藍屋，其實係香港一列唐樓，喺灣仔石水渠街 72 號至 74A 號雙數門牌，依家已經列為香港一級歷史建築。其中 72 號、72 號 A 同 74 號三幢樓嘅外牆都塗上藍色，因為咁就畀人稱為［藍屋］；而 74 號 A 喺2010年前仍然係由私人擁有，一直維持係灰色嘅外牆。
藍屋原址曾經係一間醫院，樓高兩層，喺1872年政府差餉徵收冊入面名為［華佗醫院］，亦稱為［灣仔街坊醫院］。
1886年，醫院關閉之後，變咗畀人用來供奉神醫華陀嘅［華陀廟］。
＊＊
1920年代，［華陀廟］拆咗之後，就喺原址要起一棟四層高嘅屋。座樓喺1922年起好，樓梯之間嘅牆壁、單位入面嘅窗同樣由木材造嘅，而露台部分就係用鋼筋水泥造嘅，係香港少數剩餘有露台嘅唐樓。
＊＊
72號地下，原址以前就係［華佗廟］。
。1950年代，由黃飛鴻徒弟林世榮嘅姪林祖喺度開咗間武館。
。1960年代，林祖嘅武館再改由佢個仔林鎮顯開嘅醫館。
72號一樓，曾經開辦過專為街坊子弟提供免費教育嘅［鏡涵義學］。
72號二樓同三樓，就係戰前灣仔唯一嘅英文學校［一中書院］嘅校址。
＊＊
72號A地下，以前係［廣和號］雜貨鋪。
＊＊
74號地下，係［聯興酒莊］，大約喺80年代結業。
74號二樓，曾經係［鮮魚商會］嘅會址，而同座三樓就係商會嘅會議室。
＊＊
74號A地下，原本係一間雜貨鋪，戰後改為做住宅。
＊＊
點解會有藍屋呢？
喺1990年代，香港政府為藍屋外牆做油漆時，因為物料庫只剩低水務署用開嘅藍色油漆，所以成座樓就油成藍色。
＊＊
2007年，灣仔聖雅各福群會喺藍屋地下嘅地鋪開設［灣仔民間生活館］，以［從民間出發。匯多元文化］為宗旨，展出舊時灣仔民間嘅生活用品，重透過好多唔同嘅方式，希望引起公眾人士對灣仔地區文化保育嘅關注。
＊＊
2012年3月開始，［灣仔民間生活館］得到［滙豐銀行慈善基金］贊助變身成為［香港故事館］，希望關注社區文化議題由灣仔社區拉闊至全個香港。
＊＊ 廣東話生活雜記
沒有留言:
張貼留言