唐滌生［Tang Ti-Sheng］小傳

南海十三郎［初遇唐滌生］電影版片段

電影《南海十三郎》 係依據香港編劇家杜國威所撰寫嘅舞台劇《南海十三郎》為基礎，再進行改編嘅電影作品，1997年喺香港上演，由高志森監製同導演。電影同舞台劇嘅部分情節同現實係截然唔同嘅。

＊＊

人物角色：



。十三郎：謝君豪、朱威廉（童年）
。唐滌生：潘燦良
。梅　仙：蘇玉華
。Lily 　 ：吳綺莉
。薛覺先：梁漢威［薛老五］
。太史公：周志輝［江譽鏐的父親］
。孖二八：黃　霑
。說書人：李鎮洲、黃希揚（童年）
。三姨太：李　楓
。來　福：袁福華
。新靚就：楊英偉
。任惜花：龔國強
。梁紅玉：鄭詠梅
。陳錦棠：陳劍烽
。班政家：葉榮祖
。馮班主：黃　新
。寶蓮寺住持：司馬華龍
＊＊

工作人員：



導演：高志森
編劇：杜國威、高志森
配樂：袁卓凡、王辛強、高志森
攝影：李嘉高
剪輯：高志森
監製：高志森
製片：王震球、曹萬剛

＊＊

唐滌生 Tang Ti-Sheng（1917年6月18日－1959年9月15日）



唐滌生，原名［唐康年］，廣東中山（珠海市唐家灣）人，喺黑龍江牡丹江市出生，係著名粵劇劇作家。佢能夠糅合文學同電影藝術，為粵劇藝術嘅發展，做出咗唔少嘅貢獻。

唐滌生年少時喺中山翠亨村紀念中學讀書。畢業之後，就入咗上海美術專科學校，後來又喺滬江大學修讀中文。呢間大學嘅學校董事會喺大陸易幟之後，轉移到香港成立崇基學院，即香港中文大學嘅一部分。

1937年嘅夏天，日軍侵華，唐滌生被逼輟學，南下廣州。1938年又流徙到香港，又加入咗堂姐夫［薛覺先］嘅［覺先聲劇團］負責做抄曲，之後又轉咗做編劇。入咗劇團冇耐就寫成第一部粵劇作品《江城解語花》，由當時嘅小生王［白駒榮］主演，從此就展開佢嘅編劇生涯。

當任劍輝白雪仙成立［仙鳳鳴劇團］，就請唐滌生做駐團編劇，佢重為［仙鳳鳴］編寫咗《牡丹亭驚夢》、《蝶影紅梨記》、《帝女花》、《紫釵記》、《九天玄女》、《再世紅梅記》等等著名劇目。由於佢嘅辭藻秀麗，深入描寫人物嘅情感世界，自創風格，終於成為一代宗師。

＊＊

唐滌生嘅［貴麗唱詞］



唐滌生編寫嘅劇本，劇情緊湊，風靡古今戲迷；唐滌生喺劇中填寫典雅嘅曲詞，至今仍係唔少普羅大眾朗朗上口嘅唱段。佢唔只係要求劇本嘅詞句秀麗，各場所用嘅口白、所唱嘅梆簧，都有細意嘅安排。同時又會要求音樂家為佢所寫嘅曲詞配上合適小曲，唐滌生同合作嘅音樂家共同創作咗唔少傳誦後世嘅作品。

唐滌生同音樂家［王粵生］合作多年，私交甚篤。早喺1950年，兩人已經合作為《董小苑》編撰《新台怨》一曲。自此之後，兩人共同編撰唔少動人嘅小曲，包括電影《紅菱血》嘅〈銀塘吐艷〉，粵劇《程大嫂》嘅〈絲絲淚〉，《六月雪》嘅〈六月初三寶誕香〉，全都係由唐滌生先寫唱詞，再向王粵生講解劇情，王粵生就按曲詞去譜出［喜怒哀樂］嘅樂章。

兩人合作最經典嘅曲目當然係《帝女花》嘅［香夭］同《紫釵記》嘅［劍合釵圓］。〈香夭〉改編自琵琶曲［塞上曲］嘅［妝臺秋思］，唐滌生為改編後嘅樂章填寫既忠孝、又哀怨嘅感人曲詞，係《帝女花》一劇最高潮嘅唱段，流傳後世。而［劍合釵圓］就改編自［潯陽夜月］。唐滌生用佢嘅妙筆才情，填寫咗滿江醋意又浪漫纏綿嘅唱詞，係《紫釵記》入面最吸引嘅一段曲目。

