風雲〔新界土豪聯盟〕2014

風雲〔新界土豪聯盟版〕

青山原是我身邊伴，伴着白雲在我前，
碧海是我的心中樂，與我風裡渡童年。

當初你面對山海約誓，此生相愛永不變，
想不到海山竟多變幻，再也不見舊時面。

是誰令青山也變，變了俗氣的咀臉，
又是誰令碧海也變，變作濁流滔天。
風中仍共你痴痴愛在，未讓暴雲壞諾言，
即使那海枯青山陷，與你的約誓，也不變遷。
是誰令青山也變，變了俗氣的咀臉，
又是誰令碧海也變，變作濁流滔天。

風中仍共你痴痴愛在，未讓暴雲壞諾言，
即使那海枯青山陷，與你的約誓，也不變遷。




作詞：黃　霑　作曲：顧嘉輝
主唱：林家棟．方中信．林嘉華．劉青雲．古天樂

＊＊

風雲〔2014年電影〕



竊聽風雲３ Overheard 3，係一部 2014 年上映嘅中港合拍電影，係《竊聽風雲》系列電影嘅第三部，亦係最後一部，由麥兆輝同莊文強聯合編導同埋由爾冬陞同黃斌一齊監製，劉青雲、古天樂、吳彥祖同周迅等多位知名演員主演。呢套片共計獲得2015年第34屆香港電影金像獎嘅最佳編劇、最佳男主角同埋最佳男配角三個大獎。



喺香港，新界每個男性原居民都可以向政府申請免地稅起一棟三層嘅獨立屋。呢個計劃長期引起社會爭議，而政府決定停止丁屋申請。地產公司準備將剩低嘅丁權進行統一，起一批多層式嘅［丁屋大廈］。新界鄉紳話事人陸瀚濤［曾江］打算獨吞成個地產項目，但係各個地產大巨頭都要分一杯羹。新界大地主陸永遠（錢嘉樂）同邊個靠攏，就影響到［丁屋大廈］嘅歸屬。陸瀚濤嘅司機羅永就（古天樂）揸車撞死陸永遠。陸永遠嘅死，令陸瀚濤成功攞咗呢個大地產項目。



幾年之後，羅永就出冊［放監］，同樣為陸瀚濤做事嘅同村兄弟陸金強（劉青雲）等人就唔想同陸瀚濤分享既得利益。但係意想唔到嘅係，羅永就喺陸瀚濤嘅女指揮之下，喺酒度落藥迷暈佢哋，重搵來喺監獄入面識嘅電腦奇才阿祖（吳彥祖），將陸金強等人嘅手提植入竊聽程式，暗中監視佢哋嘅一舉一動。


阿祖喺竊聽行動當中，無意中識咗圍村寡婦［陸永遠嘅遺孀］阮月華（周迅）。經過一段時間竊聽，羅永就發現咗陸金強兄弟嘅大陰謀，而幾方嘅勢力經過幾番嘅纏鬥，最後大部分人都.........



＊＊

演員角色：



劉青雲［陸金強］陸氏四兄弟大哥
方中信［陸永富］陸氏兄弟
林嘉華［陸永泉］陸氏兄弟

林家棟［陸建波］陸氏兄弟

曾　江［陸瀚濤］陸氏家族太公
葉　璇［陸永瑜］陸瀚濤之女
錢嘉樂［陸永遠］畀羅永就開車撞死
周　迅［阮月華］陸永遠之妻
古天樂［羅永就］因開車撞死陸永遠入獄五年
吳彥祖［阿　祖］幫羅永就竊聽陸氏兄弟
吳孟達［司徒光］四大地產商財團總代表
黃　磊［萬　山］陸永瑜男友［富商］
黃　奕［富　嫂］陸永富之妻
劉浩龍［龍　哥］
谷德昭［高　登］幫助陸金強做反竊聽
羅　蘭［嬌　姐］
郭　鋒［陸　九］九叔
楊英偉［明　哥］
駱應鈞［馬志權］政府高官
袁嘉敏［妓　女］
何華超［］
龍天生［］

