慢慢失傳的「廣東話童謠」！

慢慢失傳的「廣東話童謠」！

粵語〔廣東話〕童謠，好多都係普羅大眾嘅創作，約定俗成，喺傳唱嘅過程入面會出現唔同嘅版本，但係無人會規定邊個先至係〔權威〕嘅版本。

隨著1949年大批移民嚟到香港，香港地區就繼承咗好多華南地區嘅童謠，好似〔月光光〕、〔賣懶〕等等。到咗1970年代尾，日本卡通喺香港嘅電視台播出，同埋當時社會嘅需求，好多新嘅粵語兒歌湧現，例如〔小時候〕、〔飄零燕〕等等。

不過，亦有一啲粵語童謠到依家重保持住頑強嘅生命力。

＊＊

〔月光光〕維也納兒童合唱團 2017［RHK31］



月光光，照地堂，蝦仔你乖乖瞓落床。聽朝阿媽要趕插秧囉，阿爺睇牛佢要上山崗。蝦仔你快高長大囉，幫手阿爺去睇牛羊。月光光，照地堂，蝦仔你乖乖瞓落床。聽朝阿爸要捕魚蝦囉，阿嫲織網要織到天光。蝦仔你快高長大囉，划艇撒網就更在行。月光光，照地堂，年三十晚，摘檳榔，五穀都豐收堆滿倉囉，老老嫩嫩都喜喜洋洋。蝦仔你快啲眯埋眼囉，一覺瞓到大天光。

＊＊

〔月光光〕
月光光，照地堂；年卅晚，摘檳榔；檳榔香，嚼紫薑；紫薑辣，買蒲達；蒲達苦，買豬肚；豬肚肥，買牛皮；牛皮薄，買菱角；菱角尖，買馬鞭；馬鞭長，起屋樑；屋樑高，買張刀；刀切菜，買籮蓋；籮蓋圓，買條船；船浸底，浸親兩個番鬼仔；一個蒲頭，一個浸底；一個摸茨菇，一個摸馬蹄。

＊＊

〔點蟲蟲〕
點蟲蟲，蟲蟲飛，飛到荔枝基；荔枝熟，摘邊樸，邊樸啖啖肉。

〔點蟲蟲〕
點蟲蟲，蟲蟲飛，飛到荔枝基。荔枝熟，無埞僕，撲落阿仔個鼻哥。

〔點蟲蟲〕
點蟲蟲，蟲蟲飛，飛到荔枝基。荔枝熟，摘滿屋，屋滿紅，陪住個細蚊公。

＊＊

〔排排坐〕
排排坐，食粉菓；豬拉柴，狗透火；貓兒擔凳姑婆坐；坐埋一齊唱支歌。

〔排排坐〕
排排坐，食菓菓。豬拉柴，狗燒火。貓兒擔凳姑婆坐，坐爛屎窟咪賴我。

＊＊

〔凼凼轉〕
凼凼轉，菊花園，炒米餅，糯米糰，亞媽叫我睇龍船，我唔睇，睇鷄仔，鷄仔大，攞去賣，賣得幾多錢？賣得三百錢，返嚟買屋又買田。

〔凼凼轉〕
凼凼轉，菊花園，炒米餅，糯米糰。亞媽叫我睇龍船，我唔睇，睇雞仔．雞仔大，捉去賣，賣到幾多錢？賣到三百錢。一百打金釵，二百打銀牌，今朝戴，明朝戴，請個婆婆出嚟拜，拜得多，冇奈何，三酲酒，兩隻鵝，鵝頭鵝尾送畀大妗婆。大妗婆唔起屋，送畀三叔。三叔騎膊馬，老鼠拉冬瓜．．．

〔凼凼轉〕
凼凼轉，菊花園；炒米餅，糯米糰；五月初五要去睇龍船；我唔去睇，要去睇雞仔；雞仔大，搦去賣；賣咗幾多錢？賣咗幾多隻？我買咗隻風車仔，佢轉得好好睇，睇佢凼凼轉啊菊花園，睇佢凼凼轉啊凼凼轉啊轉。

