結義金蘭〔七公主〕

香港喺1960年代正值係粵語片嘅豐盛時期，喺嗰個年頭影壇上出現咗唔少巨星。當年喺影星之間都比較著重［情義］，而當時亦好盛行拜師、上契、結拜同結義金蘭。因為咁，片場上經常出現好多個組合，例如有［十二金釵］、［十兄弟］、［九大姐］、［八牡丹］、［七公主］等等。而當中最成功嘅，都要算係［七公主］嘞！

七公主係粵語片時期，七位著名上契結拜粵語片女演員嘅稱號，而大部分嘅成員都係大紅大紫。七公主成員依次序係馮素波、沈芝華、陳寶珠、蕭芳芳、薛家燕、王愛明同埋馮寶寶。雖然只有馮素波同馮寶寶係親姐妹，其他都係結義金蘭，但係佢哋彼此嘅感情亦相當好。



馮素波［大公主］
出生於演藝世家，父馮峰係1960年代粵語電影演員同埋導演，佢同父異母嘅細妹馮寶寶係60年代著名嘅香港天才童星同80年代電視演員，細佬馮克安亦係70至80年代功夫電影演員兼武術指演，馮克安曾經喺電影《功夫》裡面飾演［地殘］嘅角色。

沈芝華［二公主］
1960年代香港粵語片演員，佢係最早退出演藝事業嘅一位。

陳寶珠［三公主］
著名嘅粵劇演員同電影演員，有［影迷公主］之稱，出身自粵劇世家，係粵劇名伶陳非儂、宮粉紅嘅養女，師傅任劍輝更係香港粵劇史上最受歡迎嘅［女文武生］，亦係［銀壇鐵漢］曹達華嘅契女。

蕭芳芳［四公主］
佢6歲開始做童星，7歲嗰年接演咗第一部電影，係1954年拍攝嘅文藝片《小星淚》。1956年為邵氏公司演出《梅姑》，從此就聲名大噪。蕭芳芳囓成名作就係1960年嘅《苦兒流浪記》。後來又拜京劇武旦粉菊花為師，曾經同陳寶珠同台演出過京劇。

薛家燕［五公主］
自細就學習粵劇唱腔、南拳北腿同埋芭蕾舞。8歲嗰年得到製片家賞識，邀請佢參加電影《七兒八女九狀詞》嘅演出，從此就踏進漫長嘅演藝生涯。

王愛明［六公主］
係1960年代嘅童星，4歲就得過［金禾獎］。之後加入無線電視，同汪明荃、沈殿霞、張德蘭組成［四朵金花］，呢個係夜晚綜藝節目《歡樂今宵》入面嘅一個歌舞組合。

馮寶寶［細公主］
由兩歲半出道至依家，其中由6歲至9歲係佢最紅嘅童年時期。馮寶寶拍攝超過200部電影，係兩岸三地、世界華人電影史上拍電影數量最多嘅童星，喺全球華人地區都有廣泛嘅知名度。



＊＊



1964年，［影壇七公主］馮素波、沈芝華、陳寶珠、蕭芳芳、薛家燕、王愛明同馮寶寶喺當時環境推動下，結成金蘭姊妹。



1985年，七公主第二次齊集，佢哋唔係經常見面，但係感情深厚，今次再聚，唔少公主嘅下一代都已經成家立室。



1998年，七公主第三次齊集，當時相約喺陳寶珠屋企聚首一堂。



2018 年，今次六公主難得見面，齊集喺蕭芳芳屋企打邊爐，一齊話當年，可惜七妹馮寶寶身喺大馬休養未能參與。



＊＊

同時期結誼嘅演員導演重包括：

　七兄弟：麥先聲、尤聲普、潘有聲、陳玉郎、雲展鵬
　　　　　黎家寶、文千歲

　八牡丹：鳳凰女、鄧碧雲、羅艷卿、余麗珍、吳君麗
　　　　　于素秋、南　紅、林　鳳

　九大姐：任冰兒、朱日紅、金影憐、許卿卿、黎坤蓮
　　　　　英麗梨、李香琴、梁素琴、譚倩紅

　十兄弟：司馬華龍、林魯岳、金雷、林　甦、高　超
　　　　　朱由高、陳耀林、譚　天、曾楚霖、胡凱欣

　十大導：黃　岱、莫康時、龍　圖、胡　鵬、馮志剛
　　　　　李　鐵、吳　回、黃鶴聲、盧雨岐、珠　璣

十二金釵：黃曼梨、馬笑英、陳皮梅、容玉意、李月清
　　　　　黎　雯、甘　露、黎灼灼、李倩顰、高偉蘭
　　　　　徐　意、鄭雯霞

＊＊

1980年代［當年的社會］

小莫小於水滴，匯成大海汪洋；細莫細於沙粒，聚成大地四方.........

＊＊

香港粵語片。廣東話資料館