＊＊

薛覺先 與 唐雪鄉



薛覺先，原名［薛作梅］，別號［平愷］，廣東順德龍江鎮十三坊人。著名粵劇老倌，四大天王之一。有［粵劇伶王］、［萬能老倌］、［萬能泰斗］嘅美譽。

1925年，薛覺先喺上海成立［非非影片公司］拍攝默片《浪蝶》，結識咗片入面嘅女主角唐雪卿［唐滌生堂姐］，之後重結為夫婦。

唐滌生曾經同薛覺先嘅十妹［薛覺清］結成夫妻，之後重生咗對仔女，但係呢段婚姻維持唔到三年之後佢哋就離異。

＊＊

薛覺先 與 覺先聲劇團



1937年，唐滌生來到香港，之後加入薛覺先［唐雪卿丈夫］嘅［覺先聲劇團］，負責為擔任劇務嘅［馮志芬］做抄曲工作，由咁開始涉足粵劇。加上當時劇團係由紅伶［薛覺先］、［上海妹］等擔綱演出，喺名演員同編劇家嘅影響下，為唐滌生嘅編劇事業奠下良好基礎。

同一年，唐滌生編寫咗佢第一部嘅粵劇作品《江城解語花》，呢套劇皇係安排由［小生王］白駒榮［白雪仙父親］主演，就咁展開唐滌生做編劇嘅生涯。

＊＊

唐滌生 與 鄭孟霞



1942年，唐滌生同京劇名旦［鄭孟霞］結婚，透過鄭孟霞，唐滌生對京劇藝術嘅認識加深，重吸納咗京劇同舞蹈元素，融合喺日後所創作嘅粵劇入面。

喺香港淪陷期間，唐滌生編寫咗120多部粵劇，所編嘅劇目大部份係袍甲戲同改編京劇嘅作品，代表作有《落霞孤鶩》同《白楊紅淚》等。

香港喺淪陷時期，唐滌生為［鄭孟霞］同［羅品超］編寫咗唔少劇目，呢啲劇目已展現咗佢善於因人寫戲嘅才華。

鄭孟霞係上海京劇名旦，擅長舞蹈，因為咁，唐滌生為鄭孟霞所編寫嘅劇本，唔少係由京劇改編，例如《水淹泗州城》同《霸王別虞姫》等。

至於唐滌生為［羅品超］所編嘅劇目，就大部份係袍甲戲，《班超》、《齊宣王》等劇，畀羅品超小武行當嘅戲路得以發揮。

＊＊

鄭孟霞。白雪仙。表演西班牙舞［1955年］



鄭孟霞［1922年－2000年11月20日］，喺上海岀生，係著名京劇名伶，畀人譽為［上海四大美人］之一，係粵劇劇作家［唐滌生］嘅老婆。鄭孟霞活躍喺70年代至80年代嘅香港，佢擅長演嘅角色係［善良慈祥婆婆］。

＊＊

唐滌生 與 芳艷芬

由香港光復至到1949年，唐滌生編寫咗90幾部粵劇，喺呢段期間第一次同［芳艷芬］合作，就為佢編寫咗《文姬歸漢》一劇。

芳艷芬係演出［唐滌生］作品最多嘅名伶，唐滌生深知芳艷芬嘅唱腔特點係鼻音較重，聲線甜而且幽怨，最適宜擔演苦楚悲涼嘅角色，唐滌生為芳艷芬編寫咗幾齣名劇，例如《程大嫂》嘅［李翠芬］、《董小宛》嘅［董小宛］同埋《六月雪》嘅［竇娥］，都係因應芳艷芬嘅戲路而度身編寫嘅。

＊＊



呢張相係任姐同仙姐要去［安南］做大戲，演出團隊同送行人士喺機場一齊合照，包括有陳錦棠、梁醒波夫婦、唐滌生等。

＊＊



1950年至1959年，唐滌生編寫咗超200幾部粵劇，當中已有一啲優秀嘅作品，例如《董小宛》、《漢武帝夢會衛夫人》、《程大嫂》同《燕子啣來燕子箋》等。

劇目：董小宛［1950年］
演出：芳艷芬、黃鶴聲、陳錦棠、黃千歲

劇目：程大嫂［1954年］
演出：芳艷芬、張　瑛、黃千歲、林妹妹、黃楚山
　　　何仲芳、石　堅、馬笑英、李月清、歐陽儉
　　　高魯泉、陳翠屏、林魯岳、周志誠、梁玉崑
　　　檸　檬、余惠芬、林　甦

