香港［茶餐廳］術語

以前，喺茶餐廳做嘢嘅伙記，咩嘢地方嘅人都有，做嘢嗰陣重要係〔落單唔好急最緊要快〕嘅要求。所以，基本上好多都唔會寫到正寫字架嘞，同時喺餐牌度亦會有好多錯別字，重有係間間茶餐廳都可能會有唔同嘅叫法同寫法。呢啲嘢，去得茶餐廳嘅，就真係唔好見怪嘞。

＊＊———————————————————————————————

以下內容只供參考，歡迎提供資料修正。

＊＊———————————————————————————————



＊＊———————————————————————————————

飲品篇：［一般嘅嘢飲］

　　６　：可樂〔汽水〕
　　７　：七喜〔汽水〕
　　８　：芬達〔汽水〕　
　　９　：忌廉〔汽水〕
１０６　：凍檸檬可樂〔０６／１０６〕
１０７　：凍檸檬七喜〔０７／１０７〕
２０６　：熱檸樂
３０６　：檸檬可樂加薑
　２９　：熱鮮奶
　９Ｔ　：奶茶［nine tea］
　ＯＴ　：熱檸檬茶
　Ｃ９　：鮮奶〔西餐廳多用Ｃ〕
ＣＯＴ　：凍檸檬茶
ＣＯ６　：凍檸檬可樂
ＣＯ７　：凍檸檬七喜
　　Ｔ　：奶茶
　ＣＴ　：凍奶茶
Ｃ９Ｔ　：凍奶茶〔師奶茶〕
乃　Ｔ　：奶茶
熱　茶　：熱紅茶
孖　Ｔ　：兩杯奶茶
冬　Ｔ　：凍奶茶
涼　茶　：凍奶茶
廿四味　：黑咖啡
　　非　：熱咖啡〔西餐廳多用Ｆ〕
冬　非　：凍咖啡［有啲寫：東非］
　　央　：熱鴛鴦
冬　央　：凍鴛鴦
　　田　：熱阿華田
冬　田　：凍阿華田
　　力　：熱好立克
冬　力　：凍好立克
茶　走　：唔要砂糖，唔要淡奶，改加煉奶嘅奶茶
啡　走　：〔同上〕，改加煉奶嘅咖啡　
田　走　：〔同上〕，改加煉奶嘅阿華田
肥　妹　：朱古力
敗家仔　：阿華田〔賣田賣地，所以叫敗家〕
汪阿姐　：熱咖啡
齋　啡　：咖啡唔加糖同奶
飛沙走奶：唔要糖唔要奶
飛沙走石：冇糖冇冰
和尚跳海：滾水蛋
肥妹奶　：熱朱古力奶
爆　轆　：冰檸檬水
走　冰　：凍飲唔要冰
走　雪　：凍飲唔要雪
少　甜　：飲品唔要太多糖水
少　田　：少甜〔同上〕
雪　櫃　：可樂［雪櫃點可以冇可樂］
大　青　：大樽裝青島啤酒
大　力　：大樽裝喜力啤酒
大　妹　：大樽裝藍妹啤酒
女　人　：藍妹啤酒
情　人　：［同上］
甩　色　：檸檬水〔因為檸檬茶係有顏色嘅，而檸檬水係透明嘅〕
爆　雪　：加冰／加雪
爆　檸　：凍檸茶加冰
走　糖　：唔加糖
走　田　：走甜〔唔加糖〕
例　水　：洌湯
淨　水　：洌湯只要湯水〔唔要湯料〕