＊＊

圍頭話詞匯〔初階〕

圍頭話係新界原居民嘅方言，屬於粵語莞寶片，同東莞話、廣州話同屬於粵語，主要分布喺廣東珠江口東部嘅東莞、深圳同香港。莞寶粵語同廣府粵語差別比較大，互相通話有一定嘅困難。圍頭人又叫〔本地人〕，係最早來到香港落腳嘅主人。當時人數約占香港本地人口嘅8成。所以香港原居民通常用〔本地人〕來特指〔圍頭人〕。 粵語莞寶片，內部又劃分為幾種次方言，分別為： 莞寶粵語＞．東莞話＞．莞城話．厚街話．虎門話 　　　　＞．寶安話＞．圍頭話．南頭話 　　　　＞．　　　＞．大鵬話 基本詞匯： 1、天文地理 天光　　〔〕天亮 齊黑　　〔〕天黑 熱頭　　〔〕太陽 村仔　　〔〕農村 水湖　　〔〕水坑 埞　　　〔〕地方 水瀝　　〔〕坑渠，水溝 水瀝水　〔〕坑渠水 2、時令、時間 家下　　〔〕現在 醒朝　　〔〕明早 成日　　〔〕整天 日頭　　〔〕白天 先日　　〔〕哪天 晚頭黑　〔〕夜晚 朝頭早　〔〕晨早 日頭落水〔〕黃昏 3、農事、植物 蒔田　　〔〕插秧 絞米　　〔〕碾米 耕菜園　〔〕種田 田薺　　〔〕荸薺 花棯　　〔〕番石榴 番果仔　〔〕番石榴 禾碌　　〔〕沙田柚 圓籠　　〔〕年糕，讀魚龍，估與客家〔圓籠茶果〕同 菜頭　　〔〕蘿蔔 地豆　　〔〕花生 穀薯　　〔〕番薯 碌堆　　〔〕煎堆 粿仔　　〔〕煎堆 4、動物 雞蘭　　〔〕小母雞 雞項　　〔〕母雞 雞春　　〔〕雞蛋 騸雞　　〔〕閹雞 蛤　　　〔〕青蛙 禾蜎　　〔〕蚯蚓 5、房舍、傢俱 天廈　　〔〕廳 地栿　　〔〕門檻 下間　　〔〕廚房 板橋　　〔〕灶台 交椅　　〔〕椅子 6、稱謂 老子　　〔〕父親 阿爸　　〔〕父親 老母　　〔〕母親 阿奶　　〔〕母親 新婦　　〔〕兒媳 後歸婆　〔〕後母 大姐仔　〔〕閨女 膝　　　〔〕重孫 爺奶　　〔〕父母 主人公　〔〕家公　 主人婆　〔〕家婆 老大　　〔〕老婆婆 婦娘　　〔〕中年婦女 妗　　　〔〕舅母 大姑　　〔〕姑母 姑仔　　〔〕姑母 大姊　　〔〕家姐 阿娣　　〔〕弟弟 孭仔　　〔〕女童，例如：罵人（死孭仔） 鬼矛　　〔〕妓女，例如：罵人（病鬼矛） 7、身體 頭殼　　〔〕腦袋 後枕　　〔〕後腦勺 背梅　　〔〕背脊 肋赤下　〔〕胳肢窩 大髀　　〔〕大腿 屎肚　　〔〕肚子　 肚仔　　〔〕肚子 耳吉　　〔〕耳朶 間頭　　〔〕肩膀 頭毛　　〔〕頭髮 剃頭　　〔〕剪頭髮 鼻膿　　〔〕鼻涕 眼核　　〔〕核（音：佛）眼睛 8、病痛、醫療 結恭　　〔〕便秘 扯蝦氣　〔〕哮喘 麻墨屎　〔〕雀斑 痾肚仔　〔〕肚瀉 痾痢肚　〔〕肚瀉 肚仔痛　〔〕肚痛 9、衣著、穿戴 衣裳　　〔〕衣服 聯衫　　〔〕縫衣 背褡　　〔〕背心 笠衫　　〔〕汗衫 褲頭　　〔〕短褲 10、飲食 頸渴　　〔〕口渴 吃茶　　〔〕喝水 豆腐梅　〔〕腐乳 爇　　　〔lak〕魚，煎魚 趣魚　　〔〕蒸魚 洗魚砵　〔〕洗碗碟 洗碗箸　〔〕洗碗碟 一雙箸　〔〕一雙筷子 　　 11、日常生活 起身　　〔〕起床 做曬　　〔〕上班 去歸　　〔〕回家 歸來　　〔〕回家 洗身　　〔〕洗澡 梢涼　　〔〕乘涼 嫽　　　〔〕玩耍 過家　　〔〕串戶 趯　　　〔〕（音：作）；玩、作反 聒　　　〔〕理睬，例如：唔好聒佢（唔好睬佢） 志柄柄　〔〕懶叻，認叻 求　　　〔〕居住，例如：你家下趣先處求？ 12、紅白大事、迷信 馱仔　　〔〕懷孕 出月　　〔〕滿月 過身　　〔〕死 老咗　　〔〕死 喊童年仔〔〕叫驚 糞箕笠　〔〕咒罵他人早死 13、動作、心態 企　　　〔〕站 ？　　　〔bou〕蹲，踎 狂　　　〔〕害怕 尋　　　〔〕找 揾　　　〔〕找 哭　　　〔〕哭泣 喊　　　〔〕稱呼，呼喚 敬　　　〔〕喜歡 挈　　　〔〕拿起，收起 暗　　　〔〕掉棄 14、形容詞 好鞋　　〔〕很癢 朋　　　〔〕厚 當衰　　〔〕倒楣 能械　　〔〕聰明能幹 好反　　〔〕很頑皮 伶俐　　〔〕乾淨 銀屎　　〔〕髒穢 好企　　〔〕很斜，例如：張梯好企 好快　　〔〕刀剪鋒利，例如：把刀好快 好效　　〔〕很光亮，例如：燈火好效 能陣　　〔〕勞煩 15、方位、代詞 入內　　〔〕裏面 貌／畝　〔〕外面 上高　　〔〕上面 下底　　〔〕下面 乃誰　　〔〕誰人

