結義金蘭〔九大姐〕

九大姐，係香港1960年代九位〔二幫花旦〕上契結拜成金蘭姊妹女演員嘅稱號。當中嘅成員包括：李香琴、任冰兒、朱日紅、金影憐、英麗梨、梁素琴、許卿卿、黎坤蓮同埋譚倩紅。佢哋原本結義嘅時候係有十個人，因為其中嘅紅豆子出嫁，要專心相夫教子而退出戲台前，所以就由［十大姐］就變成之後嘅［九大姐］。

九大姐成員：

李香琴〔李瑞琴〕廣東順德

任冰兒〔細女姐〕廣東南海

朱日紅〔八　姐〕廣東順德

金影憐〔金影蓮〕廣東廣州

英麗梨〔十　姐〕廣東新會

梁素琴〔梁之素〕廣東南海

許卿卿〔　　　〕

黎坤蓮〔　　　〕英屬香港

譚倩紅〔麗　荷〕英屬香港

＊＊

李香琴〔李瑞琴〕廣東順德

粵劇界出身，係香港著名電影同電視劇女演員。早年住喺澳門，入讀勵群小學；從細就愛好粵劇，16歲就正式踏足舞台，曾經有〔二幫王〕嘅稱號。李香琴以扮演反派角色稱著，尤其係扮演奸妃、後母、情婦等嘅形象最突出，佢同余麗珍嘅東宮娘娘形象分庭抗禮。由於佢曾經扮演過西宮娘娘，而之後飾演嘅多數都係陰險嘅角色，所以有〔西宮琴〕嘅外號。佢第一部扮演反派角色嘅電影係1960年嘅《鴛鴦江遺恨》。其他嘅著名作品包括：《漢武帝夢會衛夫人》1959年、《街市皇后》1964年、《九九九離奇三兇手》等。

＊＊

任冰兒〔細女姐〕廣東南海

粵劇名伶，乳名〔細女〕，行內人稱佢做〔細女姐〕，佢嘅堂姐就係粵劇紅伶任劍輝，而夫婿就係名伶石燕子。任冰兒喺十一歲嗰年開始由粵劇最低微嘅角色梅香做起，之後就按部就班升到〔二幫花旦〕。佢喺1940年代中期，加入任劍輝同陳艷儂嘅〔新聲粵劇團〕演出。1956年，任劍輝、白雪仙組成著名嘅〔仙鳳鳴劇團〕，任冰兒升為〔二幫花旦〕，第一部演出劇目係《牡丹亭驚夢》，直至〔仙鳳鳴〕喺1968年解散為止。1979年，佢喺堂姐嘅遊說之下加入〔雛鳳鳴劇團〕。任冰兒喺2012年榮獲香港藝術發展局頒發〔2011香港藝術發展獎〕之〔傑出藝術貢獻獎〕。

＊＊

朱日紅〔八　姐〕廣東順德

粵語片電影演員同埋電影幕後工作者，係［十大導］之中珠璣嘅妹妹。朱日紅退出幕前之後轉任電影場記同副導演，畀行內人尊稱為〔場記王〕，暱稱〔八姐〕。佢係〔新藝城〕嘅中堅分子，佢同麥嘉、黃百鳴、石天、許冠傑、洪金寶等合作無間。除咗電影外，重先後擔任《南海十三郎》、《人間有情》、《聊齋新誌》等舞台劇嘅服裝統籌。佢嘅收山之作係杜國威執導嘅《Miss杜十娘》。朱日紅喺1991年獲［香港電影金像獎］頒發［專業精神獎］。

＊＊

金影憐〔金影蓮〕廣東廣州

細個嘅時代跟隨父母移民南洋，金影憐喺1961年偶然來到香港，好戲劇化咁入咗香港嘅粵劇同電影工作，佢係活躍喺20世紀60年代初期嘅粵劇［二幫花旦］同電影演員。由銀幕處女作《神蛇飛虎救正宮》1961年至電影息影作《摩登濟公》1965年，約演出70幾齣電影。

＊＊

英麗梨〔十　姐〕廣東新會

粵語電影演員，係紅線女嘅非正式弟子。英麗梨祖籍廣東新會，屋企中排行第十，人稱［十姐］。14歲時跟隨姐姐英麗明入戲行，15歲已經係劇團［第三花旦］。佢喺1950年代初同任劍輝嘅細佬任培結婚，但喺1959年離異，之後就同啲仔女移民加拿大卡加利生活 。英麗梨喺1956年加入仙鳳鳴劇團，由第一屆《紅樓夢》開始，到第七屆《西樓錯夢》止，佢都有參與演出。

＊＊

梁素琴〔梁之素〕廣東南海

梁素琴，粵劇［二幫花旦］同香港電影女明星，有〔藝壇才女〕嘅美譽，佢喺中國文學，琴、棋、書、畫等都有一定技巧。1938年［武狀元］陳錦棠自資組成［錦添花劇團］時代，梁素琴已拜佢為師傅，學習花旦臺步同埋武打技能。由銀幕處女作《孟麗君》1949年至息影作《四鳳求凰》1969年，佢參演大約有60齣電影。

＊＊

許卿卿〔〕

粵語電影演員同埋粵劇工作者，初初跟隨薛覺先習藝，薛覺先病逝之後轉拜余麗珍為師，一直追隨左右。許卿卿戲路比較廣，由［二幫花旦］到［女丑］，甚至反串［丑生］同［武生］都能夠勝任。

＊＊

黎坤蓮〔〕英屬香港

粵語電影演員，自幼投身鄧肖蘭芳門下學習粵劇。黎坤蓮係于素秋嘅專用配音。因為于素秋粵語外省口音比較重，所有佢嘅粵語電影都係由黎坤蓮現場配音。黎坤蓮喺1962年下嫁曲藝名宿黃滔嘅胞弟記者同攝影師黃鐵雄，育有兩仔一女。黎坤蓮喺1982年成家移民溫哥華。

