廣東話［文字三胞胎］

依家用緊嘅中文字，又叫做［漢字］，文字喺作為民族文化傳承嘅一種形式。話佢簡單又係幾簡單，細路仔讀到小學就識得用來作文！讀到高中就識得用來寫論文！但係，話佢難又真係幾鬼難。其實，用緊嘅中文字，到底有幾多個呢？

我哋成日用嘅中文字，到底用咗幾多個，其實好多人都唔知。又聽啲專家講，大約有十萬個左右，而目前重未有學者敢話自己識曬所有嘅中文字！

形式字，係中文字嘅一種類型，就好似文字當中嘅［雙胞胎］同［三胞胎］，甚至係［多包胎］。如果唔識同冇睇清楚，就真係認佢哋唔出架。就比如話：［己、已、巳］呢三個字，經常都會用到，但係真正分得清嘅人就唔多。

巳［zi6］；十二［地支］之一。

巳，係地支嘅第六位，前便係辰、反便係午。
。巳　月：就係農曆四月，
。巳　時：係廿四小時制嘅09:00至11:00，
。方　向：巳係指［東南偏南］。
。五　行：巳係代表［火］，
。陰陽學：巳係屬［陰］。

巳，又有停止嘅意思，所以又指草木嘅增長達到極限嘅狀態。
後世人為咗方便記憶，就將每一個地支順序對應一個生肖。
所以巳同［十二生肖］嘅搭配係［蛇］。

包含［巳］嘅干支：
。己巳
。辛巳
。癸巳
。乙巳
。丁巳

＊＊

已［ji5］；又同［以］，又相當於［與］。
已，有止；停止，完成；完畢，罷免；黜退，廢棄，病愈，一定，必然，不允許，最終；終歸，從前；已往等等嘅意思。   

。代　詞：相當於［此］。

。副　詞：表示動作、變化達到的程度，相當於［已經］，［已往］。
　　　　　表示時間靠後的，相當於［已而］、［隨後］。
　　　　　表示程度，相當於［太］、［甚］。
　　　　　表示行為的頻率，相當於［又］。

。語氣詞：用於句尾，表示確定語氣。
　　　　　用於句尾，表示疑問語氣。
　　　　　用於句首，表示感嘆語氣。同［哎］。

＊＊

己［gei2］；十［天干］之一。



己，可以解自身：自己，知己，己身，己見等等。
其他嘅重有舍己救人，先人後己，知彼知己，百戰不殆（殆：危險，失敗）。

己，係［天干］嘅第六位。
天干亦可以表示植物嘅生長周期，己係指植物開始屈曲其形。
。方位上係指［中央］。
。五行裏面己係代表［土］
。陰陽學話己係屬［陰］。

包含己嘅干支：
。己巳
。己卯
。己丑
。己亥
。己酉
。己未

＊＊

其實要分清呢三個字，就可以用呢幾句話：
［全封巳；半封已；唔封讀自己］。
［自己不出頭；已經半出頭；巳巴全出頭］。
［開口己，半口已，埋口巳］。

為咗加深印象，我哋可以詳細解說：
［要自『己』保持謙虛，凡事低調，唔出風頭；事情「已」經發生，唔能夠逃避，先伸出半個頭探探究竟；『巳』時係上晝九點到十一點，唔可以匿喺被竇度，返工嘅返工，返學嘅返學，抬頭挺胸做人，背要伸直，狗仔睇到主人有精神，尾『巴』都會竪高，頭亦都抬高。］

＊＊

。祇［zi2］同［只］
　　［kei4］祇悔，土祇，地祇
　祗［zi1］恭敬
　　［zi2］地神
　袛［dai1］袛裯

＊＊

。戊［mou6］十［天干］之一
　戌［seot1］十二［地支］之一
　戍［syu3］戍守，戍衛，戍卒
　戎［jung4］戎裝，兵戎，戎馬，蠻夷戎狄

＊＊

而除咗呢啲三胞胎之外，重有一啲字真係好似孖生嘅咁，佢哋嘅區別就只有一啲啲。

［歡迎提供修正］

。汩［gwat1］汩亂，汩沒
　　［wat6］行動迅速
　汨［mik6］汨羅江，湖南省河流名稱

。氽［tan2］漂浮；用油炸
　汆［mei6］汆水［潛水］
　　［cyun1］汆湯，汆丸，汆黃瓜片

。薜［bai6］薜荔
　　［baak3］一種藥草
　薛［sit3］一個姓氏

。塵［can4］塵土，塵囂，塵埃
　麈［zyu2］鹿一類動物，尾可以做塵拂

。壺［wu4］茶壺，銅壺
　壼［kwan2］壼闈，內壼，壼範

。亳［bok3］地名，安徽省亳縣
　毫［hou4］毫升，毫髮，毫米，明察秋毫

＊＊

大陸氣功［金像獎］2017

開場表演，［我要真氣功］！

呢啲國寶級嘅表演，再加上一啲特技效果之後，呢位氣功大師嗰招［隔山打牛］嘅威力，就更上一層樓嘞。真係［無卵得頂］，假到［無曬朋友］！不過，呢種咁嘅大師到處都係，不論國籍人種同膚色，全世界都有。喺亞洲地區比較有市場嘅有大陸、日本、台湾、馬來西亞、泰國等.........

參演招式：

。［隔住青山打西牛］

。［螺旋丸 vs 廬山升龍霸］

。［太極旋風氹氹轉］

。［真正宗。龜波氣功］

。［雷遁。千烏］

氣功嘅種類好繁多，又有悠久嘅歷史，喺古代通常分為吐吶、行氣、布氣、服氣、導引、煉丹、修道、坐禪等等。練氣功，好多時都係配合武術或者靜坐一齊練。

氣功主要可以分為［動功］同［靜功］。動功係指以身體活動為主嘅氣功，特點係強調同意氣相結合嘅肢體操作；而靜功係指身體唔迶動，只係靠意識、呼吸嘅自我控制來進行嘅氣功。大多數嘅練氣功方法係動靜相間嘅。

喺宗教之中，道教嘅道士經常會練習導引、內丹術氣功，而佛教裡面就會練習禪定、靜坐所包含嘅氣功。

＊＊

無聊通識科。廣東話資料館

絲綢之路［帝國思路］

絲綢之路，其實係沿線各個君主制國家共同促進經貿發展嘅產物，但係有好多人認為，西漢時嘅張騫喺［公元前138—126年］同［公元前119年］曾經兩次出使西域，係佢開闢咗中外交流嘅新紀元，重話係成功咁將東西方之間最後嘅珠簾掀開。

喺司馬遷嘅［史記］入面有咁寫：「於是西北國始通於漢矣。然張騫鑿空，其後使往者皆稱博望侯，以為質與國外，外國由此信之」，讚揚張騫開通西域嘅作用。從此，呢條路線就作為［國道］踩咗出來，各國嘅使者、商人、傳教士等都沿著張騫開通嘅道路，來往絡繹不絕。上至王公貴族，下至乞兒獄犯，都喺呢條絲路上留低咗自己嘅足跡。



呢條東西方嘅通道，將中原、西域同大伊朗、累范特、阿拉伯緊密聯繫埋一齊。經過幾個世紀嘅努力，絲綢之路向西伸展去到地中海。廣義上，絲路嘅東段係去到朝鮮、日本，西段至到法國、荷蘭。而經過海路仲可以去到義大利、埃及，成為亞洲同歐洲、非洲各國經濟文化交流嘅友誼之路。



＊＊

「絲路光影」攝影展
［會展中心文化廊 18-24/07/2018］
《國家地理》雜誌 National Geographic 展出喺絲綢之路沿線地區嘅精彩相片。


















＊＊

傳統絲綢之路：
一般可以分為三段；而每一段又可分為北中南三條線路。
。東段：由長安或洛陽到玉門關、陽關。
。中段：由玉門關、陽關以西至蔥嶺。
。西段：由蔥嶺往西經過中亞、西亞直到歐洲。

＊＊

東段：［西漢開闢］



東段各線路嘅選擇，好多都考慮翻越六盤山同埋渡黃河嘅安全性同便捷性。三線都係由長安或者洛陽出發，到武威、張掖匯合，再沿河西走廊至敦煌。西漢時期由張騫從長安出發出使西域；東漢時期由班超從洛陽再次出使西域開闢。