＊＊



＊＊

香港語文。廣東話資料館

于素秋［999 離奇三兇手］粵語原聲

于素秋，鮮有咁用自己嘅［上海腔］粵語，向曹達華探長解釋點樣同袁小田喺上環［大笪地］賣藝，受到劉家良同金雷等嘅流氓欺負打傷，好采得李香琴［藍碧西］仗義畀咗兩百鹹龍解困。

＊＊

999 離奇三兇手［1965年］



離奇嘅係一具屍體，竟然有三個自動投案嘅兇手。離奇嘅開場，帶著觀眾聽余麗珍［黃秀梅］、林鳳［艾綺華］同于素秋［鄔琼珠］對曹達華［華克探長］話殺咗李香琴［藍碧西］嘅自白。更離奇嘅係，喺追捕匪徒途中，曹探長同眾伙記就遇上架車拋錨嘅李香琴，重替佢點咗口煙添。

當三個話［係我開槍嘅］嘅女主角，續一講出佢哋殺人嘅因由之後，就發現死者［藍碧西］先至係貫穿成套戲嘅幕後女主角，一個壞女人李香琴［藍碧西］。

習慣咗由黎坤蓮為于素秋配音嘅觀眾，「聽」呢齣由于素秋親口演出嘅粵語片，會有完全唔同嘅感受，因為今次佢飾演一個來自北方嘅賣武姑娘，親自講粵語對白，喺于素秋演嘅粵語片入面實在難得一見。

主演：余麗珍　曹達華　李香琴　馮寶寶　司馬華龍
　　　金　雷　駱　恭　袁小田　甘　萍　胡　平
　　　于素秋　林　鳳　唐　佳　劉家良　陳少鵬
　　　黃公武　湛少雄　徐二牛

導演：黃鶴聲
編劇：李少芸
攝影：崔鑫玉
製片：蘇哲明
錄音：徐華生
美術：梁志興
剪接：湯廣仁
場記：李瑞珍
燈光：敖高喜
化妝：謝澤源
副導：劉　堅
配樂：梁山人

監製：李少芸
出品：麗士影業公司

＊＊

八牡丹



香港喺1960年代，演藝界潮流興結義。八牡丹成員皆為紅伶花旦，就算于素秋亦係平劇刀馬旦，惟獨林鳳一人係出身邵氏嘅玉女明星，佢嘅年齡同最年長嘅余麗珍相距有成17載，就算同排行第7嘅南紅比都相差成6年。

余麗珍（1923年．紫牡丹）余麗珍．民國廣東
鄧碧雲（1924年．藍牡丹）鄧芍芙．廣東三水
鳳凰女（1925年．紅牡丹）郭瑞貞．廣東三水
羅艷卿（1929年．銀牡丹）羅大紅．廣東順德
吳君麗（1930年．白牡丹）吳燕雲．廣東中山
于素秋（1930年．黑牡丹）于小圓．民國上海
南　紅（1934年．綠牡丹）蘇淑媚．廣東順德

林　鳳（1940年．黃牡丹）馮淑嫣．廣東新會

＊＊

香港［當年的社會］1980年代

小莫小於水滴　匯成大海汪洋

細莫細於沙粒　聚成大地四方

＊＊

 粵語電影。廣東話資料館

香港嘅［街頭小食］

香港嘅［街頭小食］，又叫做［街邊嘢食］，佢嘅發展都幾源遠流長嘅，聽峭話由19世紀開始已有［路邊檔口］，佢哋都係為咗搵兩餐，同埋照顧下啲社會草根階層人士嘅飲食需要而出現嘅，至於街邊小食嘅檔口就喺1950至1960年代初發展最蓬勃，賣嘅嘢食種類好多。而且價錢平，因為咁而受大眾歡迎。



到咗1970至1980年代，政府為咗整頓市容，開始抑止街邊檔口阻街同隨地垃圾嘅情況，後來又因為衞生問題，呢啲街邊檔口又畀政府逐步驅除。當時一啲冇牌嘅街邊檔，畀政府捉到就要罸錢同埋充公啲貨，所以啲街邊檔喺做生意嗰時見到政府啲人就即刻執嘢走，之後就有人叫呢啲要執嘢走嘅檔口做［走鬼檔］。