＊＊

〔大頭綠衣〕
ＡＢＣＤ，大頭綠衣；捉人唔到，吹ＢＢ。

＊＊

〔水浸街〕
落雨大，水浸街，亞哥擔柴上街賣，亞嫂出街著花鞋，花鞋花襪花腰帶，珍珠蝴蝶兩邊排。

〔水浸街〕
落雨大，水浸街。亞哥擔柴上街賣，亞嫂教我做花鞋。花鞋花襪花腰帶，一串珍珠兩邊排。

＊＊

〔落雨大〕
落雨大，去睇燈，唔見花鞋共手巾，邊個執到畀番我，買盒細茶謝你恩。
果條手巾唔打緊，果對花鞋值萬銀。鞋頭種得三竿竹，鞋尾種得一籮薑。

＊＊

〔落雨溦溦〕
落雨溦溦，水浸田基，田基有條蛇，嚇親大老爺，老爺有支槍，打親扎腳娘。

＊＊

〔賣懶〕
賣懶，賣懶，賣到年卅晚，人懶我唔懶。

〔賣懶〕
賣懶去，買精歸，賣左懶仔過新年，食過年飯好種田。

＊＊

〔瀨尿蝦〕
攋尿蝦，煮冬瓜，煮唔熟，賴亞媽。

＊＊

〔瀡滑梯〕
細蚊仔，瀡滑梯，因住跌落嚟，咪學陳德貴，成日流鼻涕，跌親籮柚唔好睇。

＊＊

［好似你噉樣］
河邊有隻羊，羊邊有隻象，象邊有隻馬騮仔，好似你噉樣。

＊＊

〔咬蔗鬚〕
咬蔗鬚，要睇毛，短毛輸，長毛贏，冇毛唔算數。

＊＊

〔鬥柑〕
搣開柑，數柑核，邊個核多就邊個贏，唔准手賴就噉縮骨。

＊＊

〔拍大髀〕
拍大髀，唱山歌，人人話我冇老婆，扚起心肝娶返個，有錢娶個嬌嬌女，冇錢娶個豆皮婆。豆皮婆，食飯食得多，屙屎屙兩籮，屙尿沖大海，屙屁打銅鑼。

＊＊

〔猜呈沉〕
呈沉磨鉸义燒包，老鼠唔食豆沙包。

〔猜呈沉〕
呈沉剪，呈沉揼，呈沉糯米扠燒包；老鼠唔食香口膠，老鼠要食豆沙包。

＊＊

〔點指兵兵〕
點兵兵，點賊賊；點著邊個做大兵，點著邊個做大賊。

〔點指兵兵〕
點指兵兵，點指賊賊，點著誰人做大兵，點著誰人做大賊。

＊＊

〔點豬包包〕
點豬包包、菠蘿顦顦，唔係捉豬就捉牛，捉到黃牛三百兩，馬尾豬肝炒韭菜，一人夾枝就行開，行到恁頭跌落水溝渠！

＊＊

〔估手指〕
估手指，要估中，邊個吾中，就吾中用，褲浪底見個窿。

＊＊

〔騎牛牛〕
騎牛牛，牛牛走，牛牛響前咪回頭，若然回頭就打籮柚。

＊＊

〔打波子〕
大眼鷄，鹹魚頭，你屙尿，唔洗手。

＊＊

〔轆銅仙〕
轆銅仙，打銅錢，全憑眼界手出變，叮響銅錢畀個仙。

＊＊

〔打泥炮〕
打泥炮，泥炮響，唔使摣槍上戰場。

＊＊

〔麻鷹飛〕
摺紙機，麻鷹飛，飛來飛去唔落地，麻鷹有條尾。

＊＊

〔趌跛跛〕
趌跛跛，跳跳腳，咚咚咚，上跳下跳似麻雀。

＊＊

〔撞跛腳〕
趌跛跛，跛咗蹄，冇米煮，煮泥沙，冇屋住，住樓梯，樓梯有隻鬼，嚇到瓹落牀下底。

＊＊

〔頂手掌〕
伸長手，頂手掌，死人都要頂硬上，咿牙崩哨就貓噉樣。

＊＊

［劈友〕
劈友，劈友，快啲走，走得快，好世界，走得嚤，冇鼻哥。

＊＊

〔鬥遠〕
鬥遠掟石頭，因住咪甩手，石頭最冇眼，掟親唔好眼淚流。

＊＊

〔掟磚頭〕
掟磚頭，鬥大嚿，一掟掟到西門口，濺起浪花拋浪頭。

＊＊

〔撈魚仔〕
花手巾，真引人，基邊撈魚好過癮，一兜一條好手運，千祈唔好踎到你頭暈。

＊＊

〔黐塘尾〕
黐塘尾，塘尾飛，飛到菜田基，田基有條蛇，嚇親兩仔爺。

＊＊

〔騎膊馬〕
一人騎膊馬，兩人騎豬乸，三步要埋頭，撞到面就打。

＊＊

〔鬥辣椒〕
紅辣椒，綠辣椒，平時你牙擦嘴藐藐，今日你冇膽同我撩。

＊＊

〔貪心鬼〕
鬼叫你咁貪心，聞咗我個屁，嗍咗入個鼻，我要你賠翻二兩四。

＊＊

〔眛水底〕
眛水底，摸泥沙，摸到泥沙當金龜，摸唔到係契弟。

＊＊

［陳德貴］
陳德貴，住得矮，床下底有只鬼，嚇到嗊抬底。

＊＊

〔童子軍〕
童子軍，食雲吞，打爛碗，賠十蚊，冇錢賠，要坐監。

＊＊

〔肥婆跳舞〕
一二三，三二一，肥婆跳舞頂第一！

〔肥婆跳舞〕
一二三四五六七，肥婆跳舞頂第一，跳得高褲頭甩，跳得矮唔好睇。

＊＊

〔做大戲〕
黑面李逵，紅面關公，三國水滸亂晒龍，打敗清兵係英雄。

＊＊

〔乞兒仔〕
乞兒仔，畫烏龜，一人一筆咪亂嚟，最後嗰個正衰仔！

＊＊

〔吹你唔脹〕
搨薑，剪薑，吹你唔脹，掹你唔長。

＊＊

〔去打仗〕
大笨象，揸支槍，去打仗，打完仗，返嚟食碗鹹酸薑。

〔去打仗〕
大笨象，揸支槍，去打仗，打唔贏，返嚟食碗辣椒醬。

＊＊

〔燒炮仗〕
隔籬屋企燒炮仗，問你燒得響唔響，唔響掌你兩巴掌。

＊＊

［有隻雀仔跌落水］
有隻雀仔跌落水，跌落水，跌落水，有隻雀仔跌落水，被水沖去。

＊＊

〔肥仔個頭〕
肥仔個頭，大過五層樓，肥仔隻手，細過荷蘭豆。

＊＊

〔條街黑咪蚊〕
條街黑咪蚊，條街黑咪蚊，條街黑到鬼都怕。道路飛石走沙，臭到金羅殿下，係人係鬼都怕，嚇走個摩羅差。

＊＊

〔跳橡筋〕
小皮球，香蕉油，那兒開花一十一，一五六，一五七，一八一九二十一，二五六，二五七，二八二九三十一，三五六，三五七，三八三九四十一，四五六，四五七，四八四九五十一，五五六，五五七，五八五九六十一，六五六，六五七，六八六九七十一，七五六，七五七，七八七九八十一，八五六，八五七，八八八九九十一，九五六，九五七，九八九九一百零一。

＊＊

〔煮飯仔〕
煮飯仔，先落米，風爐透火柴對齊，千祈唔好咁拿篩，我哋都係細蚊仔。

＊＊

〔鷄公仔〕
鷄公仔，尾彎彎，做人新婦甚艱難！早早起身都話晏，眼淚唔乾入下間，下間有個冬瓜仔，問安人老爺煮定蒸，安人又話煮，老爺又話蒸，蒸蒸煮煮唔中安人老爺意，大喳嚹鹽又話淡，手甲挑鹽又話鹹，三朝打爛三條夾木棍，四朝跪爛四條銹花裙！咁好花裙畀你跪爛，咁好石頭畀你跪崩！橫又難，直又難，不如捨命落陰間！人話陰間條路好，我話陰間條路好艱難！

＊＊

〔曖姑乖〕
曖姑乖，曖姑大，曖大姑乖嫁後街，後街又有乜嘢賣？後街有鮮魚鮮肉賣，又有鮮花戴，戴唔晒，擺落牀頭又怕老鼠拉。

＊＊

〔蘿蔔頭〕
蘿蔔頭，點豉油，點得多，鹹過頭，點得少，淡茂茂。佢以爲，好正斗，點不知，畀人踢籮柚，一踢踢到西門口。

＊＊

〔數字歌〕
一加一，二叉二，三加三，四等四，五加皮，六［淥］死你，七隻馬騮有八條尾，九龍醫院唔收你，十個肥婆送畀你！

＊＊

大家識得唱幾多？要代代相傳呀！

＊＊

圖：DingDing Christine
編：蕭南仁．2014年4月18日
原：消失的世界．廣東話資料館

＊＊

〔Ｑ太郎〕1972年。張德蘭

人人話真心鍾意他，人人話真心鍾意，咁先開心啦，佢令我地開心歡笑真真誇啦啦！生得真鬼馬，最怕冇大牙，Wow Wow 都好怕 Sa La La，唔同常人冇頭髮，剩係生出三個叉，Ｑ太郎，Ｑ太郎有你冇有怕；Ｑ太郎，Ｑ太郎係我地好朋友黎架！

＊＊

廣東話童謠。廣東話資料館

家族親戚關係稱呼表〔廣東話版〕

喺華人嘅傳統文化入面，〔親戚〕或者〔親屬〕，係指因為有〔婚姻〕或者〔血緣〕同人類個體連成嘅社會關係，父母、兄弟姊妹等等嘅〔親屬〕又叫〔親人〕或者〔家人〕，其他嘅就叫做〔親戚〕。

