〔粵語字〕廣東文

〔粵語字〕廣東文

有人話［香港字］即係［粵字］，又叫做［粵語字］或［廣東字／廣東
文］，係種自製嘅中文字，用來寫粵語用嘅。例如：【啲／Ｄ／尐】、
【喺】、【乜】、【嘢】、【佢／渠】、【邨】、【攰】、【嘅】、
【咋】、【哋】、【咁／噉／噤／恁】、【來／嚟／蒞】。

————————————————————————————————

粵語字又有幾多種呢？

１］造字
根據粵語字詞嘅發音同埋意思，遵守六書而造出嚟嘅。
例如：粵語表示［升降機］嘅詞音［lip1］，音譯自英文［lift］。為咗
寫出呢個音，就用形聲法造字，用［車］字做部首，加個［立］字創造
出【車立】字，意思係上下直立行駛嘅車。又好似個【冇】呢個字，係
將【有】字嘅兩畫搣走，去表示有嘅相反。

２］古字
根據啲專家嘅研究又叫［本字］、［正字］，係古代用嘅中文字，喺依
家嘅書面語入面已經好少再用嘅字。
例如：表示［疲倦］、［累］意思嘅【攰】字。

３］借音字
即你借用［同音字］嚟寫某個發音嘅字。而借用嘅字又增加咗一個同原
義唔同嘅解釋。
例如：【響】字，借音之後增加咗［在、喺］噉樣一個表示處所嘅解釋。
又例如：聽日嘅［聽］字亦係借音字，【聽】原意係用耳仔去感受聲音，
而新嘅意思係［遞時、之後］。

＊＊＊

粵語本字又係點嘅呢？

粵語本字，係指粵語白話文嘅［正字］。廣府話嘅歷史雖然長，但舊時
嘅文人寫嘅係［文言文］，好少用粵語字嚟寫文章，又加上粵語字詞有
時音會變，規律複雜，久而久之，無乜人記得呢啲粵語字原本係點樣寫，
甚至有人以為［廣東話］係寫唔出來嘅。

喺廣東、香港、澳門，用粵語文字寫傳奇、小說、戲曲等，代代有人。
粵曲同小說嘅例子比較容易搵到。但有啲作家亦未必能夠寫得出個正字，
所以經常會假借同音字。

到二十世紀後期，越來越多人研究粵語，喺研究［本字］方面有一啲成
績，香港同澳門又興起搵返呢啲本字。但係認識本字嘅人較少；而用
［俗字］、［新造字］比較多人睇得懂，但係又有背棄傳統之嫌。

現時，網絡上有好多百科詞字典都設有粵語本字列表，但係使用［俗字］
、［假借字］亦可接受。不過，用假借字嘅原則係借字一定要同本字同
音嘅字。
例如：喺屋企（在家）同佢係香港人（他是香港人），一個係［喺（在）
］，一個係［係（是）］，唔可以掉轉嚟寫。

有時，就算用［本字］嚟表達亦未必清楚，例如：［重］字嘅意思有好
多，有時個［仲］字可能畀人嘅感覺會清楚啲，所以有人提出必要時應
該從俗，如果冇歧義，就盡量用返本字。

