傳統嘅［漢語］音調裏面有〔四聲〕，即係有四個聲調：〔平、上、去、入〕。而其中嘅〔上、去、入〕三聲，就統稱為〔仄〕聲，就係經常聽到人哋講嘅〔平仄〕。
粵語音調就比傳統［四聲］發展得更多，有［九聲］，分別係：〔陰平、陰上、陰去，陽平、陽上、陽去，陰入、中入、陽入〕。其中〔陰平、陰上、陰去、陰入、中入〕係陰聲系，〔陽平、陽上、陽去、陽入〕係陽聲系。陰聲系嘅調值比較高；而陽聲系嘅調值就較低。［陰平］同［陽平］係〔平聲〕，其他聲調就係〔仄聲〕。雖然話粵語係有九聲，但唔係每一個字音都可以調出九個聲調嘅。
＃唔好搞錯！
傳統漢語嘅四聲，唔係等於國語／普通話（官話）嘅［四聲］。
。傳統漢語嘅四聲係：「平、上、去、入」。
。而普通話嘅四聲係：「陰平、陽平、上、去」；
實際上普通話只得三聲，冇「入聲」。
官話最早嘅定義，係對官方標準話嘅稱呼，即係做官嘅人使用嘅共同語。
。周代官話稱為［雅言］
。秦漢時期沿用［雅言］
。漢晉時期稱做［通語］ （正音移入南方發展同盛行再演化為［粵語］）
。唐宋時期沿用［通語］
。元代時期稱為［天下通語］
。明清時期稱為［官話］ （1909年大清政府將北京官話定名為［國語］）
。民國開始稱為［國語］
。大陸就改稱做［普通話］（1956年大陸政府將沿用國語改稱做［普通話］）
（1985年大陸政府將普通話定為［現代標準漢語］）
＊＊
粵語〔九聲六調〕
標註［九聲］，常用嘅方法有兩種：
1、喺拼音後方，寫上代表聲調嘅數字記號〔註〕。
2、喺拼音之前，加一個細符號來分辨聲調。
下面列出嘅就係呢啲符號：
陰平 陰上 陰去 陽平 陽上 陽去 陰入 中入 陽入
１ ２ ３ ４ ５ ６ １[7] ３[8] ６[9]
點解［陰入］同［陰平］、［中入］同［陰去］、［陽入］同［陽去］嘅數字或者符號係相同嘅？因為［陰入、中入、陽入］嘅音高又叫〔音調〕，係分別同［陰平、陰去、陽去］相同嘅。因為咁用相同嘅數字或者符號來標示就可以。不過，亦有啲字典，用「7、8、9」來表示 〔陰入、中入、陽入〕三聲，使聲調嘅標示更加清晰。
既然音高相同，點解重要區分開入聲呢？因為〔聲調〕嘅完整定義，包括發音過程中嘅高低抑揚性音高同頓挫性〔韻尾或閉塞音〕。畢竟入聲同其他三聲，雖然喺音高上相同，但喺頓錯性上就係有分別嘅。
所謂〔頓錯性〕，喺粵語裏頭係指佢哋必定係用〔p、t、k〕收音。即係話，嗰啲字嘅韻母嘅最後一個拼音符號，必定係〔p、t、k〕。例如「汁」dzap7、「月」jyt9、「隻」dzek8 等嘅字。
倒轉來講，如果個字係用〔p、t、k〕收音嘅話，咁佢一定係入聲字。而用其他收音嘅字（例如「哥」go1、「海」hoi2 等）就會係舒聲字，〔舒聲〕即係［平、上、去］三聲嘅合稱。
喺查字典嘅時候，就算字典冇用「7、8、9」來標示入聲，例如標示嘅係 dzap1、jyt6、dzek3，只要睇到個字嘅拼音係用〔p、t、k〕做收尾嘅，咁就可以知道佢係入聲字。
粵語有六個音高，但係加上頓錯性嘅差異，就能夠分出九聲。因為咁，人哋就話粵語有〔九聲六調〕，即係有：九個聲調，六種音高。
聲韻相同，聲調唔同嘅字：
(１) (２) (３) (４) (５) (６) (１) (３) (６)
陰平 陰上 陰去 陽平 陽上 陽去 陰入 中入 陽入
詩 史 弒 時 市 是 識 刺 蝕
因 忍 印 人 引 刃 壹 ～ 日
分 粉 訓 焚 憤 份 忽 ～ 佛
淹 掩 厭 炎 染 焰 ～ 醃 葉
星 醒 勝 成 ～ 剩 色 裼 食
六種調值：
［陰平］同［陰入］調值相等
［陰去］同［中入］調值相等
［陽去］同［陽入］調值相等
