藍田舊歲月［我們是這樣長大的］

藍田 Lam Tin，係觀塘區嘅一座山丘，以前叫做［鹹田］，原因係呢個地方靠近海邊，唔可能種植一般嘅淡水植物而改種［鹹禾］。由於［鹹田］畀人有一個唔好嘅印象，即係話呢度嘅人住喺一個貧瘠嘅地區，所以香港政府就喺 1970 年 9 月起，將鹹田就改名做［藍田］，係攞［藍田生玉］嘅意思。呢句係出自《漢書．地理志》入面有一句：［藍田山出美玉］。

1950年代藍田邨未建前圖片


1841年，香港島係殖民化之前，［藍田］係屬於九龍灣鹽田嘅一部分，先後隸屬［東莞縣］同［新安縣］之下。由於九龍灣鹽田鹽產豐富，於是喺呢個海灣附近嘅居民就逐漸變得富有。亦逐漸［鹹田山］就成為咗條村莊。［鹹田村］嘅農業活動同附近［蘇茅萍］嘅礦產都開始發展，［蘇茅萍］之後又改稱做［秀茂坪］。喺呢個區域逐漸成為咗一個漁產，農產同礦產會集嘅村莊。

呢個盛況持續咗好多年，直到香港畀清庭割讓畀英國為殖民地。喺英國人嘅統治下，九龍灣鹽田就畀英國人放棄，將鹽田改建為［啟德機場］，而唔再用來產鹽［鹹田村］。到二次大戰之後，香港政府喺［鹹田山］起公屋［鹹田邨］，喺1966年之後陸續起好，到1985年又畀政府納入為〔藍田邨重建計劃〕，呢個重建計劃大約喺1988年至2001年左右將〔藍田邨〕陸續清拆重建。由1970年代開始，〔藍田〕就成為一個家傳戶曉嘅公屋區，一直至依家。

＊＊

1970年代藍田邨建成後圖片

藍田邨共有廿三座樓，分別為一至廿四座，冇設第九座。原因係當初起藍田邨時，預計第八座之前會起第九座，但到後來「第九座」改為起［藍田循道小學］。

＊＊

1980年代藍田邨清拆前圖片

藍田邨第12座、13座、17座，喺1985年被納入［二十六座問題公屋］名單入面。因為咁第17座率先喺1988年清拆，而其餘各座亦陸續清拆重建。



12座、13座都係問題公屋，喺1989年封閉，1990年清拆，由於11-14座係連埋一齊，所以亦需要全部坼卸。

＊＊

藍田邨［第十五座］



藍田邨第十五座外牆上面嘅金龍壁畫，根據政府官方嘅講法，呢條龍係1970年嗰時，工務司署為慶祝落成第500座大廈而設嘅。左圖拍攝時正係工務司署慶祝第500座大廈落成儀式。

藍田舊歲月［飛龍鬥水怪傳說］
http://lovelifecantonese.blogspot.com/2018/03/blog-post_34.html

＊＊

藍田舊歲月〔藍田大火〕

1981年藍田木屋區５級大火後圖片

1981年11月21日，藍田對開山邊木屋區發生５級大火，燒咗成7個鐘頭。場火令到當中嘅玄武山村、愛華村、藍美村等成千間木屋燒曬。而呢次火災入面，好冇有人死到，有７個人受傷送去醫院，其中３個係消防員，另有７千人無家可歸，１萬人要緊急疏散，場面都幾混亂。

＊＊

藍田舊歲月［巴士記憶］

當年［藍田邨］呢個巴士有15號，15A，15B，15C，16號，到去到巴士站搭巴士時嘅心情，總係有15/16嘅感覺...

