推廣［粵劇］問題多！

香港喺三四十年代，粵劇已經非常興盛，踏入五六十年代，更加係粵劇嘅全盛時期。當時嘅粵劇賣座率好高，粵劇藝人亦係市民爭相追捧嘅偶像，著名紅伶老倌多不勝數，佢哋嘅演出每每都必定吸引大批影迷喺場外等候，風頭一時無兩。可惜由七十年代起，粵劇藝術卻走上衰落嘅命運。

千禧過後，政府鼓勵民間參與推廣粵劇，亦有團體成立粵劇發展基金，發展粵劇嘅機構有好多，包括八和會館，演藝學院，各間大學及研究院，私營機構，慈善團體，各大大細細嘅戲曲劇舍等等等。睇落好似聲勢浩大，有風光再現嘅［吹勢］。不過，真正嘅市場又見唔到有咩特別起色，而各大碼頭喺推廣運作之間，又出現好多對立意見同問題。其實，粵劇界有冇真正聯合去面對現實呢？

＊＊

推廣粵劇問題多！多！多！



。有人認為依家嘅粵劇已經變成一項福利藝術；
　觀賞戲曲藝術，多數都唔使畀錢入場嘅。

。有人覺得粵劇都搞到成為文化遺產嘅地步；
　叫得做遺產，梗係有啲嘢係死咗救唔返啦。

。有人指責政府投放資源唔夠，令社會變成文化沙漠。

。有人以立場為先，路不同不相為謀，對家嘅嘢唔會幫。

。有人為咗想留名流芳，所以傾財出力而為之；
　可惜係欠缺專業，遇到粗製濫造嘅合作伙伴。

。有人為咗助人達成理想，出心出錢又出力，不過好人難做；
　藝術家嘅理想總係比天要高，比海更深，真係嘥錢兼受氣。

。有人為推普及眾，以致雅俗共賞；
　不過左右為難，唔知要向左走，定係向右走至啱。

。有人為求雅致，俗不可耐，不與同坐。
　連坐埋都話影低佢，甚至係影衰佢，更唔使講話合作。

。有人認為名聲最緊要，寧缺勿濫，重質不重量，只此一家；
　如果製作質素係差嘅，整衰自己個招牌，就寧願唔做。

。有學者認為粵劇藝術，無論做同唱都要有分級制度；
　就好似西方歌劇同音樂一樣，有曬證書等級同認可，
　咁樣先至可以確定佢哋喺業畀嘅地位同重要性。

。有人銳意改革，想將自己嘅粵劇文化推出外國；
　不過喺外國人嘅眼中，其實同任何地區都一樣睇法，
　連本土嘅大眾市場同知名度都冇，根本重未夠班來到傾。

究竟您哋想點樣推廣［粵劇］嘅呢？

您覺得重有咩問題呢？

［歡迎提供意見］

＊＊

補充資料：

＊＊

廣東大戲



粵劇，原稱［大戲］或者［廣東大戲］，源自［南戲］，由明朝嘉靖年間開始喺廣東、廣西粵語地區出現。粵劇係糅合唱做念打、樂師配樂、戲臺服飾、抽象形體等等嘅表演藝術。粵劇每一個行當都有各自獨特嘅服飾打扮。最初演出嘅語言係中原音韻，又稱為［戲棚官話］。到咗清朝末期，知識分子為咗方便宣揚革命而將演唱語言改為粵語廣州話，使廣府人更容易明白。

粵劇喺2006年5月20日公布嘅第一批518項國家級非物質文化遺產名錄之內。

粵劇又喺2009年9月30日，獲聯合國教科文組織肯定，列入人類非物質文化遺產名錄。

＊＊

八和會館

八和會館，係由鄺新華、獨腳英、林之等粵劇藝人所建立粵劇仝人嘅行會組織，大約係1889年喺廣州成立，原址位於黃沙。之後喺香港、新加坡、馬來西亞、美國都設有分館，佢哋嘅會員都畀人叫做［八和子弟］。

喺明代，由於粵劇喺廣東佛山越來越盛行，為咗方便聯絡同安排同班主訂立合約，負責籌辦粵劇嘅藝人就集合埋一齊成立［瓊花會館］。後來，清朝咸豐年間，由李從善老先生喺黃沙同吉大街建立咗同類組織［吉慶公所］。到咗清朝光緒十五年（1889年）喺廣州建立一個有規模嘅著名粵劇組織［八和會館］。八和，就係德和、永和、兆和、新和、福和、慎和、普和、合和等共八個堂組成。隨着粵劇喺東南亞各地普及，粵劇組織相繼出現，有新加坡睯［慶維新］同吉隆坡嘅［普長春］等等。
唔同嘅行當會安排住喺唔同嘅分堂：
。兆和堂：只有公腳、小生、總生、正生、大花面等行當至有資格住；
。慶和堂：只有二花面、六分等行當至有資格住；
。福和堂：只係做花旦住宿之用；
。新和堂：只係供丑生住宿之用；
。永和堂：只係供小武同武生住宿之用；
。德和堂：只係供五軍虎和打武家住宿之用；
。慎和堂：只係供接戲同賣戲者住宿之用；
。普和堂：只供粵劇棚面音樂人員住宿之用，後來改名為［普福堂］。