調值相等嘅兩個對應嘅唔同聲調，主要唔同嘅地方就係入聲帶韻尾而平上去聲唔帶韻尾，其抑揚性相同而頓挫性唔同。
1. 陰平／陰入： a1， ä （umlaut）
2. 陰上： a2， ã （tilde）
3. 陰去／中入： a3， â （circumflex）
4. 陽平： a4， a （plain）
5. 陽上： a5， á （acute）
6. 陽去／陽入： a6， à （grave）
六調用阿拉伯數字音階描述：「11」音調最低；「66」音調最高
第一調：調值66；〔周〕Zau1
第二調：調值35；〔口〕Hau2
第三調：調值44；〔店〕Dim3
第四調：調值11；〔河〕Ho4
第五調：調值24；〔姆〕Mou5
第六調：調值22；〔渡〕Dou6
阿拉伯數字 1-6 或調類標記都可以用嚟標示調類。
記住下面幾句可以幫到好快咁記住六調：
陰平 陰上 陰去 陽平 陽上 陽去
詩Si1 史Si2 試Si3 時Si4 市Si5 事Si6
三saam1 九gau2 四sei3 零ling4 五ng5 二ji6
周Zau1 口Hau2 店Dim3 河Ho4 姆Mou5 渡Dou6
三saam1 碗wun2 細sai3 牛ngau4 腩naam5 面min6
而教育學院嘅「教院式拼音方案」採用嘅標調方式係：
陰平 陰上 陰去 陽平 陽上 陽去 陰入 中入 陽入
１ ２ ３ ４ ５ ６ ７ ８ ９
又有一啲網站，為求方便，喺拼寫教材嘅拼音時，將「7、8、9」改做「1、3、6」。但係「敎院式」係用「7、8、9」嘅。
要透過文字嘅描述，去掌握〔九聲〕，對於懂得粵語嘅人就唔算得係一件難事。
試讀下面呢段數字：
陰平 陰上 陰去 陽平 陽上 陽去 陰入 中入 陽入
三 九 四 零 五 二 七 八 六
三九四零五二七八六，呢啲就係粵語九聲嘅〔音階〕。呢啲係因為上面呢段數字嘅聲調次序，就係上表嘅次序。如果記唔到呢幾句口訣，又可以參考下面列出嘅其他口訣：
陰平 陰上 陰去 陽平 陽上 陽去 陰入 中入 陽入
三 碗 細 牛 腩 麵 餿 夾 辣
番 茄 醬 牛 肚 麪 迫 客 食
周 口 店 河 姆 渡 骨 甲 集
輕 走 過 田 野 路 不 吃 力
差 佬 去 元 朗 度 捉 惡 賊
他 只 愛 羊 肚 但 不 吃 辣
踎 喺 汕 頭 有 近 一 百 日
千 幾 個 肥 女 士 即 節 食
纖 體 過 龍 會 累 積 惡 疾
黐 咗 線 流 馬 尿 即 嚇 窒
衰 鬼 正 男 老 豆 不 吃 藥
斟 酒 當 賠 禮 係 必 殺 着
終 審 判 刑 也 未 得 發 落
張 仔 要 同 我 哋 織 隻 襪
開 採 噴 泉 會 用 叻 策 略
它 減 四 除 以 二 得 八 十
山 火 再 燃 企 望 給 撲 滅
香 港 靠 誰 領 導 出 惡 局
風 水 到 時 我 地 必 發 達
巴 打 拜 神 似 爛 gag 節 目
衰 仔 hea 完 也 未 識 發 力
喺上面嘅例子度，第一句嘅〔餿〕字攞語音〔suk7〕。最後兩句係〔潮語〕，即係現今嘅青少年流行話語。〔巴打〕音譯自英文〔brother〕，指「兄弟」。〔gag〕係由英文引入粵語化時讀〔gak7〕音，〔爛gag〕即係冷笑話。〔hea〕音〔he3〕，解做隨心放蕩、嬉戲、鬆弛、漫不經心或者〔懶散〕。
如果重係唔太清楚，可以參考下面嘅資料。
聲調，係粵語入面一大重要嘅元素，唔識聲調，除咗唔能夠欣賞詩詞平仄嘅音樂美感，就連溝通都有問題。好似填詞人黃霑曾經擧咗個例，話如果將〔新鮮美國運到〕嘅聲調搞錯咗，就可能會變成〔神仙媚國暈倒〕，咁就會鬧出笑話嘞。
＊＊
天籟調聲法