劇目：漢武帝夢會衛夫人［1959年］
演出：芳艷芬、任劍輝、半日安、 林家聲、 任冰兒
　　　李香琴、陳皮梅、余惠芬、劉克宣

劇目：燕子啣來燕子箋［1959年］
演出：鄧碧雲、羅劍郎、林家聲、鳳凰女、靚次伯
　　　陳錦棠、半日安、譚倩紅

＊＊

唐滌生 與 吳君麗



唐滌生為［吳君麗］編寫嘅劇目，亦係唐滌生為佢度身而寫嘅。吳君麗初出道時，係以［刀馬旦］嘅形象來吸引觀眾。但係唐滌生就認為吳君麗嘅聲線優美，有［正宗子喉］嘅優勢，認為改演［青衣］角色會比較好。後來，吳君麗喺唐滌生為佢編寫嘅《香羅塚》一劇入面，飾演悲苦嘅［林茹香］，以悽婉嘅歌曲成功感動觀眾，自此就改變戲路，由［刀馬旦］改為主演［青衣］一類嘅角色。

＊＊

唐滌生 與 仙鳳鳴劇團



1956年，唐滌生加入由［白雪仙］組成嘅［仙鳳鳴劇團］擔任劇務一職。佢哋兩個人對京崑劇都有相當嘅認識，銳意將京崑劇嘅藝術元素同美學精神，注入粵劇裡面。之後，唐滌生改編咗幾部古代文學巨著為粵劇，包括《牡丹亭驚夢》、《蝶影紅梨記》、《紫釵記》同埋《再世紅梅記》，盡皆曲詞精警優美，將粵劇推向高雅嘅藝術層次，亦令佢嘅編劇生涯到達巔峰，重為後世留低一批經典嘅劇本。

＊＊

唐滌生 與 白雪仙



唐滌生同［白雪仙］嘅合作，更係令人津津樂道。白雪仙口齒伶俐，係公認介口一流嘅演員，《紅了櫻桃碎了心》嘅［蕭桃紅］、《三年一哭二郎橋》嘅［楊春香］同埋《紫釵記》嘅［霍小玉］，都係唐滌生刻意為白雪仙度身而寫，用口白同小曲貫穿全套劇，令白雪仙可以充分發揮。

＊＊

唐滌生嘅事業高峰



1956年至1959年，係唐滌生粵劇創作嘅高峰期，作品雖然只有40幾部，但大多數都係經典之作，合作嘅劇團包括：

。芳艷芬 嘅［新艷陽劇團］
。白雪仙 嘅［仙鳳鳴劇團］
。吳君麗 嘅［麗聲劇團］

而當年唐滌生編寫過嘅劇目，到今日都仍然見到喺粵劇舞台上有演出。

＊＊

唐滌生加入麗的呼聲



1956年，唐滌生加入咗［麗的呼聲］做嘢，主要係負責審查節目劇本同聯絡粵劇界演出嘅工作，佢又參與播音粵劇嘅工作。其他同事重有，鄭孟霞、李銳祖、羅寶生、姚克等。

＊＊

1958年［仙鳳鳴劇團］合照



［仙鳳鳴］一連演咗九屆，劇目如下：

第一屆 1956年06月《紅樓夢》《唐伯虎點秋香》
第二屆 1956年11月《牡丹亭驚夢》《穿金寶扇》
第三屆 1957年01月《蝶影紅梨記》《花田八喜》
第四屆 1957年06月《帝女花》
第五屆 1957年08月《紫釵記》
第六屆 1958年03月《九天玄女》
第七屆 1958年09月《西樓錯夢》
第八屆 1959年09月《再世紅梅記》
第九屆 1961年06月《白蛇新傳》

＊＊

唐滌生嘅離世



1959年9月14日晚，唐滌生嘅新作《再世紅梅記》喺［利舞臺］首演。當演至第四場《脫阱救裴》嘅時候，唐滌生因為腦溢血暈低喺觀眾席上，跟住就畀人送咗去法國醫院搶救，但係喺第二日［9月15日］清晨4點，最終不治，終年42歲。