＊＊

仙鳳鳴與雛鳳鳴



仙鳳鳴劇團，由任劍輝和白雪仙喺1956年成立嘅粵劇劇團。成員包括靚次伯［武生］同梁醒波［丑生］，重請得唐滌生來做劇團劇務主任，可惜唐滌生喺仙鳳鳴第八屆上演《再世紅梅記》時，不幸逝世。仙鳳鳴之後後停演咗兩年，而第九屆演出嘅劇目《白蛇新傳》係唐滌生先生生前準備已久嘅劇目，任白將唐滌生已搜集嘅資料，交洲九位編劇家整理之後演出。

雛鳳鳴劇團，由任劍輝同白雪仙喺1963年創立嘅劇團。最初，劇團嘅成員只係以興趣形式加入，而喺1964年第一次公開演出。雛鳳鳴嘅主要成員都係任白嘅徒弟，包括有龍劍笙、朱劍丹  、蓋劍奎、江雪鷺、梅雪詩、言雪芬同謝雪心。而喺嗰個年代，行內有個唔成文嘅規定：只有「雛鳳鳴劇團」先至可以訂「一個月」咁長嘅台期。其他成員都只係喺1989年任劍輝出殯時同逝世周年紀念先至再聚集嘅。

＊＊

八和粵劇學院

八和粵劇學院，係香港八和會館創辦嘅一家粵劇訓練學校，喺1979年由當屆理事會決定創辦，籌備委員會成員包括黃炎、梁漢威、劉月峯、羅家英、李奇峯、陳昌、麥惠文、任大勳等，喺1980年初正式招生。當年導師包括楊劍華、王粵生、任大勳、麥惠文、陳敏、李艷霜、曾玉女、郭鴻斌等。課程分唱科、演科、基本功三科，為兩年學制。頭五屆培育出嘅人才包括有蓋鳴暉、鄧美玲、衛駿英、廖國森等當今名伶。

1996年，八和粵劇學院獨立註冊為慈善團體，得到市政局同香港藝術發展局資助，同香港中文大學校外進修學院聯合主辦「粵劇培訓證書課程」，當年由汪明荃任名譽總監，梁漢威任藝術總監，梁沛錦任課程顧問。課程加入粵劇史、粵劇化粧等，導師有區文鳳、麥惠文、許堅信、鄭文瑛、王家玲、周莉莉等，由羅鴻統籌、陳守仁任課程主任。

＊＊

香港演藝學院 The Hong Kong Academy for Performing Arts



演藝學院（HKAPA），喺1984年按《香港演藝學院條例》成立，係香港暫時唯一專門培養表演藝術人才嘅公立院校，亦係香港藝術領域嘅學術機構。演藝學院提供學士課程同實踐為本嘅碩士課程，學習範疇包括中國戲曲、舞蹈、戲劇、電影與電視、音樂與舞台同埋製作藝術。

演藝進修學院（EXCEL），係演藝學院持續教育分部。喺2001年創校，設有適合兒童同成人嘅短期課程，包括舞蹈、戲劇、音樂、舞台同製作技術，重有電視電影課程。

＊＊

粵劇發展基金



粵劇發展基金，係由民政事務局法團喺2005年11月27日正式設立嘅慈善基金，由民政事務局負責監管基金嘅運作。基金嘅成立宗旨係［支持和資助有關粵劇發展的研究］；［支持和資助推廣和延續粵劇發展的計劃和活動］；［支持和資助粵劇發展用途附帶引致的其他慈善工作和計劃］，同［有助達致這些用途的慈善工作及計劃］；及［為有助達到粵劇發展段述用途的計劃籌募款項。

＊＊

粵劇營運創新會



粵劇營運創新會，係一個喺2008年成立嘅非牟利團體。致力推動粵劇業界發展同增加公眾對粵劇嘅認識，以求大眾感受粵劇藝術嘅樂趣。創新會由2008年開始成為沙田大會堂場地伙伴，協助參與劇團宣傳演出劇目，又會定期舉辦各類同粵劇相關嘅公眾活動。

＊＊

生命勵進基金會



生命勵進基金會，由一眾關懷社會，樂於奉獻嘅有心人參與發起，喺2014年成立嘅香港民間慈善團體。基金會致力促香港社會可持續進步、愛惜生命、扶助弱勢、珍惜本土文化等各類教育慈善工作。具體包括設立大專院校升學獎，助學金，營運生命教育農莊，支持以推動中學生參與文藝創作同欣賞等，亦舉辦唔定期嘅教育同社會服務等公益活動。
推廣粵劇方面：
。校園［粵劇全接觸］進入中小學校園，向學生介紹粵劇文化。
。舉辦［粵劇劇本創作比賽］2017年為第一屆試辦，2018年頒獎及製作演出。
。籌劃［粵劇藝術評核評級計劃］與專業學者及政府部門商議。
。籌劃［粵劇金紫荊獎及頒獎典禮計畫］希望2019年推出。

＊＊

輯：蕭南仁。2018年6月

＊＊

拜將臺 英雄會 2015



呢個係有關劉邦借呂后剷除韓信嘅故事，反映中國人社會，有太多嘅恐懼，永遠怕畀人取代，必須要鬥垮一個可能威脅自己地位嘅人，置諸死地而後快。喺劇中嘅所有人物都係好直氣壯咁做一件自己認為係對嘅事。

＊＊

廣東大戲。廣東話資料館