親屬關係嘅記錄最早係先秦嘅典籍［爾雅］第四章嘅〔釋親〕。古代唐朝學者孔穎達對親戚嘅註解係〔親指族內，戚言族外〕，所謂〔族內〕係指父系同宗嘅人，以男性為中心，包括宗族內嘅男性同佢哋嘅配偶，但係唔包括已經出嫁咗嘅女性同佢哋嘅配偶。

到咗現代，有專家就將依家嘅人嘅親戚或親屬關係分為〔血親〕、〔姻親〕同〔配偶〕。

＊＊

＊〔血親〕

直系血親：［父系］

　　〔鼻祖〕－〔始祖〕始創人。
　　　　　　－係祖宗十八代嘅嘅第一代。
　　〔遠祖〕－〔始祖〕接班人。
　　〔太祖〕－〔係指曾祖嘅曾祖嘅父母〕。
　　〔列祖〕－〔列祖列宗〕，就係呢一個嘞！
　　〔天祖〕－〔係指阿爺嘅阿爺嘅父母〕。
　　〔高祖〕－〔父系〕太太爺，太太嫲〔高祖父母〕。
　　　　　　－〔母系〕太太公，太太婆〔外高祖父母〕。
太爺〔曾祖〕－〔父系〕太爺，太嫲〔曾祖父母〕。
　　　　　　－〔母系〕太公，太婆〔外曾祖父母〕。
阿爺〔　祖〕－〔父系〕阿爺／爺爺，阿嫲／嫲嫲〔祖父母〕。
　　　　　　－〔母系〕阿公／公公，阿婆／婆婆〔外祖父母〕。
阿爸〔父親〕－老竇，老頭子，爸爸，爹哋。
阿媽〔母親〕－老母，老媽子，媽媽，媽咪。
阿仔〔兒子〕－父母之下男性嘅第一代。又叫〔仔〕、〔囝〕。
阿女〔女兒〕－父母之下女性嘅第一代。又叫〔女〕、〔囡〕。
　孫〔孫兒〕－父母之下男女嘅第二代。
　　　　　　　依性別又分〔孫仔〕、〔孫女〕。
　　　　　　　有時候〔孫〕係一種唔分性別嘅稱呼。
　息〔曾孫〕－父母之下嘅第三代，又叫〔重孫〕。
　　　　　　　廣東話通常讀〔室〕。
　　〔玄孫〕－父母之下嘅第四代。
　　〔來孫〕－父母之下嘅第五代。
　　〔昆孫〕－父母之下嘅第六代，又叫〔晜孫〕。
　　〔仍孫〕－父母之下嘅第七代。
　　〔雲孫〕－父母之下嘅第八代。
　　〔耳孫〕－父母之下嘅第九代。

＊＊

旁系血親：［父系長輩］

阿伯〔伯父〕－仔女對阿爸嘅阿哥嘅稱呼。
　　　　　　　大哥叫〔大伯〕，二哥叫〔二伯〕，三哥叫〔三伯〕...
阿姆〔伯母〕－仔女對阿伯嘅老婆嘅稱呼。
　　　　　　　通常叫〔伯娘〕，又有分〔大伯娘〕，〔二伯娘〕，〔三伯娘〕...
阿叔〔叔父〕－仔女對阿爸嘅細佬嘅稱呼。
　　　　　　　通常叫〔叔叔〕，又有分〔二叔〕，〔三叔〕...〔細叔〕。
阿嬸〔嬸母〕－仔女對阿叔嘅老婆嘅稱呼。
　　　　　　　通常叫〔嬸嬸〕，又有分〔二嬸〕，〔三嬸〕...〔細嬸〕。
阿姑〔姑姑〕－仔女對阿爸嘅姐妹嘅稱呼。
　　　　　　　姐姐叫「姑媽」，妹妹叫「姑姐」。
姑丈〔姑父〕－仔女對姑媽同姑組嘅老公嘅稱呼，都係一樣咁叫法。

＊＊

旁系血親：［母系長輩］

舅父〔舅舅〕－仔女對阿媽嘅兄弟嘅稱呼。
　　　　　　　又有分〔大舅父〕，〔二舅父〕，〔三舅父〕...〔細舅父〕。
　　　　　　　如果佢嘅年紀比自己細嘅就叫〔舅父仔〕。
妗母〔舅母〕－仔女對舅父嘅老婆嘅稱呼。有啲人會叫〔舅媽〕。
阿姨〔姨姨〕－仔女對阿媽嘅姐妹嘅稱呼。
　　　　　　　姐姐叫〔姨媽〕，妹妹叫「阿姨」或者〔姨姨〕。
姨丈〔姨父〕－仔女對姨媽同阿姨嘅老公嘅稱呼。都係一樣咁叫法。

＊＊

旁系血親：〔自己同輩〕

親〔兄弟姐妹〕－仔女對父母嘅仔女嘅稱呼。又叫〔兄弟姊妹〕。
　　　　　　　　係指有相同〔父親〕同〔母親〕嘅人。
堂〔兄弟姐妹〕－仔女對父系旁系血親長輩〔伯、姆、叔、嬸〕仔女嘅稱呼。
　　　　　　　　有啲地方喺講嘢同介紹嘅時候係唔講個「堂」字。
表〔兄弟姐妹〕－仔女對父系旁系血親長輩〔姑〕仔女嘅稱呼。
　　　　　　　　對母系旁系血親長輩〔舅、妗、姨〕仔女嘅稱呼。

＊＊

旁系血親：〔自己晚輩〕

侄　〔仔女〕－兄弟對兄弟嘅仔女嘅稱呼。
　　　　　　　男嘅叫〔侄仔〕，女嘅叫〔侄女〕。
姪　〔仔女〕－姐妹對兄弟嘅仔女嘅稱呼。
　　　　　　　男嘅叫〔姪仔〕，女嘅叫〔姪女〕。
外甥〔仔女〕－兄弟對姐妹嘅仔女嘅稱呼。
　　　　　　　男嘅叫〔外甥〕，女嘅叫〔外甥女〕。
姨甥〔仔女〕－姐妹對姐妹嘅仔女嘅稱呼。
　　　　　　　男嘅叫〔姨甥〕，女嘅叫〔姨甥女〕。

＊＊

＊〔姻親〕

家公〔公公〕－老婆對老公嘅阿爸嘅稱呼。
　　　　　　　又叫〔家翁〕，有時直叫〔阿爸〕，有啲地區又叫〔老爺〕。
家婆〔婆婆〕－老婆對老公嘅阿媽嘅稱呼。
　　　　　　　又叫〔家姑〕，有時直叫〔阿媽〕，廣東地區又叫〔奶奶〕。
外父〔岳父〕－老公對老婆嘅阿爸嘅稱呼。
　　　　　　　有時直叫〔阿爸〕或者〔嗲哋〕。
外母〔岳母〕－老公對老婆嘅阿媽嘅稱呼。
　　　　　　　有時直叫〔阿媽〕或者〔媽咪〕。
新婦〔媳婦〕－父母對阿仔嘅老婆嘅稱呼。
　　　　　　　廣東話通常係讀〔新抱〕或者〔心抱〕。
女婿〔女婿〕－父母對阿女嘅老公嘅稱呼。