1959年9月16日下晝，唐滌生喺萬國殯儀館出殯，途經利舞台。

＊＊


唐滌生嘅劇作



唐滌生嘅一生，編寫過400幾部粵劇，雖然冇舞台紀錄，猶幸佢嘅經典劇本好多都改拍成電影，喺戲曲電影入面，佢保留咗演員嘅台步、做手、程式同埋唱功。佢亦會喺電影劇本入面建議用舞台技術拍攝，甚至直接將舞台劇本嘅佈景做法寫到電影劇本之內。唐滌生嘅電影作品，對香港粵劇藝術嘅保存起著重要作用。

＊＊

唐滌生作品



劇目　　　　　　首演　　劇團　　主演
－－－－－－－－－－－－－－－－－－－－－－－－－－－－－－－－－－
錢　　　　　　　1946年　前進　　羅品超、衛少芳、區楚翹、梁國風 
四千金　　　　　1946年　前進　　羅品超、衛少芳、區楚翹、鄭碧影
戰場風月　　　　1946年　前進　　羅品超、衛少芳、關海山、鄭碧影
金搥博銀搥　　　1946年　雙雄　　陳錦棠、新馬師曾、李海泉、少新權
落紅零雁　　　　1946年　勝利　　馬師曾、鳳凰女、紅線女、甘燕明
夜來香　　　　　1946年　龍鳳　　羅品超、余麗珍、李海泉、白駒榮
碧血黃花　　　　1946年　龍鳳　　羅品超、余麗珍、李海泉、白駒榮
桃園抱月歸　　　1946年　勝利　　馬師曾、韋劍芳、古耳順、紅線女
憑欄十四年　　　1946年　龍鳳　　羅品超、李海泉、余麗珍、白駒榮
夜流鶯　　　　　1946年　龍鳳　　何非凡、上海妹、半日安、余麗珍
麗春花　　　　　1947年　龍鳳　　羅品超、李海泉、白駒榮、余麗珍
朱門綺夢　　　　1947年　龍鳳　　李海泉、余麗珍
野火春風　　　　1947年　龍鳳　　羅品超、李海泉、余麗珍、白駒榮
路遙知馬力　　　1947年　龍鳳　　羅品超、李海泉、余麗珍、白駒榮
閻瑞生　　　　　1947年　龍鳳　　陳錦棠、李海泉、余麗珍、張漢昇
桃花依舊笑將軍　1948年　飛馬　　馬師曾、譚玉真、白龍珠、劉克宣
月上柳梢頭　　　1948年　非凡響　楚岫雲、何非凡、丁公醒、鳳凰女
天堂地獄再相逢　1948年　雄風　　羅品超、上海妹、半日安、衛明心
同是天涯淪落人　1948年　光華　　羅品超、李海泉、余麗珍、衛明珠
秦庭初試燕新聲　1949年　燕新聲　石燕子、新周榆林、陳露薇
天盜綺羅香　　　1949年　覺先聯　薛覺先、余麗珍、文覺非、羅艷卿
新小青弔影　　　1949年　新世界　羅麗娟、羅劍郎、譚玉真、梁醒波
南北二霸天　　　1949年　錦添花　陳錦棠、鄧碧雲、盧海天、半日安
出谷黃鶯　　　　1949年　錦上花　陳錦棠、半日安、上海妹、羅艷卿
梁山伯與祝英台　1949年　覺先聲　楚岫雲、薛覺先
新粉面十三郎　　1950年　覺華　　薛覺先、上海妹、半日安、余麗珍
一結同心萬古愁　1950年　新世界　羅麗娟、陳燕棠、梁醒波、譚玉真
董小宛　　　　　1950年　錦上花　陳錦棠、上海妹、半日安、衛少芳
法網哀鴻　　　　1950年　新世界　羅麗娟、梁醒波、譚玉真、羅劍郎
梟巢孤鶩　　　　1950年　錦添花　陳錦棠、上海妹、半日安、衛少芳
花蕊夫人　　　　1950年　錦添花　陳錦棠、上海妹、半日安、衛少芳
蛇蠍兩孤兒　　　1950年　錦添花　陳錦棠、上海妹、半日安、衛少芳
唐宮金粉獄　　　1950年　碧雲天　羅品超、鄧碧雲、羅艷卿、廖俠懷
撲火春蛾　　　　1950年　錦添花　陳錦棠、上海妹、半日安、衛少芳
罪惡鎖鏈　　　　1950年　覺先聲　薛覺先、余麗珍、張漢昇
漢武帝夢會衛夫人1950年　覺先聲　薛覺先、余麗珍、張漢昇
吳宮鄭旦鬥西施　1950年　大前程　石燕子、黃千歲、上海妹、半日安
胭脂紅淚　　　　1950年　新世界　羅麗娟、陳燕棠、梁醒波、譚玉真
裙帶尊榮裙帶瘋　1950年　新東方　馬師曾、文覺非、紅線女、羅艷卿
隋宮十載菱花夢　1950年　錦添花　陳錦棠、上海妹、半日安、衛少芳