＊＊———————————————————————————————



＊＊———————————————————————————————

食物篇：［一般嘅嘢食］

靚　仔　：白飯
靚　女　：白粥
米　王　：白粥［白米粥］
　　妹　：　粥［潮州話：糜］
下　火　：皮蛋瘦肉粥
擺　尾　：魚片粥
　　灣　：艇仔粥
　　菜　：牛肉粥
　　腸　：豬腸粉
油　條　：油炸鬼
炸　面　：炸麵［油炸鬼］
炸　兩　：腸粉包油炸鬼〔切件〕
細　蓉　：鮮蝦餛飩麵
細　蛹　：餛飩麵
雲吞面　：餛飩麵
羅　友　：菠蘿油〔酥皮菠蘿包加牛油〕
籮　柚　：菠蘿油
蛋河／面：魚蛋河粉／麵
南河／面：牛腩河粉／麵
什河／面：牛什河粉／麵
餐蛋麵　：午餐肉煎蛋麵〔即食麵〕
蛋牛麵　：煎蛋牛肉麵〔即食麵〕
腿　通　：火腿配湯通粉
牛　意　：牛肉配湯意粉〔配料也可因人而異〕
西　多　：西多士〔法式多士簡稱〕
夏惠姨　：西多士〔？？〕
烘　底　：烘烤過嘅麵包
生　春　：太陽蛋
孖　春　：雙蛋
熟　春　：熟蛋
反　春　：三文治用嘅雞蛋
飛　邊　：切去麵包皮
攔　住　：雞蛋三文治〔攞個諧音，貪順口嘅稱呼〕
攬　住　：〔同上〕又叫：床板夾春
隊　住　：火腿三明治
隊Ｑ住　：火腿雞蛋三明治
未嘔住　：鹹牛肉三明治
加　色　：喺飯上面加上少少牛腩汁／豉油
加　馬　：［加碼］飯或麵加份量
加　底　：雙倍嘅飯或者麵
扣　底　：一般用喺碟頭飯類嘅菜式，意思係飯減份量
雙　扣　：料、飯都減份量
孖　扣　：〔同上〕
走　青　：唔要蔥同芫茜
走　色　：唔要豉油或者肉汁
多　色　：加豉油或者肉汁
加　色　：〔同上〕又可用喺要喺麵湯上面加牛腩汁
制　水　：乾炒牛河〔制水即無水，乾塘，引伸至乾河〕
食　丁　：係客人要求將即公仔麵轉成出前一丁
打　爛　：炒飯〔因為要打爛隻雞蛋來做炒飯〕
炒　底　：白飯轉炒飯〔碟頭飯底由白飯轉為炒飯，要另外加錢〕
兜　亂　：碟頭飯上碟前先將餸同底撈埋
黑　汁　：黑胡椒汁
白　汁　：忌廉蘑菇汁
紅　湯　：羅宋湯或者意大利菜湯
白　湯　：磨菇忌廉湯或者周打魚湯
燒　衣　：乾燒伊麵
滾　水　：例湯
印度老舉：叉雞
老舉皇后：貴妃雞
鬼佬肉　：咕嚕肉
包　公　：鮑魚公仔麵〔即食麵〕
黑　面　：〔同上〕
玻　璃　：生菜〔原本係街市用語〕
誓　願　：生菜〔因為俗語有句：誓願當食生菜〕
上　池　：死魚［唔新鮮嘅魚］

＊＊———————————————————————————————



＊＊———————————————————————————————

其他嘢：［一般嘅術語］

行　街　：外賣
拍拖行街：送兩份附近地址嘅外賣
有　腳　：外賣
堂　食　：喺餐廳入面度食
單　收　：客人離開時伙記通知櫃檯有人會攞單出來找數
嗱　住　：代表數目５嘅意思
嗱住嗱住：代表數目１０嘅意思
禮拜蚊　：７蚊〔即埋單嘅價錢係７元〕
禮拜五　：７個半［７元５角］
打　鐵　：冇畀貼士
跟　餐　：飲品／湯／麵包等〔主要係飲品〕
搭　檯　：併桌〔唔認識嘅坐埋一張檯〕
師　傅　：味精〔飯餱要好味，一定搵師傅〕
開　面　：用刀／枮板
埋　面　：用鑊／鑊鏟
打　貓　：偷食［廚房用語］
射　波　：詐病［廚房用語］
水　吧　：沖奶茶，整蛋治嗰啲位置
揸　差　：總廚
將　軍　：飯堂廚師
頭　門　：頭鑊
尾　門　：後鑊
一　鑊　：喜宴菜餚師傅［十幾年功夫大師傅］
二　鑊　：炒晚市小菜師傅
三　鑊　：炒午市粉麵飯師傅
上　什　：高級學徙
打　什　：乜都要學做
執　碼　：客人落order到廚房，啲細嘅睇單執料
打　河　：企炒鍋大廚旁，幫手遞汁醬油上碟抺汗
水　臺　：砧板，中西餐各有唔同，大細高低級數
３　砧　：頂水檯，執單，切料頭，醃野，改生口［中菜］
２　砧　：執單，醃野，改生口［中菜］
頭　砧　：周圍幫，落貨執單改生口等［中菜］；海鮮貴價貨［西廳］
尾　砧　：下難野，切肉切蔥［西廳］

＊＊———————————————————————————————

 

＊＊———————————————————————————————

譯：蕭南仁．2016年6月22日

＊＊———————————————————————————————

香港經濟日報 TOPick［2015.11.20］
Topick.hket.com 香港茶餐廳術語 你識幾多個？
香港茶餐廳術語 你識幾多個？茶餐廳係香港飲食文化嘅代表，佢嘅發展過程更衍生出獨特嘅茶餐廳專用術語，「一個靚仔，兩個靚女，加個夏蕙姨 」有啲咩特別意思呢？

＊＊———————————————————————————————

術語連篇。廣東話資料館