阿嫂〔兄嫂〕－細佬細妹對阿哥嘅老婆嘅稱呼。
　　　　　　　大哥嘅叫〔大嫂〕，二哥嘅叫〔二嫂〕，三哥嘅叫〔三嫂〕...
弟婦〔弟媳〕－阿哥家姐對細佬嘅老婆嘅稱呼。
姐夫〔姊夫〕－細佬細妹對姐姐嘅老公嘅稱呼。
　　　　　　　大姐嘅叫〔大姐夫〕，二姐嘅叫〔二姐夫〕，三姐嘅叫〔三姐夫〕...
妹夫〔妹婿〕－阿哥家姐對妹妹嘅老公嘅稱呼。

＊＊

姻親：〔妯娌〕

妯娌，係兄弟嘅老婆之間嘅互相稱呼或者合稱。
輩份大嘅妯娌會直接叫細嘅妯娌嘅名，對外人介紹就講：佢係我嘅〔細嬸〕；
輩份細嘅妯娌會稱呼大嘅妯娌做〔阿嫂〕或〔大嫂〕，對外人介紹就講：佢係我嘅〔阿嫂〕。

＊＊

姻親：〔連襟〕

連襟，係姐妹嘅老公之間嘅互相稱呼或合稱。
連襟又叫〔襟兄弟〕、〔連橋〕，廣東人多數合稱叫〔老襟〕。

大伯〔大伯〕－對老公嘅哥哥嘅稱呼。
叔仔〔小叔〕－對老公嘅弟弟嘅稱呼。
姑奶〔大姑〕－對老公嘅姐姐嘅稱呼。
姑仔〔小姑〕－對老公嘅妹妹嘅稱呼。
大舅〔內兄〕－對老婆嘅哥哥嘅稱呼。
舅仔〔內弟〕－對老婆嘅弟弟嘅稱呼。
大姨〔姨姐〕－對老婆嘅姐姐嘅稱呼。
姨仔〔小姨〕－對老婆嘅妹妹嘅稱呼。

＊＊

姻親：［儭家］

儭家，係指自己仔女結婚之後，同對方父母之間嘅互相稱呼或合稱。
女方儭家有時為客氣，會降級尊稱男方儭家為［儭家老爺］同［儭家奶奶］。
另外，自己兄弟姊妹嘅［老爺奶奶］同［外父外母］或佢哋嘅高堂，亦都同您有姻親嘅關係，可以稱呼做［姻世伯］同［姻伯母］，又或者係［姻老爺］同［姻奶奶］。

＊＊

姻親：〔繼親〕

繼親，都係親屬嘅一種，係是指生父同生母離異或者父母其中一個死咗之後，仔女跟住其中一個，而佢再結婚嘅配偶對於仔女嘅關係就係叫〔繼父〕或〔繼母〕。

繼父〔後父〕－或〔晚爹〕，俗稱〔後抵公〕。
繼母〔後母〕－或〔晚娘〕，俗稱〔後抵乸〕或〔後仔乸〕。
繼子〔後仔〕－俗稱〔油瓶仔〕或〔油艇仔〕。
繼女〔後女〕－俗稱〔油瓶女〕或〔油艇女〕。
繼［兄弟姐妹〕－係〔繼父／母〕同〔生父／母〕喺結婚之前同其他人所生嘅仔女。
　　　　　　　　俗稱〔拖油瓶〕或〔拖油艇〕，基本係冇直接血緣關係嘅。
　　　　　　　　而之後所生嘅仔女就叫〔同異／父母〕嘅兄弟姐妹。
　　　　　　　　例如係：〔同父異母〕嘅哥哥，〔同母異父〕嘅妹妹。

＊＊

＊〔配偶〕

配偶，係指婚姻關係、民事結合、同居伴侶關係、普通法婚姻之中嘅伴侶。呢啲係個冇特定性別嘅詞，通常男性配偶叫做〔丈夫〕、女性配偶叫做〔妻子〕。所以，呢個詞無論係多元性別或者係單元性別嘅異性關係或者同性關係，都可以適用。一對夫妻通常會係一齊生活，一齊養育仔女，組成為一個家庭單位嘅。

老公〔丈夫〕－結咗婚嘅女人對自己伴侶嘅稱呼。
　　　　　　　近代多數叫〔先生〕，〔老公〕。
　　　　　　　傳統嘅就叫〔相公〕、〔官人〕、〔夫婿〕、〔夫君〕等。
　　　　　　　但係有人亦唔鍾意用呢個稱呼，因為喺清朝嗰時，
　　　　　　　喺京城嗰啲妓女對啲太監〔公公〕嘅蔑稱做〔嫪公〕。
老婆〔妻子〕－結咗婚嘅男人對自己伴侶嘅稱呼。
　　　　　　　有啲地方叫〔太太〕，近代多數叫〔老婆〕。
　　　　　　　傳統嘅就叫〔娘子〕、〔夫人〕。

＊＊

＊〔其他〕

契親：［契親家］

契親，又叫〔乾親〕，或俗稱〔契字輩〕，係一種人際關係，結契親、拜契親又叫〔上契〕、〔結誼〕。「誼」係指情誼，「契」係指契約，係指兩個或以上冇血緣關係嘅人結為一種擬似親屬嘅關係，彼此之間用親人嘅感情維繫，可以係長輩同晚輩，又可以係同輩。通常都係友上加親嘅居多，亦友亦親，關係比一般嘅遠親同一般嘅朋友更密切，同輩嘅結契又叫做〔結拜〕、〔結義〕、〔換帖〕等。

契爺〔乾爹〕－又叫〔契爸〕；〔乾爸〕或者〔乾爺〕
契媽〔乾娘〕－又叫〔契娘〕，〔乾媽〕一般都係契爺嘅老婆
契仔〔乾兒〕－
契女〔乾女〕－
契哥〔乾哥〕－
契姐〔乾姐〕－
契妹〔乾妹〕－
契弟〔乾弟〕－喺香港，冇乜人想畀人咁叫，如果叫〔契細佬〕就會好啲啲

＊＊

過繼：〔過嗣〕

過繼，又叫做〔過房〕、〔過嗣〕，係傳統宗族觀念入面嘅一種〔收養〕行為。大多數係為咗延續男性繼承人而做嘅。當一個家庭需要後嗣嘅時候，就喺宗族或者其他親屬入面，收養一個仔或女，用嚟維持祭祀香火或者男性繼承人。就算呢個男性無仔送終，家族仍然可以為佢選一個嗣子，做成親生仔嘅關係。有啲地方生咗細路仔難養〔多病等〕，都會搵個〔人〕或〔神明〕嚟過繼〔形式上〕，認為咁樣個細路就會好養啲。