韓信一怒斬虞姬　1950年　大龍鳳　新馬師曾、芳艷芬、梁醒波、麥炳榮
魂化瑤台夜台花　1950年　大龍鳳　新馬師曾、芳艷芬、梁醒波、衛明珠
一寸相思一寸灰　1950年　大龍鳳　新馬師曾、芳艷芬、梁醒波、衛明心
一曲鳳來儀　　　1950年　大龍鳳　新馬師曾、芳艷芬、少崑崙、衛明心
卿須憐我我憐卿　1950年　錦添花　陳錦棠、上海妹、半日安、衛少芳
袈裟難掩離鸞恨　1950年　錦添花　陳錦棠、上海妹、半日安、衛少芳
元順帝夜祭凝香兒1950年　大龍鳳　新馬師曾、芳艷芬、梁醒波、衛明心
橫霸長江血芙蓉　1950年　錦添花　陳錦棠、黃千歲、上海妹、半日安
情花浴血向斜陽　1951年　錦添花　陳錦棠、上海妹、半日安、羅艷卿
雍正與年羹堯　　1951年　錦添花　陳錦棠、上海妹、半日安、衛少芳
錦湖艷姬　　　　1951年　錦添花　陳錦棠、上海妹、半日安、衛少芳
節婦可憐宵　　　1951年　錦添花　陳錦棠、上海妹、半日安、衛少芳
楊柳攀折銷魂柳　1951年　錦添花　陳錦棠、上海妹、半日安、余麗珍
一自落花成雨後　1951年　大龍鳳　何非凡、芳艷芬、白龍珠、鄭孟霞
月落烏啼霜滿天　1951年　大龍鳳　何非凡、芳艷芬、白龍珠、鄭孟霞
毒金蓮　　　　　1951年　錦添花　陳錦棠、上海妹、半日安、余麗珍
仙女牧羊　　　　1951年　大金龍　馬師曾、陳錦棠、紅線女、任劍輝
金面如來　　　　1951年　大四喜　新馬師曾、譚玉真、廖俠懷、白龍珠
風流夜合花　　　1951年　大羅天　何非凡、芳艷芬、白龍珠、梁醒波
屠城鶼鴣淚　　　1951年　大金龍　馬師曾、陳錦棠、任劍輝、紅線女
一劍能消天下仇　1951年　大四喜　新馬師曾、譚玉真、廖俠懷、白龍珠
蠻女催粧嫁玉郎　1951年　普長春　石燕子、何非凡、紅線女、梁醒波
萬里雲山一雁歸　1952年　大龍鳳　新馬師曾、芳艷芬、梁醒波、衛明心
綵雲仙子鬧禪台　1952年　大歡喜　石燕子、何非凡、鄧碧雲、梁醒波
夜夜念奴嬌　　　1952年　喜臨門　何非凡、鄧碧雲、梁醒波、少新權
漢宮蝴蝶夢　　　1952年　喜臨門　何非凡、鄧碧雲、梁醒波、少新權
一枝紅艷露凝香　1952年　金鳳屏　芳艷芬、任劍輝、白雪仙、白龍珠
望帝迎歸九鳳屏　1952年　金鳳屏　芳艷芬、任劍輝、白雪仙、半日安
漢苑玉梨魂　　　1952年　金鳳屏　芳艷芬、任劍輝、白雪仙、半日安
梨渦一笑九重天　1952年　金鳳屏　芳艷芬、任劍輝、白雪仙、半日安
一樓風雪夜歸人　1952年　金鳳屏　芳艷芬、任劍輝、白雪仙、白龍珠
郎心如鐵　　　　1952年　錦添花　陳錦棠、鄧碧雲、任劍輝、白雪仙
紅樓二尤　　　　1952年　金鳳屏　芳艷芬、任劍輝、白雪仙、靚次伯
夢斷香銷四十年　1952年　金鳳屏　芳艷芬、任劍輝、白雪仙、靚次伯
蓬門未識綺羅香　1952年　金鳳屏　芳艷芬、任劍輝、白雪仙、靚次伯
一點靈犀化彩虹　1952年　金鳳屏　黃千歲、任劍輝、白雪仙、靚次伯
帝苑梨花三月濃　1952年　梨園樂　黃千歲、羅艷卿、白龍珠、歐陽儉
一年一度燕歸來　1953年　金鳳屏　芳艷芬、黃千歲、任劍輝、白雪仙
復活　　　　　　1953年　鴻運　　陳錦棠、任劍輝、白雪仙、梁醒波
賴婚　　　　　　1953年　鴻運　　陳錦棠、任劍輝、白雪仙、梁醒波
燕子啣來燕子盞　1953年　鴻運　　陳錦棠、任劍輝、白雪仙、梁醒波
天降火麒麟　　　1953年　大好彩　白玉堂、陳錦棠、陳艷儂、鳳凰女
醉打金枝戲玉郎　1953年　大好彩　芳艷芬、陳錦棠、任劍輝、白雪仙
忽必烈大帝　　　1953年　大好彩　陳錦棠、沖天鳳、靚次伯、李海泉
紅了櫻桃碎了心　1953年　鴻運　　陳錦棠、任劍輝、白雪仙、梁醒波
魂繞巫山十二重　1954年　鴻運　　陳錦棠、任劍輝、白雪仙、梁醒波
