廣東十虎 gwong2 dung1 sap6 fu2

廣東十虎 gwong2 dung1 sap6 fu2
——————————————————————————————————

相傳喺清末年間，廣東有十位武功極高，受人尊敬的武林怪傑稱為［廣東
十虎］；廣東十虎嘅英雄人物分別係：王隱林、黃澄可、蘇黑虎、黃麒英、
周泰、譚濟筠、黎仁超、陳鐵志、蘇燦、梁坤。

廣東十虎，係近代歷史嘅產物，由於清代末年內憂外患社會動盪不堪，清
政府根本無力保護良民，廣東省地處南方治安更為惡劣，民間為咗保護自
己紛紛習武，各村鎮行會都爭聘武術高強嘅武師任教，一來為咗保護自身
利益，二來亦可以使子弟強身健體，所以一時之間練武嘅風異常熾熱，特
別係廣州，有好多武館相繼設立而...而且公開招攬學生。

正所謂同行如敵國，各武師為咗爭奪市場利益，彼此之間踢館同接受外人
公開挑戰係好平常嘅事，一場比武決戰之後，勝者有更多嘅學生慕名而至，
敗者漏夜回鄉關門大吉，可想而知喺呢個殘酷嘅競爭之下，冇真材實料係
唔可能喺廣州食武師呢行飯嘅，更唔好話要喺廣東打出名堂。不過，呢種
環境就促進咗近代南派拳術嘅發展，有好多依家重流傳嘅南拳都係始創喺
呢個時代背景。

當然，按照華人嘅道德標準，武功高強嘅武師亦唔一定受人尊敬嘅，擁有
高強武功而言行不善嘅武師只會被人唾駡為以武淩人嘅惡霸，唯有行俠仗
義，武功高強嘅先至受老百姓所尊敬。被封為［廣東十虎］嘅武師，就係
呢類身懷絕技嘅民間英雄。廣東十虎之中，幾位重有著傳奇嘅經歷，所以
畀人搵嚟做拍電視劇嘅題材。廣東十虎係十九世紀（1800年——1899年）
嘅人物。另外，廣東十虎之一嘅黃麒英個仔黃飛鴻，佢並唔係廣東十虎之
一。

——————————————————————————————————
——————————————————————————————————

王隱林［俠家拳］
　


——————————————————————————————————

相傳廣東南拳大俠李鬍子，由四川雲遊到廣東，喺肇慶鼎湖山慶雲寺掛單，
將俠家拳傳畀僧人王隱林［王飛龍］，王隱林到廣州之後還俗，喺黃沙兼
善街開設武館授徒，將十二支橋，小羅漢，虎鶴相鬥，大羅漢，俠家刀、
槍棍等拳械套路傳畀王漢榮、王倫［王敬初］、蔡懿恭、王林開、潘鑒等
徒弟，廣州洪家拳鄧龍對俠家拳表示欣賞，重畀個仔鄧錦濤拜王倫為師，
鄧錦濤傳畀個仔鄧鎮江。

王隱林喺廣州傳授咗七個高徒，其中王倫一脈傳畀鄧錦濤，王林開一脈傳
畀吳肇鐘，吳肇鐘發揮咗俠拳嘅鶴形特點，分支白鶴派，蔡懿恭一脈向海
外發展，稱龍長老係喇嘛，所以又分支為喇嘛派。

絕技：俠家拳、俠家拳械
拳套：十二支橋、小羅漢、大羅漢、虎鶴相鬥
器械：單刀、左把槍、九點十二槍響棍

——————————————————————————————————
——————————————————————————————————

九龍拳［黃澄可］




——————————————————————————————————

黃澄可，又叫爛頭可。傳聞佢為人生性善良，宅心仁厚，天資聰敏，樂於
助人。原本係鄉村赤腳細路仔，事事唔強求，之後離開家園出去省城，面
對人生種種考驗同經歷之餘，先後得到一代宗師陸阿采、黃麒英、鐵撟三
等人指點武學，經歷大大細細嘅生死切磋搏鬥，融會貫通各家武學之大成，
最終自創出一套剛柔並重，變化無窮嘅［九龍拳］。