＊＊

譚倩紅〔麗　荷〕英屬香港

粵劇艷旦，譚倩紅拜京劇名師粉菊花同吳惜衣學藝；因為咁佢係陳好逑嘅師姐。譚倩紅係〔花旦皇〕芳艷芬嘅副車，公認係勤力同好易相處。佢由任劍輝喺1947年引薦入粵劇行業嘅香港電影風騷艷星，係經周詩祿導演引薦接拍銀幕處女作《恨海芳魂》1953年。

＊＊

紅豆子［魏筱靈］英屬香港

紅豆子，原名魏筱靈，係紅線女嘅徒弟，而藝名係由馬師曾代擬，細個時就讀於聖保祿小學同九龍總商會學校，係名校番書女，自細跟外婆住，由姨媽介紹認識紅線女入咗戲行。喺第一屆［真善美劇團］，林家聲就已經同紅豆子同台演出，不過嗰時各自都未留有特別印象。

香港喺1954年有大批演藝紅人回歸祖國，紅豆子亦有跟隨師父紅線女返穗，一邊演戲一邊學藝。由於唔習慣廣州嘅生活，於是就隻身走返香港，轉跟袁小田習北派。因為普慶戲院需要拆卸重建，而一向喺戲院入面練功嘅袁小田，亦帶同啲徒弟一齊轉往林家大廳，作為八和會館嘅臨時會址，而紅豆子就順理成章咁成為咗林家嘅常客。

林家聲好想知道喺廣州學藝同練功嘅情形，經常同紅豆子傾偈，大家接觸多咗，認識深咗，林家聲就發覺到呢位姑娘原來係好有見地嘅，最重要嘅重係大家對藝術都有著共同嘅見解同取向，於是就不知不覺間，愛情就慢慢生長。1962年事業如日方中嘅聲哥對外宣布結婚。婚後紅豆子選擇棄影持家，為聲哥生咗兩個仔潤笙同潤添。

紅豆子喺2009年5月4日因為淋巴癌喺在加拿大逝世。

＊＊

［十大姐］

後左起：紅豆子、黎坤蓮、許卿卿、金影憐、英麗梨、任冰兒

前左起：李香琴、譚倩紅、朱日紅、梁素琴

十大姐，係香港1950年代尾，有十位〔二幫花旦〕上契結拜成金蘭姊妹女演員嘅稱號。之後，因紅豆子要出嫁，同林家聲結婚，婚後要專心相夫教子而退出戲台前，所以［十大姐］就變成之後嘅［九大姐］。

＊＊

＊＊

八和會館紅伶及子弟祝賀［華光先師寶誕］演出［1966年］



劇目有［觀音得道］同［香花山大賀壽］。參與演出嘅紅伶等都施展渾身解數，演出精彩。另有八和會館子弟演出：［疊羅漢］、［舞人龍］、［耍北派］等。

參與演出紅伶：
。陳好逑［藝術旦后］
。陳寶珠［三公主。銀壇玉女］
。林家聲［林派藝術家］
。阮兆輝［神童。萬能泰斗］
。李寶瑩［小芳艷芬］
。吳君麗［白牡丹］
。石燕子［新派武狀元］
。羽　佳［神童佳］
。紅聖女［三幫花旦］
。蘇少棠［棠哥］
。羅劍郎［富哥］
。羅艷卿［銀牡丹。風騷艷旦］
。鳳凰女［紅牡丹］
。黃千嵗［道理芬］
。許英秀［廖俠懷腔］
。譚蘭卿［六姑。小曲王］
。梁醒波［丑生皇］
。陳錦棠［一哥。武狀元］

＊＊

香港記憶［清潔香港1989］一起參與

＊＊

香港粵語片。廣東話資料館

結義金蘭〔八牡丹〕

香港嘅1960年代，喺當時演藝界嘅潮流就好興金蘭結義嘅，而八牡丹嘅結義亦係嗰個年代嘅盛事。八牡丹嘅成員都係當時得令嘅紅伶花旦，就算［于素秋］亦係粵劇刀馬旦，惟獨係［林鳳］一人係出身邵氏嘅玉女明星，佢同年紀最大嘅［余麗珍］相差有成十七歲，就算同排行第七嘅［南紅］比，亦都細成六年。

八牡丹成員：

。余麗珍（1923年．紫牡丹）余麗珍．民國廣東

。鄧碧雲（1924年．藍牡丹）鄧芍芙．廣東三水

。鳳凰女（1925年．紅牡丹）郭瑞貞．廣東三水

。羅艷卿（1929年．銀牡丹）羅大紅．廣東順德

。吳君麗（1930年．白牡丹）吳燕雲．廣東中山

。于素秋（1930年．黑牡丹）于小圓．民國上海

。南　紅（1934年．綠牡丹）蘇淑媚．廣東順德

。林　鳳（1940年．黃牡丹）馮淑嫣．廣東新會

＊＊

余麗珍〔1923年－2004年3月4日．紫牡丹〕，喺英屬馬來聯邦出生，香港1950年代著名粵劇同電影演員，佢係廣東人，一位基督教徒，13歲時已經投身粵劇界，以演〔刀馬旦〕稱著。20世紀50年代至離開香港赴加拿大之前居住喺旺角西洋菜街，佢丈夫就係編劇家李少芸，佢哋育有兩仔一女，大仔叫李潤生，么仔李榮雄曾經喺1968年3月4日凌晨喺西貢井欄樹村，同佢兩位同學王志偉同簡尼仔一齊翻車嚴重受傷。