。北線：
由涇川、固原、靖遠至武威，路線最短，但沿途缺水、補給困難。

。南線：
由鳳翔、天水、隴西、臨夏、樂都、西寧至張掖，沿途有補給，但係路途漫長。

。中線：
由涇川轉往平涼、會寧、蘭州至武威，距離和補給均屬適中。

到10世紀末期，北宋王朝為繞開地處河西走廊嘅西夏領土，開闢咗由天水經青海至塔里木盆地嘅［青海道］。成為北宋時期嘅一條新絲綢之路嘅東段商路。

東段簡表＊北線、南線、中線：
　　　　　。洛陽（洛城）河南古都，絲路東起點
　　　　　。長安（西安）古稱，番邦人稱長安為胡姆丹
　　　　　。須彌山石窟（）寧夏原州須彌山
　　　　　　麥積山石窟（）甘肅天水麥積山
　　　　　　炳靈寺石窟（）甘肅臨夏積石山
　　　　　。武威（涼州）甘肅河西走廊東端
　　　　　。張掖（甘州）甘肅河西走廊中部
　　　　　。酒泉（肅州）甘肅河西走廊西端
　　　　　。敦煌（沙州）甘肅河西走廊終端
　　　　　　莫高窟（千佛洞）甘肅敦煌
　　　　　　榆林窟（萬佛峽）甘肅瓜州

　　　　＊北宋新路：（青海道）
　　　　　。天水（西北小江南）甘肅東南部城市
　　　　　。西寧（鄯州、青唐城）青海省會
　　　　　。伏俟（伏俟城）青海共和縣石乃亥鄉
　　　　　。索爾庫裏盆地（索爾庫裏）

＊＊

中段：［西漢開闢］



中段主要係塔里木盆地境內嘅諸線路，隨綠洲、沙漠嘅變化而時有變遷。三線喺中途尤其係安西四鎮（640年）有分岔同支路。由陽關到樓蘭或者若羌米蘭綠洲，要沿著疏勒河同阿爾金山北麓穿越長達千幾里嘅庫姆塔格沙漠，歷史上呢段路沿途都冇綠洲文明可以作為旅行嘅基點。而喺陽關以東或者米蘭、樓蘭以西，沿途嘅綠洲星羅棋布。因此，「西出陽關無故人」的名詩句也寫出了陽關以西這千餘里絲路的可怖。此路線後來為313國道。

。南道：又稱［于闐道］
由東起陽關，沿塔克拉瑪干沙漠南緣，經若羌、和田、莎車等，至到蔥嶺。

。中道：
由玉門關開始，沿著塔克拉瑪干沙漠北緣，經樓蘭羅布泊、吐魯番、焉耆、庫車、阿克蘇、喀什等，再到費爾干納盆地（大宛）。

。北道：
由安西，走天山北麓，經哈密、吉木薩爾、伊寧等，直到碎葉。北道係唐朝時期先至開闢嘅絲路。

中段簡表＊南道：（于闐道）
　　　　　。陽關（）敦煌西南部
　　　　　。若羌（鄯善）新疆吐魯番一個城
　　　　　。且末（）新疆巴音郭楞
　　　　　。尼雅（精絕）西漢時西域三十六國之一
　　　　　。和田（于闐）古代西域王國

　　　　＊中道：
　　　　　。玉門關（小方盤城）敦煌市西北部
　　　　　。羅布泊［鹽澤、蒲昌海］若羌北一個乾涸鹹水湖
　　　　　　蒙古語及維吾爾語意為「匯入多水之湖」
　　　　　。樓蘭［樓蘭國）為鄯善所兼併，現屬新疆若羌縣
　　　　　。吐魯番（車師、高昌）
　　　　　　高昌故城、交河故城、雅爾湖故城、柏孜克里克千佛洞
　　　　　。焉耆（尉犁）新疆塔里木盆地東北部古國
　　　　　。庫車（龜茲）克孜爾千佛洞、庫木吐喇千佛洞
　　　　　。阿克蘇（姑墨）西域古國
　　　　　。喀什（疏勒）新疆維吾爾西南部
　　　　　。大宛（費爾干納盆地）中亞費爾干納區域國家

　　　　＊北道：
　　　　　。安西（瓜州）酒泉下屬一個縣
　　　　　。哈密（伊吾）水道縱橫盛產哈密瓜
　　　　　。烏魯木齊（）蒙古文意思解做［美麗的草原］
　　　　　。吉木薩爾（庭州）蒙古語意為沙礫灘河
　　　　　。伊寧（伊犁）烏孫國領土
　　　　　。碎葉（）吉爾吉斯斯坦楚河州西南部

＊＊

西段（東漢開闢）



由蔥嶺以西直到歐洲嘅都係絲綢之路嘅西段，北中南三線分別同中段嘅三線相接對應。其中經裏海到君士坦丁堡嘅路線係喺唐代開闢嘅。

。北線：
沿著鹹海、裏海、黑海嘅北岸，經過碎葉、怛羅斯、阿斯特拉罕等地到君士坦丁堡。

。中線：
由喀什起，走費爾干納盆地、撒馬爾罕、布哈拉等，再到馬什哈德同南線匯合。

。南線：
由帕米爾山，可由克什米爾進入巴基斯坦同印度，又可以由白沙瓦、喀布爾、馬什哈德、巴格達、大馬士革等，再去歐洲。

西段簡表＊北線：
　　　　　。烏魯木齊（）新疆維吾爾中部
　　　　　。阿拉木圖（）哈薩克斯坦城市
　　　　　。江布爾城（怛羅斯）哈薩克斯坦城市
　　　　　。托克瑪克（碎葉）吉爾吉斯斯坦城市
　　　　　。伊蒂爾（阿斯特拉罕）
　　　　　。薩萊（金帳汗）俄羅斯
　　　　　。薩克爾（）
　　　　　。君士坦丁堡（伊斯坦堡）土耳其城市

　　　　＊中線：
　　　　　。喀什（喀什葛爾）新疆維吾爾一個地區
　　　　　。白沙瓦（哈拉，林大道）
　　　　　。喀布爾（）阿富汗東部
　　　　　。巴米揚（帆延）阿富汗哈扎拉賈特地區最大城市
　　　　　　著名巴米揚大佛喺2001年畀人摧毀

　　　　＊南線：
　　　　　。馬什哈德（殉教地）伊朗第二大城市
　　　　　。薩卜澤瓦爾（）伊朗東北部城市
　　　　　。赫卡托姆皮洛斯（番兜，和櫝）
　　　　　　可能喺伊朗達姆甘同沙赫魯德之間
　　　　　。德黑蘭（拉伊）伊朗最大城市
　　　　　。哈馬丹（埃克巴坦那）西亞古城
　　　　　。克爾曼沙汗（）伊朗三十個省份之一
　　　　　。巴庫拜（）伊拉克
　　　　　。巴格達（）伊拉克最大城市
　　　　　。阿布哈里卜（）巴格達西部城市
　　　　　。費盧傑（清真寺城）沿幼發拉底河至阿列頗
　　　　　。拉馬迪（）伊拉克中部城市
　　　　　。阿列頗（）敘利亞
　　　　　。大馬士革（大馬色）敘利亞首都
　　　　　。阿達納（）土耳其安納托利亞地區南部古城
　　　　　。科尼亞（）土耳其科尼亞省首府
　　　　　。安條克（安提阿）黎凡特西北部奧龍特斯河一個古城
　　　　　。布爾薩（）土耳其西北部城市
　　　　　。君士坦丁堡（伊斯坦堡）土耳其最大城市

＊＊

其他絲路

除咗［傳統嘅絲路］之外，重有好多唔同嘅絲路。

。草原絲綢之路：係歐亞大陸北部嘅遊牧民族使用嘅。



草原絲路，係古時由中原地區向北越過長城入塞外，然後穿越蒙古高原、中西亞北部、南俄草原，向西走去歐洲嘅陸路商道。其中最重要嘅城市係［訛答剌］、［塔拉斯］、［托克馬克］。

＊＊

。南方絲綢之路：主要係同南亞交流嘅。



南方絲路，古時叫做［蜀身毒道］，又叫［交廣印度兩道］，係一條經交州、廣州，通去西域、印度，再遠至巴格達嘅中外絲綢貿易孔道。係中國最古老嘅國際通道之一，包括陸同海路，主要出口商品係［絲綢］。