相傳話當時朝廷績弱，國難當前，民不聊生，黃澄可不惜一切聯同眾虎，
灑熱血拋頭顱，發揚武學嘅俠義精神，亦成為一代英雄。

絕技：九龍拳
九種武功集一身。拳招一發就好似［九龍沖天］咁，幻變無窮。

——————————————————————————————————
——————————————————————————————————

鐵沙掌［蘇黑虎］




——————————————————————————————————

少林黑虎門，相傳源出嵩山少林寺，距離依家約二百年前嘅道光年間，有
一個少林僧人法號［兆德］，每隔幾年就到廣東化緣一次。因而遇上順德
北崗鄉嘅蘇黑虎，蘇黑虎年幼時已經學習武術，但你見到兆德和尚嘅少林
絕技之後，就決心跟兆德和尚上嵩山少林學藝。但係蘇黑虎初到少林寺嘅
時候，兆德和尚就一啲功夫都唔傳授畀佢，只係每日吩咐蘇黑虎重複咁拋
石鎖、彈石球、埋木椿等最基礎嘅功力訓練。

聽講話，原來兆德和尚心裡係另有打算嘅，佢希望蘇黑虎能夠練得一對橋
手堅實如鐵，唯有呢種武術功底，少林拳嘅威力先王可以發揮，就係咁，
蘇黑虎就整整花咗三年時間練習基本功，直到有一日，兆德和尚認為時機
成熟，就親自教咗一套黑虎十形拳、一套醉八仙拳、黑虎刀同金剛棍。前
前後後共用咗六年，蘇黑虎終於學成落山，嗰時佢已經係廿四歲。

身懷少林絕技嘅蘇黑虎返到老家順德之後，接受鄉親邀請教村入面嘅子弟
少林武功，但係蘇黑虎喺村鎮入面教拳，佢實在覺得自己懷才不遇，之後
就到省城［廣州］發展，喺同村兄弟嘅介紹，先去任職果欄教頭，三年後
蘇黑虎喺廣州西關開咗間武館，由於藝宗少林，武藝精湛，慕名而嚟嘅開
始多，不過就招致當地嘅武當派教頭呂榮嘅妒忌，去到蘇黑虎嘅武館搗亂，
但係畀蘇黑虎擊敗，從此聲名大噪。又因為蘇黑虎武功精湛，行俠仗義，
名震羊城，得後人封佢為［廣東十虎］之一。

絕技：鐵沙掌、黑虎十形拳
黑虎十形拳嘅［十形］即係龍、蛇、虎、豹、鶴、獅、象、馬、猴、貂，
係一套剛柔並濟嘅拳術，套路分做前椿、中椿同後椿三部份，由於源自少
林寺，所以叫做少林黑虎門。

——————————————————————————————————
——————————————————————————————————

無影腳［黃麒英］




——————————————————————————————————

黃麒英嘅功夫，相傳係源自金鉤李鬍子同洪熙官嘅傳人陸亞彩。

黃麒英，係南海西樵人。少年時鬻技街衢，賣藝為生，有一日喺鎮粵將軍
署前曠地賣武，咁啱陸阿采又在場，見佢係個良材，就收咗佢做徒弟。黃
麒英跟師父學藝十年，得到師父嘅武學神髓。

黃麒英之後做咗鎮粵將軍所部兵技擊教練，不過就薪俸底微，每個月所得
嘅都只係三兩六錢，都唔可以養家，所以佢重要喺靖遠街開設生草藥鋪，
搵返些少幫補一下。

聽講話，黃麒英將佢嘅平生所學都傳畀佢個仔黃飛鴻［喺功夫片嚟講，黃
飛鴻就係個著名人物］，而黃飛鴻又將功夫再傳受畀林世榮、梁寬等人。

絕技：無影腳
洪拳腳法：魚尾腳、鏟腳和鐮刀腳。
單動腳法：魁星踢斗［低彈］、白鶴踏雪［踩腳］、童子獻蹄［撐腳］、
　　　　　虎尾腳［側撐］、明尖腳［中彈］、鉸剪腳［奪命］；
組合腳法：懶虎伸腰［橫撐］、三星鉤彈腳、纏絲明尖、左右撥腳、
　　　　　連環掛腳［］、連環穿心腳。
十獨手内：伏地虎尾腳，月影撩陰腿，分溜持拐腳，三星勾彈腳。

——————————————————————————————————
——————————————————————————————————

軟綿掌　周泰




——————————————————————————————————

周泰，係清末廣東湛江人，武術家，外號［周鐵頭］，以八卦棍、軟綿掌
馳名，有［嶺南棍王］稱號。傳聞佢俠骨丹心，唯心高氣傲，自尊心過強。
又醉心武學，係［十虎］之中嘅［武癡］。周泰以發揚家傳周家拳為畢生
事業，但係羈絆於武學範疇上嘅［象牙塔］之內。

聽講話，佢後嚟得到高人指點，拋開周家拳嘅枷鎖，脫胎換骨，練成一套
以柔為主，柔中寓剛，行掌時綿綿延長嘅掌法［軟綿掌］。

絕技：軟綿掌、八卦棍
綿掌拳係一種短促靈便快打嘅傳統拳術，勁道講究脆、快、硬，特點係發
力迅速，雙掌拳交替快捷，全套一氣呵成。基本功為［十三太保功］，分
蹲式、站式、臥式三段，共十三個動作要求外形動作同內體運氣相統一，
具有氣功特點。

