學生運動 Student Activism
學生運動，簡稱〔學運〕或者〔學潮〕，係一種由學生為主要成員嘅社會運動。呢種運動一般係源於年青學生自發嘅行動，不過亦有可能係受到某啲新聞媒體、專欄作家、電台名嘴、社會輿論、團體意見、政黨領袖等引導所致嘅。
學運嘅目標有為學生組織嘅正名運動、反殖民主義、反專制政府、反一黨專政、聲援政治人物等等。一般嘅學生運動都係比較單純，喺初期佢地係為理想，為公義，充滿正義能量。
但係運動到咗中後段嘅時期，就有可能畀其他勢力介入，變成走向政治角力嘅磨心。喺政客嘅立場，如果運動成功嘅話，介入者可以從中得益；若果運動失敗，佢地亦有辦法可以全而退；當然，最後嘅後果就會由學生或運動領袖自己承擔。
學運事件：
＊＊
前朝時代
。166年［黨錮之禍］東漢時期
漢朝士大夫、貴族同宦官發生爭鬥，士人畀宦官以〔黨人〕入罪禁錮同殺害。原因係宦官黨羽故意喺大赦之前犯罪，期望可以藉此逃脫之前之後嘅懲罰，而當任官員不畏權貴，喺大赦以後仍然按律處置呢啲犯人。宦官等人就向桓帝進言，桓帝聽信一面之詞，重處呢班官員。
。168年［九月辛亥政變］東漢時期 漢朝士人竇武等人準備喐手除去宦官曹節王甫一黨，點知畀宦官偷咗佢份奏摺，知道咗士人嘅計劃，因而連夜歃血共盟，發動政變。宦官同皇帝嘅奶媽趙嬈一齊，矇騙年幼嘅靈帝，格殺親近士人嘅宦官山冰等，搶埋印、璽、符、節，脅迫尚書假傳詔令，劫持竇太后，追捕竇武、陳蕃等。 。1604年［東林黨爭］萬曆時代 明朝一班講學嘅退休朝官同學生組成嘅評論學院，同全國嘅閹黨、朋黨集團鬥爭。東林黨係江南士大夫為主嘅政治集團，喺東林黨之外，重有浙黨、齊黨、楚黨、昆黨、宣黨等，統稱為齊楚浙黨，之後多加入閹黨，［東林黨爭］幾乎係東林黨同全國朋黨集團之爭。
。1895年［公車上書］光緒時代 清朝康有為同梁啟超等一千兩百名舉人，聯名上書光緒皇帝，反對同日本簽訂喪權辱國嘅《馬關條約》。呢次舉動被認為係維新派登上歷史舞台嘅標誌，亦被認為係中國群眾政治運動嘅開端。 ＊＊ 民國時期 。1919年［五四運動］ 一場以青年學生為主嘅學生運動。主要對北洋政府未能捍衛國家利益上街遊行表達不滿，當時最著名口號之一係［外爭國權（對抗列強侵權），內除國賊（懲除媚日官員）］。
。1935年［一二九運動］ 由青年同學生發起嘅反分裂、反割據愛國運動，要求保全中國領土完整，又叫做〔一二九抗日救亡運動〕。
。1946年［反蘇運動］ 因為政府官員張莘夫接收撫順煤礦時被蘇聯保護嘅東北民主聯軍殺死，導致學生抗議蘇聯侵犯中國主權而進行嘅一系列遊行示威活動。
＊＊
中共 。1957年［反右運動］ 反右運動係中國共產黨左派人士發起嘅第一場波及社會各階層嘅群眾性大型政治運動。係喺［整風運動］過程中又掀起咗［反右運動］。前者［整風運動］係中國共產黨內嘅整風，後者［反右運動］主要結果係畀中共黨內外大量人員確定［右派］身份。
。1966年［文化大革命］ 中國共產黨左派人士與紅衛兵組織大串連，除四舊，立四新，做成嚴重破壞。紅衛兵係中共文化大革命時期對部分特殊人群嘅一種稱呼，佢哋成員大部份係由高校以上嘅學生所組成，即係大專院校以上嘅學校。
