十二生肖，又叫做〔十二屬相〕或者〔十二年獸〕，係東亞地區嘅民族用嚟代表年份嘅十二種動物嘅統稱，包括有〔鼠〕、〔牛〕、〔虎〕、〔兔〕、〔龍〕、〔蛇〕、〔馬〕、〔羊〕、〔猴〕、〔雞〕、〔狗〕、〔豬〕。而每個人都以佢哋出世年嘅象徵動物嚟做生肖，所以以前喺民間通常係用生肖嚟計算年齡嘅，循環一次就叫〔一輪〕。
除咗用生肖紀年之外，重用同佢哋相應嘅十二支紀月、紀日、紀時（時辰）。十二生肖（獸曆）亦都廣泛流行喺亞洲諸民族同東歐，仲有北非嘅某啲國家入面。
喺中華文化入面，對〔十二生肖〕嘅詞語、成語、寓言有好多，但係好多都係屬於貶義嘅；而喺西洋英文入面嘅十二生肖，又有啲咩唔同嘅意義呢？
＊＊〔歡迎提供資料修正〕＊＊
＊＊————————————————————————————————
一〕鼠 Rat
鼠〔rat〕係用嚟比喻〔討厭鬼〕，〔可恥嘅人〕，〔告密者〕，〔密探〕，〔破壞同罷工嘅人〕；而喺美國俚語入面就係指〔新學生〕、〔下流嘅女人〕。
當睇到：
好似：〔smell a rat〕
呢句嘢時，其實係指畀人懷疑係做錯事；
〔a rat race〕
就表示係激烈嘅競爭；
〔rats desert a sinking ship〕
船沉鼠先逃，呢句諺語係指嗰啲一遇到危險就爭先去搵安全地方，
或者係一睇見有困難就匿埋嘅人。
＊＊————————————————————————————————
二〕牛 Ox
牛〔ox〕有關嘅中文成語好多，好似〔對牛彈琴〕、〔牛蹄之涔〕等。而英文入面用〔ox〕嘅表達方式就冇咁多。
用〔ox－eyed〕嚟形容眼睛大嘅人；
用短語〔The black Ox has trod on sb’s foot〕就係表示災禍已經降臨到某個人嘅身上。
＊＊————————————————————————————————
三〕虎 Tiger
虎〔tiger〕係指嗰啲好鬼惡死嘅人，好似〔虎狼之徒〕咁；
而英文就指嗰啲〔著住制服嘅馬夫〕；口語入面就係指〔比賽嘅勁敵〕。
中華地區就會用〔paper tiger．紙老虎〕嚟比喻嗰啲睇落好勁而實質就好弱雞嘅敵人。
而片語〔ride the tiger〕，係表示喺非常唔穩定或者危險嘅方式生活。
＊＊————————————————————————————————
四〕兔 Hare / Rabbit
兔〔hare〕喺英文俚語入面係指嗰啲坐車唔買飛嘅人，即係〔撘霸王車〕。
同［hare］組成嘅片語有：
好似：〔make a hare of sb.］
愚弄某人。
〔start a hare〕
喺討論之中提出枝節問題。
例如：〔You start a hare every time at the meeting.〕
每次討論你都提出同題目冇關嘅問題。
英文入面有好多關於兔嘅諺語；
好似：〔First catch your hare.〕
勿謀之過早〔唔好過於樂觀〕。
〔You cannot run with the hare and hunt with hounde.〕
不能兩面討好（唔好耍兩面派）。
＊＊————————————————————————————————
五〕龍 Lung / Dragon
龍〔dragon〕喺華人嘅心目中佔有好崇高嘅位置，有關龍嘅成語就非常之多，而且含有褒義。好似〔龍躍鳳鳴〕、〔龍驤虎步〕等。喺英文入面，讚龍嘅詞語就非常之少，而且仲係含有貶義嘅添。
例如：〔dragon〕
係指兇暴嘅人，嚴厲嘅人，兇惡嚴格嘅監護人，兇惡嘅老婦人等。
用［dragon］組成嘅片語亦係含有貶義。
例如：〔dragon’s teeth〕
相互爭鬥嘅根源；排列或者多層嘅楔形，反坦克，混克混凝土障礙物。
〔The old Dragon〕
魔鬼。
＊＊————————————————————————————————
六〕蛇 Snake
蛇 〔snake〕嘅含意係指〔冷酷陰險嘅人〕，〔虛偽嘅人〕，〔卑鄙嘅人〕；美式俚語就指〔追求同欺騙女仔嘅男仔〕或者係〔阿飛〕。就咁睇嚟，喺英文入面〔snake〕通常都係含有貶義嘅。
例如：〔John's behaviour shows him to be a snake!〕
莊嘅行為表明佢係一個冷酷陰險嘅人。
同［snake］組成嘅成語習語、諺語有好多，舉幾個例：
好似：〔a snake in the grass.〕
潛伏嘅敵人或者危險；
〔to warm a snake in one’s bosom.〕
養虎貽患，姑息壞人；
〔Takd heed of the snake in the grass.〕
草裡防蛇。
＊＊————————————————————————————————
七〕馬 Horse
馬〔horse〕喺英美國家嘅人都好鍾意嘅，所以用〔horse〕呢個字組成嘅片語、成語、諺語非常之多，舉幾個例：
好似：〔get on the high horse〕
擺架子，目空一切；
〔work like a horse〕
辛苦工作；
〔horse doctor〕
獸醫、庸醫；
〔dark horse〕
競爭之中出人意料嘅勝利者，
例如：〔The voters were surprised when the dark horse won the nomination.〕
嗰個無名小卒贏得提名時，啲選民都Ｏ晒嘴。
＊＊————————————————————————————————
八〕羊 Sheep / Goat