＊＊

。海上絲綢之路：主要係東南部沿海嘅路線至到歐洲。



海上絲路，唔單只係運輸絲綢，而且又運輸瓷器、糖、五金等出口貨物；重有香料、藥材、寶石等進口貨物。

＊＊

霸王別姬［當愛已成往事］Farewell My Concubine

當愛已成往事 Farewell My Concubine 

往事不要再提　人生已多風雨　縱然記憶抹不去　愛與恨都還在心裡

真的要斷了過去　讓明天好好繼續　你就不要再苦苦追問我的消息　

愛情它是個難題　讓人目眩神迷　忘了痛或許可以　忘了你卻太不容易

你不曾真的離去　你始終在我心裡　我對你仍有愛意　我對自己無能為力

因為我仍有夢　依然將你放在我心中　總是容易被往事打動　總是為了你心痛

別流連歲月中　我無意的柔情萬種　不要問我是否再相逢　不要管我是否言不由衷

為何你不懂　只要有愛就有痛　有一天你會知道　人生沒有我並不會不同

人生已經太匆匆　我好害怕總是淚眼朦朧　忘了我就沒有痛　將往事留在風中

~間奏~

因為我仍有夢　依然將你放在我心中　總是容易被往事打動　總是為了你心痛

別流連歲月中　我無意的柔情萬種　不要問我是否再相逢　不要管我是否言不由衷

為何你不懂　只要有愛就有痛　有一天你會知道　人生沒有我並不會不同

人生已經太匆匆　我好害怕總是淚眼朦朧　忘了我就沒有痛　將往事留在風中

為何你不懂　只要有愛就有痛　有一天你會知道　人生沒有我並不會不同

人生已經太匆匆　我好害怕總是淚眼朦朧　忘了我就沒有痛　將往事留在風中

懷念：張國榮

＊＊

無聊通識科。廣東話資料館

嶺南［五府］節度使

節度使，係古代嘅軍事將領職銜，後來成為咗地方官，簡稱〔節度〕、〔節使〕、〔節帥〕。唐代駐守喺各道嘅武將叫做〔都督〕，都督帶使持節嘅就叫做〔節度使〕。一般情況下又通常叫持節嘅各鎮守軍官，例如〔觀察使〕、〔招討使〕同〔安撫使〕等為節度使。

喺唐朝開元年時期，唐玄宗設立咗十個節度使。

。安西四鎮節度使［龜茲］七一〇年
　兵力：兩萬四千　
　目的：鎮守安西四鎮，防禦天山南部　　
　任職：夫蒙靈曜、高仙芝、王正見、封常清

。北庭節度使［庭州］七一二年
　兵力：兩萬　　　　
　目的：防禦天山北路部　　　　　　　　
　任職：來曜、王安見、程千里、封常清

。河西節度使［涼州］七一〇年
　兵力：七萬三千　
　目的：斷隔吐蕃、突厥聯絡　　　　　
　任職：王倕、皇甫惟明、王忠嗣、安思順、哥舒翰

。朔方（靈武）節度使［靈州］七二一年
　兵力：六萬四千
　目的：防範突厥
　任職：王忠嗣、張齊丘、安思順

。河東節度使［太原］七一一年
　兵力：五萬五千
　目的：防範突厥、遏制四夷
　任職：田仁琬、王忠嗣、韓休琳、安祿山

。范陽（燕薊）節度使［幽州］七一三年
　兵力：九萬一千　
　目的：防禦奚族、契丹
　任職：裴寬、安祿山

。平盧節度使［營州］七一九年
　兵力：三萬七千
　目的：防禦室韋與靺鞨
　任職：安祿山

。隴右節度使［鄯州］七一三年
　兵力：七萬五千
　目的：防禦吐蕃　
　任職：皇甫惟明、王忠嗣、哥舒翰

。劍南節度使［益州］七一四年
　兵力：三萬九百
　目的：防禦吐蕃與吐谷渾
　任職：章仇兼瓊、郭虛己、鮮于仲通、楊國忠

。嶺南五府經略使［廣州］七一一年
　兵力：一萬五千　
　目的：治夷
　任職：裴敦

＊＊

嶺南節度使：



733年，開元二十一年就設置咗〔嶺南五府經略討擊使〕。之後為〔天寶十節度〕之一。

757年，至德二載為［嶺南節度使］。
設治所喺廣州，直轄廣管各地州府，即係依家嘅欽山港東面，除咗連州市、連山、連南之外嘅廣東省。兼領管埋〔桂州、邕州、容州、交州〕四個領地，所以叫做五府（都督府）。

862年，咸通三年又分成東西兩道節度使。
廣管係〔嶺南東道節度使〕，邕管兼領〔桂、容、交〕就係〔嶺南西道節度使〕。

895年，又改為〔清海軍節度使〕。

917年，清海軍節度使劉龑建立〔南漢〕。
劉龑喺番禺［廣州，興王府］稱帝，國號「大越」。第二年劉龑以佢係漢朝劉氏後裔嘅身份改國號做［漢］，史稱［南漢］，以別於［北漢］。



937年，南漢［交州］發生兵變。
屬將矯公羨殺死主管官員割據一方，另一屬將吳權領兵攻打矯公羨，矯公羨向劉龑求救，劉龑就封劉弘操做交王，然後領兵進攻吳權，結果劉弘操畀吳權打敗陣亡。吳權從此佔據咗交州，而吳權重喺939年建立咗自己嘅王朝［越南吳朝］。

＊＊

嶺南節度使管轄地：

廣管22州
廣　州　（廣東廣州市）
韶　州　（廣東韶關市）
循　州　（廣東惠州市）
潮　州　（廣東潮州市）
康　州　（廣東德慶縣）
瀧　州　（廣東羅定市）
端　州　（廣東肇慶市）
新　州　（廣東新會縣）
封　州　（廣東封開縣）
春　州　（廣東陽春市）
勤　州　（廣東雲浮市）
羅　州　（廣東廉江市）
潘　州　（廣東高州市）
高　州　（廣東陽江市）
恩　州　（廣東恩平市）
辯　州　（廣東化州市）
雷　州　（廣東雷州市）
崖　州　（海南海口市）
儋　州　（海南儋州市）
瓊　州　（海南海口市瓊山區）
振　州　（海南三亞市西崖城）
萬安州　（海南萬寧市）

容管15州
容　州　（廣西北流市）
白　州　（廣西博白縣）
禺　州　（廣西北流市東南）
牢　州　（廣西玉林市）
繡　州　（廣西桂平市南）
黨　州　（廣西玉林市西北黨州）
竇　州　（廣西信宜市西南）
廉　州　（廣西合浦縣）
義　州　（廣西岑溪縣）
岩　州　（廣西廣州市）
藤　州　（廣西藤縣）
順　州　（廣西陸川縣）
鬱林州　（廣西興業縣）
平琴州　（廣西玉林市）
湯　州　（越南諒山省）

邕管13州
邕　州　（廣西南寧市）
貴　州　（廣西貴港市）
橫　州　（廣西橫縣）
欽　州　（廣西欽州市）
澄　州　（廣西上林縣）
賓　州　（廣西賓陽縣）
嚴　州　（廣西來賓市）
羅　州　（廣西廉江市）
淳　州　（廣西橫縣西北巒城鎮北）
瀼　州　（廣西上思縣西南）
山　州　（廣西北海市東）
田　州　（廣西田陽縣東南）
籠　州　（廣西扶綏縣）

桂管14州
桂　州　（廣西桂林市）
梧　州　（廣西梧州市）
賀　州　（廣西賀州市）
連　州　（廣東連州市）
柳　州　（廣西柳州市）
富　州　（廣西昭平縣）
昭　州　（廣西平樂縣）
蒙　州　（廣西蒙山縣）
環　州　（廣西廣州市）
融　州　（廣西融水苗族自治縣）
思唐州　（廣西象州縣東）
龔　州　（廣西平南縣）
思誠州　（廣西大新縣）
古　州　（貴州黎平縣）

交管11州
交　州　（越南河內市）
峰　州　（越南富壽省越池東南）
愛　州　（越南清化省清化市）
驩　州　（越南義安省榮市）
長　州　（越南太平省）
演　州　（越南義安省演州縣）
武峨州　（越南太原省）
武安州　（越南海防市）
福祿州　（越南富壽省）
陸　州　（廣西欽州烏雷山）
芝　州　（廣西忻城縣）