後來呢啲街邊檔口就開始搬入舖頭繼續做生意，雖然唔喺以前嘅街邊［推車仔］，但仍然係賣以前街邊檔口嘅嘢食，都重係好似以前咁受歡迎。



喺依家，呢啲街頭檔口嘅小食種類好多，例如有：雞蛋仔、碗仔翅、臭豆腐、生菜魚肉湯、魚蛋、砵仔糕、牛雜、格仔餅、炸魷魚鬚、串燒、燒賣、煎釀三寶等等，佢哋大多用紙袋或者發泡膠兜裝住，再用竹簽或者膠匙來食，呢啲檔口同鋪頭通常都係冇枱冇櫈，即買即食，即係要企喺條街度食，又或者係一路行一路食。


由香港嘅［街頭小食］發展，可以睇到香港人獨有嘅飲食文化特色。香港人除咗平日嘅生活節奏同做嘢嘅速度快之外，喺飲食方面亦都顯出香港人講求快速嘅心態，唔止食嘅要快，連做整嘢食嘅都要快，正所謂［千祈唔好急，最緊要你快］，咁先至能夠喺呢個社會度生存，而街頭小食就正正係顯示出呢個特點。

＊＊

華南地區小食：

香港小食： 
雲吞麪、蛋撻、菠蘿包、波羅油、絲襪奶茶、鴛鴦、檸檬可樂、煎釀三寶、格仔餅、老婆餅、炸兩、雞蛋仔、魚蛋、碗仔翅、車仔麵、蝦餃、廣東燒賣、牛肉燒賣、魚肉燒賣、冰山大火、茶粿、龍鬚糖、糖不甩、啄啄糖、缽仔糕、魚蛋、臭豆腐、生菜魚肉、冰糖葫蘆、珍珠奶茶



澳門小食：

冬蔭公魚蛋、葡式蛋撻、豬扒包、紐結糖、蛋卷、鳳凰卷、蛋卷仔、花生糖、酥糖、澳門杏仁餅、豬油糕、甜老婆餅、咸老公餅、合桃酥、雞仔餅、牛耳仔、咸切酥、鹹甜粿



廣東小食：
拉腸粉、蝦餃、燒賣、鳳爪、蛋塔、煎堆、油角、炸大腸、糖冬瓜、糖蓮藕、糖芋條、老婆餅、雞仔餅、盲公餅、雙皮奶、薑汁撞奶、艇仔粥、及第粥、牛腩、牛雜、沙河粉、陳村粉、乾炒牛河、東莞米粉、燒鵝、燒肉、叉燒、豉油雞、鹽焗雞、蔥頭雞、白雲豬手、白雲鳳爪、豬腳薑、紅雞蛋、砵仔糕、厚街燒鵝瀨粉、道窖裹蒸粽、莞城豬紅粥、道窖肉丸粥、豆腐角、牛腩粉、鯽魚粥、黃鱔飯、豬腸粉、餛飩麪、涼茶、燒臘、糖水、牛腩蘿蔔、馬崗雞仔餅、皮蛋酥、油炸鬼、冰肉千層酥、野雞卷，均安煎魚餅、龍江煎堆、中山杏仁餅、肇慶裹蒸粽、廣東月餅、酥皮蓮蓉包、粉果、薄皮鮮蝦餃、玉兔餃、干蒸蟹黃燒麥；潮州魚蛋粉、汕頭牛肉丸、潮州粉粿、卷煎、糯米豬腸、粿汁、粿條湯、潮州春餅、炒糕粿、肖米、麥包、南瓜芋泥、反沙芋、糕燒番薯、豬腳圈、浮豆乾、芋丸、水晶包、白飯桃、清心丸、綠豆爽、鴨母捻、粽球、牛肉丸、束砂、糖蔥薄餅、朥餅、姜薯酥、潮州腐乳餅、肉粽、紅桃粿、沙茶粿、韭菜粿、鹹水粿、菜頭粿、甜粿、油粿；客家粽、珍珠粉、煎釀蛋角



廣西小食：
螺螄粉、桂林米粉、梧州龜苓膏、玉林牛巴、大肉棕、桂林馬肉米粉、炒粉蟲



海南小食：
海南粉、抱羅粉、椰子飯、椰子米果、竹筒飯、雞藤粑仔、千孔糕、海南燕米果、煎堆、竹簡飯



台灣小食：
擔仔麪、鱔魚意麪、金瓜米粉、珍珠奶茶、生煎包、肉粽、麻豆碗粿、新竹米粉、新竹貢丸、鹹酥雞、台南棺材板、基隆廟口鼎邊銼、花蓮麻糬、蚵嗲、蚵仔煎、蚵仔麪線、大腸麪線、滷肉飯、藥燉排骨、燒酒螺、萬巒豬腳、筒仔米糕、臭豆腐、潤餅捲、小籠包、滷味、鐵蛋、挫冰、美濃粄條、米血、刈包、大溪豆乾、台中太陽餅、彰化肉圓、香雞排、茶葉蛋、豬血糕、甜不辣、花枝羹、魷魚羹、大餅包小餅、大腸包小腸、春捲、蔥油餅、牛肉麵、鍋燒意麵、車輪餅、麻花捲、澎湖海苔酥、澎湖黑糖糕、𩵚魠魚羹、烤魷魚、肉燥飯、飯糰、鹹甜粿、烤香腸