余麗珍1947年開始拍電影，演出過《十奏嚴嵩》、《光緒皇夜祭珍妃》、《山東紮腳穆桂英》等粵語戲曲片，同埋神怪武俠戲曲片《無頭東宮生太子》上、下集、《無頭東宮救太子》、《飛頭公主雷電鬥飛龍》等。余麗珍飾演〔東宮娘娘〕，［東宮］原本係指皇太子所住嘅宮殿，［東宮娘娘］本意係指皇太子妃，但係近代戲曲入面就用來對皇后嘅稱呼，可能係源自清末慈安太后稱為［東太后］嘅形象更係深入民心而影響。

余麗珍同鳳凰女（紅牡丹）、鄧碧雲（藍牡丹）、羅艷卿（銀牡丹）、吳君麗（白牡丹）、于素秋（黑牡丹）、南紅（綠牡丹）、林鳳（黃牡丹）等七位粵劇女演員結義金蘭，號稱［八牡丹］。余麗珍排行最大，外號［紫牡丹］。

余麗珍喺1968年退出藝壇，移民加拿大多倫多，2004年3月4日〔星期四〕 在多倫多病逝，享年81歲。

＊＊

鄧碧雲〔1924年9月27日－1991年3月25日．藍牡丹〕，原名鄧芍芙，廣東三水人，13歲就加入職業劇團，跟廖了了學習唱功、又隨蕭蘭芳學習演戲。15歲已經獲升為正印花旦，擅長演多類角色，又可以反串做文武生，佢會講［石岐話］、［順德話］同［四邑話］，譽為［萬能旦后］。鄧碧雲後來加入太平劇團，抗日戰爭時期曾經喺澳門演出。之後去到廣州加入［錦添花劇團］，同鄭碧影合稱［大細碧姐］。佢嗰時同雷維舟結婚重生咗一個女叫［雷靄然］。

鄧碧雲喺1950年後轉到香港拍電影，大部分係喜劇。其中以刁蠻媳婦、傻大姐、順德［媽姐］嘅形象最深入民心。又同當時嘅正印花旦鳳凰女、羅艷卿、余麗珍、吳君麗、于素秋、南紅、林鳳〔玉女明星〕合稱八牡丹，佢踲稱號係［藍牡丹］。鄧碧雲拍戲至1967年為止，一共演出過250部電影。

鄧碧雲喺1968年開始轉向電視發展，曾經喺麗的電視、佳藝電視、無綫電視演出，多數飾演亞媽［母親］嘅角色。其中1980年代喺無線電視劇《季節》飾演〔媽打〕mother 諧音，〔媽打〕角色紅極一時，之後佢參演嘅電影同廣告亦使用〔媽打〕嘅形象。她最後一次見面係參加亞洲電視嘅開心主流派做嘉賓。

鄧碧雲喺1991年3月25日，因肺衰竭喺香港病逝，享年66歲。

＊＊

鳳凰女〔1925年－1992年12月1日．紅牡丹〕，原名郭瑞貞，廣東三水人，港澳著名粵劇名伶。佢自細就鍾意粵劇，13歲時就跟隨紫蘭女學藝。1939年升為正印花旦。香港淪陷時期就跟住幾個粵劇團喺內地流浪同演出。香港重光之後，加入咗馬師曾嘅勝利劇團，又喺唔同嘅劇團擔任二幫花旦。到1954年，喺大春秋劇團擔任正印花旦。

鳳凰女喺1950年至1968年，參演過嘅電影超過250部。退出舞台之後，轉向主持電視節目。後來又同麥炳榮、梁醒波、譚蘭卿組成嘅［大龍鳳劇團］擔任正印花旦，重同林家聲、陳好逑等名伶合作，成為粵劇班霸。1960年代嘅《鳳閣恩仇未了情》、《百戰榮歸迎彩鳳》、《花木蘭》都係鳳凰女嘅佳作。喺《鳳閣恩仇未了情》劇目入面，鳳凰女飾演入質金國嘅大宋紅鸞郡主，帶出連串錯摸嘅喜劇處境，梁醒波、譚蘭卿嘅諧趣演出，更使全片絕無冷場。後來，佢又自組［鳳凰劇團］，亦曾經同麥炳榮另組［鳳求凰劇團］。鳳凰女同鄧碧雲、羅艷卿、余麗珍、吳君麗等7位粵劇女演員結義金蘭，號稱［八牡丹］，佢為［紅牡丹］；佢嘅徒弟有高麗同彩鸞鳳等。

鳳凰女喺1978年獲中國國民黨海工會同中華民國僑務委員會頒發海宣勳章同獎狀，表揚佢對粵劇嘅貢獻同反共政治立場。喺80年代，鳳凰女同寶人和劇團，喺百麗殿演出之後漸漸淡出粵劇界。丈夫林桂廉係一位記者，喺1967年因為癌病去世。

鳳凰女1992年喺美國逝世，用佢嘅首本名劇《鳳閣恩仇未了情》嘅紅鸞郡主戲裝入殮，享年67歲。

＊＊

羅艷卿〔1929年－．銀牡丹〕，原名羅大紅，廣東順德人，係20世紀40年代香港粵劇名伶同粵語片紅星，係余麗珍同薛覺先嘅徒弟。1953年6月7日星期日嫁畀粵劇名伶何非凡，嗰晚喺石塘嘴萬國酒家設宴，吸引好多香港市民圍觀。但之後喺1957年5月離異。 羅艷卿曾經組織過［艷堂皇劇團］同［千紅劇團］，重拍攝電影，多數同紅線女、馬師曾、文覺非、新馬師曾、羅劍郎、何非凡、任劍輝合作，經典作品包括《醉打金枝》、《四郎探母》、《雙龍丹鳳霸王都》、《燕歸人未歸》、《刁蠻公主戇駙馬》、《乞米養狀元》、《劉金定斬四門》、《樊梨花》、《十兄弟》、《璇宮艷史》同埋《夜光杯》等。