過繼〔達〕－或者直叫〔爸、爹〕等
過繼〔娘〕－或者直叫〔媽、娘〕等
過繼〔兒〕－
過繼〔女〕－

＊＊

收養：〔領養〕

收養，又叫〔抱養〕、〔領養〕，係指將人哋嘅仔女收嚟做自己嘅仔女。法律上，收養視同婚生子女嘅一種身分契約關係。由於收養會將本身冇真實血緣聯係嘅人，擬制具有親生仔女關係，所以收養人同埋被收養人之間又叫做〔法定血親〕或者〔擬制血親〕。收養人叫做〔養父〕或〔養母〕，被收養人就叫做〔養子〕或〔養女〕；被收養人嘅生父母叫做〔本生父母〕，而對本生父母嚟講，被收養人叫做〔出養子女〕。仔女出養之後，本生父母嘅親權即處於暫時停止嘅狀態。

養父〔義父〕－
養母〔義母〕－
養子〔義子〕－
養女〔義女〕－

＊＊

祖宗十八代



傳統〔十八代〕嘅意思，一般係指父系之中［上九代］同［下九代］嘅宗族成員。之後，亦畀人引伸加入鬧人嘅用語入面，將人哋嘅家族成員都牽涉當中，用語嘅起源都已經無從稽考。

上九代依序係：

〔鼻祖〕－子女以上嘅上九代。［祖宗十八代嘅嘅第一代］
〔遠祖〕－子女以上嘅上八代。
〔太祖〕－子女以上嘅上七代。
〔列祖〕－子女以上嘅上六代。
〔天祖〕－子女以上嘅上五代。
〔高祖〕－子女以上嘅上四代。
〔曾祖〕－子女以上嘅上三代。
〔　祖〕－子女以上嘅上二代。
〔　父〕－子女以上嘅上一代。

下九代依序係：

〔　兒〕－父母之下嘅第一代。
〔　孫〕－父母之下嘅第二代。
〔曾孫〕－父母之下嘅第三代。
〔玄孫〕－父母之下嘅第四代。
〔來孫〕－父母之下嘅第五代。
〔晜孫〕－父母之下嘅第六代。
〔仍孫〕－父母之下嘅第七代。
〔雲孫〕－父母之下嘅第八代。
〔耳孫〕－父母之下嘅第九代。［祖宗十八代嘅嘅第十八代］

＊＊

中文親屬稱呼同英文親屬稱呼

中文嘅親屬稱謂比較細緻，英文嘅稱呼就好簡單，舉個例嚟講：
Aunt 可以表示〔嬸嬸〕、〔伯母〕、〔舅母〕、〔姑組〕、〔姨媽〕；
Uncle 可以表示〔叔叔〕、〔阿伯〕、〔舅父〕、〔姨丈〕、〔姑丈〕。

中文嘅親屬稱謂係為咗區分內外同表裡，比如係：
「堂」親，例如〔堂兄、堂弟〕，係同姓家屬，係近親，係家族裡面嘅人；
「表」親，例如〔表哥、表弟〕，係異姓親屬，係遠親，係家族外面嘅人；
「內」親，例如〔爺爺、嫲嫲〕，係同族近親，你阿爸呢邊嘅人，係家族裡面嘅人；
「外」親，例如〔外公、外婆〕，係異族遠親，係阿媽嗰邊嘅人，係家族外面嘅人。

英文嘅親屬稱謂系統逢係唔做呢樣嘅區分。
Grandfather 既可以表示〔爺爺〕，又可以表示〔外公〕；
Cousin 既可以表示〔堂兄、堂弟〕，又可以表示〔表哥、表弟〕。
所以由英語嘅稱呼上睇唔出遠近同表裡，睇唔出親疏關係。

喺古代嘅家族入面，通過稱謂，就可以確定一個人喺家族裡頭嘅地位同身份，所享有嘅權利同要盡嘅義務，呢樣要各人守好自己嘅本分，有利於家族嘅管理，有利於儒家等級制度嘅實施。而西方人嘅等級觀念同等級制度就冇東方人咁複雜，所以表現喺稱呼上面亦都冇咁複雜同細緻。

＊＊

譯：蕭南仁．2014年11月
圖：廣東話資料館［最後修正．2014年9月1曰］

＊＊

小莫小於水滴，匯成大海汪洋； 細莫細於沙粒，聚成大地四方。

＊＊

香港語文。廣東話資料館

經典回憶［每日一字］

每日一字，係香港無線電視喺1983年至1987年所播放嘅一個電視資訊節目，由林佐瀚主持，喺每日嘅下晝6點25分播出（每集大約3分鐘，用廣東話講解嘅）。每日都會介紹一個中文字，重會介紹每個字嘅正確讀音、用法，同埋糾正人對嗰個字嘅誤解，而呢個節目喺當時好受歡迎。喺呢三年幾嘅時間，林佐瀚教曉咗觀眾過千個中文字。

主持：林佐瀚［兼資料搜集］
助導：徐世傑
編導：梁蘊紅
監製：黃孝廉
製作：無線電視

＊＊

呢集介紹啲乜？

．酣　　［飲酒暢快］音：ham4
　　　　　有暢快，暢飲，醉酒，激烈嘅意思



．酣飲　［暢快痛飲］

．酣暢　［飲酒盡意］

．酣放　［嗜酒暢飲而行為放縱］又可以指寫文章

．酣睡　［酣然入睡］指熟睡

．酣戰　［相持長時間嘅激戰］

＊＊

其他補充：

．酣酣　〔暢飲醉酒嘅樣〕

．酣興　〔盡情喝酒嘅樂趣〕

．酣歌　〔暢飲樂極而忘情高歌〕

，酣叫　〔暢飲且大聲呼叫〕

．酣笑　〔暢飲且大笑〕

．酣然　〔盡意暢快〕

．酣適　〔暢快舒適〕

．酣酒　〔沉湎於酒〕

．酣醉　〔暢快大醉〕

．酣足　〔痛快滿足〕

．酣悅　〔暢快喜悅〕

．酣湑　〔暢飲歡樂〕

．酣飫　〔酒醉飯飽〕

．酣宴　〔縱情飲宴〕

．酣臥　〔甜美熟睡〕

．酣眠　〔熟睡沉睡〕

．酣夢　〔深沉甜美睡眠〕

．酣甜　〔酣暢甜美睡眠〕

．酣沉　〔形容睡眠濃甜而深沉〕

．酣呼　〔酣睡時打鼻鼾〕

．酣寢　〔甜美熟睡〕

．酣鬧處［激烈之時］

．酣鬥　［戰鬥激烈］

．酣鏖　［戰鬥劇烈而持久］

＊＊

順便介紹下個主持人



林佐瀚，香港著名電視節目主持人，喺80年代主持香港無線電視節目《每日一字》成名。

1934年，林佐瀚喺香港出生，祖籍係廣東番禺。曾經就讀香港華仁書院，畢業之後喺香港大學攻讀英國文學，攞到榮譽學士學位。之後獲得英國文化協會獎學金，去英攻讀圖書館學，攞到英國圖書館協會會員資格。返香港之後，跟住饒宗頤教授治宋詞，再攞到中國文學碩士銜。當時佢亦曾經擔任香港中文大學聯合書院圖書館副館長、香港行政局同香港立法局總主任，同埋喺香港大學度任教。

