仙鳳鳴《紫釵記》劍合釵圓［1959年電影］

仙鳳鳴《紫釵記》劍合釵圓［1959年電影］

無論係《紫釵記》或者係《紫簫記》入面，霍小玉都係能夠同李益終成眷屬，而小說入面嘅李益就對霍小玉始亂終棄，順從母親之命，另娶富家女為妻，使霍小玉悲痛欲絕，更係「喪慟號哭數聲而絕」。

＊＊



情節大綱：

唐代隴西士子李益（十郎）赴長安應試期間，喺元宵夜長安燈市執到霍小玉留低嘅紫玉燕釵，之後重發展到以釵定情添。李益得到朋友崔允明嘅鼓勵，直訪霍小玉家求親，當晚就成其好事。喺李益同霍小玉相遇之前，曾經巧遇過盧太尉嘅女盧燕貞。燕貞好仰慕李益嘅才華，對佢重一見傾心，咁就種下咗李益同霍小玉二人分離嘅禍根。兩人新婚之時，正係李益高中狀元之日。盧太尉特意下令新及第進士等人都要上門拜見，希望趁呢個機會安排燕貞嘅婚事，偏偏李益就冇來到。因為咁，盧太尉將李益遠庶塞外參軍，斷絕佢同霍小玉兩人嘅音訊。李益呢一去就三年，而霍小玉生嘅活日漸艱難，重要時加接濟潦倒嘅崔允明，最後只得叫佢嘅侍女浣紗將佢支紫玉釵變賣。

過咗三年之後，李益被召返長安，盧太尉又想招李益做女婿，重用埋啲奸計，唔準李益返屋企，又暗中買咗霍小玉變賣嘅紫玉釵，再向李益詐稱霍小玉已經另嫁他人，等李益死埋條心。盧太尉又逼李益嘅朋友韋夏卿同崔允明做媒人 ，搞到崔允明為報霍小玉嘅恩情而死。十郎見釵在情亡，唔願再娶，重想吞釵拒婚，可惜畀盧太尉用反唐詩來威脅。後來霍小玉遇到黃衫客〈花前遇俠〉，重得到黃衫客嘅幫助，再可以同李益重逢。兩人冰釋前嫌，十郎為小玉將紫釵重新插戴，以証舊盟。盧太尉得知呢件事之後勃然大怒，李益又畀盧太尉嘅爪牙捉返去，逼佢即日同燕貞成婚。〈劍合釵圓〉霍小玉再得黃衫客之助，冒死闖入盧府據理爭夫。盧太尉以霍小玉闖席論罪，想將一霍小玉監生打死；最後黃衫客趕到，表露佢就係四王爺嘅身份，重指證盧太尉嘅惡行。四王爺下令再點花燭，畀李益同霍小玉聯婚，有情人終成眷屬。