羅艷卿1978年先喺麗的電視演出首套長篇劇《追族》，年中再喺佳藝電視拍攝劇集《名流情史》。1986年同吳仟峰、任冰兒、阮兆輝等完成金龍劇團演出之後，短暫休息三年。1989年同羅家英組成［春秋劇團］喺香港大會堂演出。1990年再同羅家寶組成［寶艷紅劇團］間有演出，至到九十年代中期開始淡出舞台。

羅艷卿同鄧碧雲、鳳凰女、吳君麗、余麗珍等七位粵劇女演員結義金蘭，號稱〔八牡丹〕，佢就係其中嘅［銀牡丹］。

＊＊

吳君麗〔1933年1月29日－．白牡丹〕，廣東中山小欖人，原名為吳燕雲，係1960年代香港粵語片演員同粵劇花旦。佢同鄧碧雲、鳳凰女、羅艷卿、余麗珍、林鳳、于素秋、南紅結義金蘭，號稱［八牡丹］，佢係其中嘅［白牡丹］。早年居住喺上海就讀中信學校，中國抗日戰爭之後跟隨母親到香港定居。曾經跟從尹自重學習粵曲，之後加入陳非儂所辦嘅［香江粵劇學院］成為陳非儂嘅入室弟子，有［玉喉艷旦］之譽。擅演青衣同刀馬旦，曾經參與120部電影，包括粵劇電影同埋時裝電影。

吳君麗喺1962年成立［新麗聲影業公司］，直接參與電影拍攝工作。1970年代至1980年代參與林家聲嘅［頌新聲劇團］。1987年至1993年間同陳劍聲、新海泉組織［新麗聲粵劇團］參與粵劇演出。1991年喺新加坡舉辦個人演唱會《吳君麗獅城會知音》，之後就好少演出。

吳君麗喺2004年將3,000項服飾、戲箱、道具，同埋劇本、宣傳刊物、相片等捐贈畀香港文化博物館。2008年，簽約無綫電視拍攝處境劇《畢打自己人》，2009年因為只係同無綫電視簽咗一年合約而離開劇組。

＊＊

于素秋〔1930年7月9日－2017年5月12日．黑牡丹〕，原名于小圓／于鳳，上海人。係1950至1960年代香港著名粵劇刀馬旦同電影明星。父親係著名京劇名武生于占元，由於出身自京劇世家，佢自小就開始學戲，擅打北派，係有名嘅京劇〔刀馬旦〕，亦係成龍、洪金寶等人嘅大師姐同韓英傑嘅姨仔。

于素秋14歲就踏台板，18歲開始拍電影，曾經主演超過400部影片，當中有170多部係武俠片，係香港早期著名嘅武俠女星。作品包括粵語武俠片經典《如來神掌》，重同男主角曹達華傳出過緋聞，亦畀當時嘅媒體認定為最佳嘅螢幕情侶。因為于素秋嘅廣東話外省口音比較重，講起對白時唔係好流暢，所以佢嘅粵語電影大多數係由黎坤蓮現場配音。

于素秋同鄧碧雲、羅艷卿、余麗珍、吳君麗、鳳凰女、南紅、林鳳等七位粵劇女演員結義金蘭，號稱〔八牡丹〕，于素秋為其中嘅［黑牡丹］。1966年2月佢同粵劇名伶麥炳榮喺香港希爾頓酒店舉行婚禮，婚後息影。

2017年5月12日，于素秋喺美國三藩巿與世長辭，享年89歲。

＊＊

南紅〔1935年－．綠牡丹〕，原名蘇淑媚，廣東順德人，係1950至1960年代香港著名粵劇演員、粵語電影演員、歌手，至1970年代成為電視劇演員。南紅係19830年代廣州著名歌唱家同演員陳剪娜（陳翦娜）嘅女，經母親引薦之下，拜紅線女為師學戲，重畀師父為佢改咗〔南紅〕做藝名；另外佢又跟隨王粵生學習粵曲唱腔。

南紅喺1950年代開始拍攝電影，到1960年已經成為電影紅星，同期曾經同羽佳合組［慶紅佳劇團］演出做大戲，又追隨紅線女參演電影。後來喺1962年合組［玫瑰電影公司］，佢喺1967年同當時知名導演兼演員楚原結婚。

南紅所拍嘅戲曲電影只有10幾部，比較著名嘅除咗1964年嘅《十二欄杆十二釵》之外﹐亦有1968年同陳寶珠嘅《再世紅梅記》，其餘百幾部都係時裝片居多。踏入1970年代中期，曾經加盟電視台演出劇集。

南紅亦曾經為電影獻唱插曲，例如女殺手嘅插曲《荳蔻春心》同《情花朵朵開》、《牆頭馬上－纖情》、《半掩琵琶弄鶯喉》、《蔓莉，親愛的蔓莉》嘅《癡女情》、《燈塔行屍》嘅《歸心似箭》、《田園曲》嘅《風月無邊》、《情種》嘅《誤種情花》、《少女情》嘅《杜鵑紅》、《假妻》嘅《練舞曲》、《浪子癡情》嘅《四季想郎》、《孽海遺恨》嘅《永遠想著你》等等。重同同期嘅正印花旦鳳凰女、鄧碧雲、羅艷卿、余麗珍、吳君麗、于素秋、林鳳結義合稱［八牡丹］，南紅係其中嘅［綠牡丹］。

南紅曾經加入麗的電視，1970年代中期轉投無線，至1994年左右又返到亞洲電視。佢喺電視生涯主要係飾演賢妻良母，例如喺《網中人》入面嘅唐少梅、《京華春夢》入面嘅賀母、《播音人》入面嘅陳彩霞等。

＊＊

林鳳〔1940年－1976年8月28日．黃牡丹〕，原名馮淑嫣，廣東新會人，係香港1960年代電影明星，十六歲就考入邵氏公司粵語片組演員訓練班，演出嘅第一部電影係《玉女春情》，一片成名。之後同張英才演出《街市皇后》，將演藝事業推向高峰。