＊＊

香港風情。廣東話資料館

一個午餐可以好簡單！

有個男仔午餐冇嘢食，同學暖心感動人！

愛，係與生俱來嘅，可以認為係人性嘅特質。可以逋係一種衍生自親人之間嘅強烈關愛、忠誠同善意嘅情感同埋心理狀態，就好似母愛。亦可以衍生自情感上嘅吸引力，例如情人之間嘅愛情同溫柔。另外，亦可能以衍生自尊敬同欽佩之情，例如朋友與同學之間彼此重視同欣賞。同時，愛被認為係一種［神奇嘅力量］。

愛，亦係作為人必須具備嘅本質之一。愛，可以包括靈魂或者心靈上嘅愛、對法律同組織嘅愛、對自己嘅愛、對食物嘅愛、對金錢嘅愛、對學習嘅愛、對權力嘅愛、對名譽嘅愛、對他人嘅愛等，數之不盡。唔同人對佢所接受嘅愛都有唔同嘅重視程度。愛，本質上係一個抽象嘅概念，可以體驗，但係就好難用言語或者文字來表達。

＊＊

一個午餐可以好簡單！



午餐，又叫做［食晏］，亦叫［晏晝飯］、［中午飯］等，係中午附近時間食嘅一餐。有啲人會［早餐 breakfast ］同［午餐 lunch］夾埋一餐食，叫做［早午餐 brunch］。而喺［午餐］同［晚餐］之間嘅一餐，就叫做［下午茶 afternoon tea］，下午茶並唔係正餐來嘅，聽講話［下午茶］係發展自英國維多利亞時代。

＊＊

老婆同亞媽整嘅午餐！



＊＊

女朋友整嘅午餐！［買返嚟嘅］



＊＊

得罪老婆同亞媽嘅下場！




有人話〔衣食父母〕，即係指喺生活上要依賴嘅父母。因為［衣食］呢兩樣嘢，一般都係由老婆同亞媽掌握大權嘅，尤其事係［食］添！千祈唔好話［女人心海底針］好難估呀，一打開個飯盒，你就知道尋晚有冇得咗罪佢哋嘞。

＊＊

喂～快手啲啦，貓奴。

有個［打貓］嘅故仔係咁講嘅：

喺早幾十年前，啲食肆伙計人工總係比其他行業少一千幾百，原因係呢啲食肆會提供埋伙計嘅膳食，而［打貓］即係偷食正常膳食以外嘅食物。話說有個伙計匿埋廚食撞正老闆入廚房攞嘢，伙計靈機一觸將啲嘢食連埋個碗掉去後巷，跟住大大聲話：［衰貓吖，偷食，等我打死你。］估唔到咁都過到骨，自此［打貓］就成為偷食嘅代名詞嘞。

另又有個故仔係咁話：［資料：Tak Ming Kwok］
［打猫］嘅意思係打走咗隻猫，咁老鼠就可以偷食。原因主要唔係人工較低，而係嗰陣時到食肆打工嘅人，大多數都係來自貧苦家庭嘅細路童工，例如：送外賣，樓什，油鷄仔，厨房仔，點心妹等，佢哋從來或甚小機會食到酒樓食肆嘅美食，所以佢哋一有機會就喺傳菜，送外賣，或賣點心嗰陣，襯冇人睇時就偷嘢食嘞。

＊＊

瀨尿蝦都識［寸勁］？

瀨尿蝦，又叫做［螳螂蝦］、［蝦狗彈］、［口蝦蛄］、［富貴蝦］、［皮皮蝦］等。喺古時嘅亞述人叫佢做［海蝗蟲］，澳洲人就叫佢做［明蝦殺手］。佢畀人捉住嘅時候，個肚會射啲水出來，好似射尿咁，所以喺廣東地區多數人都叫佢做［瀨尿蝦］。

佢嘅頭胸部有一對好似螳螂一樣嘅鐮刀狀前腳，撞擊力好大，可以令想捉佢嘅敵人覺得好痛。呢個亦係佢搵食嘅方法，利用佢有力嘅前腳將獵物刺穿、震暈、甚至解體。一般嘅貝類、螃蟹、海膽等都敵唔過佢嘅［寸勁］。