＊＊

歷代嶺南節度使：

宋　璟　（716年）
甄　亶　（717年）
裴伷先　（719年—722年）
李　琚　（727年—735年）
李尚隱　（727年）
李朝隱　（733年—735年）
宋　鼎　（739年）
裴敦復　（745年—未赴任）
彭　果　（745年—747年）
盧　奐　（749年—751年）
張九皋　（751年—753年）
何履光　（754年—756年）
賀蘭進明（756年—未赴任）
韋利見　（757年—758年）
張萬頃　（758年—760年）
趙良弼　（760年—761年）
韋利見　（761年）
張　休　（763年）
楊慎微　（764年—767年）
徐　浩　（767年—768年）
李　勉　（768年—772年）
呂崇賁　（772年—773年）
路嗣恭　（773年）
李　述　（775年—遙　領）
高　暈　（776年—777年）
張伯儀　（777年—782年）
元　琇　（782年—784年）
杜　佑　（784年—787年）
李　復　（787年—792年）
薛　珏　（792年—795年）
王　鍔　（795年—801年）
趙　植　（801年—802年）
徐　申　（802年—806年）
趙　昌　（806年—808年）
楊於陵　（808年—810年）
鄭　絪　（810年—813年）
馬　總　（813年—816年）
崔　詠　（817年）
孔　戣　（817年—820年）
崔　能　（820年—823年）
鄭　權　（823年—824年）
崔　植　（824年—826年）
胡　證　（826年—828年）
李　憲　（828年—829年）
崔　護　（829年—830年）
李　諒　（831年—833年）
崔　珙　（833年—未就任）
王茂元　（833年—835年）
李從易　（835年—836年）
盧　鈞　（836年—840年）
崔龜從　（844年—845年）
盧　貞　（845年—846年）
李　玭　（847年—848年）
李行修　（848年—849年）
韋正貫　（849年—851年）
紇干眾　（851年—854年）
韋　曙　（855年—858年）
楊　發　（858年）
李　燧　（858年—收回任命—未到任）
李承勛　（858年—859年）
蕭　倣　（859年—860年）
韋　宙　（861年—868年）
鄭　愚　（868年—871年）
鄭從讜　（871年—874年）
韋　荷　（874年—876年）
李　迢　（877年—879年）
鄭　續　（879年—886年）
呂用之　（886年—未到任）
裴　璩　（887年—889年）
劉崇龜　（890年—895年）
陳　珮　（893年—未到任）
崔　胤　（896年—未到任）
李知柔　（896年—900年）
崔　胤　（900年—未到任）
徐彥若　（900年—901年）
劉　隱　（901年—911年）
裴　樞　（903年—未到任）
崔　遠　（904年—未到任）
劉　岩　（911年—917年）

＊＊

節度使，係大唐創立嘅地方軍官職銜，有好大權架［而當時期嘅大唐官話，就喺之後演變成我哋依家講嘅（粵語）嘞］。到咗安史之亂嗰陣，就更加變成擁兵自立，將官銜世襲化，至到五代十國之後，大宋太祖趙匡胤［杯酒釋兵權］，先至令節度使呢個官銜再無實權力，去到元朝重冇埋呢個職銜添.........

無聊通識科．廣東話資料館

＊＊

香港記憶［清潔海灘1989］廣告



＊＊

廣東話生活雜記

茶樓齊共上！

茶樓 caa4 lau4，係以前飲茶食點心嘅地方。細緻啲分就有［茶居］同［茶樓］，茶居通常得一層，而茶樓就有樓梯嘅幾層高嘅，例如嘅上環高陞茶樓。不過，係咪茶樓都係任人叫嘅啫，唔使太過執著嘅。



舊時茶樓嘅就樓底比較高，天花頂吊住把大風扇，圓檯圓凳兼夾無挨凭。有啲茶樓就或者會有設啲卡位嘅，喺檯底重放咗個痰罐，畀啲阿伯痰上頸不時之需。而茶盅同水煲之類嘅嘢到家下就唔多見嘞。伙記［伙計］九成都係老友記［長者］，重好興將塊白毛巾搭喺膊頭度周圍行。舊式嘅茶樓主要係做熟客仔生意，唔多有女士來幫襯，細路仔［小童］免茶芥喺當其時已經係成例。茶樓嘅墻上高有勾，係畀啲人客掛雀籠嘅，事關舊時有好多阿伯鍾意撚雀過下世藝嘅。

而家嘅茶樓差唔多變曬做［酒樓］，裝修得好靚同埋有貴到飛起嘅點心。有啲連推車仔點心都唔用，改用寫紙仔。部長又西裝骨骨，有啲重戴曬耳機，成個Ｇ４咁款。

＊＊

廣東茶館詩對



廣東人嘅〔三茶兩飯〕係非常著名而普遍嘅，所謂〔三茶〕係早茶、午茶、晚茶，飲茶為名，食茶點為實。因為飲茶嘅人好多，茶館有時都會遇到啲霸王〔白食〕客。講起白食茶客，原來以前嚟白食嘅霸王都係好有才華架，而已重有一段古仔添：

話說有日，廣州一間茶館嚟咗三個霸王客，分別係個風水佬、執藥佬同埋一個乞兒，佢哋食完嘢就諗住靜靜雞鬆人，點知畀茶館老闆當場捉住，個茶館老闆都唔難為佢哋，只係要佢哋照住自己嘅身分作翻一首詩，而詩句入面必須包括上下、前後、左右同埋三五兩個字，咁樣就可以唔使畀茶錢嘞，如做邊個作唔出嚟，就要乖乖送官法辦。

風水佬，見慣場面，經常同人吹水拋書包，呢啲嘢難唔到佢：
「上天文，下地理，前朱雀，後玄武，左青龍，右白虎，入地三尺埋葬，五子登科。」

執藥佬，亦有啲墨水，就算好似執藥念口黃咁都搞掂：
「上天冬，下地榆，前前胡，後厚朴，左羚羊，右犀角，用水三碗煎服，病減五分。」

個乞兒，真係無家無產，身無分文，實在冇乜好講，但係唔講又過唔到關！只好講：
「上無片瓦，下無立錐，前無去路，後有追兵，左難走，右難行，欠三分茶銀，五內難安。」

三個白食才子講密，茶館成班睇熱鬧嘅塘邊鶴就齊齊望住老闆，茶館老闆聽咗之後就拍掌揮手，就話通通過關。因為佢哋所講嘅都恰如其分，睇嚟茶中無俗人，又真係幾堅喎。

＊＊

粵式飲茶



廣東人飲茶，又叫做〔品茗〕，係一種源自廣州嘅粵式飲食文化，而後來廣東人直接到世界各地傳播，成為廣東文化嘅一大特色。喺香港，飲茶一開始係叫做〔上茶樓〕或者〔上酒樓〕，後來就叫咗〔去飲茶〕，慢慢〔飲茶〕就變成咗上茶樓飲茶食點心嘅代名詞。

飲茶主要包括咗飲茶同食點心，而點心之中嘅蝦餃同叉燒包喺早期較為受歡迎嘅，所以粵語有句話形容飲茶為〔一盅兩件〕，即係〔一盅茶＋兩件點心〕，而且喺某啲語境之下佢重表示咗〔最低消費〕嘅意思。

飲茶喺早期嘅香港同廣東一帶非常流行，依家已經流傳到大陸其他省份同世界各地，成為最具代表性嘅粵菜之一。喺外國，飲茶差唔多係點心嘅同義詞。飲茶嘅茶樓喺歐美畀人叫做〔Dim Sum House〕點心屋。澳洲同紐西蘭重索性將飲茶嘅地方同樣稱呼做〔飲茶〕，而平日傾計亦會講（Let's go to Yum Cha）我哋去飲茶囉。

茶館係由某啲做得出色嘅〔一厘館〕升級而來，呢個係廣州最初嘅帶有專業性質嘅茶館。呢啲茶館通常開喺碼頭、魚欄、果欄、肉檔等勞苦大眾集中嘅地方附近，專門係對啲勞苦大眾嚟做快餐飲食同埋畀佢哋有個同行家溝通嘅地方。因為去茶館飲茶嘅人，只係要花二厘錢，就有一盅劣茶，兩件粗製點心，叫做〔一盅兩件〕，基本上就可以填飽個肚，所以呢類廣式茶館又叫做〔二厘館〕。

＊＊

飲茶嘅過程



茶樓喺傳統上係即場搵位，依家如果茶樓喺客滿嗰時，都會改為排隊等位，然後照住飲茶嘅人數安排適合嘅枱。喺香港大多數茶樓或者酒樓依家都改為先排隊攞飛然後跟住先後次序入去攞位，比起以前有系統好多。

如果嚟飲茶嘅人唔夠坐滿一張大枱，而要同其他唔識得嘅人坐埋同一張，就叫做〔搭枱〕。

開茶，又或者叫〔開位〕。飲茶嘅人喺搵到位之後，先揀一種或者幾種想飲嘅茶，例如：鐵觀音、普洱、香片、壽眉等，或者滾水，然後叫伙記〔沖茶〕。開茶嗰時伙記喺點心卡度寫上開位人數，叫做〔茶位〕，再幫客人沖半杯滾茶。茶客先會用呢半杯滾茶嚟洗碗筷，同埋幫茶杯去消毒。