紫氣東來花滿樓　1954年　鴻運　　陳錦棠、任劍輝、白雪仙、梁醒波
難續空門未了情　1954年　新艷陽　芳艷芬、陳錦棠、梁醒波、靚次伯
春燈羽扇恨　　　1954年　新艷陽　芳艷芬、陳錦棠、白龍珠、歐陽儉
錦城脂粉賊　　　1954年　錦城春　陳錦棠、陳艷儂、鳳凰女、梁醒波
玉女換雙城　　　1954年　大世界　羅麗娟、陳錦棠、吳君麗、梁醒波
壯士魂銷帳下歌　1954年　大世界　羅麗娟、陳錦棠、吳君麗、梁醒波
錯把銀燈照玉郎　1954年　鴻運　　陳錦棠、任劍輝、梁醒波、白雪仙
唐伯虎點秋香　　1954年　新聲　　任劍輝、梁醒波、白雪仙
販馬記　　　　　1954年　利榮華　任劍輝、白雪仙
真假春鶯戲艷陽　1955年　新艷陽　芳艷芬、陳錦棠、白龍珠、歐陽儉
雄寡婦　　　　　1955年　同慶　　黃千歲、鄧碧雲、梁醒波、鳳凰女 
傾國名花　　　　1955年　艷陽紅　新馬師曾、陳艷儂、鳳凰女、梁醒波
珍珠塔　　　　　1955年　利榮華　何非凡、半日安、白龍珠、白雪仙
一盞香燈照玉郎　1956年　利榮華　任劍輝、白雪仙、半日安、白龍珠
金雀奇緣　　　　1956年　利榮華　任劍輝、白雪仙、半日安、白龍珠
陽春白雪兩相輝　1956年　利榮華　任劍輝、白雪仙、半日安、白龍珠
煙花引蝶來　　　1956年　利榮華　任劍輝、白雪仙、半日安、白龍珠
桂枝告狀　　　　1956年　利榮華　任劍輝、白雪仙、半日安、白龍珠
琵琶記　　　　　1956年　利榮華　任劍輝、白雪仙、白龍珠、英麗梨
紅菱血　　　　　1956年　碧雲天　羅品超、鄧碧雲、廖俠懷、羅艷卿
跨鳳乘龍　　　　1956年　利榮華　任劍輝、白雪仙、半日安、歐陽儉
紅樓夢　　　　　1956年　仙鳳鳴　任劍輝、白雪仙、梁醒波
牡丹亭驚夢　　　1956年　仙鳳鳴　任劍輝、白雪仙、梁醒波、靚次伯
穿金寶扇　　　　1956年　仙鳳鳴　任劍輝、白雪仙、梁醒波、靚次伯
英雄掌上野荼薇　1956年　仙鳳鳴　任劍輝、白雪仙、梁醒波、鳳凰女
雙珠鳳　　　　　1957年　麗聲　　麥炳榮、吳君麗、鳳凰女、歐陽儉
帝女花　　　　　1957年　仙鳳鳴　任劍輝、白雪仙、梁醒波、靚次伯
香羅塚　　　　　1957年　麗聲　　陳錦棠、吳君麗、半日安、梁醒波
紫釵記　　　　　1957年　仙鳳鳴　任劍輝、白雪仙、梁醒波、靚次伯
雙仙拜月亭　　　1958年　麗聲　　何非凡、吳君麗、梁醒波、鳳凰女
王佐斷臂　　　　1958年　麗聲　　何非凡、吳君麗、梁醒波、麥炳榮
白兔會　　　　　1958年　麗聲　　梁醒波、靚次伯、何非凡、鳳凰女
百花亭贈劍　　　1958年　麗聲　　何非凡、吳君麗、梁醒波、靚次伯
香囊記　　　　　1958年　麗聲　　何非凡、吳君麗、麥炳榮、鳳凰女
鐵弓緣　　　　　1958年　孖寶　　陳寶珠、陳非儂、梁寶珠、梁醒波
蝶影紅梨記　　　1958年　仙鳳鳴　任劍輝、白雪仙、梁醒波、靚次伯
西樓錯夢　　　　1958年　仙鳳鳴　任劍輝、白雪仙、梁醒波、靚次伯
雪蝶懷香記　　　1959年　快樂　　陳錦棠、何非凡、吳君麗、歐陽儉
義膽忠魂節烈花　1959年　梨苑香　白玉堂、秦小梨、麥炳榮、半日安
亂世嫦娥　　　　1959年　新艷陽　芳艷芬、陳錦棠、歐陽儉、鳳凰女
再世紅梅記　　　1959年　仙鳳鳴　任劍輝、白雪仙、靚次伯
血羅衫　　　　　1959年　麗聲　　何非凡、吳君麗、梁醒波、白龍珠
九天玄女　　　　1959年　仙鳳鳴　任劍輝、白雪仙、梁醒波
西施　　　　　　1960年　仙鳳鳴　任劍輝、白雪仙、梁醒波、靚次伯
血淚銀箏血淚人　　　　　－　　　何非凡、羅麗娟、鄭碧影、小覺天
風流三父子　　　－　　　－　　　陸飛鴻、王中玉、鄭孟霞
龍潭夜葬夜明珠　－　　　－　　　芳艷芬、黃千歲、譚玉真、陸飛鴻
火海冤禽　　　　－　　　－　　　－
花田八喜　　　　－　　　－　　　－