林鳳號稱〔銀壇玉女〕，係當代香港最受歡迎嘅女演員。佢同鄧碧雲、鳳凰女、羅艷卿、余麗珍、吳君麗、南紅、于素秋等七位粵劇女演員結義金蘭，號稱［八牡丹］，佢係［黃牡丹］。

林鳳喺1967年嫁畀譚永成［周啟邦夫人譚月清嘅哥哥］之後息影，佢哋育有一個仔，1976年8月28日於渣甸山谷柏道寓所因服食過量安眠藥逝世，終年36歲。佢嘅自殺，有人話係同婚姻生活唔開心同減肥無效有關。

＊＊

＊＊

于占元［關公］對戰 于素秋



于素秋，原名［于小圓／于鳳］，上海人。係1950－1960年代香港著名電影明星。父親係著名京劇名武生于占元，由於出身自京劇世家，自小就開始學戲，佢擅打北派，係有名嘅京劇〔刀馬旦〕，亦係成龍、洪金寶等人嘅大師姐，又武打明星韓英傑嘅姨仔。

于占元，係京劇名武生，1940年代喺上海享負盛名，知名武戲教席兼後台武戲管事。之後因為大陸環境惡化而南遷香港，1960年代開辦［中國戲劇研究學院］。門下弟子眾多，桃李滿門，包括七小福：元庭（吳明才）、元龍（洪金寶）、元樓（成龍）、元彪、元奎、元華、元武（周元武）、元泰等七個人，係表演團嘅基本班底。其他嘅重有：元慶（袁和平）、元秋、元德、元俊、元彬（陶周坤）、元寶（徐佑麟）等，七小福最多時曾經有成七十幾人。

＊＊

香港粵語片。廣東話資料館

油炸鬼 jau4 zaa3 gwai2

油炸鬼 jau4 zaa3 gwai2，又叫［炸麵］，潮州人叫做［油炸粿］，北方人就叫佢做［油條］，係華人傳統嘅民間小食，佢其實係一種用油炸成嘅麪粉團。

油炸鬼嘅做法亦都好簡單，只係將兩細塊嘅麪粉團搭埋一齊，中間用刀背輕輕咁印一吓或者椓一下，等佢好似有兩條黐埋咁，跟住就放入滾油度炸，炸到麪粉團脹起，顏色變到成金黃色，炸到個形狀變到好似一段脛骨咁，就可以撈起上架賣嘞。油炸鬼好多時都係會同粥一齊食，而有啲鋪頭就專係做油炸鬼同豆漿嘅。



油炸鬼個名嘅由來有好多，其中有一個講法，係油炸鬼原本係叫做［油炸檜］；檜即係宋朝時代一個畀人公認為奸相嘅［秦檜］；而油炸檜就係啲後人因為勁憎呢個奸相曾經設計陷害忠臣岳飛，憎佢做咗啲禍國殃民嘅事，於是就創作咗呢種民間小食嚟發洩，寓意秦檜同佢老婆死咗之後除咗希望佢哋落地獄之外，重要畀閰羅王放佢哋落油鑊度炸嚟懲罰佢。由於係咒佢哋兩公婆，所以油炸鬼一定係好似有兩條黐埋咁樣。到後來，呢隻嘢食嘅名喺歷史上一路流傳，演變成今時今日嘅油炸鬼。

另一個講法就較簡單直接，話油條呢種嘢食喺中原傳到落福建同潮汕地區，閩南話同潮州話都係叫佢做［油炸粿］或者［油押粿］，而廣府人聽到就直接叫佢做［油炸鬼］。又有人解釋話，廣東人將［油押粿］讀成［油炸鬼］嘅講法，就好似喺泰國嘅潮州話同閩南話講嘅〔炒粿條〕一樣，變成廣東話講嘅〔炒鬼刁〕或者〔炒貴刁〕咁。

唔知有冇人知道其他嘅由來呢？



＊＊

油炸鬼係外國又畀人叫做 Chinese Donut（中國冬甩），因為佢同冬甩一樣都係炸嘢，不過冬甩係圓嘅。如果講油炸鬼似冬甩，有人覺得［牛脷酥 ngau4 lei6 sou1］就重似。

牛脷酥同油炸鬼一樣都係麪粉做。麪粉加糖搓成兩條，中間灑糖，個形就好似條脷咁，再放落油鑊炸，因為有糖之故，所以係甜甜哋嘅。牛脷酥通常係同粥一齊食，粥舖多數會賣。

＊＊

油炸鬼進化版［炸両］



炸兩 zaa3 loeng2，可以寫做［炸両］，又叫做［炸腸］，喺香港流行嘅廣東嘅特色小食。係將［腸粉］同［油炸鬼］兩種嘢食夾埋而變成嘅。做法係用腸粉包住油炸鬼，而用嘅腸粉係齋腸，然後切成一段段，淋上豉油，有人鍾意點甜醬同糝芝麻來食。香港人通常喺食粥嗰時配炸兩，所以炸兩主要喺粥舖或大排檔有得賣，而家擴展到走入啲酒樓當點心賣。

不過，如果用咗啲油頭粉面凍冰冰嘅［腸粉］來包著啲無厘火氣軟塌塌嘅［油炸鬼］，咁就真係離行離迾嘅兩回事嘞。



＊＊

香港記憶［清潔香港1989］一起參與



＊＊

香港小食。廣東話資料館

香港街頭小食〔牛雜〕

牛雜，係香港、廣東、東南亞嘅街頭小食，主要係用牛嘅內臟，包括：胃、腸、心、肝、腎、肺，再同蘿蔔加柱侯醬一齊煮。

喺以前，因為牛內臟平過牛肉，所以好受低下階層歡迎。但係喺煮之前，牛雜嘅清洗工夫花時間就比較多，唔係就會有異味；如果話喺依家嘅健康角度嚟講，牛雜嘅膽固醇就好鬼高嘞。