瀨尿蝦對前腳嘅撞擊力唔單只可以打穿甲殼類動物嘅殼，有啲大隻嘅瀨尿蝦，喺畀人捉咗之後，曾經一嘢將困著佢嘅水缸玻璃打穿逃走。不過，最後都係畀人將佢落鑊。

瀨尿蝦點分雌雄？蝦嘅第三對胸足腹部之間，有對長長嘅幼條，就屬於［蝦公］，冇呢條嘢嘅，就係［蝦乸］。

＊＊

無聊通識科。廣東話資料館

南海十三郎［江楓］小傳

《南海十三郎》係一部以20世紀30年代粵劇編劇家南海十三郎嘅生平事跡做題材改編成嘅舞台劇，由［香港話劇團］製作。1993年喺香港上演，又喺1995年重演，再喺2013年第三度重演。舞台劇嘅部分故事情節同現實情況截然不同，唔係事實嘅全部。
《南海十三郎》嘅生平事跡廣為流傳，最初係杜國威改編成嘅香港話劇團［舞台劇版］喺香港上演，由謝君豪飾演佢。由於呢套舞台劇好受歡迎。之後喺1997年，春天製作加入做《南海十三郎》嘅［舞台劇版］同埋又改編拍成［電影版］。後來喺1999年，又畀亞洲電視再改編成為［電視劇版］，由林韋辰扮演十三郎。三種唔同媒體對南海十三郎嘅生平有唔同嘅演繹，亦帶畀觀眾《南海十三郎》唔同嘅面貌。

舞台劇演出角色：（春天舞台版）
。十三郎：謝君豪
。太史公：丁家湘
。三姨太：李　楓
。莉　莉：焦　媛［十三郎嘅初戀情人，為佢放棄學業到上海］　　　　　
。梅　仙：蘇玉華
。薛覺先：梁漢威
。唐滌生：陳煥球
。講古組：馮蔚衡、高翰文、潘燦良、劉雅麗、楊英偉

舞台劇製作人員：
。導演：古天農、黃樹輝、高志森
。編劇：杜國威
。作曲：朱咪咪
。指導：許堅信［粵劇］
。布景：陳俊豪
。燈光：姚巧玉
。服裝：黃志強
。監製：高志森

＊＊

南海十三郎生平



南海十三郎，原名〔江譽鏐〕，1910年3月3日喺廣州出生，佢自稱〔江譽球〕，別字〔江楓〕，藝名〔南海十三郎〕，廣東南海縣人，係三十年代著名嘅年輕編劇家。佢係太史［江孔殷］嘅第六夫人杜氏所生嘅第十三仔，所以佢就有〔南海十三郎〕呢個藝名。佢亦係香港女影星［梅綺］嘅亞叔。

有傳話［十三郎］因為自幼失去母愛，又受到眾多庶母同埋異母兄弟嘅白眼，所以養成孤癖、反叛嘅性格，鍾意調皮搗蛋，周時攪攪震，但係又聰明過人，記性又好。




中學時代嘅［十三郎］就讀［南武中學］，但係因為調皮搗蛋嘅原因畀校長開除出校。但係十三郎喺嗰陣重未以戲劇為職業。去到20世紀30年代初，佢考入咗［香港大學］度讀醫科。後來，十三郎輾轉先至晉身入梨園，佢一開始就效力［覺先聲劇團］，重為［薛覺先］寫咗唔少經典嘅劇作。

1938年，廣州淪陷，十三郎繼續喺香港大寫抗日劇本。1940年，廣東省長李漢魂邀請［十三郎］去韶關，投入關德興［新靚就］嘅〔救亡粵劇團〕擔任編劇，當時改名號為［南海江楓］。1945年，年初，韶關淪陷，佢又同劇團走到去和平縣堅持演出。直至日本投降之後又返到香港，佢經常對人講嘅說話係：〔士可死，志不可屈。〕



畀人認為係〔恃才傲物〕嘅［十三郎］，喺創作事業如日方中嘅時候，佢批評香港某啲電影人嘅製作太過媚俗，有傷風化，因為咁而得罪咗一啲人，呢啲人話佢係〔傻佬〕，令致［十三郎］喺香港電影界無法立足，生活仲成為問題。



失落嘅［十三郎］，佢流連喺中環街頭，不過佢又經常出現喺［陸羽茶室］。薛覺先同梅綺（江孔殷嘅孫女，香港電影明星）都曾經收容過佢。但係後來因為神智失常，畀人送咗佢入青山醫院，晚年四處流浪，亦經常有好友關顧，最後因為普通科病患於瑪嘉烈院病死，終年74歲〔1984年5月6日〕。

＊＊

十三郎嘅老竇［江孔殷］喺私邸「太史第」門前留影！



江孔殷［1864年—1952年］，原名［鎬］，字［少泉］、［韶選］，號［百二蘭齋主人］，別號［霞公］，乳名［霞］，喺上海出世，籍貫廣東南海縣，出身於茶商世家，係晚清時期嘅政治人物，亦係一位美食家。佢考到過進士，登光緒三十年甲辰恩科殿試金榜［第二十七名］，入翰林院，被選用為［庶吉士］，所以啲人嗌佢做［太史公］。喺民國之後，開始從商。後嚟，又喺廣州河南［同德里］起大宅，人稱［太史第］，當時同好多革命人士有來往；佢亦自創過好多有名嘅菜式，譬如［太史蛇羹］、［龍虎鳳］、［太史豆腐］等等。

