睇圖唔睇文，一定好頭痕！

睇圖唔睇文，一定好頭痕！

［所以，睇圖都要睇埋圖附嘅貼文呀！］

＊＊＊—————————————————————————————————

假㗎啲字

見到講「正字」嘅 post 大家忍忍手唔好 share 啦！

呢種假正字長出長有，原因係粵語（同其他好多語言）嘅人長期缺乏正常嘅語文教育，對自己嘅母語認識貧乏；冇正式渠道認識自己嘅語言，就生產咗一種假學術文章，一兩個神棍，求其揾本古書、摷幾隻古字，標榜係本字正字，中原正音，就有一班人吹捧。要一千幾百 Share 真係毫無難度。

神棍之可以生存，就係因為有班唔識分真假嘅民眾。唔係叫大家下下 Fact check，但係凡涉及語言文字嘅嘢，唔係「未見過」就等於「啱」㗎。你睇完啲嘢你唔覺得唔 make sense 㗎咩？你唔覺得吹大咗㗎咩？

我教大家最簡單嘅原則：如果有人話，某個詞嘅本字係乜乜乜，如果你有「嘩，完全睇唔明呀」或者「好難寫呀」嘅感覺，假嘅機會真係高達八成。為香港人着想，麻煩你唔好 share。

查死書唔會揾到活字，咁在意啲字點寫，不如認真學吓文字學聲韻學。如果你只係鍾意廣東話，對學理冇乜興趣，不如就 share 吓啲優質粵文小說好過。

圖文：粵典創辦人

https://medium.com/@chaaak/gaa2-gaa3-di1-zi6-2ad0c32d2ce0

＊＊＊—————————————————————————————————

現代嘅人好奇怪嘅，當一件事被當做平常，無論有人點去講、點去改、點去做，其他人都會以平常嘅態度面對。但如果將一件平常事用嚴辭去評價、去標籤，人就相反會覺得好奇同有興趣，當人刻意去指斥某啲事係歪理、係錯誤、係唔夠水平時，就可能令人更加想去認識、更加想去理解、更加會去認同，最終係同你嘅意願背道而馳。

就好似喺日常生活，有個字讀錯咗或者寫錯咗［常有發生］，冇問題架，知道咗咪改返正囉，如果唔係牽涉到法律公文嘅嘢，寫字同說話偶有錯失亦係好平常。

喺生活文化上，各個群體或地區都有自己嘅特色，例如同一個字或一句用辭，會有唔同嘅解釋同讀音，又好似唔同嘅字辭亦會有同樣嘅讀音、同樣嘅解釋。呢啲分別，亦可能係各地區群體產生出自己特有嘅意義，唔係用一句［呢啲係錯架］就可以要人認同。

喺學術上，有好多人正喺度推動粵語［廣東話］嘅發展，有啲學者喜歡講究音韻，有啲專家鐘意追查字源，有啲常人只求生活意義，亦啲有學人可能才高八斗，但曲高和寡，肆意吹噓眨人身價，總之就各有各方向、各有各意途、各有各爭議。

有網友亦提出，研究粵語字，文化嘅根底功夫要求唔低，就算日日挑燈夜讀至五更鼓亦須時至少五年或更長嘅時間。而坊間又太多穿鑿附會嘅［專家］，一般大眾係難以辨識嘅。

都唔知點講至好......... 希望有朝一日會出現學者、專家、大眾都認同嘅一套方案啦。

文：小學生級別的文章

＊＊＊—————————————————————————————————

下面係喺網絡流傳嘅一啲［粵語字］參考資料，當中可能有真有假，希望有關學人多用平常姿態指導修正，使常人得知更多自己母語嘅常識。

＊＊＊—————————————————————————————————

咸家鏟 ham6 gaa1 caan2
冚家剷 ham6 gaa1 caan2
解釋：係咒人全家死於非命嘅意思，又引申為［死亡］之意。
例句：你咸家鏟啦你！
　　　你條友正一冚家剷！　

字源資料［參考］
。［咸］字可以解做：都、皆、全。例：老少咸宜、四海咸服。
　《說文》：咸，皆也。悉也。从口从戌。戌，悉也。
　《書經舜典》：殛鯀于羽山，四罪而天下咸服。

其他辭彙［參考］
。咸家鏟：《維基辭典》
。冚家鏟：《粵典》
。冚家剷：《粵典》
。闔家剷：［網絡］
。陷家產：［俗讀］
。含家產：［俗讀］
。杏加橙：［諧音］
。幸富貴：［諧音］

衍生辭彙［參考］
。咸/冚家拎：指家人全部死於非命，得自己一個孤零零。
。咸/冚家祥：反語，表面上係祝人全家祥和，實際上等於講（咸家鏟）。
。咸/冚家長：反語，表面上係祝人全家長壽，實際上等於講（咸家鏟）。
。咸/冚家短：指咒當事人全家短命。
。咸/冚富貴：反語，表面上祝人全家富貴，實際上等於講（咸家鏟）。
　　　　
＊＊＊—————————————————————————————————



澩嫪 lao2 gao6
澩澩嫪嫪 lao2 lao2 gao6 gao6
解釋：形容情況或事物雜亂、亂七八糟嘅意思。
例句：咁大個人，書包都唔識執，樣樣嘢都咁澩嫪，信唔信我話畀你老師知呀嗱？
　　　你整到間房澩澩嫪嫪，又要係亞媽幫你執手尾！

