱〔扭計師爺〕，綽號［荒唐镜］。傳聞話佢平時自命足智多謀，係地方官老爺嘅［白紙扇］，又傳佢同陳夢吉係死對頭，經常喺陳夢吉嘅故仔入面做反派角色。

＊＊

劉華東［文怪］

劉華東（1778年－1841年），清朝末年著名文人（考得舉人），傳說話佢係當時期嘅著名狀師，有〔文怪師爺〕嘅稱號。劉華東參考咗崑劇《金印記》同《滿床笏》而改編成為名粵劇《六國大封相》。佢嘅對聯作品《劉華東隸書八言聯》，依家重存喺香港荔枝角（嶺南之風）公園入面。

劉華東隸書八言聯：［壯志鵬飛，寬如渤海；奇姿鵠立，峭若崑崙。］



＊＊

何淡如［第尾才子］

何淡如（1820年－1913年），名〔又雄〕，字〔淡如〕，以字行，係清朝末年著名文人〔書生〕，廣東南海灣頭鄉人（佛山瀾石鎮灣何村）。喺同治元年（1862年）考中舉人，之後主要喺廣東同香港做教書為生，曾經開書館喺九龍城嘅龍津義學（以前嘅龍津石橋側邊）。

何淡如生性詼諧，生性詼諧，又有急才，每出一言都令人捧腹大笑。佢講課生動有趣，而且深入淺出，所以聽者益眾，名噪一時。佢最善長作對聯，尤其係喜歡用廣州話寫諧對（怪聯／無情對），而且數量亦有好多，所以又畀人稱為〔怪聯聖手〕、〔廣東諧趣通俗文學家〕。

＊＊



一拳打出眼火；對面睇見牙煙。
——題路人打架

三間大屋間間間；九橫長梯橫橫橫。
——上下聯最後一字均讀去聲，〔間〕即〔間隔〕，〔橫〕乃一級一步也

風腸煮熟堪餐飯；雲耳切開好會齋。
——廣州食物對

公門桃李爭榮日；法國荷蘭比利時。
——無情對

四面雲山誰作主；一頭霧水不知宗。
——上聯為唐詩，下聯為廣州俗語

叢桂有坊含湛露；六榕無寺挹清風。
——聯嵌廣州四地名

立刻捉拿三隻手；幾時失過一條毛。
——題佛山某〔更練館〕，職責擒拿竊賊

周身花果然好樣；一肚草格外大聲。
——舊曆每年二月，廣州均搭棚放花炮祭拜土地，何題之

打鼓打鑼，不過戥人高興；
搬埕搬塔，總之自己破財。
——自撰嫁女諧聯。　
　　戥人高興：廣東俗語，指為別人添興之意　
　　搬埕搬塔：搬運雜物，此處指嫁妝

水手落水，水鬼拉著水手手；
火頭吹火，火星飛上火頭頭。
——即景對

仁壽殿慈禧，弄權非人是獸；
玉瀾堂太后，囚帝縱欲貪婪。
——諧音諷慈禧太后

雪點梅花，昨夜不知五六出；
灰飛葭管，小陽初入二三分。
——賀朋友十月新婚

世事若鳴鑼，只為錢多開口響；
人情如擊鼓，每因皮厚發聲多。
——諷時勢人情

睇唔真咪嘈，請問前頭個位高見者；
企得穩便罷，留番餘地讓俾後來人。
——題番禺市橋戲棚

鹹月甜月五仁月，豆沙冰月，鵝油酥月；
生煙熟煙孖姑煙，蘭州水煙，鴉片公煙。
——上聯為月餅名，下聯為煙名

扒扒扒，扒扒扒，扒扒扒，扒到龍門三級浪；
唱唱唱，唱唱唱，唱唱唱，唱出仙姬七姐辭。
——題端午節諧聯

船又扒，艇又扒，扒扒扒……扒到龍門三尺浪；
生也唱，旦也唱，唱唱唱……唱到東方一遍紅。
——某年端午龍舟賽會，主持人折好64格長紙，請何淡如題聯，何稍事思索，寫出一副長聯，上下聯中間各有50個〔扒〕和〔唱〕字

我本一片慈悲，有時黑面做埋，只系收磨惡鬼；
你若十分誠敬，如被紅須扭過，何妨直稟靈神。
——題觀音大士醮棚

滾滾江山，只為大花面爭權，國老無能終散局；
紛紛世界，點得正武生執印，奸臣盡滅始收科。
——題廣州河南關帝廟戲棚

公乃嶺表英才，可惜奮翮未酹，鐵血已凝珠海石；
我亦國民分子，自愧窮途輟學，灰心羞謁硯山碑。
——挽馮如

不怕紅毛鬼，最怕白鼻哥，搬是搬非，兩面刀弄出這般戲本；
先殺黑心婦，後殺藍面妾，硬橋硬馬，周身膽方為蓋世英雄。
——題某戲棚

殉社會者則甚易，殉工藝者則尤難，一霎墜飛機，青塚那堪埋偉士；
論事之成固可嘉，論事之敗亦可喜，千秋留實學，黃花又見泣秋風。
——挽馮如

新相識，舊相識，春宵有約期方值。試問今夕何夕，一樣月色燈色，該尋覓；
這邊游，那邊遊，風景如斯樂未休。況是前頭後頭，幾度茶樓酒樓，盡勾留。
——題廣東佛山春色賽會

豬北竇；蔡西灣。
——對師蔡西灣。豬北竇乃地名

有酒不妨邀月飲；無錢哪得食雲吞。
——一次廣州文人集會，有人出上聯，何淡如對下聯

鼠眼蛇頭賣菜仔；雞毛豬鬃換花生。
——對師蔡西灣

皮背心襯繡花雪帽；血牙嘴鑲斑竹煙筒。
——對師蔡西灣。上聯指何淡如裝飾，下聯指師旱煙袋

珠江船如梭，橫織波中錦繡；羊城塔似筆，倒寫天上文章。
——對友人

剩得兩撇鬍鬚，此後唔知點算好；
養成一身貴骨，從今改過未為遲。
——何淡如父子諧對

＊＊

譯：蕭南仁。2016年

＊＊



＊＊

廣東風情。廣東話資料館