公元2007年．貂蟬再遇呂布［無禮的篡改 一］
———————————————————————————————
「軍情如何？」
斥侯已確認；各地檄文以達諸郡，以大義昭告天下。
各鎮諸侯皆起兵相應，義軍共起十八路大軍。
立袁紹為盟主，各領本部人馬，正浩蕩殺奔汜水關。
先鋒孫堅已到關前五里！
「十八路人馬，咁即係幾多兵馬呀？」
據急報所講；各路諸侯，聲勢浩大，有形容義軍陣容；「紛紛塵土蔽天黃，徵雲繚繞千山遠，殺氣氤氳萬里長，旌旗招氈似雲翻，密密魚鱗排劍戟，層層雁翅列刀槍。」
一望旌旗蔽塞野..... 估計合眾就有上百萬人馬！
董卓你欺天罔地，滅國弒君殘害生靈。而家天怒人怨嘞，你都有今日！？
＊＊
「軍帳將令調撥邊個去迎敵？」
已派華雄做先鋒，任驍騎校尉，撥馬步軍五萬，率副將李肅、胡軫、趙岑已離洛陽，星夜赴汜水關迎敵！
「呂將軍嗰邊點呀？」
呂將軍正喺西校場調兵點將！
「再探！」
報！華雄已經領頭功，斬敵將鮑忠。華雄已調任為都督。
「再探！」
報！華雄引鐵騎出關，敵軍寨前搦戰。再誅敵將祖茂、俞涉、潘鳳！
但係........ 華雄將軍最後畀敵營陣中一名紅面長髯嘅大將斬死。
「吓！係邊個？」
未知.....只係知道嗰一支帥旗係姓劉。
「殿入便同相國府嘅調配情況又點？」
相國令；李催，郭汜，領禁軍五百，已擒太傅袁隗，全家老幼已盡皆誅絕，已有令將袁隗人頭去關前號令。令李催、郭汜引兵五萬，已趕去守住汜水關！
另頒佈軍令；即晚點兵，起主軍十五萬，相國領，點李儒、呂布、樊稠、張濟守虎牢關。
...奉先，真係要上陣嘞....
「呂將軍嘅赤兔馬有冇隨行？」
呢方面..... 小人唔知道.......
據知今日呂將軍因為點兵時，有啲軍士唔聽號令，軍紀散漫，姿容不整。將軍見到，怒火上撞，喺校場上搠戟勒馬，以禦下不嚴之罪，己斬咗幾個裨將、卒伯同百夫長。
溫侯啊；兵有備闕，凡興師先斬將士，對軍不利啊，你點解咁糊塗呀？
「呂將軍佢飲咗酒呀？」
小人都唔知道.......
「你個奴才冇鬼用！」
主人恕罪.... 係小人稍疏，小人再去探。
..... 但係.... 陛下有侍臣派御酒祝捷，呢個慣例......
「無論如何，將呢封信送到呂將軍手上！再有遺漏來敷衍我，就小心你頸上用來裝飾嘅人頭！」
小人明白。
「如果唔能夠親手交畀呂將軍，你就想辦法將信交畀高順。」
「另外；呢一封密函，立即送去畀司徒。」
董卓；你呢個猖獗殘暴嘅逆賊！重想帶兵逞英雄？
報！相國統領本部大軍已屯兵虎牢督戰。
呂將軍領本部三萬軍，已到虎牢關前紮寨。
「敵軍點樣？」
據流星馬探得；袁紹分王匡、喬瑁、鮑信、袁遺、孔融、張楊、陶謙、公孫瓚，八路人馬，準備正面夾攻虎牢關。曹操未知去向。笫一軍係河內太守王匡；已引兵先到，打第一陣。
呂將軍領三千鐵騎，已經旌旗擂鼓號令，交馬上陣！
「快啲再探！」
報！呂將軍誅敵將方悅。廝殺咗一陣，王匡同三路諸侯，折咗啲人馬已經敗退三十里下寨。呂將軍英雄蓋世，果真無人匹敵。
「我嘅信，係咪已經交咗畀將軍？」
小人已經將信交畀高順大人。
另外；王允大人未知去向，未能送函。
報！呂將軍領一簇軍馬關前繡旗招颭，已前往敵陣搦戰。
「結果？」
敵軍分八隊人馬迎擊。我軍陣中騎都尉已斬殺敵將穆順、敵將武安國重傷，敗公孫瓚！
「騎都尉？」
係啱啱遷任呂將軍麾下嘅張遼。
但係............
「但咩？快啲講！」
敵軍人數眾多，呂將軍出陣冇奈，雖然連折敵將，但係交鋒陣中有三名大將正喺度夾攻呂將軍。三人丁字形圍困將軍廝殺。已經打咗幾百回合，未分勝負。轉頭又再廝殺，呂將軍似未有上風.......
「幫我 check 下，嗰三個係咩人？」
據流星馬報；前軍校將旗係［劉］字號，應該係寶安縣令劉德華，其餘兩個未有資料。只知道關前鑼鼓雷鳴，喊聲震天，一直未有停.........
＊＊
奉先；而家風雲驟起，你初執金吾，要知道開封疆守社稷，除患害成武德。千祈唔好輕敵..... 你更加唔好有任何損傷.....红裙簾內靜待音耗，望凱旋之日，再同你把盞。
君倘有不測....貂蟬必自戕相陪。篤願再相期於來世.......
陣前英勇統貔貅，能征戰將攥獅蠻。
跨下征馳名赤兔，手中寒戟號方天。
弓懸秋月彎龍角，箭射流星插鳳毛。
汝是我郎武神威，天下誰不識奉先。
．．．．．．．．．．．．
．．．．．．．．．．
．．．．．．．．
．．．．．．
．．．．
．．
．
＊＊
「小姐.....。」
「小姐..........。」
「小姐............！」
「哦！........ 咩事？」
「頭先空姐廣播；飛機準備降落香港喇！要扣好安全帶。」
「哦....好呀。Thank You！」
續～
＊＊
原：飛鳥 Aska Tsang。2010年
譯：蕭南仁。2018年
＊＊
1980年代。香港［當年的社會］
小莫小於水滴 匯成大海汪洋
細莫細於沙粒 聚成大地四方
＊＊
廣東話資料館
沒有留言:
張貼留言