。1976年［四五運動］ 北京天安門廣場嘅一大規模群眾非暴力抗議活動，主要係妒念周恩來同表達對四人幫嘅不滿，之後北京出動１萬多民兵、公安同衛戍部隊，以武力驅散群眾。事後，中共政治局將事件定性為反革命政治事件，認為當時主持中央工作嘅鄧小平係事件總後台，重撤銷咗鄧小平黨內外一切職務。
。1986年［八六學潮］ 由安徽省中國科技大學發起嘅［民主］學運，學生因不滿合肥市西市區人大代表選舉問題，抗議中共不遵守［新選舉法］、違法干涉基層民主選舉，聯合安徽大學等高校４千幾名學生走上街頭發起［要求進行民主選舉］嘅遊行，由此引發全國範圍嘅學潮。隨後湖北、上海、江蘇、浙江、黑龍江、北京等省市高校有幾萬名學生上街遊行。
。1989年［八九民運］ 一場由北京大學學生主導嘅反共產黨高層貪污腐敗嘅學生絕食運動，主要領導者為王丹、吾爾開希與柴玲。之後嘅政治力量介入，令學生運動轉變為全國示威。
。1989年［六四事件］ 4月開始，由中國高校學生喺北京市天安門廣場發起，持續近兩個月嘅全國示威運動。到6月4日凌晨，解放軍部隊進入天安門廣場對示威學生執行武力清場行動。
＊＊ 香港 。1970年代［香港學生運動］ 香港1970年代，大學嘅政治氣氛非常熱烈。喺呢段時期，有人稱之為香港學運嘅［火紅年代］。當時嘅大學生，依佢哋嘅政治立場可以分成三大派系，國粹派、社會派同自由派。唔少學生運動嘅中堅份子，後來都成為香港政壇、新聞界或文化界嘅要角。
。1968年［中文運動］ 由最先由專上學生發起，喺學界成立委員會向政府爭取中文合法使用。去到1974年，政府立法通過中文同英文享有同等法律地位。
。1970年［保釣運動］ 美日兩國私自達成協議，美國準備喺1972年將美軍二戰時佔領嘅琉球群島交予日本，當中包括釣魚台同附近嘅島嶼。
1978年［中文教學運動］ 當年司徒華擔任中文運動聯合委員會主席，發起第二次中文運動。 爭取中學用中文教學。
。2012年［反國教運動］ 學民思潮組織，發動多次遊行示威行動，反對政府推行〔德育及國民教育科〕。
。2014年［香港學界大罷課］ 由香港專上學生聯會同學民思潮發起，目標喺爭取真普選，要求確立［公民提名］為特首選舉提名方法、廢除立法會功能組別、全國人大撤回［8・31決議］。
＊＊ 臺灣 。1948年［四六事件］ 當時有唔少大陸到臺灣就讀嘅學生，同埋本地唔少知識份子都有社會主義政治傾向，引發國民政府大規模逮捕學生嘅行動。 。1963年［自覺運動］ 1960年代臺灣青年學生發起嘅運動，內容為提振國民公德心嘅運動。批評當時臺灣嘅自私、善嫉、冷漠、社會腐化現象，引起唔少青年學生共鳴。 。1990年［野百合學運］ 又叫［三月學運］，將近６千名來自臺灣各地嘅大學生，集結在中正紀念堂廣場上靜坐，佢哋提出［解散國民大會］、［廢除臨時條款］、［召開國是會議］、同埋［政經改革時間表］等四大訴求。
。2004年［新野百合學運］ 由一群大學學生發起嘅活動，學生集結喺中正紀念堂靜坐抗議。起因係質疑2004年中華民國總統選舉疑似不公、抗議總統陳水扁當時喺［319 槍擊案］並未將真相交代，最後學生與支持者被警察強制驅離。 。2008年［野草莓運動］ 又稱［1106 爭人權反集遊法靜坐］，抗議馬政府使用國家暴力侵犯人權，而發起大學生、教授同社會人士發動靜坐抗議嘅社會政治運動。要求馬英九總統公開道歉、警政署長王卓鈞下台。
