《香港人三字經》註解

《香港人三字經》註解

香港人三字經，係香港以前流傳嘅一首打油詩，除咗第一句〔人之初〕同正牌《三字經》一樣之外，就無乜特別關係。而且經過唔同地方同唔同嘅人再加演繹，就出現咗好多版本添。有啲人仲將佢攞來玩遊戲添，好似玩接龍咁...〔人之初，搓老泥，泥鯭魚，魚肝油，油麻地，地中海，海龍王，黃大仙，仙人掌，掌你兩巴掌...〕

＊＊〔歡迎提供資料修正〕
————————————————————————————————

人之初　口多多　〔童言無忌，口不擇言〕

笑騎騎　放毒蛇　〔笑裡藏刀嘅意思〕

馬照跑　女照搞　〔冇事發生，冇改變到〕

舞照跳　雞照叫　〔同馬照跑〕

知少少　扮代表　〔貪功認叻〕

冇幾耐　扮大袋　〔大袋係粗俗語，意思係大人物〕

牙詀詀　死得慘　〔禍從口出〕

眼眨眨　扮花旦　〔雖無過犯，面目可憎嘅人〕

聲大大　冇貨賣　〔言過其實〕

眼大大　易學壞　〔青春少艾，容易誤入歧途〕

周身逳　扮忙碌　〔逳，即係動；指人講多過做〕

眼濕濕　扮憂鬱　〔貓哭老鼠〕

嘴藐藐　打得少　〔口花花，撩是鬥非〕

靜雞雞　認低威　〔衰衰哋咁認錯〕

有早知　冇乞兒　〔世事難料〕

晨早知　中三Ｔ　〔三Ｔ，係最多獎金嘅賽馬彩池〕

擔凳仔　霸頭位　〔驚死執輸〕

一張票　睇到笑　〔以前啲鹹片戲院一張飛成日任睇〕

好好好　睇唔到　〔敷衍了事〕

繑埋手　晨早走　〔練精學懶〕

有得震　冇得瞓　〔好驚大禍臨頭〕

搞搞震　冇幫襯　〔搞事破壞份子〕

側側膊　唔多覺　〔得過且過，求求其其〕

搏大霧　唔使做　〔混水摸魚〕

包二奶　實聽拉　〔香港人返大陸偷情好危險〕

噍多件　攞嚟賤　〔自己攞嚟衰〕

有姿勢　冇實際　〔虛有其表，得個樣〕

有交易　靠實力　〔唔靠偏門左道〕

七八九　飲到嘔　〔七八九係卡拉OK夜店嘅猜枚遊戲〕

硬骨頭　食地球　〔地球牌，係指大陸出嘅一隻煙仔〕

手頭緊　搵真銀　〔要勤力搵錢〕

烏啄啄　任人將　〔做人糊塗，容易畀人呃〕

淡淡定　有錢剩　〔凡事處變不驚；剩音靜〕

失失慌　害街坊　〔小不忍則亂大謀〕

嗱嗱臨　上瓊林　〔瓊林，係香港一間出名嘅夜總會〕

口旱旱　食咳糖　〔口乾，口水都無滴〕

有得賭　精神好　〔爛賭之輩〕

三缺一　慘過乞　〔麻雀術語〕

腯腯震　食夾棍　〔忙中有錯〕

時運高　搏番鋪　〔掌握時機〕

煙ＫＪ　撳住搦　〔話事啤術語，贏面好高〕

二仔底　冇得睇　〔沙蟹術語，輸多贏少〕

隨口噏　當秘笈　〔語不驚人誓不休〕

招乜積　中圍骰　〔好串而又好運〕

贏粒糖　輸間廠　〔十賭九輸〕

贏把遮　輸架車　〔上句另一個版本〕

面懵懵　當老馮　〔香港人叫老馮喺解做奉旨〕

細細兜　容易媾　〔初出茅廬嘅女仔，容易畀人呃〕

女人心　海底針　〔係指女人善變〕

無端端　簫吹鬈　〔莫名其妙〕

十八樓　自己友　〔街坊街里，守望相助〕

有竇口　早啲抖　〔安得廣廈千萬間〕

讀書少　畀人藐　〔學識低，俾人睇唔起〕

面撞面　好面善　〔似曾相識〕

頭岳岳　四圍踱　〔無聊發悶〕

爛撻撻　唔負責　〔無恥之徒〕

冇晒計　發狠戾　〔唔按常理做事，有趕狗入窮巷意思〕

咖喱啡　扮阿姐　〔泥鯭充石斑〕

頻頻撲　冇聯絡　〔貴人善忘〕

姿姿整　有環境　〔露出馬腳〕

咁人齊　等發圍　〔同心協力〕