喺咁多種茶之中，［普洱］係最常見嘅一種，因為可以消滯，幫助消化。其他嘅例如係香片、烏龍同綠茶都好普遍。喺一啲高級食府，鐵觀音、菊普都係好普通嘅嘢飲。

喺開茶之後，伙記會將一啲醬料（例如辣椒醬）或者小食（例如花生）畀客人，同埋茶一齊就叫做〔茶芥〕。

喺廣州，伙記會先放一包另外收錢嘅紙巾或者濕手巾，呢種硬性收費喺客人唔同意嗰時，一定要啲伙記拎走嚟減少無必要嘅收費。

習慣上，廣東人喺為自己倒茶之前會先幫其他人先斟，而當人哋幫自己斟茶之後，會將食指同中指屈曲同敲枱幾次嚟表示感謝。呢種姿態嘅起源有個講法係話，清朝乾隆同佢嘅侍從微服出巡時去飲茶，為免畀啲平民知道自己嘅身份，就為自己嘅隨從斟茶，嗰啲隨從為咗謝恩，以免受罰，於是就將手指屈曲嚟代表磕頭同謝禮。

一般廣東人去〔一盅兩件〕，都會等杯茶沖好之後，先至開始去叫點心食。

＊＊

飲茶揀嘢食嘅過程



以前〔茶樓〕嘅點心妹，喺心口度掛住一個大盤，將啲點心放喺盤上面。之後點心妹一邊喺茶樓四圍行，一邊大聲哎住啲點心名，等啲茶客嚟揀。後來逐漸用點心車又或者叫推車仔，代替點心妹心口掛嘅大盤，嗰啲點心妹之後又變成點心阿嬸。

點心車可以裝好多點心，有啲點心車通常會喺車前面放住張寫咗點心名嘅牌。茶客可以出去搵點心車，又或者等點心車過嚟。客人揀好點心之後，伙記就喺車度攞啲點心放落客人嘅盤度，然後喺客人嘅點心卡上面扱個印。有啲點心車入面重有加熱嘅設備，幫啲有蒸點嘅點心車入面嘅水加熱嚟保持食物溫度，或者為煎炸點心車即製點心。又有啲會喺大堂度整設個食物攤檔，茶客拎住張點心卡，走到檔頭前面，講明要嘅點心名，廚師就會喺你面前整。

一張典型嘅點心卡通常分〔小點〕、〔中點〕、〔大點〕、〔特點〕、〔頂點〕同埋後來增加嘅〔超點〕用嚟區分點心嘅價錢，如果有特製嘅點心要加收或者係超值點心嘅話，就喺下面或者後面備註度寫明。

因為用點心車好容易撞到或者淥親啲客，車入面嘅石油氣又可能容易爆炸，同埋好難計點心嘅出貨量等嘅原因，所以依家廣州同香港陸續有茶樓取消點心車而改咗用即叫即整嘅方式，就係等啲客人先揀好想食嘅嘢，交畀伙記到廚房落單。

＊＊

老牌茶樓



省城〔蓮香樓 〕　　　　香港〔蓮香樓〕

省城〔蓮香樓〕係一家老牌茶樓，喺光緒時期始業喺省城西關第十甫，之後又喺香港中環度開設分號。廣州〔蓮香樓〕前身係西關嘅嫁女同過大禮用嘅餅店糕酥館。喺清朝光緒十五年（1889年）改名叫〔連香樓〕，到1910年〔宣統二年〕廣州蓮香糕酥館正式改名為〔蓮香樓〕。

香港〔蓮香樓〕分號，係喺中環威靈頓街同鴨巴甸街交界。由開張到依家，一路都係由顏世滔家族打色。雖然話舊式茶樓日漸式微，唯獨〔蓮香樓〕依然享負盛名，皆因佢哋秉承舊日開舖嘅宗旨。「舖面賣各式唐餅、樓上設茶居雅座」跟足舊時舖頭格局。開茶嘅時候，事必奉上一隻膠兜過茶客洗杯。重有用焗盅飲茶之類嘅老餅習俗，真係三日三夜都講唔曬。之不過，以前餐檯下底個痰罐認真係污糟邋遢，唔乾淨而有客詐型，孻尾冚嘭唥扐扯曬。

〔蓮香樓〕雖則話係茶樓，喺舖入面並奛任何貴格茶葉，若果閣下想飲雨前龍井又或者想要馬騮搣嘅話，伙記〔權叔〕實行麗你一眼然之後話〔我哋淨係有烏龍、普洱、香片、水仙、壽眉，唔飲請過主〕。計正飲茶傳統，茶葉要用個〔鐵嘜〕秤過之後至擺落茶壼，咁樣沖出嚟嘅茶至唔濃又唔淡。唔同家陣啲侍應話之你死，就咁成拃茶葉隊落個茶壼度。

〔蓮香樓〕至出名嘅係做〔月餅〕。舊陣時唔似得家陣咁，餅家多過米舖個喎，月餅淨得茶樓有得賣，所以每年逢八月十五舖面梗係墟撼到不得了。而〔蓮香樓〕出品嘅禮餅亦係有口皆碑，當其時有錢人家一度豪擲千金咁訂翻一百幾十擔嫁女餅，認真係架世堂。

開初〔蓮香樓〕有四層樓，層層價錢都唔同，而實情係佢哋嘅點心茶銘一式一樣。至貴係二樓，其次係三樓，再其次係四樓，點解咁奇？事關當其時未曾有〔車立〕，幾十歲人同你撐樓梯梗係索晒氣喇，多數啲老餅〔長者〕情願畀多幾個仙坐二樓，所以之後就有〔兩仙廳〕，〔三仙廳〕，〔四仙廳〕同埋〔五仙廳〕。幾仙廳個幾仙係講緊一盅茶嘅銀碼（舊底茶金係斷一盅盅咁計）。

舊陣時嗰啲二世祖好興托住個雀籠去飲早茶，四樓就日日都有人打雀，真係旺過旺角。打雀個陣，兩家〔目及〕到個雀籠實一實，雙眼直情曉發光咁，所以廣東話有句〔打雀噉眼〕就係咁嚟。茶居世藝除打雀之外，聽歌仔亦都相當之得人歡喜。〔蓮香樓〕老世曾經禮聘名伶徐柳仙喺樓面唱粵曲。當其時未曾有大聲公喇叭，挐大喉龍唱，山頂嘅朋友聽到一舊雲。有見及此，喺演唱之時會免費派發歌紙，茶客一路睇一路聽一路食，個情形認真頂癮。

〔蓮香樓〕菜式

【茶市】　雞球大飽　　蓮蓉飽　　　蠔油鴛鴦扎　豬肚燒賣　
　　　　　豬膶燒賣　　鵪鶉蛋燒賣　千層糕　　　馬拉糕　　燒腩卷　　

【飯市】　家鄉釀鯪魚　八寶鴨　　　霸王鴨　　　冬瓜盅　　焗魚腸　　
　　　　　
＊＊

我要〔滇普洱〕



普洱茶，係用雲南區入面嘅一種大葉種曬青毛茶做原料，經過發酵加工成嘅散茶同壓茶。佢嘅外形色澤褐紅；內質湯色紅濃明亮，香氣獨特沉香，滋味醇厚回甘，葉底褐紅。

普洱茶嘅產地因為喺清朝時係屬雲南嘅普洱府，所以就用呢個名嚟做統稱。實際上，依家畀人叫做滇普洱茶通常係指雲南地區生產嘅一種茶葉。

喺明朝嗰時，普洱茶係叫〔普茶〕，明成祖朱棣曾經下令要取消天下龍團同鳳團等嘅緊壓茶，但唔係黑茶係綠茶；喺邊境嘅雲南，呢種古稱〔團茶〕嘅緊壓茶製做工藝就保存落來。

普洱茶自古以來都畀人認為有治理腸胃、解油膩嘅功能。主食係牛羊肉同澱粉（青稞）嘅西藏人，據講只要無飲茶，就會有病。現代嘅中國、日本同法國嘅臨床實驗都顯示普洱茶有降低膽固醇同血脂嘅功效，對心血管疾病保健好有幫助。

由於普洱茶〔渥堆〕工藝一向畀人視為唔傳嘅秘密，所以造成〔黑洞〕，令到初次接觸嘅人容易買到唔合格嘅普洱茶；所以想買普洱茶就必須要搵信得過嘅商家，或者特別要注意熟茶有無異味。

＊＊

廣州［大同酒家］門前對聯



以前喺廣州嘅［大同酒家］門前，貼咗一副「嵌名」對聯：

「大包易賣　大錢難賺　針鼻削鐵　祗係微中取利」
「同父來少　同子來多　檐前滴水　何曾見有倒流」

上聯講嘅氮酒家自己製作嘅大包，甫一出籠，就畀啲茶客搶晒，大包係好容易賣出，不過就只能夠係微中取利，所有依家喺某啲唔計成本傾銷嘅活動，就叫做「賣大包」嘞。

下聯講嘅係實況，細路仔年紀細時，多數由父母拖住手上茶樓品茗食點心，但係雙親年老之後，做仔嘅亦成家立室，又有咗自己嘅仔女，於是就有「同子來多，同父來少」嘅情況。

廣州［大同酒家］，原名［廣州園酒家］，喺1938年開業。到1942年因為酒家虧損易主而改名做［大同酒家］。2016年12月1號，酒樓話因為資金問題，宣布遣散員工暫停經營。