1983年3月，林佐翰接受香港無線電視高層重金邀請，主持《每日一字》嘅節目（每集兩分鐘）。呢個節目一做就做咗三年半，總共製作咗成1千4百幾集。聽講，林佐瀚喺每星期嘅6日工作裡面，一日用來錄影節目；其餘5日就係搜集資料。由於佢主持節目嘅時候風趣幽默，加上個節目深入淺出嘅介紹，節目好受觀眾歡迎，林佐瀚重成為市民心目中嘅「大眾老師」。

1987年，林佐翰曾經為香港亞洲電視黃金台（本港台）主持〔話說運河〕。

1988年，林佐瀚轉職，成為澳門旅遊娛樂股份有限公司公關部主管至到1991年為止。

1991年，林佐瀚再轉職，成為澳門大學講師兼首席助理教務長至到1998年為止。

2001年1月28日，林佐翰因為心臟病喺葛量洪醫院辭世，終年66歲。

林佐瀚著作：

。《每日一字》

。《無悔集續篇》



林佐瀚、任繼愈、饒宗頣、程祥徽、季羡林、鄭煒明、譚世保。合影

＊＊

香港語文。廣東話資料館

陳真經典對白〔惡搞〕！

《精武門》係香港1972年嘉禾電影出品嘅一套武打電影［功夫片］，由李小龍主演，羅維執導。李小龍喺戲入面飾演民國初年武術大師霍元甲嘅徒弟陳真（虛構人物），最出名嘅一幕係陳真單人匹馬攞坐之前日本仔送嘅「東亞病夫」牌匾，走入虹口道場度踢館，教訓班日本仔一餐，之後重塞紙入佢哋個口。

呢部電影喺當年好受歡迎，李小龍飾演陳真呢個角色亦心入民心。而喺呢套戲入面，重有好多值得回味嘅經典片段同對白嘅。不過，呢次就有啲［惡搞］下，您記唔記得原本係講啲咩嘅呢？

＊＊

陳真喺《精武門》入面嘅經典對白〔惡搞〕

　

「你話我知呀！胃病會唔會死人？感冒會唔會死人？睇鹹書會唔會死人？」
　陳真咁樣去質問師兄佢哋，師父〔霍元甲〕嘅死因係咩。

＊＊



「我係精武館最『水皮』嘅徒弟，我想試下日本『壽司』嘅味道！」
　陳真將〔東亞病夫〕牌匾送返去虹口道場時講嘅嘢。

＊＊



「我話你知呀！孫中山唔係病夫！係大夫！」
　陳真將虹口道場啲［架仔］都教訓一餐之後講嘅嘢。

＊＊



「呢次要你哋食紙、下次要你哋食玻璃！再下次要你食埋個木框！」
　踢完館之後，陳真將寫著〔東亞病夫〕嘅紙撕落嚟，逼嗰兩個之前送牌匾到精武館嘅日本人食，喺塞紙入去佢哋個口時講嘅嘢。

＊＊

　

「點解？點解你要逼我呀？我根本就唔識得玩 Farm-Ville！」
　陳真逼漢奸胡恩講出〔霍元甲〕嘅死因之後，本來已經係放佢一馬畀佢走；但係胡恩喺背後偷襲，就畀陳真一拳打死嗰時就講咗呢一句。

＊＊

　

「我少讀書，你唔好呃我！Samsung Galaxy 同 iPhone 邊隻正啲！」
　呢句陳真向巡捕房探長講嘅嘢。跟住陳真就問探長，若果佢行出嚟自首，精武館嘅人係咪唔受牽連。

＊＊

　

「我話你知呀！我陳真玩 Candy Crush Saga，同精武館無關！」
　陳真臨走出精武館門口嗰時，向嗰啲日本領事講嘅嘢。

＊＊

中國人，唔係病夫！



＊＊

大陸氣功［金像獎］2017

開場表演，［我要真氣功］！

呢啲國寶級嘅表演，再加上一啲特技效果之後，呢位氣功大師嗰招［隔山打牛］嘅威力，就更上一層樓嘞。真係［無卵得頂］，假到［無曬朋友］！不過，呢種咁嘅大師到處都係，不論國籍人種同膚色，全世界都有。喺亞洲地區比較有市場嘅有大陸、日本、台湾、馬來西亞、泰國等.........

參演招式：

。［隔住青山打西牛］

。［螺旋丸 vs 廬山升龍霸］

。［太極旋風氹氹轉］

。［真正宗。龜波氣功］

。［雷遁。千烏］

氣功嘅種類好繁多，又有悠久嘅歷史，喺古代通常分為吐吶、行氣、布氣、服氣、導引、煉丹、修道、坐禪等等。練氣功，好多時都係配合武術或者靜坐一齊練。

氣功主要可以分為［動功］同［靜功］。動功係指以身體活動為主嘅氣功，特點係強調同意氣相結合嘅肢體操作；而靜功係指身體唔迶動，只係靠意識、呼吸嘅自我控制來進行嘅氣功。大多數嘅練氣功方法係動靜相間嘅。