趁佢病　攞佢命　〔趕盡殺絕〕

出嚟威　識搶咪　〔要懂得爭取機會〕

唔想衰　埋大堆　〔團結就是力量〕

有異性　無人性　〔見色忘義〕

有殺錯　冇放過　〔寧枉莫縱〕

有胸毛　出嚟蒲　〔惡人形象〕

手毛長　性慾強　〔順口溜，無科學根據〕

聽唔明　扮純情　〔裝模作樣〕

懶癡纏　搏可憐　〔做戲咁做〕

大笪地　食自己　〔喺大笪地擺檔嘅都係自食其力嘅人〕

做臭四　冇地企　〔對唔住朋友嘅人，必然係冇好下場〕

眼光光　等天光　〔失眠，滿懷心事〕

䟴䟴腳　等人約　〔無所事事〕

有斷估　冇痛苦　〔難得糊塗〕

撚雀籠　遲早窮　〔敗家仔嘅形象〕

人工高　冇秘撈　〔秘撈，秘密去做兼職〕

唔夠班　執二攤　〔未夠斤兩，只有等機會〕

跟老頂　有得醒　〔老頂，大哥大嘅人；醒，有好處〕

著草鞋　有排捱　〔著草，即係走路、遲難嘅意思〕

走得快　好世界　〔童年嘅順口溜〕

走得摩　冇鼻哥　〔走得慢，冇好下場〕

你老竇　大水牛　〔童年鬧人嘅順口溜〕

你老母　大風爐　〔都係童年嘅鬧人順口溜〕

大肚髧　冇良心　〔童年順口溜〕

大恰細　畀屎餵　〔以前大欺小，讀大蝦細〕

有迫慣　冇困難　〔Background，人事背景〕

有哥利　大餐屎　〔哥利Quality資歷；餐屎Chance機會〕

冧巴溫　有紋身　〔Number One，大哥大之輩〕

揸咈人　有疤痕　〔揸 Fit，高級領導人〕

密響歌　冇甩拖　〔將勤補拙〕

椓手指　靠飛屎　〔有面子〕

起大屋　靠表叔　〔表叔，大陸幹部〕

學猜枚　媾表妹　〔猜牧係夜店嘅玩意，表妹係指大陸妹〕

十十吓　拉頭馬　〔傻人胡里胡塗，無端端發達〕

中間界　騎喱怪　〔形象標奇立異嘅人，正字係騎籬蟈〕

唔識字　扮博士　〔唔識嘢又扮猛料〕

唔識路　企嚮度　〔唔識做〕

唔夠皮　無面畀　〔皮即皮費，唔夠錢用時咩人都唔賣帳〕

二三線　好難變　〔次級貨色，好難會變得好〕

手指指　扮蕃薯　〔扮熟絡，蕃薯即係FAN屎，超級迷〕

係咁易　戴撈屎　〔表示囂張，撈屎係指勞力士金錶〕

無喇喇　整笪瘌　〔無事搵事做〕

咁點會　有運行　〔即係冇運行囉〕

白白淨　冇性病　〔讚男仔靚仔〕

人嚇人　好易暈　〔意思係俾人嚇慘過俾鬼嚇〕

穩穩陣　做半份　〔安全第一，做事唔好博咁盡〕

手頭緊　賣白粉　〔狗急跳牆，不擇手段，唔理後果〕

吹吹水　唔抹嘴　〔吹水，口沫橫飛，即係吹牛皮〕

趁你病　撻你訂　〔乘人之危落井下石〕

唔用腦　等運到　〔批評嗰啲靠好彩唔靠勤力嘅人〕

癲癲地　唔識死　〔不知天高地厚〕

賺快錢　炒孖展　〔孖展，高風險嘅投資方法，如同賭博〕

買藍籌　唔駛愁　〔藍籌，高質素股票〕

過大海　搏好彩　〔過大海，係指去澳門，去賭場搏殺〕

口水多　無尿屙　〔口水多過茶，口水多到連尿都冇埋〕

四圍走　鬥疊友　〔疊友，指人強馬壯〕

逋廢話　好囉唆　〔講多無謂〕

褲頭鬆　搏街鐘　〔小姐要有街鐘，就唔好惜身如玉嘞〕

跑鐘仔　貼哥仔　〔指歡場女子，辛辛苦苦都係為哥仔〕

當我流　拋浪頭　〔流，即假嘢，拋浪頭即係靠嚇〕

出嚟滾　無責任　〔指吊兒郎噹，不負責任嘅人〕

賣大包　任人抄　〔唔計較得失〕

日本船　遲早完　〔日本郵船「遲早丸」，完係丸嘅諧音〕

————————————————————————————————
＊＊

香港語文。廣東話資料館