當年嘅巴士路線：

。１５號　藍田北－紅磡碼頭　　　 1968年02月24日投入服務
。１５Ａ　藍田北－慈雲山　　　　 1968年02月24日投入服務
。１５Ｂ　藍田北－觀塘碼頭　　　 1968年04月06日投入服務
。１５Ｃ　藍田南－觀塘裕民坊　　 1974年04月01日投入服務
。１６號　藍田北－大角咀碼頭　　 1975年03月16日投入服務
。１５Ｍ　藍田北－觀塘地鐵站　　 1979年12月16日投入服務
。１６Ｍ　藍田康華苑－觀塘地鐵站 1987年04月27日投入服務

＊＊

［Yeung Chu 日記］



我係喺藍田邨第五座第一批入住嘅居民，自從喺1966年3月初開始入住藍田直至2000年初先至搬出，喺接近34個寒暑嘅歲月中，見証咗藍田地區喺呢段日子中嘅漸變過程。喺我入住嘅初期由於啓田道路面鋪設工程尚未建築完工，當時出入市區對外交通服務，主要係單靠一條由私人公司經營，車隊只有幾架九座位嘅客貨車接載往返藍田至官塘，如果要去九龍其他地方，就要落到觀塘轉車。直至到啓田道路面鋪設工程全面完工之後，九巴就喺當年3月17日起開始開辦一條14A往返咸田至彩虹嘅巴士線，初期嘅巴士總站係設喺第一座同第二座之間嘅停車埸。

由於藍田邨内新建住宅樓宇持續落成同開始有大批居民入住，為咗應付區内交通啂急切需求，九巴14A線喺1968年2月24日開始停辦，從新增辦兩條编號15號同15A嘅新巴士路線，往來咸田至紅磡碼頭同埋慈雲山（北）之間，同時政府又為配合區内人口增長，當年規划喺德田街同安由街側邊新起坑狀月台嘅巴士總站，喺四月六日開始全面運作使用，15號同15A巴士線喺搬入新總站運作同時，九巴新增一條编號15B往來咸田新總站至觀塘碼頭路線即日提供服務。之後由於藍田半山區有大量僭建木屋同引嚟外來人入住，令到藍田區内居住人口急劇增加，迫令政府要增設更多巴士路線投入服務。

其中最令人難忘嘅事件就係1981年11月21日，接近入夜時段藍田第四座對開山邊，有人喺木屋内打翻火水爐而引發５級大火最為震撼，呢場大火燒咗接近７個幾鐘頭，有七人受傷送院同千幾間木屋焚燬，接近有七千幾人無家可歸。

之後政府又進行舊區拆卸重建，原先曾經訂下安排居民原區安置計劃，由於區內鹹水建築樓宇需要提早拆卸引致計劃嚴重失誤，令到最早期第一批入住嘅第五座同第六座變得清拆遥遙無期，後來到2000初期先至落實清拆重建最後嘅兩座樓，而且呢兩座嘅居民重要搬離藍田。

＊＊

藍田邨〔舊地圖〕



舊［藍田邨］重建前區內小學：
。愛德華小學　　　　１至４座
。內明小學　　　　　５至６座　　　
。循道小學　　　　　７至１０座　　
。培成小學　　　　　１１座　　　　
。牧幼小學　　　　　１２座　　　　
。新會商會小學　　　１３至１４座　
。兆強小學　　　　　１５座　　　　
。司徒氏宗親會小學　１６至２０座　
。八和會館小學　　　２１至２４座　

舊［藍田邨］重建前區內中學：
。聖保祿女子中學　　安田街１０號
。聖言中學　　　　　安田街１１號
。基孝中學　　　　　啟田道５號

。五邑司徒浩中學　　啟田道７號

舊［藍田邨］重建後區內情況：
。第１座　　　　　　藍田（北）市政大樓
。第１座　　　　　　聖公會德田李兆強小學
。第３至６座　　　　藍田邨（藍碧樓、藍暉樓、藍蔚樓、藍泰樓）
。第７至１０座　　　康逸苑
。第１１至１４座    　啟田邨、啟田商場一期　　　 　
。第１５座        　    　安田邨、啟田商場二期
。第１６至２０座　　平田邨（平真樓、平善樓、平美樓）、服務設置大樓
。第２１至２４座　　平田邨（平信樓、平仁樓、平旺樓、平誠樓）、平田商場

＊＊

新會商會藍田小學



新會商會藍田小學資料館．ＦＢ專頁！
https://www.facebook.com/SWCSSMuseum/　

新會商會藍田小學．ＦＢ群組．歡迎加入！
https://www.facebook.com/groups/242472182472269/

＊＊

香港風貌。廣東話資料館