＊＊＊

下面整理啲正字資料，只係考證推測，唔一定正確。

〔歡迎提供資料更正及補充〕
　
推斷正字　造借字　白話文　　　例子（推斷正字）
————————————————————————————————

　也　　　嘢　　　物、事　　　今日無也做。

　啗　　　氹　　　騙、引誘　　你買紮花去啗返你女朋友啦。

　撳　　　扲　　　按　　　　　入實驗室撳緊急掣。

　眲　　　呃　　　騙　　　　　我畀人眲咗一百萬啊。

　文　　　蚊　　　圓（錢）　　我畀人偷咗一百文呀。

　返　　　番　　　回　　　　　你快啲返屋企啦。

　來　　　嚟　　　來　　　　　我來咗喇。

　蒞　　　嚟　　　來　　　　　我蒞咗喇。

　重　　　仲　　　還有　　　　我重有好多也未做。
　　　　　　　　　還要　　　　我重要去買洗衣機。

　睺　　　喉　　　等候　　　　我睺咗爾個機會出好耐咖喇。

　令　　　靚　　　美麗　　　　你今日着得好令喎。
　　　　　　　　　優　　　　　我想揸架令車去街。

　正　　　正　　　好　　　　　爾齣戲好正。

　鍾意　　中意　　喜歡　　　　我得閒鍾意上網玩遊戲。

　窞　　　氹／凼　深坑　　　　識咗你咁耐，竟然畀個窞我踩。

　涔　　　氹／凼　水漥　　　　啱啱落完雨，地面有好多水涔。

［言甲］　噏　　　亂說　　　　啲電台節目成日都喺度亂噏廿四。

　罨　　　　　　　蓋　　　　　我扭嚫隻腳，中醫話要罨藥。

　睼　　　睇　　　看／正視　　你幫我睼下爾篇作文吖。

　侲　　　腎／神　神經質　　　成日驚有人害佢，都侲侲地嘅。

　𡚗　　　雷　　　大　　　　　大隻𡚗𡚗。

　眅　　　坦　　　反眼　　　　眼眅眅。

　瞪　　　登／定　睜大眼睛　　佢嬲起來瞪大隻眼好得人驚㗎。

　無　　　冇　　　沒有　　　　家下無爾隻貨喎。

　無　　　唔　　　不　　　　　我等屬文無使恁俗。

　怎　　　點／嚸　如何　　　　怎解你要恁樣做？

　恁　　　咁／噤　如此　　　　乜場波恁鬼悶。

　焉　　　邊　　　何　　　　　你想唱焉首歌？
　　　　　　　　　何處　　　　你揸咗我架車去焉？

　道　　　度　　　處　　　　　你揸咗我架車去焉道？

　忌　　　咖　　　助語詞　　　爾架車好強馬力忌。
　　　　　嘅　　　所有格　　　我爾架車好好力忌。

　爾　　　呢　　　這　　　　　佢爾架車都冇力忌。

　揄　　　休　　　牽挽　　　　着衫休褲。

　向　　　響　　　走向、在　　本書向屋企度。

　誃、跙　扯　　　離開　　　　好！我哋誃。

　畀　　　俾　　　付、給　　　你幫我畀住錢先。

　俾　　　比　　　被　　　　　渠比人查緊牌。

　尐　　　啲　　　一點　　　　唔該你快手尐。
　　　　　　　　　那些　　　　怎解尐公仔會爛嘅？
　　　　　　　　　的　　　　　怎解你尐公仔會爛嘅？

　㞘　　　篤／督　尾端　　　　走廊行到篤，你就見到咖喇

　滮　　　標　　　噴　　　　　驚到滮尿 。
　
　𠜱　　　批　　　削　　　　　我同蘋果批皮。

　挽　　　掹　　　拉　　　　　鬼挽腳；爾件事無得挽㗎喇。

［　］　　冧　　　倒塌　　　　冧咗落來喇!

　擢　　　剒　　　猛烈搖動　　擢到條頸。　擢斷條繩。

　巧　　　橋　　　巧合　　　　乜咁巧呀？

　篋　　　喼　　　行李箱　　　去完遊埠返來，成篋也派街坊。

　勿　　　咪　　　不要　　　　勿攪我。

　渠／其　佢　　　他　　　　　渠等唔去睇戲喇。

　等　　　哋　　　們　　　　　我等唔去睇戲喇。

　徛　　　企　　　站立　　　　徛成晚好攰㗎噃。

　而今　　而家　　現時、現在　而今算怎？

　僆　　　𡃁　　年輕人、後輩　僆仔，僆妹。

　咸不論　冚唪唥　全部都　　（唐代外來語）
　　　　　　　　　　　　　　　成燒瓶碳酸咸不論分解完。

　念、恁　諗　　　想　　　　　你念咁耐都念唔掂？

　攰　　　癐　　　累　　　　　行完山之後真係好攰。

　竉　　　窿　　　穴／洞／孔　 條褲有個大竉。

　屛　　　柄／窉　藏　　　　　尐也你屛埋喺焉道?

　子　　　崽／仔　子、幼細　　你個子個耳子好大啊。

　困　　　睏瞓　　躺／睡　　　孲子你乖乖睏落牀。

　奅　　　炮　　　虛大／空大　爾個書法家奓大奅，都唔識寫。

　奓／奢　車　　　奓言，猶夸　爾個奓大奅，個字都唔識寫。

　物／厶　乜　　　甚麼／何　　妳搵佢做物鬼？

　乜　　　竵／歪　不正／不直　偏離元處；你個頭係唔係乜咗啊？
　　　　　　　　　　　　　　　　　　　　你寫字寫到乜乜斜斜嘅！

　元　　　原　　　至始／最初　元旦之前你好擺返你尐也。

　騭　　　質　　　缺德　　　　做埋啲陰騭事。

　忔　　　乞　　　可惡　　　　佢成日都做埋尐忔人憎嘅嘢。

　逳　　　郁　　　移動　　　　佢成日周圍逳。
————————————————————————————————
資料：自由獵人［2013-03-07］
————————————————————————————————

————————————————————————————————

粵語入文與雅俗界線

喺八九十年代，曾經有學者提出過［粵語字詞嘅表達，一直都係香港文
學面對嘅問題］，有人取笑香港人嘅英文唔好，普通話唔掂，點可能寫
到好嘅文章，更何況係講中文創作；又有人歎息［港式中文］嘅蕪雜污
染，斷定如果再用粵字入文，香港嘅文學就必難成氣候。

寫文章，如果用［呢、啲、係、乜、嘢、嚟、嘅、佢、哋、喺、嗰、度
、好、靚］融入喺作品入面時，就畀人批評話對中國傳統文化冇認識、
冇文學味道或者係庸俗累贅等。［即係話寫文章嗰位讀得書少，
唔會寫得出好嘢。］

有啲人認為，如果想寫出高雅秀麗嘅文章，必定係採用［這、些、是、
甚麼、東西、來、的、他、們、在、那、處、很、美麗］等嘅傳統辭彙
，［這些用的說的，才是皇道正宗］吖嘛。

您有咩意見？

————————————————————————————————

香港語文。廣東話資料館