＊＊

牛雜嘅起源，又係有好多講法：



其中一個講法話，喺古時有一位大王喺祭祀農神嗰時，突然天降大雨，大王睇到當地百姓饑謹，立即下令劏咗自己隻牛，將啲牛肉、牛肚、牛心、牛肝、柏葉、牛腸等放入個大鑊度煮。啲百姓食咗都話味道好正。

另一個係話，山東係牛雜嘅起源地，做法都係將啲牛內臟洗乾淨放入個大鑊度加醬料一齊煮，而當地人叫佢做［牛雜碎］。

又有人話，廣州至係牛雜嘅發源地，佢地有一味叫做［和味牛雜蘿蔔］，聽講話係清朝光緒年間一個居住喺光塔寺附近嘅回族廚師發明嘅。重話佢係用牛腸、牛膀、牛肺、蘿蔔再加咗花椒、八角等五種味料嘅醬汁慢火炆幾個鐘，等牛雜炆透而蘿蔔又吸咗入牛雜醬汁之後，再剪開細細塊，用竹籤串著醮辣椒醬來食。



光塔寺［懷聖寺］係廣州越秀一座歷史悠久嘅清真寺。

＊＊

唔知重有冇其他嘅講法呢？

＊＊

一般嚟市面上賣嘅普通牛雜：



。牛　胃［通常分做四個：草肚、金錢肚、牛百葉、牛沙瓜］

。牛　腸［有分：牛腸頭、牛粉腸、牛竹腸、牛大腸］

。牛　肺［］

。牛　膀〔即係牛嘅胰臟，又叫：橫脷〕

。牛　肚〔即係牛嘅瘤胃，又叫：草胃、草肚、毛肚〕

。牛　肝［又叫：牛膶］

。牛　心［］

。牛　腎［又叫：牛腰、牛腰子］

。牛百葉〔即係牛嘅重瓣胃〕

。金錢肚〔即係牛嘅網胃，又叫：蜂巢胃）

。牛沙瓜〔即係牛嘅皺胃，真胃，牛傘肚〕

。牛傘肚〔即係牛嘅皺胃，真胃，同牛沙瓜〕

＊＊

比較特別同少有嘅牛雜：



。牛　韁［即係牛嘅頸韌帶，又叫：牛頸筋］

。牛天梯［即係牛嘅上顎部位，亦有指係牛嘅喉嚨，又叫：牛脆骨］

。牛管廷［即係牛嘅喉嚨，或者係牛頸兩邊嘅大動脈血管］

。牛心碇［即係牛嘅心臟血管頭］

。牛　脬［即係牛嘅膀胱］

。牛荔枝［即係牛嘅睪丸］

。牛　鞭［即係牛嘅陽具］

。牛歡笑［即係牛嘅子宮］

。牛歡喜［即係牛嘅陰部］

＊＊

香港記憶［清潔龍1991］吳君如



1990年代，委任咗形象正義嘅清潔龍家族，分別係［清潔龍］、［沙灘龍］、［郊野龍］同兩條小龍［小清］同埋［小潔］。

＊＊

香港小食。廣東話資料館

《霸王別姬》張國榮 與 程蝶衣

電影《霸王別姬》Farewell My Concubine，係改編自李碧華嘅同名小說，故事係講述伶人［程蝶衣］對國粹藝術嘅執著，進一步而投影出歷史同文化喺大時代嘅演變之下，造成嘅佢激盪嘅人生。

主演：張國榮［程蝶衣］小豆子
　　　張豐毅［段小樓］小石頭
　　　鞏　俐［菊　仙］名　妓
　　　葛　優［袁世卿］袁四爺



劇情大岡：

段小樓（張豐毅）同程蝶衣（張國榮）係一對由細就一齊長大嘅師兄弟，兩個人一個演生，一個飾旦，一向都配合得天衣無縫，尤其係佢哋合作嘅一出《霸王別姬》，更加係譽滿京城。就因咁，佢哋兩個人就約定，合演一世嘅《霸王別姬》。

不過，佢哋兩個人對［戲劇］同［人生］關係嘅理解就有唔同嘅感覺，段小樓深知道［戲非人生］，但係程蝶衣就［人戲不分］。 程蝶衣對佢哋兩人嘅關係已經超越咗朋友，更加超越咗兄弟.........



師兄段小樓認為應該係成家立業嘅時候，佢就娶咗一位名妓菊仙（鞏俐），以致令到師弟程蝶衣認定菊仙係一個可恥嘅第三者，而段小樓就做咗叛徒。自此之後，三個人就圍繞著一出《霸王別姬》產生出佢哋嘅愛恨情仇戰，開始隨著時代風雲嘅變遷而不斷升級，最終都係做成一場悲劇。



電影《霸王別姬》獲得第46屆法國康城影展嘅［金棕櫚獎］，成為第一部亦係至今嘅唯一獲得呢個獎項嘅華語電影。



《霸王別姬》重榮獲美國金球獎［最佳外語片］，同埋第66屆奧斯卡最佳外語片獎提名。



《霸王別姬》喺2015年畀美國《時代》周刊評為「百大不朽電影」之一。



張國榮扮演嘅［虞姬］，［程蝶衣］對段小樓無望嘅愛、淒寂嘅身影同絕望嚋眼神，令無數嘅觀眾男女都感到陣陣淒迷。難怪就連張國榮嘅京劇速成老師亦都贊：［張國榮，係唱戲嘅才料。］



歷盡滄桑嘅程蝶衣同段小樓喺十一年後再演《霸王別姬》，程蝶衣嘅情感依舊，但係畀段小樓提醒，自己原來始終都係一個男兒身。冇錯，自己係男人，對段小樓嘅愛情都不過係一場美好而痛心嘅奢夢，終於夢醒，但係身心都已經傾獻出去。唔願夢醒嘅程蝶衣寧願好似虞姬一樣，永遠倒臥喺血染嘅愛情裡面［從一而終］，佢用自己送畀段小樓嘅寶劍自刎。