＊＊

1953年［紅了櫻桃碎了心］劇本

製作：鴻運劇團

主演：陳錦棠、任劍輝、白雪仙、梁醒波

＊＊

1954年［亂世嫦娥］手稿

唐滌生為戲曲［亂世嫦娥］而繪畫嘅人物造型設計手稿。

劇目：亂世嫦娥［1959年］

製作：新艷陽劇團

主演：芳艷芬、陳錦棠、歐陽儉、鳳凰女

＊＊

1957年［帝女花］之［庵遇］劇照

主演：任劍輝、白雪仙、梁醒波、靚次伯

製作：仙鳳鳴劇團

原作《帝女花》係清代［黃燮清］喺道光壬辰（1832年）基於［甲申之變］歷史而創作嘅。係講述李自成大順軍攻入燕京，崇禎皇帝自縊嘅事件。係以周世顯同長平公主來做主角，描寫出一個哀豔嘅故事。

唐滌生改編嘅《帝女花》，並唔似［黃燮清］一樣依循正史嘅記載來鋪排情節。唐滌生作品嘅基調顯然係受孔尚任嘅《桃花扇》影響，企喺反清立場來描寫長平公主同周世顯嘅節烈。將長平公主同周世顯嘅對立面，由李闖改為清廷，使主要矛盾，變成反對民族壓迫，大大加強咗鬥爭嘅正義性。