香港［大同酒家］，喺1925年開業，喺上環德輔道中同文華里交界，即永安中心對面，酒家已經結業 。大同酒家曾經喺1959年同1970年辦過兩次［滿漢全席］。

＊＊

香港記憶［清潔海灘1970s］廣告



七十年代香港記憶 之 清潔海灘廣告。

＊＊

廣東話資料館

文學放得開［粵難愈愛］2018（補充資料）

廣東話究竟係唔係香港人嘅母語？有人會迴避唔答呢個問題，有人就會企出嚟，認真討論我哋最熟悉嘅廣東話。今集《文學放得開》有主持鄧小樺、查映嵐，嘉賓歐陽偉豪 Ben Sir 、陳鴻輝（廣東話資料館專頁管理員），一齊嚟講講廣東話嘅歷史同現狀。從粵謳到粵語詩，從廣東話聖經到俗語、俚語，體驗粵語嘅獨特之處。朋友亦可以小測下自己嘅廣東話知識，等我哋愈係喺粵語艱難嘅時期，就愈堅定地去愛佢。

主持：鄧小樺［香港文學館總策展人／作家］
　　　查映嵐［評論人］

嘉賓：歐陽偉豪［前大學講師］
　　　陳鴻輝［廣東話面書專頁管理員］



＊＊

補充資料：

學母語係先天，外語係後天，對比其他技能就好似［飲奶］vs［刷牙］。

母語，或第一語言，係一個人出生以後，最早接觸、學習、同掌握嘅一種或幾種語言。母語通常係自幼即開始接觸、又持續運用到青少年或之後；而且喺一個人所受嘅家庭或正式教育之中，尤其係早期，有相當部分係通過母語傳授嘅。一個人同時可以擁有幾種母語，而且可以使用雙語或多種語言。相較之下，第二語言係任何一種語言，唔係一個人嘅第一語言。

＊＊

慣用語言

2016年全港5歲及以上嘅人口有705萬人，當中626萬人（89%）用廣東話為慣用語言，其次係英語（30萬人）。另有22萬人慣用客家話、潮州話、福建話同上海話等中國方言，較06年下跌23.5%。至於普通話係香港人慣用語排第四，但係人數比喺過去十年倍增，由2006年嘅6萬人大升1.16倍至2016年嘅13萬人。

＊＊

母語教學



1951年聯合國教科文組織：
［母語係指一個人自幼習得嘅語言，通常係佢思維同交流嘅自然工具。］

2003年，聯合國教科文組織頒佈《多語世界中的教育》Education in a Multilingual World 文件，呢份立場文件涉及語言同教育嘅關鍵問題，提供咗指導綱要同原則，試圖釐清語言同教育有關嘅政策。文件入面提及：［聯合國教科文組織支持以母語作為教學語言係因為可從老師同學習者熟悉嘅知識同經驗上提高教學嘅效率］。

聯合國教科文組織支持母語教學。母語教學係初等教育以及提升讀寫能力最唔不或缺嘅部分，應該盡可能咁擴充母語教學嘅階段。作為日常生活用語，母語應該優先於官方語言（在官方語言非使用者的母語的前提下）同其他外來語言。

＊＊

普教中

用普通話教授中文科，簡稱［普教中］，係香港政府同語文教育及研究常務委員會（語常會）嘅推廣普通話政策，將普通話取代廣東話作為中國語文科嘅主要教學語言，取代用廣東話為主嘅母語教學。語常會喺2008年起推出《協助香港中、小學推行「以普通話教授中國語文科」計劃》，撥款資助學校推行普教中。

由於教學成效存疑，教育局網頁亦曾承認：「目前仍未有確實證據，證明以普通話學習中國語文的學生的一般中文能力會有所改善。其中兩項研究發現，以普通話學習的學生的中文能力，與以廣東話學習的學生並無分別，甚或表現更差。」

＊＊

粵語易致鼻咽癌！



曾經喺2014年，內地嘅傳媒引咗用一份喺十年前嘅雜誌刊文，話粵語嘅鼻音韻母刺激鼻咽頂黏膜致癌！

《海南醫學》雜誌喺2004年刊登嘅《鼻咽癌語音易患因素與難患因素分析》一文中，作者話：［粵語中有其獨特的鼻音韻母，發音時普遍應用鼻咽及鼻竇的共振，使鼻咽特別是鼻咽頂黏膜反復受振動波的刺激，長期振動會引起黏膜肥厚、增生，並以基因的形式向下遺傳，不斷的增生引起非典型增生，繼而形成上皮性腫瘤。］

呢個作者重話：［結合咗廣東地區鼻咽癌高發嘅情況，推斷講粵語可能係廣東人易患鼻咽癌嘅原因之一。］

評語：［發神經！］

＊＊

講粵語扣［道德操行分］

由1990年代尾開始，廣州部分中小學校禁止學生喺學校期間使用粵語，違例者可以畀學校扣減［道德操行分］，有人稱之為［說二十句粵語，三好學生無緣］。同時間亦有部分家長發現佢哋嘅仔女喺屋企裡頭唔講廣州話，甚至乎連睇粵語配音動卡通片嘅興趣都冇埋。

順帶一提，聽講話由1990年代中以來，廣東附近嘅廣西壯族自治區，尤其係首府南寧，喺20世紀仍然係粵語活躍地區之一，喺市政府推行普通話政策咁多年之後做嘅非正式統計顯示，粵語人口嘅比例已跌至唔夠三成，而呢三成入面大多數係長者。

＊＊

2010年廣州撐粵語行動



廣州撐粵語行動係廣東省廣州市嘅市民發起嘅一系列捍衛粵語的行動。事件引起粵港澳三地網民討論同當地媒體嘅報導。

事件起因

2010年6月廣州市政協舉行咗一個網上問卷調查，建議增加廣州市營電視頻道嘅普通話節目，其問卷內容一面倒類似［軟強迫］而惹人質疑，調查結果顯示有超過八成人反對提議。

2010年7月廣州市政協提案委副主任向廣州市人民政府提交《關於進一步加強亞運會軟環境建設的建議》，當中包括將主要使用粵語嘅［廣州電視台］綜合頻道或新聞頻道改為主要使用普通話廣播，或者喺兩個嘅主時段使用普通話廣播。即時引起廣州市各界嘅強烈反對同批評。

雖然市政協承認之前嘅網上問卷調查結果［符合廣州當前嘅實際情況］，不過佢哋仍表示有需要通過宣傳教育，引導廣州市廣大電視觀眾［正確認識國家中心城市嘅地位，同廣州電視台用普通話為基本播音用語嘅關係」。

喺之後嘅7月25日同8月1日廣州市面都有［撐粵語］嘅遊行。

＊＊

台灣作家林蔚昀：［外省人，重新學習母語，重新選擇自己的家鄉。］

林蔚昀，文學創作同翻譯作者，曾經喺英國求學，後來因為一張波蘭海報走到波蘭，喺波蘭結婚生子。佢透過翻譯喺華語界推廣波蘭文學，喺2013年獲得波蘭文化部頒發波蘭文化功勳獎章。喜歡體驗多元文化生活，而且將生活中嘅各種稜角同喜怒哀樂化為文字。佢依家返到台灣住，以一個易鄉人嘅身分重新體驗故鄉。

林蔚昀返到台灣之後，佢遇上咗一個又新又怪嘅問題。因為住喺台灣人使用嘅語言除咗國語，重有台語［閩南話］、客家話、原住民語、東南亞語……台灣人嘅定義於是就唔再僅止於［會說媽媽的話的人］。

＊＊

［口語］與［書面語］嘅分別



每個語言都有口語同書面語，粵語都係。

。口　語：係人進行交際所使用嘅語言，基本上係用講話嘅風格所表現出來嘅話。
。書面語：係書面交際所使用文字寫出嚟嘅語言。可以用粵語同官話［普通話］。

古代嘅書面語，稱為［文言文］；現代嘅書面語，叫做［現代標準漢語語法］，又稱［白話文］。依家我哋用緊嘅書面語，其實係政權嘅因素之下，畀官方將漢語當中嘅官話 Mandarin［普通話 Putonghua］定為書面用嘅［標準漢語］。

＊＊

啲、Ｄ、尐、［di1］

［啲］，意思係［一點／一些］，流行喺粵語、客家話裡面。例如快啲、少啲、呢啲等等。

［Ｄ］，係英文字母，好多人都用呢個「D」字來代替原來嘅［啲］，例如將［快啲］寫成［快D］。香港人習慣中英夾雜寫文，比較少人學寫粵語字，亦有人貪方便唔使寫咁多筆劃，所以就借用英文近音字母「D」。

［尐］，有啲人認爲［啲］係香港人自創嘅新字，認爲係錯字，正字或本字應該係［尐］。不過，呢個講法唔正確，首先「啲」字，早喺明末清初已經有出現。

＊＊

《華英通語》

Chinese and English Phrase Book，A Roman & Company 1867.



