廣東燒賣 gwong2 dung1 siu1 maai2
—————————————————————————————————＊＊
燒賣，又叫做〔乾蒸〕、〔燒麥〕、〔燒梅〕、〔肖米〕、〔稍麥〕、
〔鬼蓬頭〕，係形容頭頂蓬鬆嘅形狀，係一種用燙麵做皮連餡放喺蒸籠
蒸熟嘅小食。依家嘅燒賣喺大陸嘅內蒙古、北京、上海、天津、東北、
山西、山東、江蘇、浙江、福建同廣東都有分布。
有人話，燒賣起源喺元代嘅大都，又有人話其實係喺內蒙古。喺元末明
初，高麗出版嘅中文書籍《朴通事諺解》入面記載元朝首都大都有小販
賣熟食［素酸餡稍麥］，係用麥麵整成嘅薄皮包着肉蒸熟，撈埋啲湯嚟
食。喺清代乾隆年間，楊米仁喺《都門竹枝詞》入面有［稍麥餛飩列滿
盤，新添掛粉好湯圓］嘅詩句。
喺明清時期，［稍麥］嘅稱呼仍然被沿用，但同時亦有諧音［燒麥］、
［燒賣］嘅出現。而有關於燒賣嘅記載，就包括有：《揚州畫舫錄》、
《桐橋椅棹錄》，清朝《金瓶梅詞話》有［桃花燒賣］嘅記述。而喺清
朝著名嘅食譜《調鼎集》亦有收集到呢款菜式，例如：［葷餡燒賣］、
［豆沙燒賣］、［油糖燒賣］等等。
—————————————————————————————————＊＊
［乾蒸燒賣］係廣東人飲茶主要食嘅點心之一。
［廣式燒賣］一般都比較細粒，長度大細大約兩厘米，一個細籠裡面可
以放三至四粒。
［廣東燒賣］嘅款式有好多，比較常見嘅有：
—————————————————————————————————＊＊
乾蒸燒賣 gon1 zing1 siu1 maai2
乾蒸燒賣，又叫［豬肉燒賣］或［蝦肉燒賣］，用切碎嘅豬肉、鮮蝦嚟
做餡料，用鮮黃色嘅薄皮包住，再喺燒賣上面加一啲蟹黃嚟點綴，但係
由於成本問題，依家好多都用蟹子代替蟹黃。
乾蒸燒賣呢個名又係點來嘅呢？聽啲老廣州人講，原來［乾蒸］就係將
啲食物放喺竹籠，用蒸汽炊熟嘅一種烹調方法。
又由於廣東人嘅思想係以水為財，認為［乾］嘅意頭唔好，就用材料名
來代替［乾蒸］嘅叫法，亦成為之後燒賣嘅款式，就好似牛肉丸會整成
［牛肉燒賣］、［蟹子燒賣］、［三星燒賣］等，重有鋪上［豬肝］嘅
叫［豬潤燒賣］。
—————————————————————————————————＊＊
牛肉燒賣 ngau4 juk6 siu1 maai2
牛肉燒賣，係將切碎嘅牛肉，用白色嘅薄皮包住，再喺上面加上一粒青
豆。另有［乾蒸牛肉球］，三粒牛肉放喺腐皮上面。
—————————————————————————————————＊＊
三星燒賣 saam1 sing1 siu1 maai2
三星燒賣，係乾蒸燒賣嘅一個變種，喺豬肉餡嘅燒賣分別放入冬菇、豬
肚同蝦肉［或鵪鶉蛋］。每籠三星燒賣只有三粒，就係放上呢三種唔同
嘅燒賣各一粒。
—————————————————————————————————＊＊
魚肉燒賣 jyu4 juk6 siu1 maai2
魚肉燒賣，比一般嘅燒賣細一啲，主要嘅餡料係碎魚肉，用鮮黃色薄皮
包住，多數點甜醬同辣椒油嚟食。通常都俾人用嚟做街邊小食。
—————————————————————————————————＊＊
黃沙豬潤燒賣 wong4 saa1 zyu1 jeon6 siu1 maai2
黃沙豬潤燒賣，亦都係［乾蒸燒賣］嘅一個變種，喺豬肉餡料上面加上
豬潤。呢款係一種懷舊嘅點心，依家都好少茶樓有得賣，只有一啲老茶
樓，好佚蓮香樓呢類茶樓至有得賣。
—————————————————————————————————＊＊
鵪鶉蛋燒賣 am1 seon4 daan6 siu1 maai2
鵪鶉蛋燒賣，用嘅餡料係碎豬肉、蝦肉，喺上面有粒一原隻嘅鵪鶉蛋，
一啖咬落去，啲蛋黃香同肉汁配合得恰到好處，好正架！
—————————————————————————————————＊＊
齋燒賣 zaai1 siu1 maai2
齋燒賣，係將蘿蔔、馬蹄、豆腐乾切碎搞拌至完全混合，再加入燕麥、
粟米粉、調味，搓成一細嚿，再用雲吞皮包住捏成燒賣形狀，去蒸十至
十二分鐘。
—————————————————————————————————＊＊
—————————————————————————————————＊＊
—————————————————————————————————＊＊
油瓶枳 jau4 ping4 zat1
舊時茶樓食嘅燒賣，其實都都幾大隻，佢重有個花名叫做［油瓶枳］。
先解釋下廣州話嘅［枳］字，音讀［質］，即係個［瓶塞］，而當其時
裝油嘅［油瓶］亦相當大，又有叫做［油埕仔］，可想而知呢個［枳］
能夠塞住個油埕，會有幾大個呢。油瓶枳［冇錯，抵食夾大件！］
資料：《飲食香江》2001 年
—————————————————————————————————＊＊
香港小食。廣東話資料館
沒有留言:
張貼留言