喺宗教之中，道教嘅道士經常會練習導引、內丹術氣功，而佛教裡面就會練習禪定、靜坐所包含嘅氣功。

＊＊

香港粵語電影。廣東話資料館

廣東話［爛 Gag］ＩＱ題！［答案］

嘩！細Ｂ，你個表妹做咩喊得咁淒涼！

＊＊

廣東話［爛 Gag］ＩＱ題！

答案：

01. 狗．狗養〔久仰大名〕

02. 龜苓膏．［龜零高〕

03. 頭名狀

04. 珍寶珠

05. 珍珠

06. 碧麗珠

07. 朱自清．〔豬自清〕

08. 七喜

09. 及第粥．〔(目及)底粥〕

10. 蕉．〔中招〕

11. 蕉．〔朝不保夕〕

12. 囉毛．Normal〔普通〕

13. 多士爐．〔多屎爐〕

14. 欄杆．〔難乾〕

15. 蝦．〔蝦餃燒賣〕

16. F4．〔Ｆ４...言承旭，周渝民，吳建豪，朱孝天〕

17. 豹．〔豹聞底褲〕

18. 蜜瓜．〔勿瓜〕

19. 因為西經畀唐三藏攞咗

20. 自動櫃員機．〔自動跪完機〕

21. 未．你今日飲左未〔味〕

22. 你唔好扮曬蟹～［因為蟹柳唔係用蟹肉做嘅］

23. 死．〔死肥仔〕

24. 因為超人件３寫住〔Ｓ〕細碼

25. Ｅ同Ｃ班．〔伊斯蘭教〕

26. 蛇Ｃ慢．〔佘詩曼〕

27. 最懶係１，最勤力係２．〔一不做，二不休〕

28. 做六嘅手勢果時～

29. 賣Ｇｏｄ！［Ｍｙ Ｇｏｄ！］

30. 紅豆．〔佢流血，染到變咗紅色〕

31. 青豆．〔佢嚇到面青青〕

32. 綠豆沙

33. 茄子．〔因為條香蕉跌到瘀咗，變咗紫色〕

34. 香蕉．〔佢散咗瘀喇〕

35. 無比膏．〔高〕

36. 強力無比膏．〔高〕

37. long time no see．〔Ｃ〕

38. Keroro

39. 名偵．〔名偵(探)柯南〕

40. 有２隻手要嚟叉住個鼻

41. ＵＳＢ

42. 阻〔左〕Ｑ住曬

43. 楊過．〔佢成日叫．姑姑〕

44. 喬治布殊〔薯〕

45. 玩緊大富翁

46. 小易畀人打到阿媽都唔認得

47. 財神．〔林子祥嘅歌。財神到，財神到，好走快兩步...〕

48. 黃色．〔人心惶惶．黃黃〕

49. 奶昔．〔nine six〕

50. 因為啲星星係會〔閃閃閃〕

51. 食兩舊屎

52. 羊．〔佢成日叫．咩〕，重有［串羊肉］

53. 一波三折

54. 米奇老鼠

55. 所有鴨都系（唔好話唐老鴨）

56. 滑蛋話：５同你玩啦，你蝦仁［哈人］嘅！

57. 老豆就話喇：傻仔，你點會系傻仔呢？

58. 第二日，阿仔死咗～

59. 醫生諗咗諗，就同距講講：試過屎未？

60. 大家咁話...

＊＊



圖：方東昇［世界Ｏ距離］

＊＊

香港語文。廣東話資料館

廣東話［爛 Gag］ＩＱ題！

嗱！細Ｂ...你係味咁樣玩嘢呀？

 ＊＊

爛 Gag，有人叫佢做［爛梗］、［冷語］、［冷笑話］，又有人話佢係［失敗嘅笑話］，呢個詞係指笑話本身因為無聊、諧音字、翻譯、或省去主語、唔同邏輯、斷語、或特殊內容等問題，又或者係由於講嘅人語氣同埋表情等嘅原因，搞到一個好似笑話嘅笑話唔好笑，出現［冷場］。



但係咁又唔一定係代表個笑話好悶，呢個笑話本身可能係一種幽默嘅表現。如果喺聽到爛 Gag 時，而聽眾又有啲配合，例如係會心微笑［冷笑］，有時又做出雙臂抱緊嘅動作表示［好凍呀］，又或者講出同呢啲冷語相關嘅說話或動作，就好似［打冷震］、［天氣好熬］、［閂冷氣機］等等。

有啲爛 Gag 因為表現問題，經過重新構思表現之後，可以再發掘出唔少微妙嘅地方，有時話人搞爛 Gag 唔好笑亦係搞笑嘅另一個笑點（想扭轉氣氛用），爛 Gag 多數流行喺網路、電視節目、書籍、雜誌等媒體入面，而喺坊間亦有好多爛 Gag 高手。喺學校、公司等都有人會講爛 Gag［冷笑話］來調劑下生活嘅。由於爛 Gag 大多數係無聊，內容古怪，實用嘅意義唔大，所以有人聽得爛 Gag 越多就越唔爛 ［冷］。

＊＊

世界Ｏ距離［方東昇］

廣東話［爛 Gag］ＩＱ題！

01. 大明養小明，咁邊個養大明？

02. 咩動物成世都唔會長高嘅呢？

03. 你考第一名嗰張獎狀叫咩名呢？

04. 咩豬係得一隻腳嘅？

05. 咩豬又係冇腳嘅呢？

06. 咩豬又會係最乾淨？

07. 麥兜自己沖涼，估一位近代文學作家嘅名？

08. 嗰斑小矮人偷睇白雪公主沖涼，估一種飲品～

09. 咩粥係最鹹濕？

10. 咩生果最容易種？

11. 咩生果係最唔保值？

12. 咩毛係最普通嘅？

13. 咩爐係最鬼臭？

14. 咩公共地方掠衫最搵自己笨？

15. 咩動物最中意同燒賣發生關係？

16. 喺電腦鍵盤上面，邊粒掣係最靚仔？

17. 咩動物係最鐘意聞底褲嘅？

18. 咩生果可以祝人長命百歲？

19. 點解呢個世界上有［東京］、［南京］、［北京］，但係冇［西京］呢？

20. 大雄做錯事，畀阿媽罰跪地三個鐘，呢個時候，叮噹攞咗樣咩法寶出嚟幫大雄呢？

21. 蘋果汁係蘋果味，橙汁係橙味，咁益力多係咩味？

22. 見到蟹柳，要同佢講咩啊？

23. 啲肥仔多數係姓咩？

24. 點解超人件３咁窄？

25. A、B、C、D、E、F班，邊兩班係最難教？

26. 蛇Ａ至蛇Ｚ，邊條蛇行得最慢？

27. 1-10 嘅數目字裡面，邊個數子係最懶，同邊個數字係最勤力？

28. 六減二，幾時會等於零？

29. 花店賣花，電器鋪賣電器，咁教堂賣咩？

30. 綠豆撞落條柱度，會變咗做咩？

31. 綠豆撞鬼，又會變咗做咩？

32. 有鯊魚食咗粒綠豆，條鯊魚又會變咗做咩？

33. 香蕉成熟時，跌咗落地，會變咗做咩？

34. 過咗一日之後，又變做咩？

35. 咩嘢係最高？

36. 有咩又比上一題嘅嘢更高呢？

37. ABBDABBDAABDAABBBBBDDAABBDABBDA，係句子度猜一句問候語［英文］～

38. 菠蘿係橙黃色，咩蘿係綠色嘅呢？

39. 柯南病咗，有邊個會去探佢？

40. 一隻螞蟻有６隻腳，點解佢行過狗屎得４隻腳印？

41. 知唔知ＵＳＡ個細佬係邊個？

42. 從前左Ｑ同右Ｑ住埋一齊，後來右Ｑ搬走咗，結果點呢？猜四個字～

43. 狗會「汪汪」咁叫，貓會「喵喵」咁叫，咩會「咕咕」咁叫呢？

44. 拉登最想炸咩薯？馬鈴薯？番薯？薯條？

45. Ａ君拎住個熨斗去水務局，Ｂ君揸架車去公園，Ｃ君就戴住頂帽坐監，究竟佢地做緊乜？

46. 點解小明畀人打，佢阿媽企喺對面都唔過去救佢呢？

47. 如果獅子嚟到要走快四步，老虎嚟到要走快三步，咁乜嘢嚟到要走快兩步？

48. 人心係咩色架？

49. 用96猜一種飲品。

50. 點解放煙花時唔會射到天上嘅星星嘅？

51. 有乜嘢慘過食一舊屎呢？

52. 咩動物係最串？

53. 隆胸兩邊隆曬要一萬，但係隆一邊就只要三千，估一句四字成語～

54. 有咩老鼠得兩隻腳？

55. 有咩鴨得兩隻腳？

56. 蝦仁話：滑蛋，你好滑啊！你估滑蛋會講咩嘢呢？

57. 有一日小強問距老豆：老豆，到底我系唔系傻仔啊？又係估佢老豆講乜嘢～

58. 阿仔同阿媽講想食煲仔飯，又估下跟住會點呢？

59. 有個人，佢腸胃吾好，一日，距來到胃病醫院睇病～
 　 個人講：醫生，我好煩啊！
 　 醫生問：點解你禁煩啊？
 　 個人話：點會吾煩吖！我幾日冇屙屎！
 　 醫生問：咁，呢幾日食過啲咩？
 　 個人話：我食乜就屙乜，食西瓜屙西瓜，食黃瓜屙黃瓜～
 　 醫生諗咗諗，就同佢講：＊＊＊＊？〔唔係粗口〕