華語，以前係指〔粵語〕，呢本書喺1867年美國紐約出版嘅，佢重有其他年份版本。書入面嘅內容係以日用應酬嘅事項分門別類，羅列常用嘅英文用辭，喺旁邊註有中文字標音，方便嗰陣時唔識英文嘅華人學習嘅。有人覺得書入面啲句子 ，好似系四邑地區嘅口音。

＊＊

《英語指南》
English and Chinese Dialogues



呢本書係黄履卿喺1929年〔民國十八年〕出版，同之前嘅《英語須知》一樣係用中文標音嘅方法來教人學英文嘅讀音，同加上廣東話口語註釋。不過，呢個版本嘅分類就比之前嘅好啲。

＊＊

口語文學［粵謳］

嘉慶道光年間開始興起，喺珠江花艇上，歌姬用粵語創製嘅一種曲調，內容多為男女之情。而呢啲歌曲嘅情韻，多數都係以嗰啲歌姬做主導唱出嘅。粵謳喺廣府一帶係特別流行，而當地重有人話「唔識唱粵謳唔係正宗廣州人」嘅講法。

清。招子庸［粵謳］

招子庸， 廣州南海橫沙鄉人，清代文學家，舉人。佢喺道光元年［1821年）集合、修飾粵謳之後修編成《粵謳》一書，於是粵謳就有咗文字版本流傳。

《心心點忿》
心心點忿，拆散絲蘿。
怨一句紅顏，怨一句我哥。
世界做得咁情長，做乜偏偏又無結果？
就把舊時個種恩愛，付落江河。
共你相好到入心，唉！又被朋友嫁禍。
因愛成仇，你妹見盡許多。
試睇人地點樣子待君，君呀，亦你要回想下我。
從頭想過，正好共我丟疏。
天呀，保佑邊一個薄情，就保邊一個折墮。
唉，真正無錯，免使我枉死含冠，受此折磨。

＊＊

廖鳳舒［粵語詩］

廖鳳舒，廣東惠陽人，佢喺日本東京帝國大學政治系畢業。1908年任清政府外交官，曾代表袁世凱出席南北議同會議，佢包弟廖仲愷係南方政府代表。廖鳳舒喺1924年著《新粵謳解心》；亦寫有一啲［粵謳體］嘅詩，例如〈唔好守舊〉《嬉笑集》。

《秦始皇》
荊軻嚇失佢三魂，好在良官冇扑親。
野仔執番條爛命，龜公害盡幾多人。
監生點解嚟陪葬，臨死唔知重拜神。
萬里咁長城一座，後來番鬼當新聞。

＊＊

《　》［邊箇知？］
情唔好亂用，用錯就幾咁擔心。
人客總有箇多情，勸妹你慢慢嚟尋。
若然係亂咁鍾情，人哋就會拖妹你落氹。
條魚上釣，都因為猴擒。
大抵十箇男人，著九箇會噤。
摸佢箇心唔著，重慘過大海撈針。

＊＊

粵語九聲



粵語聲調有〔九聲六調〕，即係有九個聲調。

分別係：［陰平］、［陰上］、［陰去］

　　　　［陽平］、［陽上］、［陽去］

　　　　［陰入］、［中入］、［陽入］

陰平同陽平係〔平聲〕，其他聲調為〔仄聲〕。

雖然話粵語係有九聲，但唔係每一個字音都可以調出九個聲調。

基本上，用〔-p〕、〔-k〕、〔-t〕收音嘅字係入聲，有三個聲調。

分別係：〔陰入〕、〔中入〕、〔陽入〕

而以〔-p〕、〔-k〕、〔-t〕以外收音嘅字，就可以調出六個聲調。

分別係：［陰平］、［陰上］、［陰去］

　　　　［陽平］、［陽上］、［陽去］

下面有幾個字音為例，調出粵語九聲。

九聲六調，九個聲調嘅字：

(１) 　(２)　 (３) 　 (４)　 (５)　 (６) 　 (７)　 (８)　 (９)

陰平　陰上　陰去　陽平　陽上　陽去　陰入　中入　陽入

諸　　位　　聽　　完　　以　　後　　七　　八　　日

都　　睇　　怕　　憑　　語　　調　　識　　切　　入

翻　　炒　　過　　能　　領　　悟　　得　　確　　實

＊＊

廣東話常用語氣詞



語氣助詞喺粵語〔廣東話〕語句情貌嘅表達上，有非常重要同不可或缺嘅作用。粵語嘅語氣助詞非常之豐富，用法亦都幾複雜，有單式、二覆疊式、三覆疊式同埋多覆疊式等嘅形式。

單　式：吖、呀、啊、哎、噃、㗎、嘅、啩、吓、吔.........
二疊式：呀嘛、㗎喇、嘅喳、嘅啫、啦喂、嘞咩、囉噃.........
三疊式：㗎囉噃、㗎喇吓、㗎啦喎
多疊式：㗎啦吓嘩

＊＊

文學中的［粗口］



想像下，一部喺1997年左右寫嘅城市風物紀錄《V城夢華錄》，但已經散佚，一班人喺2046年試圖修復呢部著作。用書面語為主，但係僅存嘅《夢華錄》碎片就有一啲粵語嘅部份。

［仆街人］
指因腳軟、肌肉萎縮、耳水不平衡、頭暈、或行路唔帶眼而慣性於街上摔倒者，或指品德不良的該死之人。

［娼妓之城，阿叔調戲雛妓］
伙計在我身後嬉嚷道：『姐姐仔，幾時招待阿叔呀？』
女孩頭也不回，只回敬一句：『招你老母，慳啲啦你！』

＊＊

廣東話《聖經》

經文：廣東話 Vs 書面語

咪議論人，就唔畀人議論你。因為你咁樣議論人，就畀人咁樣議論你。你兄弟眼中條棘，你就睇見，你自己眼裡有條杉，你自己都唔見覺，為乜呢？

你們不要論斷人，免得你們被論斷。因為你們怎樣論斷人，也必怎樣被論斷； 為甚麼看見你弟兄眼中有刺，卻不想自己眼中有樑木呢。



早期為廣州、香港、澳門傳教而翻譯同印刷嘅聖經，都會用中文或英文標明著［廣東話 Cantonese］嘅版本。
。四福音：羊城土話（1882年，光緒八年）
。新約全書：廣東話（1906光，光緒三十二年）聖書公會
。新約全書：廣東土話羅馬字譯本（1906年，光緒三十二年）美國聖經公會
。舊新約全書：廣東話（1907年，光緒三十三年）聖書公會
。新約全書中西字：廣東話＋英語［1909年，宣統元年］美華聖經會
。約翰福音中西字：廣東話＋英語（1925年，民國14年）聖書公會
。新約全書：廣東話新譯本（1927年，民國16年）美華聖經會／聖書公會
。新約全書：廣東話新譯本與美國新譯英文（1931年，民國20年）美國聖經公會

美華聖經會［美華書館］
美華書館，初名［花華聖經書房］，係一個美國基督教新教團體美北長老會傳教機構，1844年美北長老會差會喺澳門設立嘅一個出版、印刷機構。美華書館嘅第一位負責人叫［谷立 Richard Cole］。書館有兩名印刷工人同一名排字工。1845年花華聖經書房搬咗去浙江寧波。

英國聖書公會［聖書公會］
馬禮遜牧師到中國嘅任務，係因為倫敦傳道會接受英國聖經公會嘅委託，主要係將聖經翻譯成為中文。所以馬禮遜喺1807年到廣州之後，就開始辛勤學習中國語文，1810年喺廣州出版《使徒行傳》；第二年出版《路加福音》，於是引起滿清官吏嘅注意，頒令禁止印刷基督教中文書籍。但係馬禮遜仍然祕密從事新約嘅翻譯，喺1813年出版《新約》。