字源資料［參考］
。《說文》：嫪，犬驚吠叫。亦有紛亂、擾亂意思。
。《廣東俗語正字考》：紛亂謂之澩嫪。
。《左思吳都賦》：㒊矗澩㺒，交貿相競。
。［李善註］：澩㺒，眾相交錯之貌。

其他辭彙［參考］
。澩嫪：《廣東俗語考》
。撈攪：［］
。撈嚿：［］
。摎搞：［］
。繚繳：［］

＊＊＊—————————————————————————————————



㪐㩿 laak1 kaak1
㪐㪐㩿㩿 laak1 laak1 kaak1 kaak1
解釋：形容人講嘢斷續、唔順暢、含糊不清嘅意思。
例句：望住嚟讀都讀到咁㪐㩿，重學人參加朗誦喎！
　　　呢位兄台講嘢咁㪐㪐㩿㩿，都唔知佢講乜！

字源資料［參考］
。［㪐㩿］：原本解做唔穩或唔平滑之意，
　　　　　　後來引伸為形容說話結結巴巴、含糊不清。
。《玉篇》：⽁部，㪐㩿，不滑利。
。《廣韻》：沒部，㪐㩿，不穩、不利。
。《類篇》：⽁部，㪐㩿，不滑利或物不安貌。

其他辭彙［參考］
。㪐㩿：《康熙字典》《宋本廣韻》
。㪐㪂：［］
。𪙛𠸉：［］
。犖硞：［］
。犖确：《國語辭典》《廣府俗語探奇》
。犖埆：《國語辭典》
。犖角：［］
。犖確：《國語辭典》
。犖嶨：［］
。䃕確：［］
。䃕礭：［］
。嶨硌：［］
。勒咳：《廣府俗語探奇》
。甩咳：［俗讀］

＊＊＊—————————————————————————————————



俹簁 laa2 sai1
解釋：形容人處事輕率、欠責任感嘅意思 。
　　　即係輕率、無責任感、求其，是但咁解。
例句：條竹升妹做嘢真係好俹簁。

字源資料［參考］
。［俹簁］：本作倚簁，釋名倚簁。
　　　　　　倚簁，倚伎也，簁作清簁也，言人多伎巧尚輕細如簁也。
。《廣州語本字》：俹簁者，作事苟且而不精細也。

其他辭彙［參考］
。俹簁：《廣州語本字》
。搻簁：［］
。揦簁：［］
。揦篩：《粵典》
。揦西：《粵典》
。乸西：［俗讀］
。哪西：［俗讀］

＊＊＊—————————————————————————————————



發怐愗 faat6 ngau6 dau6
怐怐愗愗 ngau6 ngau6 dau6 dau6
解釋：形容人呆頭呆腦、 懵懵懂懂、冇乜神采嘅樣貌。
例句：你次次開會都發怐愗，老闆當然睇你唔順眼。
　　　每次見親佢都係怐怐愗愗咁，佢係咪有病呀？

字源資料［參考］
。［怐愗］本意係形容人愚昧無知。之後引申為意指發呆、放空之意。
。《玉篇》：怐愗，愚貌。
。《楚辭》［九辯。戰國．宋玉］：然潢洋而不遇兮，直怐愗而自苦。
。《南山》［唐．韓愈］：茫如試矯首，堛塞生怐愗。

其他辭彙［參考］
。怐愗：《康熙字典》《國語辭典》
。吽哣：《廣州話正音字典》《廣州話標準音字彙》

＊＊＊—————————————————————————————————



娿哿 o1 go6 / ngo1 go6
娿娿哿哿 o1 o1 go6 go6 / ngo1 ngo1 go6 go6
解釋：形容人姿姿整整、三心兩意、猶豫不決嘅意思。
例句：三姨真係娿哿，出門口時總係要搞多幾個字至行得！
　　　快啲啦，重喺度娿娿哿哿未行得，我哋遲大到啦！

字源資料［參考］
。《正韻》：娿，於何切，音阿。媕娿，不決也。
。《韻會》：娿，倚可切，音㫊。娿娜，弱態貌。亦姓。
。《說文》：哿，可也。
。《左傳》［昭公八年］：哿矣能言，巧言如流。

其他辭彙［參考］
。娿哿：［］

。柯箇：《粵典》

＊＊＊—————————————————————————————————

廣東話。粵語字

粵語字，係統稱用喺書寫粵語白話文嘅中文字，佢重有好多常用嘅別稱：粵語用字、粵語漢字、廣東字、廣州話字、香港字等。而喺臺灣嘅字型廠商就通常稱為廣東外字、香港外字。呢批粵語字主要通用喺粵語嘅使用者之間，尤其喺香港、澳門、海外唐人街地區特別多見，通常用喺私人或群體溝通、網絡論壇、香港媒體、書刊雜誌、劇本同埋一啲字幕。

不過，［粵語字］仍然未有完整同標準嘅方案，好多學者正係積極研究當中，尤其喺［字源］、［讀音］、［正字］、［本字］嘅問題上仍有極多爭議。希望未來會有一套學者大眾都認同嘅［粵語字］標準嘅方案出現。

呢啲［粵語字］嘅資料內容分別喺唔同嘅渠道搜集同整理，如果有其他參考資料嘅話，喺每幅圖嘅貼文中都會盡量鋪出作為參考，但資料亦會出現錯漏嘅地方，歡迎大家提供資料參考及修正。

廣東話。粵語字［圖集］
https://www.facebook.com/pg/CantoneseMuseum/photos/?tab=album&album_id=3029394703737388

＊＊＊—————————————————————————————————

香港語文。廣東話資料館