＊＊

粵劇名伶［薛覺先］



薛覺先，原名［薛作梅］，字［平愷］，廣東順德人，著名粵劇老倌，四大天王之一。薛覺先出身粵劇世家，十兄弟之中排行第五，二姐［薛覺芳］，三姐［薛覺非］同九弟［薛覺明］都係粵劇演員。

係［薛覺先］發掘咗［南海十三郎］嘅編劇才華。［十三郎］撰寫嘅《女兒香》係［薛覺先］嘅首本名戲。《心聲淚影》入面嘅《寒江釣雪》亦係薛腔名曲之一。

＊＊

南海十三郎姪女［梅綺］



梅綺，係［南海十三郎］嘅姪女，喺上世紀30年代經由［十三郎］引薦走入香港電影圈嘅，亦都成為當時得令嘅紅影星，又曾經參加過粵劇嘅演出。

＊［呢個係只係電影同舞台劇嘅講法］

梅綺，原名［江端儀］，原籍廣東省南海縣，1923年喺北京出生。亞爺係廣東太史公［江孔殷］，老竇係民國時期嘅國會議員，亞叔係粵劇名作家［南海十三郎］江譽鏐。

江端儀，容貌姣好，6歲時就開始客串做童星，演出《聰明笨伯》；1937年［14歲］時正式從影，改咗個藝名叫做［梅綺］。參演嘅第一部電影《百戰餘生》。 江端儀從影共23年時間，主演過70幾部影片。

1959年，江端儀宣布脫離影壇，之後將會專門做傳道工作，引起當時極大轟動。

1963年，江端儀喺香港創立［新約教會］，呢個亦係歷史上第一個發源喺香港嘅獨立教派。

＊＊

南海十三郎之迷［唐滌生］

唐滌生，原名［唐康年］，廣東香山［珠海唐家灣］人，喺黑龍江牡丹江出生，著名香港粵劇劇作家。

唐滌生喺1938年，加入唐雪卿［堂姐］同丈夫［薛覺先］嘅［覺先聲劇團］度做抄曲，開頭係跟［馮志芬］做助手。

馮志芬係廣東新會人，曾經喺廣州思恩中學做過教師。馮志芬喺1931年，做過編劇家梁夢嘅助手，幫手編撰名劇《火燒阿房宮》，之後加入薛覺先嘅［覺先聲男女劇團］擔任［開戲師爺］，曾經寫下《胡不歸》同《情僧偷到瀟湘館》等名作。

唐滌生入行初時得到［薛覺先］同［馮志芬］嘅指導，再加上自己苦心鑽研名家［薛覺先］、［南海十三郎］、［馮志芬］、［謝漢扶］等人嘅作品，亦透過［鄭孟霞］吸納京劇及舞蹈嘅元素，融會貫通，後來成為香港著名嘅粵劇編劇。

唐滌生嘅代表作有《牡丹亭驚夢》、《紫釵記》、《帝女花》等等......

1959年，唐滌生喺新作《再世紅梅記》首演時，因為腦溢血暈低喺觀眾席上，隨即送去法國醫院搶救，但係喺第二日不治，終年42歲。

有傳話，唐滌生係南海十三郎［江譽鏐］嘅徒弟。其實佢咃兩個人在生時都冇證實過呢件事，亦都未有其他資料引證到，比較多人知道嘅係由杜國威改篇嘅舞台劇同電影［南海十三郎］，將佢兩個串成係師徒。

舞台劇嘅部分情節同現實截然唔同，劇入面唐滌生拜十三郎為師，呢段情節未有史料證實，主要係杜國威為舞台劇嘅創作；劇入面十三郎係喺香港街頭鬱鬱而終，而事實上佢係喺精神病院病逝。

有認識生前嘅［十三郎］同［唐滌生］兩個人嘅朋友，話佢哋係朋友關係而唔係師徒，亦有鍾愛佢哋兩個人嘅朋友，又極力要去證實佢哋兩個係師徒關係。不過，到依家暫時連佢哋嘅一張合照都未有喺網絡上面出現過。

＊＊

南海十三郎．作品

呢位多才多藝嘅粵劇編劇家，一生編寫過百幾部劇本，最後留低一首由佢翻譯嘅［莎士比亞墓志銘］：

〔休將吾骨伴囂塵，黃土一抔葬此身；頑石有情充棺槨，千秋猶斥泯英魂！〕

＊＊

粵劇作品：

《心聲淚影》　　　（）

《寒江釣雪》　　　（）
《梨香院》　　　　（）
《七十二銅城》　　（）
《女兒香》　　　　（）
《梁紅玉》　　　　（）
《燕歸人未歸》　　（）
《李香君》　　　　（）