＊＊

飲江《人皆有上帝》粵語詩

人皆有上帝 

翳我獨無 

上帝說 

係你自己攞嚟嘅 

人皆攞嚟嘅 

係有 

翳獨我攞嚟嘅 

係無 

這痛苦 

這痛苦 

沒有誰知道 

這痛苦 

nobody knows  

but 

耶穌 

耶穌說 

係你自己攞黎嘅 

連同唔係你自己攞黎嘅 

我都知道 

我都願意知道 

黑膠旋轉瑪麗安安德森唱 

nobody knows 

the trouble I see 

nobody knows 

my sorrow 

耶穌降臨 

對她如是說 

而我居然聽到 

Matthew說 

你又冇種棉花 

你又唔係黑奴 

其實  你聽不到 

子非魚我說我想說 

但我聽到  喂  魚說 

這未嘗不好 

聖安東尼對魚佈道 

人與魚與Matthew皆聽得到 

翳我獨聽不到 

這痛苦 

深潛海底 

躍出水面 

這痛苦 

沒有誰知道 

但  我聽到  喂 

魚說  這未嘗不好 

我聽到 

魚對魚說 

這人世 

有懲罰 

有眷顧 

有知道不知道 

甜蜜悲哀有奧秘 

有懊惱 

你聽 

子在川上曰 

我願意是魚 

我願意是魚呀 

如果  你是 

如果  

微小 

暗啞 

你是 

那個 

未嘗不好

飲江，原名劉以正，香港出生，七十年代開始新詩創作。曾經攞過［香港青年文學奬］、［工人文學奬］、［職青文學奬］同［香港中文文學奬］等詩歌創作奬項。1987年同朋友創辦《九分壹》詩刊，重參與早期嘅編輯工作。佢係幾屆［香港中文文學奬］詩歌奬評委；亦多次參與唔同嘅文學奬、詩奬、等嘅評審工作。佢嘅詩集《於是你沿街看節日的燈飾》喺1997年出版，重獲得［香港中文文學雙年奬］。2010年出版另一本詩集《於是搬石你沿街看節日的燈飾》。

＊＊

莫言［高密土語］



莫言，原名管謨業，係中國當代作家，山東高密縣出世。香港公開大學榮譽文學博士，青島科技大學客座教授。佢嘅小說《紅高粱家族》喺1987年畀導演張藝謀拍成電影《紅高粱》，喺2002年《師傅愈來愈幽默》又畀導演張藝謀拍成《幸福時光》。2011年莫言嘅長篇小說《蛙》獲得［第八屆茅盾文學獎］。2012年獲得［諾貝爾文學獎］。

莫言講過：［故鄉留畀我嘅印象，係我小說嘅魂魄。故鄉嘅土地與河流、莊稼與樹木、飛禽與走獸、神話與傳說、妖魔與鬼怪、恩人與仇人，都係我小說嘅內容。］

莫言嘅早期作品，都係佢嘅親身經歷，書入面嘅人物都係［我的大爺、大娘、大嬸子］，用嘅係高密東北鄉嘅方言。呢啲方言土語非常能夠表現當地鄉土生動活潑嘅情景，同用書面語去表達有好大嘅差別。

＊＊

將進酒［李白］

君不見黃河之水天上來，奔流到海不復回？
君不見高堂明鏡悲白髮，朝如青絲暮成雪？

人生得意須盡歡，莫使金樽空對月。
天生我材必有用，千金散盡還復來。
烹羊宰牛且為樂，會須一飲三百杯。

岑夫子，丹丘生，將進酒，杯莫停。
與君歌一曲，請君為我傾耳聽。
鐘鼓饌玉不足貴，但願長醉不復醒。

古來聖賢皆寂寞，唯有飲者留其名。
陳王昔時宴平樂，斗酒十千恣歡謔。

主人何為言少錢，徑須沽取對君酌。
五花馬，千金裘，
呼兒將出換美酒，與爾同銷萬古愁。

李白喺寫呢首詩嘅時候，正係佢仕途失意，懷才不遇，轉投酒樂，借詩意言志，佢話唔想做聖賢，只係想交朋結友，同佢哋一醉解千愁。

＊＊

神曲［但丁］



但丁喺三十幾歲嗰陣寫嘅一首詩歌，因為捲入黨派紛爭而畀人流放，神曲就係喺佢呢十幾年嘅失意時期誕生。神曲分成［地獄篇］、［淨界篇］同［天堂篇］三大部份，每篇都大概有三十三至三十四首詩，內容大致係描述但丁人生三十幾年，喺一個黑暗嘅森林入面蕩失路，好彩有靈魂帶領佢，開始遊歷煉獄。

地獄有九圈，就好似一個漏斗噉，越落就越窄。然後又去到淨界，淨界有七層。最後就到伊甸園，跟住又有機會去到天堂，天堂分［九重天］，最後幻想突然唔見咗。當中但丁遇到好多聖人同埋無數嘅奇遇，每事每物都有寫低，都有超強嘅時代宗教批判色彩，佢覺得政教應該分離，主張政權同教權平等嘅理念。

＊＊

［方言］相對［語言］

方言，係一個語言學術語，分兩種，一種叫［地域方言］，另一種叫［社會方言］。地域方言係語言嘅地域變體，多數嚟講地域方言係因為大規模移民之後，久而久之演變出嚟。而社會方言係語言嘅社會變體，同一種話因為唔同人嘅職業、階層、年紀、性別差異，而喺講嘢嘅口音、措辭、言談之間會有唔同，例如上流社會同低下層社會嘅人講嘢就有唔同。社會方言之下又有所謂個人方言，即係每個人講嘢自己嘅特點。通常任何有語言差異嘅社會，基本上每個人講嘢都係講方言。

相對於語言嚟講，語言屬於一個抽象觀念，因為實際上每個人講嘢都係講方言而唔係講語言。對於語言一個比較實在啲嘅理解，可以講成［民族共同語］或者［民族語言］，即係指一個民族講嘢嘅大圍基礎。例如中國嘅民族共同語係普通話，但實際上唔同地方嘅人講普通話都帶有方言嘅特性，就算係以標準普通話，即［北京官話］嚟計，佢本身亦係一種地域方言，所以民族共同語其實本身都係以某一種方言作為基礎，所以又有分非基礎方言同基礎方言，但兩種嘢之間都有好多相通。

呢個觀點，你又點睇？

＊＊

三及第文學［三蘇］

廣府文人有一種文體，稱為「三及第」，即係文言、白話、方言一齊用。有人以為呢種文體係創於香港，其實只止咁樣，喺四五十年代嘅廣州報紙，喺副刊即見呢種文體，尤其係好多都用喺小說。（上溯至明末木魚書，宋詞中亦有）

三蘇（高雄），《經紀拉與飛天南》（黃仲鳴研究）

我最怕老婆看大戲，尤怕看戲後講戲文，講伶工更難入耳。我乃中止其言曰：『我對大戲最冇癮。』老妻一聽又發火曰：『你當然冇癮，飲茶索女招待則有癮矣！』老妻發火，無可理喻，惟有蒙頭而睡。

「結果又到俱樂部，我想打舊章冇問題，現款雖不多，未必不夠也。不料人衰鬼弄燈，米少飯焦𥧌，四圈未完，已輸二百元，袋中數目，已差不多，勢色唔同，想話鬆頂，老孫曰：『豈有打四圈便走者，怕老婆乎？』出來撈不能唔化，惟有再執位。」

。鬆頂
。監人乃後
。呃鬼食豆腐

。老尷

＊＊

廣東話俗語



廣州話俚語同俗語，係一種廣州人所熟悉、通俗流行嘅固定短語或者口頭禪，又叫做〔常言〕，〔俗話〕；呢啲係老百姓創造嘅，重喺民間口語之中流傳，具有口語性同通俗性嘅語言單位。

就因為係口語相傳，又冇書又冇信，有好多人都唔知原來嘅本字係點寫嘅，重加上各處鄉村各處講，所以喺坊間同喺網上都流傳咗好多唔同寫法，當中梗係會有好多係〔白字〕同〔別字〕重有〔錯字〕！

＊＊



＊＊

The Pulse 2014 "Cantonese Under Threat?" 

Last September Chinese state media said that more than 400 million Chinese are unable to speak Putonghua the national language, and large numbers in the rest of the country speak it badly. Pretty much every year, the government launches another push for linguistic unity. While officials admit they will probably never get the whole country to speak Putonghua that doesn't stop them trying. And many are concerned about the way those efforts are spreading to Hong Kong, Just before the Lunar New Year holiday, the Education and Manpower Bureau issued an article on its "Language Learning Support" page in which it said that" Cantonese is a dialect but not an official used language in Hong Kong ..." This statement sparked a new wave of controversy regarding Hong Kong's identity.

With us in the studio to discuss this is:

Dr Ben Au Yeung of the Chinese University of Hong Kong.

Other opinions: 
Mr. Ip Kin-yuen of Legislator, Education　
Mr. Darry Chan of Founder "Cantonese Museum" Facebook Page
Ms. Xu Xi of Writer-in-residence, Dept of English City U. HK

＊＊

粵難愈愛。廣東話資料館