。2012年［反媒體壟斷運動］ 臺灣組織［901 反媒體壟斷聯盟同］由各大學院校學生組成嘅［反媒體巨獸青年聯盟］推動反對旺中案、反對壹傳媒併購案，要求制定反媒體壟斷法。以維護臺灣新聞自由、反對媒體壟斷、防止中資與臺灣財團控制臺灣媒體為主要訴求。
。2014年［太陽花學運］ 又稱為［318 學運］、［佔領國會事件］，由臺灣大學學生同公民團體共同發嘅的社會運動。佔領台北市立法院，重一度嘗試佔領行政院。抗議《海峽兩岸服務貿易協議》遭強行通過審查，而協議被反對者視為將損害自身經濟，而且強化中華人民共和國政治影響力。其他理由還包括要求民主程序、反對自由貿易等。
＊＊ 日本
。1905年［東京大學事件］ 東京中國留日學生抗議日本政府《取締清韓留日學生規則》活動。 。1959年［安保鬥爭］ 日本國民反對《日美安全保障條約》嘅運動。
。1968年［東京大學鬥爭］ 由東京大學學生發起嘅一場學生運動，醫學部學生為咗反對登記醫師制度代替現行嘅實習制度，進入無限期罷課。當時東京大學半數以上學生參與呢次運動，重構成日本全國學生運動嘅一個重要組成部分。 。1969年［東大安田講堂事件］ 東京大學本鄉校區遭全學共鬥會議［全共鬥］佔據，之後被警視廳解決嘅一個事件。呢次事件亦被稱為［東大安田講堂攻防戰］。因為呢事件嘅影響，日本喺第二年東京大學嘅入學考試停止辦理，第二年冇人可以入學。
。1970年［安保騷動］ 日本國民第二次反對《日美安全保障條約》嘅運動，呢場運動被自由民主黨在內嘅執政方稱為［騷動］。
＊＊ 韓國 。1960年［四一九學運］ 由韓國嘅中學、大學生同勞工領導嘅學運，由於總統選舉發生作票舞弊情形，導致學生同民眾抗議。嗰次革命推翻咗李承晚獨裁嘅韓國第一共和國。
。1979年［釜馬民主抗爭］ 釜馬抗爭係金泳三所屬選區釜山直轄市同附近嘅馬山市嘅學生、市民為反獨裁同民主化而發動嘅大規模示威。示威之後被政府鎮壓，其後嘅抗爭運動又因為朴正熙遇刺，韓國實施戒嚴而中止。
。1980年［五一八光州事件］ 喺韓國光州同全羅南道一次由當地市民自發嘅要求民主運動。當時嘅陸軍中將全斗煥下令武力鎮壓，造成大量平民同學生死傷。
。1987年［六月民主運動］ 係韓國爆發嘅大規模全國範圍民主運動，喺［四一九革命］同［光州事件］兩次流血抗爭後，上百萬韓國民眾喺1987年6月嘅全國各地示威抗議。
＊＊ 哈薩克［前蘇聯］ 。1986年［阿拉木圖十二月事件］ 一批哈薩克加盟共和國學生同群眾走上街頭示威，抗議由俄國人做國家領導，期間受到武裝軍警襲擊，做成流血衝突。
＊＊ 法國 。1968年［五月風暴］ 法國一場反大學學位同教席過多引致地位下降嘅學生運動，初期只係學生示威引起衝突，後來被政治人物同工會領導利用做成反總統暴亂。
＊＊ 匈牙利 。1956年［匈牙利事件］ 匈牙利民眾對政府表達不滿導致蘇聯入侵嘅暴力事件。最初係由學生運動開始，之後蘇聯軍隊入駐配合匈牙利國家安全局進行鎮壓而結束。
＊＊
文：蕭藍仁．2019年7月14日 無聊通識科。廣東話資料館