＊＊

電影作品：

《新女兒香》　　　（1953年，編劇）
《花街神女》　　　（1941年，編劇）
《趙子龍》　　　　（1940年，編劇、導演）
《夜盜紅綃》　　　（1940年，編劇、導演）
《一代名花花影恨》（1940年，編劇、導演）
《女兒香》　　　　（1939年，編劇、導演）
《最後關頭》　　　（1938年，編劇、導演）
《公子哥兒》　　　（1937年，編劇）
《百戰餘生》　　　（1937年，編劇、導演）
《萬惡之夫》　　　（1937年，編劇、導演）
《兒女債》　　　　（1936年，編劇、導演）

＊＊

蘭齋軼事：



有傳話［南海十三郎］曾經打電話［999］報警話畀人打劫，警察派人去到佢住嘅地方，當時十三郎住床位。佢同啲警察話畀人偷咗一雙鞋，警察問佢知唔知道係邊個偷咗，佢話知道，話係兩個人而且重係認識嘅添，但係又話啲警察一定唔敢拉佢哋，因為佢話左邊鞋係毛澤東偷咗，右邊鞋係蔣介石偷嘅。而南海十三郎［話劇］可能因為呢個講法政治敏感改為左邊鞋係日本人偷咗，右邊鞋係英國人偷嘅。

＊＊

《心聲淚影》之〔寒江釣雪〕

＊＊

南海十三郎［江楓］小傳。廣東話資料館

究竟〔八婆〕係點架？

究竟〔八婆〕係點架？

八婆，廣東人多數用嚟形容一啲［多管閒事］或者［搬弄是非］嘅女人，係一句帶有貶義嘅俗語。喺其他地區嘅華人社會裡面，呢種女人一般都係畀人叫佢做「長舌婦」。



［八婆］嘅來源就唔多確定嘞，都有好多種唔同嘅講法，而且呢啲講法都好難去追查佢嘅真實性。而最簡單嘅解釋，就係指［八婆］其實就係［鍾意諸事八卦同講事講非嘅女人］嘅簡稱。


另外，有一個講法，同［三姑六婆］有關嘅，就係指［三姑六婆］裡面嘅［六婆］再加上另外兩個［婆］，又或者係將［三姑］加埋［六婆］，即係九婆。但係又因為中間有兩個亞［婆］做嘅嘢係相同，所以又減咗一個就合稱為［八婆］。總之，都係形容一啲鍾意搞風搞雨講人是非嘅女人。

＊＊

三姑六婆：



三姑：係講三種唔同宗教嘅出家女人。
．尼姑：係佛教嘅僧侶，有人叫佢哋做〔施姑〕或者〔師姑〕。
．道姑：係道教嘅教徒，又有人叫佢哋做〔女道士〕。
．卦姑：係專門幫人占卦、算命、扶乩等嘅女人，有啲仲做埋［問米婆］添。

六婆：係以前六種職嘅名稱，有啲人重可以一身兼幾職。
．牙婆：係為做生意嘅人拉線搭橋嘅中間人（經紀），包括［販賣人口］在內。
．媒婆：係為人介紹對象同人相睇嘅女人，即係做〔媒人〕。　
．師婆：係幫人畫符施咒、請神、問鬼、占卜算命同埋打小人嘅［巫婆］。
．虔婆：係妓院裡面嘅［鴇母］，又叫做〔龜婆〕，依家啲人就叫〔媽媽生〕或者〔媽咪〕。
．藥婆：係賣藥、執藥同幫人煲藥嘅女人。好似牙痛藥、安胎藥同落仔藥。
．穩婆：係幫人做接生嘅［接生婆］，又即係〔執媽〕。


又有另外嘅一個講法，就係話［八婆］呢個詞係源於開埠初期一個叫［朱燕］嘅女人。呢個朱燕喺屋企排行第八，人稱［八婆］，佢係香港富商何東家族嘅一個女工人，後嚟因為畀人發現佢將何東家族嘅秘密［資料］賣畀英國人，畀當時嘅華人指責，於是泛稱［多管閒事］，［唔守秘密］同［出賣朋友］等等嘅女人就叫［八婆］。


亦又有人話，［八婆］呢個叫法，係源於每年嘅三月八日［婦女節］。

佢哋話因為婦女節喺三月嘅第［八］日，所以話啲［婦女］即係［三八］，三八又即係［八婆］咁話喎，講嗰個緊係有啲嫌命長。


香港人通常講嘅［八婆］，同台灣人一般稱呼嘅［三八］係有啲唔一樣，因為佢哋指嘅［三八］，其實係嗰啲［腥腥作態］、［舉止輕浮］、［表現虛偽］嘅女人。

＊＊

香港語文。廣東話資料館