羊〔sheep〕係指〔怕醜而忸怩嘅人〕，〔膽小鬼〕，〔馴服聽話嘅人〕。有關〔sheep〕嘅諺語都有唔少。
例如：〔As well be hanged for a sheep as a lamb.〕
偷羊偷羔都係絞（死）；偷大偷細統係賊〔一不做，二不休〕；
〔There’s a black sheep in every flock.〕
每群羊裡都會有一隻黑羊，醜兒家家有〔每家都會有個敗家仔〕；
〔He that makes himself a sheep shall be eaten by the wolf.〕
甘心做綿羊，早晚喂豹狼〔人弱受人欺〕；
〔The sheep who tallks peace with a wolf will soon be mutton.〕
羊向狼求和平，好快就會變成羊肉〔千祈唔好向敵人求和〕。
而〔Goat〕就畀人指係〔蠢貨〕。同〔goad〕組成嘅片語有：
例如：〔to act the goat〕
做蠢事；
〔silly old goat〕
老笨蛋；
〔to get sb.'s goat〕
使到某人發火。
＊＊————————————————————————————————
九〕猴 Monkey
猴〔monkey〕喺用嚟做名詞嗰時，係指〔頑童〕、〔淘氣鬼〕，話人似猴，係指〔容易受欺負嘅人〕。
例如：〔What are you doing, you young monkey!〕
喺度做咩呀，你隻馬騮！
而用嚟做動詞時係指〔胡鬧〕、〔搗亂〕。
例如：〔Stop monkeying about with the TV set !〕
唔好亂搞部電視機！
同［monkey］搭配嘅片語、習語同俚語好多都好得意。
好似：〔put sb’s monkey up〕
整估某個人，激嬲某個人；
〔Your last word has really put his monkey up.〕
你最後嗰句話搞到佢好嬲；
例如：〔make a monkey of〕
愚弄；
〔a monkey with a long tail〕
抵押；
〔get the monkey off〕
戒除吸毒嘅惡習；
〔have a monkey on one’s back〕
毒癮好深。
＊＊————————————————————————————————
十〕雞 Cock / Rooster
雞〔cock〕係指〔首領〕，〔亞頭〕，〔神氣十足嘅人〕；同［cock］組成嘅片語好多姿多彩。
例如：〔cock of the walk / school.〕
支配人嘅人；
〔a cock of the loft / dunghill〕
喺小天地中稱王稱霸嘅人；
〔live like fighting cock〕
生活得幾好，尤其指食得好；
〔cock - and - bull story〕
荒誕嘅故事，無稽之談。
用［cock］表達嘅諺語：
好似：〔It is a sad house where the hen crows louder than the cock.〕
牝雞司晨，家之不祥
〔老公軟弱而一切由老婆作主嘅家庭係唔會有幸福，
當然呢個係一種大男人嘅思想〕。
而〔Rooster〕係指〔狂妄自負嘅人〕，〔好鬥者〕。
例如：〔Don't talk with him; he is a rooster.〕
唔好理佢，佢太狂妄自大嘞。
＊＊————————————————————————————————
十一〕狗 Dog
狗〔dog〕嘅中文就經常畀人用嚟比喻人，例如：〔忠實走狗〕、〔門口狗〕，成語就有〔狗苟蠅營〕、〔狗彘不若〕等。喺英文入面除咗比喻人之外，重有好多精彩嘅片語、諺語等。
用［dog］嚟做名詞嗰時係指〔無賴〕，〔壞蛋〕、〔廢物〕，〔唔受歡迎嘅人〕。
有時會加形容詞嚟修飾，可以係指〔各種人〕。
例如：〔You dirty dog !〕
你呢個壞蛋！
〔a lucky dog〕
幸運兒；
〔a dumb dog〕
粒聲唔出嘅人，
〔a sly dog〕
偷偷去尋歡嘅人，偷雞摸狗嘅人；
〔a dog in the manger〕
生人霸死地嘅人。
用［dog］表達嘅諺語：
例如：〔Barking dogs seldom bite.〕
吠犬不咬人；大大聲嚇人或者慣咗大呼小叫嘅人，就唔使驚佢；
〔Every dog has his day.〕
凡人皆有得意日〔大家都有好日子〕；
〔Dog does not eat dog.〕
同類不相殘，同室不操戈，〔即係唔好狗咬狗骨〕。
＊＊————————————————————————————————
十二〕豬 Boar / Pig
豬〔boar〕係指〔未閹嘅豬公〕，同豬有關嘅詞語；
重有：〔pig〕
豬、
〔piggy〕
豬仔、
〔wildboar〕
野豬，
〔hog〕
食用豬、
〔sow〕
牝豬，
〔swine〕
豬（舊用法）。
而喺十二生肖用嘅［Boar］，喺英文入面又用嚟比喻［貪婪］、［污糟］、［自私］嘅人。
＊＊————————————————————————————————
編整：黎詩詩．2017年1月29日
＊＊————————————————————————————————
＊＊————————————————————————————————
＊＊————————————————————————————————
廣東話文化。廣東話資料館