一個字嘅讀音，一般由聲母、韻母、聲調所組成。廣東話有九個聲調，分別係〔陰平、陰上、陰去〕、〔陽平、陽上、陽去〕；再加上〔陰入、中入、陽入〕。即係話，平上去入各分陰陽，再加上中入，就係［九聲］。
但係點樣分辨九聲呢？我哋可以學習〔天籟調聲法〕。天籟，即係自然嘅聲音，好似記著一首歌一樣，就會記得九聲嘅讀法。
其實，只有鼻音收音字，即係用〔m、n、ng〕收音嘅字，先至可以調出九聲，其餘嘅都只可以調出六聲，冇嗰三個入聲嘅。
發音例子：
陰平 陰上 陰去 陽平 陽上 陽去
詩si1 史si2 試si3 時si4 市si5 是si6
但係，如果係用〔m、n、ng〕收音嘅話，就宥可以調出九聲來嘞。用〔m〕收音嘅字，調至入聲時，會改成用〔p〕收音；用〔n〕收音嘅字，調至入聲時，會變做用〔t〕收音；用〔ng〕收音嘅字，調至入聲時，就成為〔k〕收音嘅字。
發音例子：
陰平1 陰上2 陰去3 陽平4 陽上5 陽去6 陰入7 中入8 陽入9
淹jim1 掩jim2 厭jim3 炎jim4 染jim5 焰jim6 ■jip7 醃jip8 葉jip9
因jan1 隱jan2 印jan3 人jan4 引jan5 刃jan6 一jat7 ■jat8 日jat9
星sing1 醒sing2 勝sing3 成sing4 ■sing5 剩sing6 色sik7 裼sik8 食sik9
去讀呢九聲嘅方法，叫做〔天籟調聲法〕。
將九聲分三組來讀：
１「陰平、陰上、陰去、陰入」
２「陰平、陰上、陰去、中入」
３「陽平、陽上、陽去、陽入」
讀音例子：
淹、掩、厭、 ■ ； 淹、掩、厭、醃 ； 炎、染、焰、葉
因、隱、印、一 ； 因、隱、印、 ■ ； 人、引、刃、日
星、醒、勝、色 ； 星、醒、勝、裼 ； 成、 ■、剩、食
如果遇到並唔係用〔m、n、ng〕收尾嘅字，冇入聲，只好空住嗰啲位置唔讀，或者借用附近嘅、順口嘅入聲韻。
例如：
詩、史、試、 ■ ； 詩、史、試、裼 ； 時、市、是、 ■ ／或
詩、史、試、色 ； 詩、史、試、裼 ； 時、市、是、食
當將上面〔天籟調聲法〕嘅例字反覆吟詠，使佢成為隨口就唸得出來嘅〔音階〕。咁，對九聲嘅掌握，就唔成問題嘞。
註：■ 表示有音無字。
＊＊
口語變調
識得讀粵語嘅人都知道，某啲粵語字嘅書面同口語嘅讀音係唔一樣嘅。粵語口語通常會將低聲調嘅字讀成高聲調，稱之為〔變調〕。好似〔老王〕嘅〔王〕、〔金魚〕嘅〔魚〕，都經常由［陽平聲］讀成［陰上聲］。唔係咁讀嘅話，反而覺得有啲唔夠道地。
變調多數出現喺〔陽平聲〕嘅字，大概因為陽平聲嘅聲調太低。一句之中，如果發過多嘅陽平聲又實在辛苦。至於變成嘅聲調，就大部份係〔陰上聲〕，亦有唔少係〔陰平聲〕。下面擧出咗一啲例子：
變成〔陰上聲〕例子：
◆ 陽平變陰上：何伯嘅〔何〕、圍棋嘅〔棋〕、作文嘅〔文〕。
◆ 陽上變陰上：紅柿嘅〔柿〕、書友嘅〔友〕、仔女嘅〔女〕。
◆ 陽去變陰上：圖畫嘅〔畫〕、各位嘅〔位〕、炸彈嘅〔彈〕。
◆ 陰去變陰上：花旦嘅〔旦〕、小販嘅〔販〕、開會嘅〔會〕。
調值同陰上一樣，但係用〔p、t、k〕收音，係陰上聲同入聲嘅混合，只存在喺口語。有啲學者蛋佢稱為〔新入〕。
◆ 中入變陰上：臘鴨嘅〔鴨〕、請帖嘅〔帖〕、麻雀嘅〔雀〕。
◆ 陽入變陰上：木盒嘅〔盒〕、賞月嘅〔月〕、白鶴嘅〔鶴〕。
變成〔陰平聲〕／〔陰入聲〕例子：
◆ 陽平變陰平：玻璃嘅〔璃〕、烏蠅嘅〔蠅〕、捉伊人嘅〔人〕。
◆ 陽入變陰入：一粒嘅〔粒〕、勞碌嘅〔碌〕、親暱嘅〔暱〕。
◆ 中入變陰入：白雪雪嘅兩個〔雪〕、光脫脫嘅兩個〔脫〕。
變成〔陽平聲〕例子：
◆ 陰平變陽平：〔爸爸〕、〔媽媽〕、〔哥哥〕中嘅第一個字。
