香港喺1997年以後，就有傳話到咗公元2000年就會出現所謂嘅千年蟲問題［Year 2000 Bug Problem］，到時全世界所有電腦會喺2000年1月1日以後嘅日期同時間，可能會出現唔正常嘅運作，有可能導致一啲工業部門，例如（電力、能源）同銀行、政府等都會運作停頓，甚至發生災難性嘅結果。
喺當時，好多地區嘅政府，大企業同大公司都大為緊張，佢哋重各自各成立特別嘅部門，去應對呢次未知情程度嘅大災難。亦有啲科技公司受到重金邀請，成為各大機構嘅千年蟲應對顧問，直至2000年1月1日後災難結束為止。
除咗政府同大機構之外，當年好多使用個人電腦嘅中小企業同民間團體亦好緊張，跟住就有啲所謂嘅科技公司推銷一啲宣稱話［可以預防電腦千年蟲病毒入侵嘅藥物］喺市面度賣，銷量亦都好可觀。而事實上所謂嘅［電腦千年蟲藥物］，只係一啲有破壞力嘅電腦程式啫。
＊＊
變種千年蟲 Y2KII
千年蟲問題擾攘到咗1999年，經過傳媒廣泛報導千年蟲嘅事，而民眾之中又有喺網上傳出，千年蟲已經變咗種，變成一種類似瘟疫、傳染病等嘅病毒，而感染咗千年蟲病毒嘅人有可能會死。當時網上亦有人傳出已經成功製做咗隻新嘅［千年蟲解藥］出嚟，宣稱可以有效殺死唔同品種嘅千年蟲咁話。
呢啲其實係啲老千［騙徒］誘騙對千年蟲問題一知半解嘅民眾，同有部分唔熟悉電腦嘅人，以為千年蟲真係一種傳染病毒同害蟲，係當時典型嘅街頭騙案，電視節目《警訊》亦都經常提醒市民小心騙局。不過，都係有好多人中招！
另外，電視新聞有報導過，有一個女人以為千年蟲係喺肚入面生嘅新類型寄生蟲，畀三個人［騙徒］遊說佢買咗一百粒價值三百元一粒嘅［千年蟲杜蟲藥］，連現金、手鈪同戒指等，畀人呃走咗三萬幾蚊。
＊＊
根據一啲中小型嘅電腦附件生產廠商嘅資料，其實喺1996年以後出產嘅電腦同附屬產品，已經改用晒四位數字嘅年份運算顯示，基本上已解決咗跳入千禧年［2000年］電腦運算嘅問題。
不過，大部份先進國家地區嘅電腦公司同專家，都對千年蟲問題持擔憂態度，有時令到中小型電腦生產廠商啼笑皆非。
＊＊
香港政府檔案處 2018
（參考編號：HKRS1456-1-60-3）
電腦設計未有考慮世紀轉換問題，所以在踏進千禧年時可能會出現運作問題，稱為電腦千年蟲危機，因此必須預先進行修正。政府特別借喻千年蟲為昆蟲，到處進行破壞，令市民感受到危機的嚴重性，從而正視這個問題。
＊＊
香港傳說。廣東話資料館
沒有留言:
張貼留言