懷念～張國榮

＊＊

廣東話資料館

韓信．拜將臺風雲［2018年漫遊香港］

韓信［公元前230年－前196年］，淮陰人，同張良、蕭何為西漢開國三傑之一。佢又同彭越、英布並稱為［漢初三大名將］。蕭何譽為［國士無雙］、蒯徹譽為［功高無二，略不世出］。韓信係謀略家、戰術家、統帥同謀戰派嘅軍事理論家，喺歷史上以卓絕用兵嘅才能著稱，留低好多著名戰例同策略。

韓信嘅主要戰績：
。擒魏豹：原魏國公族，秦末民變時嘅六國群雄之一。
。斬陳餘：大梁人，秦末漢初代王兼趙國太傅，井陘之戰失敗而死。
。收左車：秦末年間趙國謀士，趙國名將李牧之孫。
。降燕地：歷史上從西周到春秋戰國時期北方姬姓諸侯國，為戰國七雄之一。
。殺龍且：楚漢戰爭時代人物，西楚項羽部下。
。取田齊：田氏代齊後嘅齊國，係戰國七雄之一，媯姓。

韓信，被世人譽為［兵仙、戰神］，佢威風八面，戰無不勝！有人話，如果冇咗韓信嘅出現，或者西楚霸王項羽就不至於去到［別姬］同［自刎］嘅地步，而劉邦亦未必能夠開一朝之盛世。當［漢朝］嘅大局已成，就正係韓信將死之期！

喺二千幾年前發生嘅歷史嘅一件冤案，真相係點根本就無從辨別，更唔好話想要同佢平反！戲臺上嘅故事當然亦真亦假，戲臺下就更加係虛無縹緲。喺2018年，韓信突然走到來現代，佢搵咗佢兩個朋友出嚟傾［粵劇偈］，佢哋又講咗啲咩呢？

追蹤韓信死前廿四個鐘頭嘅足印；當今年［立冬］之期，［死神］同［戰神］相遇之時，佢地究竟又會發生啲咩時空交錯嘅變動呢？

＊＊

寫一個荒誕嘅劇本，都寫唔出來嘅荒謬時代。



回想過去，縱使當時社會係一個反智嘅年代，但比起今日，原來嗰陣時已經算比較正常。喺現今社會嗰種［難為正邪定分界］嘅顛倒邏輯，小人當道，謬論充斥，歪理常在，正常同理智受到衝擊，引用聖經入面嘅一句［彎曲悖謬的世代］亦不過就係咁。

歷史係不斷循環嘅，就好似動畫入面嘅一句對白［人類總要重複同樣嘅錯誤］。當我地揭開歷史，入面一頁頁咁寫住一個民族嘅劣根性。人同人嘅關係就基於一個身份，於是就出現咗上尊下卑嘅意識，［在下者］無論能力有幾高，功績有幾好，你都唔可以冇規距［以下犯上］，更加唔可以［功高蓋主］，亦要忌住唔好［鋒芒太露］。如果唔係，就多多都唔夠...死！

韓信，喺某個意義上就係因為有過人之才而不幸遇上心胸狹窄嘅老闆，於是就兵權被奪，含屈而終，呢個悲劇睇來都係無可避免嘅。又睇翻歷史，我哋會不恥劉邦同呂后［狡兔死，走狗烹；飛烏盡，良弓藏；敵國破，謀臣忘］嘅卑劣，但係到今時今日，我哋嘅民族基因有冇變過呢？比起以前，我哋有冇打破［人與人嘅關係就係基於身份］而唔係基於才能呢種恩維？又如果，有一個冇大學學位嘅韓信喺你公司度出現，身為老闆嘅你，又會點樣對待佢呢？



＊＊

我哋都唔陌生喺職場上［識做人比識做事更為重要］呢重論調。所謂［識做人］有可能做成［擦鞋文化］，而［識做事］嘅前提就係要［識做人］，咁你先至有機會發揮所長！雖然聽落有啲怪，不過我哋依家嘅社會咪就係咁囉。喺上位嘅，有幾多個係真才實學嘅，講到底佢哋出現都係比較係靠［關係］。

或者有人會話，韓信唔夠［謙遜］，恃住開國有功，就連老闆都唔放喺眼內，所以就唔好怪老闆無情嘞。當年劉邦唔係聽張良同蕭何支笛重用韓信，韓信又點可以成就功績呢？但係掉返轉頭，冇韓信嘅才能幫助，劉邦又可唔可以打發項羽而得天下呢？其實又係邊個靠邊個呢？

就好似現今嘅社會，有啲人明明都係受壓迫嘅一群，但係佢哋選擇企喺權貴嘅一邊，佢無視權力不平衡帶來嘅不公義，甘心屈服喺威權嘅思維。就好似蕭何一樣，佢嘅立場足可以影響韓信嘅一生，正所謂［成也蕭何，敗也蕭何］。

＊＊

香港《拜將臺》黑盒劇場版 2018

洪　海　飾演［韓信］
鄭詠梅　飾演［呂后］
李沛妍　飾演［瑤姬］
符樹旺　飾演［劉邦］
呂洪廣　飾演［蕭何］
郭啟煇　飾演［霸王］
莫華敏　飾演［鍾離眜］

＊＊

韓信．拜將臺風雲［2018年漫遊香港］

演出：吳國亮、洪海、黎宇文

＊＊

桃花源《拜將臺》回顧

＊＊

韓國首爾《拜將臺》黑盒劇場版 2017
PAMS 2017 拜將臺 배장대 ArenA Trailer

＊＊

二千多年前的歷史冤案！真相無從辨別，更遑論平反！戲臺上說故事當然亦真亦假，追蹤韓信死前二十四小時的足印；當「死神」與「戰神」相遇，曾否網開一面？

洪　海　飾演［韓信］
鄭詠梅　飾演［瑤姬］
符樹旺　飾演［劉邦］
鄧美玲　飾演［呂后］
呂洪廣　飾演［蕭何］
阮德鏘　飾演［霸王］
莫華敏　飾演［鍾離眜］

＊＊

香港《拜將臺》英雄會 2015

呢個係有關劉邦借呂后剷除韓信嘅故事，反映中國人社會，有太多嘅恐懼，永遠怕畀人取代，必須要鬥垮一個可能威脅自己地位嘅人，置諸佢死地而後快。喺劇中嘅所有人物，佢哋都好理直氣壯咁做一件自己認為啱嘅事.........