——————————————————————————————————
——————————————————————————————————

七星拳［黎仁超］




——————————————————————————————————

黎仁超，傳聞佢為人聰明能幹，頭腦靈活多變，每每洞悉先機，係個城府
好嘅人。佢喺［十虎］之中嘅智將。絕招七星拳，拳術就好似［北斗七星］
咁，靜如穹蒼天河，動如鬥轉星移。呢套［七星拳］原名係［七傷拳］，
招式以狠辣惡毒為主，務求一招殺敵。

黎仁超雖然有一身好武功，但就深藏不露，唔會輕易出手。聽講話，佢初
時係個不擇手段向上爬嘅人，甚至利用人哋嘅感情嚟漁利。但佢始終都係
本性善良，到咗關乎國家安危嘅時候，亦都大徹大悟，棄暗投明，亦成為
［廣東十虎］之一。

絕技：七星拳［七傷拳］
器械：蝴蝶雙刀

——————————————————————————————————
——————————————————————————————————

鶴陽拳［潭濟筠］




——————————————————————————————————

潭濟筠，係清末年間嘅廣東武術家，原名潭石窩，成名之後將個名改爲潭
濟筠。傳聞佢為人性格率直衝動，之後跟隨詠春宗師梁贊學武，唔單只武
藝精進，個人亦變得成熟穩重，因緣際遇又結識到革命黨人，重不惜一切
捨身匡扶，好多次身陷險境亦義無反顧。後嚟佢更將所學嘅詠春拳，融會
之後再自創出鶴陽拳。之後又重開設武館授徒，發揚鶴陽拳要萃，又成為
［廣東十虎］之一。

絕技：鶴陽拳
呢套鶴陽拳，放拳如猛虎，出招似蛟龍，拳法剛烈威猛，動作長橋大馬，
大開大合，套路係以拋拳、沖拳、衝鋒拋拳為主，動力係發長勁、拋勁為
主，衝擊力大，招法係以彈、拋圈托為主，進攻勇猛快速。

——————————————————————————————————
——————————————————————————————————

鷹爪王［陳鐵志］




——————————————————————————————————

陳鐵志，又名陳長泰，傳聞佢有一身剛猛雄勁嘅武功，出手疾如閃電，指
勁雄渾，堅如鐵石，所以啲人叫佢做［鐵指陳］。更有傳話陳鐵志係個出
身低下嘅莽夫一名，佢惟利是圖，恃強淩弱，深明無權勢冇發達之道。佢
後嚟洗心革面，同眾虎一齊抵抗外侮，亦成為［廣東十虎］之一。

絕技：鷹爪功／鷹爪拳
鷹爪拳係吸收鷹嘅形意同擊法發展而成嘅一種拳術，屬象形拳。又有鷹爪
翻子拳、鷹爪行拳同鷹爪連拳之稱。呢套拳以模仿鷹爪抓扣同鷹翼翻旋嘅
動作為主。

——————————————————————————————————
——————————————————————————————————

醉拳［蘇乞兒］




——————————————————————————————————

蘇燦，廣東南海人，清朝後期拳師，精於拳棍。傳聞佢為人好勝，放蕩不
羈，淡薄名利，認為父親做人只係識委曲求全，引以為恥，形成佢反叛嘅
性格。佢處事招搖，成日花天走地，揮霍無度。蘇燦父母因為自己闖禍而
死，之後就遁世江湖，與酒為伍，狂歌當哭。不過佢竟然將消愁嘅酒意融
入功夫嘅招式入面，畀佢創出咗套別具一格嘅［醉拳］，係［廣東十虎］
之中最出世化外嘅一虎。

另外，有傳聞話蘇燦曾經同佢個妹喺街頭賣藝。又有傳話佢曾經喺廣州三
聖社設教館授徒。

絕技：醉拳
醉拳係武術之中以模仿醉漢［醉酒佬］動作嘅一種拳術。雖然醉拳喺大眾
文化之中相當知名同廣為人知，但係醉拳嘅真實性同歷史又真係幾難搵到
資料。

醉八仙歌訣
醉者，醉也，號八仙。
頭頸兒，曾觸北周巔，兩肩誰敢與周旋。
臀膊兒，鐵樣堅；手肘兒，如雷電。
拳似抵柱，掌為風煙。
膝兒起，將人掀；腳兒勾，將人損。
披削爪掌，肩頭當先。
身範兒，如狂如顛；步趨兒，東址西牽，好叫人難留戀。
八洞仙跡，打成個錦冠顧天