［baa4 baa1］、［maa4 maa1］、［go4 go1］
◆其他聲調變陽平或陰平。而〔姐姐〕一詞，第一個〔姐〕字由陰上聲變陽平聲，第二個〔姐〕字就變成陰平聲。
呢啲變調，例子實在有好多，冇可能喺呢度全數擧出。除咗個別字，變調比正讀更常讀之外，一般粵音字典都唔會收錄變調。正如學者黃錫凌講：〔讀者只好從日常談話中體驗就係嘞〕。
＊＊
外省人學粵語九聲
對於外省人，甚至外國人來講，由於粵語嘅聲調系統同自己母語唔同（對西方人士來講，自己母語更係冇聲調），要學九聲，就只得依靠〔五度標音法〕。
跟據學者嘅分析，雖然每個人能夠發出嘅高低音都有唔同，有啲人唱高調一啲就會「走音」。但係有基本嘅五度調值，係每個人都能夠發出嘅。雖然呢五度調值，對每個人來講都可能有啲唔同，但基本上呢五度間嘅關係，係有固定模式嘅。音韻學家就將呢五度調值標出來，用「1」至「5」來表示。
「1」代表最低值，「5」代表最高值。
「1」調值同「5」調值嘅關係，大概就好似音樂嘅Ｃ大調內嘅 do 同 so 音嘅關係。
粵語嘅［陰平聲］，調值係「55」或「53」。而日常發音時，一般人將大部份嘅字都讀做「55」嘅。不過，讀做「55」亦好，讀做「53」又好，都唔影響辨義。普通話嘅陰平聲，調值亦係「55」，懂得普通話嘅人，大可以將粵語嘅陰平聲，同普通話嘅陰平聲對等。
粵語［陰上聲］嘅調值是「35」，係向上升起嘅。呢個調值亦即係普通話陽平聲嘅調值，但屬於粵語陰上聲嘅字，喺普通話裏頭全部都係上聲字，而唔係普通話陽平嘅字。
粵語［陰去聲］嘅調值係「33」。如果粵語陰平聲係Ｃ大調嘅 so 音，粵語陰去聲就係 me 音。屬粵語陰去聲嘅字，普通話發音亦係去聲嘅。
屬於粵語［陽平聲］嘅字，喺普通話裏頭絕大多數都係陽平聲。但請注意，粵語嘅陽平聲，調值係「11」或「21」，略同於普通話「半三聲」嘅調值。佢係Ｃ大調嘅 do 音，簡單來講，將字唱到最高音就係粵語陰平聲，唱到最低調就係陽平聲嘞。好似「天、田」、「詩、時」，前者係陰平聲，後者讀陽平聲。
粵語嘅［陽上聲］，調值係「13」，剛好比陰上嘅「35」低音，但特徵就相同。粵語以濁音 （即係［m、n、l、ng、w、j］）開頭嘅陽上聲字，普通話多數讀上聲。其他粵語陽上聲字，普通話就讀去聲。
粵語［陽去聲］嘅字，普通話一般都係讀去聲。陽去聲比陰去聲略低，調值係「22」，係Ｃ大調嘅 re 音。
粵語［陰入聲］、［中入聲］同［陽入聲］，分別同粵語陰平、陰去同陽去聲嘅調值相同。不過讀起上來就短促咗一啲。
下圖標出咗各個聲調嘅音值高低。
註：由於【fat】嘅中入聲無字，故借讀音相近嘅「發」【faat】字代替。
＊＊
粵拼嘅全名係〔香港語言學學會粵語拼音方案〕，係粵語嘅一種拉丁拼音方案，係香港語言學學會（LSHK）喺1993年製訂。網上亦都有基於呢個方案嘅輸入法。
＊＊
教育學院拼音方案，通稱〔教院式拼音方案〕或〔教院拼音方案〕，又叫《常用字廣州話讀音表》拼音方案，係香港教育統籌局同香港考試局等嘅香港教育部門，佢哋依家唯一承認嘅標準粵語拼音方案。
＊＊
鄧麗君講廣東話
VIDEO
鄧麗君［忘記他］
作詞：黃霑 作曲：黃霑
忘記他 等於忘掉了一切
等於將方和向拋掉 遺失了自己
忘記他 等於忘盡了歡喜
等於將心靈也鎖住 同苦痛在一起
從來只有他 可以令我欣賞自己
更能讓我去用愛 將一切平凡事 變得美麗
忘記他 怎麼忘記得起
銘心刻骨來永久記住 從此永無盡期
忘記他 等於忘記了歡喜
等於將心靈也鎖住 同苦痛在一起
從來只有他 可以令我欣賞自己
更能讓我去用愛 將一切平凡事 變得美麗
忘記他 怎麼忘記得起
銘心刻骨來永久記住 從此永無盡期
＊＊
粵聲音。廣東話資料館
