《兩老契嗌交》板眼
板眼，係從前瞽師喺妓院花艇娛樂妓女同嫖客嘅曲藝。板眼只喺妓院度演唱，並無外傳，係最特殊嘅曲種，亦係最早隨妓院嘅消失而失傳。板眼嘅故事都係有關妓女、客人同下九流人物，文字俏皮，充滿俚語俗話、雙關語同埋歇後語，曲調活潑，節奏明快，瞽師自拉大板胡伴奏，經常一句裡面半唱帶說，難度極高。 由於環境特殊，詞曲都唔受傳統禮敎束縛，自由發揮，更加時有涉及世俗所唔容納嘅淫詞褻語。
＊＊
《兩老契嗌交》嘅主角爛大鼓係花天酒地而牀頭金盡嘅二世祖。
杜煥用第一身講唱，又一人扮演伙頭大叔、艇嫂、瑞彩、師爺、再加鄰船唱［嘆息］嘅歌姬。佢用千變萬化嘅音高、音色、音量、字眼、語法、節奏、速度、旋律、以至方言、鄉音等來表現唔同人物嘅性格、背景、職業同埋情緒等，維肖維妙，完成一齣小小嘅悲喜劇。伴奏係大板胡，佢亦係唱者用來製造特別聲效嘅萬能器。
＊＊
《兩老契嗌交》詞：［折部份］
哎喲！ 我踱來踱去，踱下踱來，都係唔得嚿蒜（算）！
點解呀？係嘍，實見囉攣。
想我爛大鼓，生來，係冇乜嘅人緣。
唔係冇人緣！不過百家憎。
想我哩，想我爛大鼓為人，係自己作賤。
哎喲，有觀音係唔學，學個何二趴面。
想我有錢哩，嗰陣時呀，也住到沙面呀。
哩，我叫艇喎，遊河，樣樣都佔先。
哩！哩！哩！今晚又叫青蘭，明晚叫瑞鑽。
有晚瑞彩喎，阿瑞珍，與共阿瑞嬋呀。
我叫老舉哩，係叫來，風車咁轉。
嗰啲老舉話我，話我貪同人客試新鮮。
所以話埋行，老舉埋行，佢就抵制我喇。
喺喇！有錢冇地擤呀！
有嘅，有個瑞彩，生平共我格外有緣。
佢話人客送盡，一萬九千九百九十個都未曾遂得佢心願。
話我爛大鼓哩，就生來嗰啲脾性，撳扁搓圓。
所以話喎，話跟我係埋街，跟唔到哩，就會尋短見喎。
話要生要死，要話擝刀割大髀喎，歸家寧願同我食粥捱鹽。
咁嘅......... .........
「哩，因為我近日發狠學人開間係鴉片館…」
「哎喲好生意呀呵！」
「好！…」
「開間鴉片館，皆因所以就賒少，賒少財銀。
我想趁此係矮平上多幾碼，特意開來把老契你…來啦來啦哪 …你借住十両銀。
借得你耐就唔好意思，至遲三兩日我就還銀，就還銀。」
「哎喲我啋，啋，啋！對，對，對，對，對！
哎喲難為你話借，借得咁心傷。擘大個口我就睇到你條腸。」
「你有义光鏡咩！」
「你估，哎喲，我當真來跟你上岸呀？」
「咁唔係嘅咩？」
「氹你啫噃！真係囉喎！ 啋！估話當真跟你上岸！哎喲！
跪倒戲（餵）豬就睇錢份上，冇錢開來鬼認你做老相咩！
哎喲，你唔知咩？我地老舉心腸鐵咁樣。有錢開來係我情郎 ……」
＊＊
唱作：杜煥
文字：蕭南仁
影片：Ragamala Rokudan
＊＊
廣東話資料館
沒有留言:
張貼留言