＊＊

1957年［帝女花］長平公主。造型圖

製作：仙鳳鳴劇團

主演：任劍輝、白雪仙、梁醒波、靚次伯

＊＊

［帝女花。庵遇］泥印本［任姐所用］

＊＊

［帝女花］工尺譜

＊＊

1957年［紫釵記］劇本

製作：仙鳳鳴劇團

主演：任劍輝、白雪仙、梁醒波、靚次伯

＊＊

1957年［紫釵記］霍小玉。造型圖

製作：仙鳳鳴劇團

主演：任劍輝、白雪仙、梁醒波、靚次伯

＊＊

1958年［西樓錯夢］造型圖

製作：仙鳳鳴劇團

主演：任劍輝、白雪仙、梁醒波、靚次伯

＊＊

1959年［再世紅梅記］劇本

製作：仙鳳鳴劇團

主演：任劍輝、白雪仙、梁醒波、靚次伯

＊＊

1959年［再世紅梅記］造型照

製作：仙鳳鳴劇團

主演：任劍輝、白雪仙、梁醒波、靚次伯

＊＊

［再世紅梅記］泥印本

左邊為任姐所用，右邊為仙姐所用，各人用唔同符號喺自己嘅對白上做標記。

＊＊

唐滌生［富士山之戀］電影

唐滌生嘅電影大部份係以愛情為題材，由早期嘅時裝劇《我為卿狂》、《紅菱血》、中期嘅《富士山之戀》、《花都綺夢》、到後期最受人傳誦嘅古裝劇《雙仙拜月亭》、《紫釵記》、《帝女花》等都以愛情為主線。佢擅長刻劃男女主角嘅命運，令佢哋歷經劫難、波折、猜疑、奸人從中作梗等情節，使觀眾俾劇中情節緊扣著，到劇終時先至情人重逢，奸人被罰。而喺愛情題材包裝之下，佢嘅電影往往反映對抗家長專制、追求自由戀愛同對愛情從一而終嘅價值觀。至於其他嘅電影類型，包括呼應社會現狀為主題嘅寫實電影、歷史同宮幃劇，但所佔嘅數目就比較少。

＊＊

唐滌生［富士山之戀］手稿

唐滌生鍾意繪畫，年青時曾經就讀上海美術專科學校。佢繪畫嘅戲劇人物，早蹞1940年代報紙上刊登嘅劇團廣告睇到。至1950年代，劇團特刊同埋戲橋入面，都經常見佢為劇中人物畫造型。

唐滌生喺《富士山之戀》嘅一系列劇入面嘅主角造型圖，都可以見佢對劇中人物嘅服飾、髮型同形象嘅整體要求。而舞台上嘅佈景設計，佢都有詳細考慮。喺佢編寫嘅劇本入面，每場戲嘅開首佢都有細緻咁描述台上所需要嘅佈景道具，甚至親自繪畫佈景圖畀佈景師傅參考，可見佢將自己嘅繪畫興趣運用喺編劇工作入面。

＊＊

唐滌生手稿：唐滌生年青時曾經就讀上海美術專科學校。

＊＊

唐滌生書法手稿

1950年代，唐滌生開始學習書法，喺臨摹古人書法時，佢亦放唔低編劇嘅工作。

＊＊

《紫釵記》首輪演出劇本及英文譯本．精裝本
．Waiting Heart．Chinese-English Bilingual Script
based on manuscript used for first season of staging



《紫釵記》係1956年由唐滌生根據明代湯顯祖原著崑劇改編嘅粵劇，一共有八齣，1957年8月30日喺香港利舞台首演。

。〈墮釵燈影〉
。〈花院盟心〉
。〈陽關折柳〉
。〈典賣珠釵〉
。〈吞釵拒婚〉
。〈花前遇俠〉
。〈劍合釵圓〉
。〈論理爭夫〉

＊＊

《紫釵記》曾經兩次被拍成粵劇電影。



第一次拍成粵劇電影係1959年上映嘅，導演係李鐵，唐滌生編劇，由［仙鳳鳴劇團］主演。

。任劍輝（飾）李益
。白雪仙（飾）霍小玉
。梁醒波（飾）崔允明、黃衫客
。靚次伯（飾）盧太尉
。任冰兒（飾）浣紗
。蘇少棠

。英麗利
。張醒非
。陳皮梅

第二次係1977年拍成粵劇電影，由金鳳出品，李鐵執導，唐滌生編劇，由［雛鳳鳴劇團］主演。
。龍劍笙（飾）李益　　
。梅雪詩（飾）霍小玉　　
。靚次伯（飾）盧太尉
。梁醒波（飾）崔允明、黃衫客

＊＊

《紫釵記》喺1966年錄製粵劇全本唱片錄音。
。任劍輝（飾）李益
。白雪仙（飾）霍小玉
。梁醒波（飾）崔允明、黃衫客
。靚次伯（飾）盧太尉
。任冰兒（飾）浣紗
。蘇少棠（飾）韋夏卿
。朱少坡（飾）
。雛鳳九名成員

＊＊

美編：吳國亮
英譯：張群顯博士
出版：桃花源粵劇工作舍



人生百味＠戲曲

＊＊

廣東大戲。廣東話資料館