第一節：漢鐘離，酒醉仙。
　　　　胡蘆兒，肩上安。讓來讓去，得他便。
　　　　雖則是玉山頹樣，也須要躲影神仙。
　　　　膝兒起，撇兩邊，起時最忌身手便。
　　　　牽前踏步，帶飛推肩。

第二節：呂洞賓，酒醉仙。
　　　　背上兒，雙飛劍。披手披腳隨他便，隨他便。
　　　　雖則是兩手如矢，也須要直利牽拳。
　　　　反後步，要身偏，偏時要閉陰囊現。
　　　　從上劈下，石壓山巔。

第三節：韓湘子，酒醉仙。
　　　　竹筒兒，手內拈，重敲輕打隨他便，隨他便。
　　　　雖則是，裏裹外裹，也須要，插掌填拳。
　　　　魚鼓兒，咚咚填，打時誰知掃陰現。
　　　　去時躲影，來若翩遷。

第四節：曹國舅，酒醉仙。
　　　　手兒裏，拂塵翩。直臂橫肘隨他便，隨他便。
　　　　雖則是，身步齊進，也須臂膊渾堅。
　　　　頂肘開，頓肘填，坐時誰知身坐連。
　　　　臀肘右下，左臂身旋。

第五節：何仙姑，酒醉仙。
　　　　鐵爪籬，懷中見，上爪下爪隨他便，隨他便。
　　　　雖則是，鸞顛鳳倒也須要，側進身偏。
　　　　指上爪勝鐵鞭，爪時誰知血痕見。
　　　　長伸短縮，通臂如猿。

第六節：藍采和，酒醉仙。
　　　　兜的是，花籃艷，上勾下挽隨他便，隨他便。
　　　　雖則是，蜻蜒點水，也須要，搬開爭先。
　　　　眼兒緊，望下邊，望時只怕腿尖現。
　　　　挽拳挽腳，裏進填拳。

第七節：張果老，酒醉仙。
　　　　拿的是，鐵栗片，拿來拿去隨他便，隨他便。
　　　　雖則是，金絲纏洗，也須要，骨反筋偏。
　　　　身窈窕，採摘堅，采時離托人前面。
　　　　拿拳拿掌，後手緊拈。

第八節：鐵拐李，酒醉仙。
　　　　倒戴的，金剛圈。左投右撞隨他便，隨他便。
　　　　雖則是，黃鶯磕耳，也須要，腳管肩先。
　　　　腳兒彎，好勾臁，勾時鄭重人後面。翻身進步，身倒腳掀。

醉八仙歌訣，亦出自《拳經拳法備要》同《拳經》內容可查。

醉八仙歌，只係假藉八仙嘅名義，將招式藏訣於中，主要講求：頭、肩、
臂、肘、拳、掌、膝、腳八個部份嘅妙用。適用喺各類拳種，為萬變不變
嘅萬法之法。唔係醉拳獨有所屬嘅。

——————————————————————————————————
——————————————————————————————————

鐵橋三［梁坤］




——————————————————————————————————

梁坤，廣東南海縣人，因為橋手功夫獨到，所以被人稱為［鐵橋三］，亦
有［洪拳大師］之稱。傳聞佢少年時好習拳技，有緣拜少林名手金李鬍子
為師，之後遊覽各地尋師訪友，苦練少林武術，練到對橋手就好似鐵一樣。
梁坤鍾意同佛家人士往來，喺廣州彩虹橋廣昌梁布廠做教頭，技壓各方拳
勇，聲名大振。

梁坤出生於清嘉慶年間，經曆咸豐同治兩個世代，佢喺光緒十二、三年之
間過身。聽講話鐵橋三嘅死，係因為佢喺海幢寺隨圓光和尚練習三十六點
銅環棍，積勞成疾，鐵橋三又因為染有阿芙蓉癖者，圓光和尚要佢戒煙，
鐵橋三接受聽話，決心戒絕，苦練棍法，但係因為年事已高，體力支持唔
全，染病而卒，享壽七十。

絕技：洪拳、鐵線拳
洪拳十二橋：剛、柔、逼、直、分、定、寸、提、流、運、制、訂；
十二橋手法：穿、沉、分、架、摸、推、尋、磨、掛、撞、鎖、劈。
十二橋馬步：四平馬、子午馬、伏虎馬、麒麟馬、吊　馬、獨鶴馬、
　　　　　　中字馬、三角馬、敗馬、二字鉗羊馬、跳馬、丁字馬。

——————————————————————————————————
——————————————————————————————————

廣東傳奇人物。廣東話資料館