有人會追憶［十三郎］，亦有人去追捧［唐滌生］，又有冇人認識［馮志芬］呢？其實佢哋三位都係一線牽連，但係佢哋盛名開始喺三個唔同年代。
［歡迎提供資料增修］
＊＊
馮志芬（約1907-1962年），香港編劇家，廣東新會人。出身書香世家，由細就鍾意古代詩詞，亦係佢日後成為編劇家奠定咗堅實嘅基礎。佢亞叔係京劇名演員［梅蘭芳］嘅好朋友，所以亦影響咗馮志芬嘅志趣。
馮志芬喺入粵劇界之前，係［廣州思思中學］嘅教師。初入粵劇界之時，係做編劇家［梁夢］嘅助手同編劇，之後加入［覺先聲劇團］就做過南海十三郎（江楓）嘅副手，再之後成為［覺先聲］、［錦添花］、［非凡響］；［永光明］劇團嘅編劇。
馮志芬嘅劇作特色係情節緊湊、曲詞優美、雅俗共賞。最著名嘅係《胡不歸》。佢嘅代表作重有《零落斷腸花》同埋［四大美人戲］，《西施》、《王昭君》、《貂嬋》、《楊貴妃》，最經典嘅重有為何非凡寫嘅《情僧偷到瀟湘館》。
1929年，唐雪卿同丈夫薜覺先組成［覺先聲劇團］，之後南海十三郎（江楓）亦加入成為劇團編劇。［十三郎］較為多人認識嘅作品有《心聲淚影》、《梨香院》、《七十二銅城》、《女兒香》、《梁紅玉》、《燕歸人未歸》、《李香君》等。
1931年，馮志芬協助［梁夢］編名劇《火燒阿房宮》之後，加入［覺先聲劇團］做開戲師爺，有傳話佢初頭係名編劇南海十三郎（江楓）嘅副手，之後又成為編劇。到南海十三郎離開［覺先聲］之後，馮志芬亦成為［覺先聲劇團］嘅主要編劇。
1935年，馮志芬開始為［薜覺先］度身編寫［四大美人戲］，薜覺先要唔同先後扮演男女角色。好似《貂蟬》，頭場飾貂蟬，後場飾關公；《西施》先飾范蠡，後飾西施；《楊貴妃》先飾楊玉環，後飾唐明皇；《王昭君》先飾漢元帝，後飾王昭君。
1938年，唐滌生初入［覺先聲劇團］時，劇團已經有麥嘯霞、南海十三郎（江楓）、馮志芬等人擔任開戲師爺同編劇，唐滌生高跟住馮志芬等人做助手學寫戲。唐滌生之後又轉為編劇，佢嘅第一部粵劇作品係《江城解語花》。
1939年，馮志芬為［覺先聲］編寫《胡不歸》，呢套劇亦成為薛覺先、上海妹、半日安嘅名劇，經歷過70年，仍然都有劇團演出呢部名作。
1940年，廣州淪陷，南海十三郎（江楓）走去韶關，加入關德興（新靚就）嘅［救亡粵劇團］做編劇。
1945年，韶關淪陷，南海十三郎（江楓）同劇團走到去和平縣，堅持演出，直至日本投降之後，先至返來香港。之後又受到人生同事業嘅打擊，令十三郎失常，經常流連中環街頭同出入醫院。
1948年，馮志芬為［何非凡］領銜嘅［非凡響劇團］編寫《情僧偷到瀟湘館》，連演300場，轟動一時。
1949年，馮志芬喺大陸解放之後，由香港返上廣州，先後喺［文聯粵劇團］、［永光明粵劇團］、［廣州粵劇團］做編劇，佢編嘅《評雪辨蹤》喺廣州市粵劇第一屆觀摩大會度攞到［劇碼獎］，之後重有改編《紅娘子》、《白蛇傳》、《碧容探監》，重編《胡不歸》、《西施》等劇目，佢重同［莫志勤］合編《梁山伯與祝英台》。
1954年，薛覺先離開香港定居廣州，出任廣州粵劇工作團藝術委員會主任同中國戲劇家協會廣州分會副主席，後來任全國政協委員。
1956年，唐滌生加入［仙鳳鳴］做劇團劇務主任，同年演出作品有《紅樓夢》、《唐伯虎點秋香》、《牡丹亭驚夢》、《穿金寶扇》等。
1957年，馮志芬喺大陸嘅［反右運動］時，畀人劃為［右派分子］，之後送咗去農場度改造［勞改］。
1962年，南海十三郎（江楓）撰寫《十三郎談粵劇前景》，語重心長。
＊＊
1956年，薛覺先喺大陸演完［花染狀元紅］，第二日就因為腦溢血過身，佢葬喺廣州三元里走馬崗八和墓園。
1959年，唐滌生喺［利舞臺］首演《再世紅梅記》嘅時候，因腦溢血暈低畀人送去法國醫院搶救，但喺第二日最終不治。
1962年，馮志芬喺廣東三水嘅一個農場度逝世。馮志芬死後，獲得平反，恢復名譽，劇協廣東分會、廣東粵劇研究中心成立［馮志芬劇作研究會］，紀念佢對粵劇嘅貢獻。
1984年，南海十三郎（江楓）當時因患普通科病，由青山醫院轉送往瑪嘉烈醫院，最後不冶病逝。
＊＊
順便介紹一下（薛覺先）嘅粵劇改革：
薛覺先喺上海拍戲嘅時候，就廣泛接觸到京劇，發現佢哋嘅技藝精湛同好有系統。於是，薛覺先就喺上海做事嘅同時又學習京劇藝術。1927年，薛覺先返到香港，先後加入［天外天］、［新景象］、［大江東］等戲班。1929年又返去廣州，當時［大羅天］戲班改組，佢應邀加入同做埋班主，戲班改名［覺先聲］劇團。之後，薛覺先就致力於粵劇嘅改革。
首先，由戲班嘅制度入手，取消咗［師約制］，打破［紅船］嘅陋規，畀演員有返啲人身自由，又喺演出之時，唔准街外小販入場叫賣，嚴禁閒人隨意出入，以保證演出時有良好嘅秩序。跟住，又廢棄咗提綱戲，杜絕［爆肚］、［吞生蛇］同埋［飲湯］、［換墊］等嘅現象，要求排演忠於劇本，唱做念打唔可以更動。更重要嘅係，佢對粵劇藝術嘅全面革新。
腔調方面，借鑑京劇婉轉同和諧嘅唱腔，吸收江浙戲劇小曲同時代流行曲輕快流暢嘅優點，創造出一種字正腔圓，善於表達情意嘅［薛腔］；樂器方面，喺［五架頭］中式樂器之中，加入小提琴、吐林必、瑟士風、吉他等嘅西洋樂器同京劇鑼鼓，組成［中西合璧］嘅音響，使到音色更加豐富同厚實；表演方面，佢又融合京劇嘅武功、身段、舞蹈等嘅技藝，又請來袁小田、郭鴻斌等教授北派功夫，開創粵劇［北派］嘅開打場面。
薛覺先對粵劇嘅全面付出同努力改革，贏得［粵劇伶王］、［萬能泰斗］、同埋［一代宗師］等稱譽，又被英國倫敦［國際哲學科學藝術學會］招為會員。
＊＊
香港故事。廣東話資料館
沒有留言:
張貼留言