原著：唐滌生［1956年］
導演：李　鐵［1959年］

主演：任劍輝（飾）李　益
　　　白雪仙（飾）霍小玉
　　　梁醒波（飾）崔允明、黃衫客
　　　靚次伯（飾）盧太尉
　　　任冰兒（飾）浣　紗

＊＊

《紫釵記》劍合釵圓



李益：小玉妻，我望你盡飲此杯，就算十郎對你賠還不是呢。
小玉：君虞，君虞，妾為女子薄命如斯，君是丈夫，負心若此，容顏稚齒，飲恨而終，慈母在堂，不能供養，綺羅弦管，從此永休，征痛黃泉，皆君所致，李君，李君，
李益：小玉。
小玉：今當永訣矣。
李益：小玉，霧月夜抱泣落紅，險些破碎了燈釵夢，喚魂句頻頻喚句卿須記取再重逢，歎病染芳軀不禁搖動，重似望夫山半綺帶睡容，千般話猶在未語中，擔驚燕好皆變空，小玉妻，小玉妻，
小玉：處處仙音飄飄送，暗驚夜台露凍，讎共怨我待向陰司控，聽風吹翠竹昏燈照影印簾攏，霧夜少東風，是誰個扶飛柳絮。
李益：小玉妻，是十郎扶你呀，
小玉：唉﹒﹒﹒生不如死，何用李君關注。
李益：願天折李十郎，休使愛妻多病痛，劍合釵圓，有日都望生一日呀，並頭蓮曾亦有根基種，權勢盡看輕只知愛情重，與你做過夫妻醉梁鴻。
小玉：墳墓裏可盡失相思痛，憎哭聲喊聲將霍小玉叫回俗世中，生生生，雖生何所用呢，你再配了丹山鳳，把白玉簫再弄，則怕你紅啼綠怨，由來舊愛新歡兩邊都也難容，祝君再結鴛鴦夢，我願乞半穴墳，珊珊瘦骨歸墓塚。
李益：雲罩月更迷蒙，是誰個誤泄風聲播送，瑤台未有奇逢。
小玉：你既非負心，勝業坊與太尉府都只是一街之隔唧，你﹒﹒﹒你胡不歸來呀！
李益：淚窮力竭儼如落網歸鴉困身有玉籠，一朝翅折了怎生飛動。
小玉：哼，鬼信你呀，想你見我變賣頭上釵，都已知我今非昔比，我想那盧家小姐，佢在你乘龍日半繞盤龍髻插玉燕釵，腰肢款擺上畫閣中，投懷向君弄髻描容，佢斜泛眼波，微露笑渦，將君輕輕碰，指玉燕珠釵不惜千金買來耀下威風，你..你知否新人髻上釵，會向舊人嘅眼中刺呢。
李益：郎未變愛，針鋒相迫刺郎實太陰功。
小玉：我典珠賣釵，以身待君，我盼君望君，醉君夢君，你到今始再婚折害儂。
小玉：哼﹒﹒﹒既盡愛何未潔身自重。
李益：咪再錯翻醋雨酸風，當知衷心隱痛。
小玉：侯氏報消息佢那有不忠。
李益：經拒婚摧惡夢。
小玉：我未信君你入贅繡閣，敢拒附鳳與攀龍。
李益：十郎未慣同床異夢，去憶小玉恩深重。
小玉：柳底間有摺摺熏風，且聽君將愛頌。
李益：日掛中天格外紅，月缺終須有彌縫，千差萬錯，錯在我吹台賦詩一首，「不上望京樓」之句呀。
小玉：係呀？
李益：佢便借詩中意，謠言惑眾，設花燭迫我乘龍，玉燕釵又有相逢，我靜中向袖籠，吞釵拒婚將世諷。
小玉：哦﹒﹒﹒十郎﹒﹒﹒十郎﹒﹒﹒你可曾為我真個吞釵拒婚，不慕權貴。
李益：正是。
小玉：十郎﹒﹒﹒若是真情，以釵還我。
小玉：哎吔，釵燕失春風，憔悴不出眾，我再將紫釵弄，漸露笑容，玉潔冰清那許有裂縫，今宵壓髻有紫釵用，浣紗﹒﹒﹒浣紗，快取鏡奩脂粉，待我從新插戴啦。

＊＊

《紫釵記》首輪演出劇本及英文譯本．精裝本
．Waiting Heart．Chinese-English Bilingual Script
based on manuscript used for first season of staging



《紫釵記》係1956年由唐滌生根據明代湯顯祖原著崑劇改編嘅粵劇，一共有八齣，1957年8月30日喺香港利舞台首演。

。〈墮釵燈影〉
。〈花院盟心〉
。〈陽關折柳〉
。〈典賣珠釵〉
。〈吞釵拒婚〉
。〈花前遇俠〉
。〈劍合釵圓〉
。〈論理爭夫〉

＊＊

《紫釵記》曾經兩次被拍成粵劇電影。



第一次拍成粵劇電影係1959年上映嘅，導演係李鐵，唐滌生編劇，由［仙鳳鳴劇團］主演。

。任劍輝（飾）李益
。白雪仙（飾）霍小玉
。梁醒波（飾）崔允明、黃衫客
。靚次伯（飾）盧太尉
。任冰兒（飾）浣紗
。蘇少棠

。英麗利
。張醒非
。陳皮梅

第二次係1977年拍成粵劇電影，由金鳳出品，李鐵執導，唐滌生編劇，由［雛鳳鳴劇團］主演。
。龍劍笙（飾）李益　　
。梅雪詩（飾）霍小玉　　
。靚次伯（飾）盧太尉
。梁醒波（飾）崔允明、黃衫客

＊＊

《紫釵記》喺1966年錄製粵劇全本唱片錄音。
。任劍輝（飾）李益
。白雪仙（飾）霍小玉
。梁醒波（飾）崔允明、黃衫客
。靚次伯（飾）盧太尉
。任冰兒（飾）浣紗
。蘇少棠（飾）韋夏卿
。朱少坡（飾）
。雛鳳九名成員

＊＊

美編：吳國亮
英譯：張群顯博士
出版：桃花源粵劇工作舍



人生百味＠戲曲

＊＊

廣東話資料館