洪　海　飾演［韓信］

鄭詠梅　飾演［瑤姬］

符樹旺　飾演［劉邦］

鄧美玲　飾演［呂后］

呂洪廣　飾演［蕭何］

阮德鏘　飾演［霸王］

莫華敏　飾演［鍾離眜］

＊＊

《拜將臺》英雄會［2015］

＊＊

《拜將臺》粵曲小令《問天》［2015］

＊＊

香港《拜將臺》英雄會 2011

韓信被譽為「兵仙」、「戰神」，是中國古代戰術名家，戰無不勝！

沒有韓信，或許西楚霸王項羽不至於別姬自刎、

劉邦亦未必能開一朝盛世。

當漢立之局已成，正是韓信將死之期？

二千多年前的歷史冤案！真相無從辨別，更遑論平反！

戲臺上說故事當然亦真亦假，追蹤韓信死前二十四小時的足印；

當「死神」與「戰神」相遇，曾否網開一面？

洪　海　飾演［韓　信］

鄭詠梅　飾演［瑤　姬］

陳嘉鳴　飾演［呂　后］

鄘宏基　飾演［簫　何］

宋洪波　飾演［劉　邦］

黎耀威　飾演［霸　王］

藍天佑　飾演［鍾離眛］

＊＊

廣東話資料館

女俠［于素秋］北派功架，連踢十二支纓槍！

粵語電影［斷橋產子之水浸金山寺］入面，于素秋表演連踢十二支纓槍！

＊＊

于素秋，原名［于小圓／于鳳］，上海人。係1950－1960年代香港著名電影明星。父親係著名京劇名武生于占元，由於出身自京劇世家，自小就開始學戲，佢擅打北派，係有名嘅京劇〔刀馬旦〕，亦係成龍、洪金寶等人嘅大師姐，又武打明星韓英傑嘅姨仔。



于素秋十四歲踏台板，十八歲開始拍電影，曾經主演超過400部粵語電影，當中有170幾部都係武俠片，係香港早期著名嘅武俠女星。于素秋嘅作品包括粵語武俠片經典《如來神掌》，而且重同男主角曹達華傳出過緋聞，畀當時嘅媒體認定為最佳嘅螢幕情侶。



因為于素秋嘅廣東話外省口音比較重，講起對白時就唔係好順暢，所以佢嘅粵語電影大多數係由黎坤蓮現場配音。



于素秋曾經同鄧碧雲、羅艷卿、余麗珍、吳君麗、鳳凰女、南紅、林鳳等七位粵劇女星結義金蘭，號稱〔八牡丹〕，于素秋係其中嘅「黑牡丹」。1966年2月于素秋同粵劇名伶麥炳榮喺香港希爾頓酒店舉行婚禮，佢喺結婚之後就息影。

2017年5月12日，于素秋喺美國三藩巿與世長辭，享年89歲。

＊＊

［于占元］對戰［于素秋］片段



于占元，係京劇名武生，1940年代喺上海享負盛名，知名武戲教席兼後台武戲管事。之後因為大陸環境惡化而南遷香港，1960年代開辦［中國戲劇研究學院］。門下弟子眾多，桃李滿門，包括七小福：元庭（吳明才）、元龍（洪金寶）、元樓（成龍）、元彪、元奎、元華、元武（周元武）、元泰等七個人，係表演團嘅基本班底。其他嘅重有：元慶（袁和平）、元秋、元德、元俊、元彬（陶周坤）、元寶（徐佑麟）等，七小福最多時曾經有成七十幾人。

 ＊＊

《無敵楊家將》穆桂英。攻打火焰陣！



于素秋喺《無敵楊家將》飾演穆桂英，再表演佢嘅出色武藝，一氣呵成，絕無花假！

 ＊＊

結義［八牡丹］



1960年代演藝界潮流興結義。八牡丹成員朵朵都係紅伶花旦，就算于素秋亦係平劇刀馬旦，惟獨林鳳一個係出身邵氏嘅玉女明星，佢哋嘅年紀同最大嘅余麗珍相差有成十七載，就算同排行第七嘅南紅比都相差6年。

余麗珍（1923年．紫牡丹）余麗珍．民國廣東
鄧碧雲（1924年．藍牡丹）鄧芍芙．廣東三水
鳳凰女（1925年．紅牡丹）郭瑞貞．廣東三水
羅艷卿（1929年．銀牡丹）羅大紅．廣東順德
吳君麗（1930年．白牡丹）吳燕雲．廣東中山
于素秋（1930年．黑牡丹）于小圓．民國上海
南　紅（1934年．綠牡丹）蘇淑媚．廣東順德
林　鳳（1940年．黃牡丹）馮淑嫣．廣東新會

 ＊＊

 于素秋［粵語］原聲



于素秋，好少有用自己嘅上海腔粵語來講對白，喺戲入面向曹達華探長解釋點樣同袁小田喺上環大笪地賣藝，受到劉家良同金雷等流氓嘅欺凌同受傷，幸好得到李香琴仗義畀咗兩百鹹龍佢哋解困。

＊＊

廣東話資料館