60. 其實如果你唔樣衰都幾靚架喎...：＊＊＊＊〔一樣都唔係粗口〕

＊＊



［今次唔係我死，就係你笑到碌地！］

＊＊

廣東話［爛 Gag］ＩＱ題！［答案］

＊＊

香港語文。廣東話資料館

李小龍。精武門［踼館］！

我係精武館最水皮嘅徒弟，我想試下日本拳頭嘅味道！

＊＊

精武門經典對白：

「胃病會唔會死人？感冒會唔會死人？」
陳真咁樣質問師兄佢哋，師父霍元甲嘅死因。不過當年感冒的確係可以致命嘅。

「我問你，你係咪中國人？」
精武館二師兄質問胡翻譯嘅話。

「我係精武館最『水皮』嘅徒弟，我想試下日本拳頭嘅味道！」
陳真將「東亞病夫」牌匾送返去虹口道場時講嘅說話。

「中國人唔係病夫！」
陳真將虹口道場嘅打手都教訓一餐之後講嘅說話。

「呢次要你哋食紙、下次要你哋食玻璃！」
踢館之後，陳真將寫着「東亞病夫」嘅紙撕下來，逼嗰兩個當初送牌匾嘅日本人，塞紙入佢哋口時講嘅說話。

「點解？點解你要逼我呀？」
陳真逼漢奸胡恩講出霍元甲嘅死因之後，本來都放佢一馬；但胡恩喺背後偷襲，反畀陳真一拳打死時講咗呢句話。

「我就係唔講道理嘅！」
探長話巡捕房做事一定要講道理，虹口道場社長鈴木寬咁樣回應。

「我哋容忍係錯㗎！五師弟佢啱！」
大師兄范先生返到精武館時，眼見一眾師弟妹被殺，悲憤之中講嘅說話。

「我少讀書，你唔好呃我！」
陳真向巡捕房探長講嘅說話。跟住再問，如果佢出去自首，精武館嘅人係咪唔受牽連。

「我話你知呀！我陳真殺人填命，同精武館無關！」
陳真臨步出精武館之前，向日本領事講嘅說話。

＊＊

精武門 Fist of Fury，係1972年一部武打功夫電影，由李小龍主演。呢部係李小龍回港後主演嘅第二部電影，當時香港票房收得超過四百萬。成名前嘅林正英、成龍都喺戲入面度做龍虎武師。

故事大綱：



20世紀民初時期，陳真返到上海日租界嘅精武館為師父霍元甲奔喪，重打算同青梅竹馬嘅師妹結婚。雖然醫生講霍元甲係因為胃病轉感冒致死，但係精武館弟子都有懷疑，而陳真就誓要查清真相。

霍元甲嘅公祭儀式度，胡翻譯帶著兩個日本虹口道場嘅人走來挑釁示威，重送來一塊牌匾，上面寫著［東亞病夫］，陳真嬲到要出手打鑊佢哋，但係畀大師兄阻止。



師父受辱，陳真條氣唔順，冇同師兄弟講聲就單拖將個牌匾送返去虹口道場，一條友用［迷蹤拳］同唔知點變出來嘅［雙節棍］打殘班架仔，重要先前喺公祭度挑釁搞人喪事嘅兩條友食咗寫著［東亞病夫］嘅紙。

離開道場行到去公園，睇到［狗與華人不得入內］嘅告示牌，又同其他日本人再起爭執，之後重凌空一腳踢碎嗰塊告示牌。

紅口教頭派咗好多人去報復，到精武館砸打一番，重要精武館交出陳真。

陳真返到精武館，喺帥兄弟嘅勸說之下準備離開上海。不過嗰晚發現田伙頭同馮管事傾密謁，聽到霍元甲原來係畀佢哋毒死，重同一個叫［胡先生］嘅人有關，又知道田伙頭原來係日本軍人。陳真就打死佢哋兩個，將佢哋條屍掛喺枝電線桿度，離開咗武館。後來師妹喺霍元甲嘅墓地度搵到陳真，重提醒佢，胡先生可能就係胡翻譯。



胡翻譯幫紅口教頭出主意，用日本嘅政治威勢向巡捕房施壓要捉陳真。胡翻譯同紅口教頭重有俄國斧頭黨首領聚會之後坐人力車離開，個車夫原來係陳真假扮，結果畀陳真拉咗去後行。威嚇之下，胡翻譯供出紅口教頭先至係幕後主謀；胡翻譯伺機偷襲，畀陳真打死。陳真跟著整壞虹口道場嘅電話線，假扮修理技工混入去道場。

師妹帶大師兄去到霍元甲墓地見陳真，不過陳真已經走咗。而虹口道場又派出大班手下易裝攜刀離開之後，陳真一人闖入道場，打死一班武師，經過激烈決鬥，先後打死俄國斧頭黨首領同埋紅口教頭。



大師兄等人返到精武館，發現成班師弟帥妹毒手幾乎死曬。而日本領事又催促巡捕房到精武館攞人。陳真返到精武館裡頭，為免精武館嘅人受罪，挺身成擔，走出大門對著一班鎗手踢出凌空一腳……

＊＊



＊＊

＊＊

大陸氣功［金像獎］2017

開場表演，［我要真氣功］！

呢啲國寶級嘅表演，再加上一啲特技效果之後，呢位氣功大師嗰招［隔山打牛］嘅威力，就更上一層樓嘞。真係［無卵得頂］，假到［無曬朋友］！不過，呢種咁嘅大師到處都係，不論國籍人種同膚色，全世界都有。喺亞洲地區比較有市場嘅有大陸、日本、台湾、馬來西亞、泰國等.........

參演招式：
。［隔住青山打西牛］
。［螺旋丸 vs 廬山升龍霸］
。［太極旋風氹氹轉］
。［真正宗。龜波氣功］
。［雷遁。千烏］

氣功嘅種類好繁多，又有悠久嘅歷史，喺古代通常分為吐吶、行氣、布氣、服氣、導引、煉丹、修道、坐禪等等。練氣功，好多時都係配合武術或者靜坐一齊練。

氣功主要可以分為［動功］同［靜功］。動功係指以身體活動為主嘅氣功，特點係強調同意氣相結合嘅肢體操作；而靜功係指身體唔迶動，只係靠意識、呼吸嘅自我控制來進行嘅氣功。大多數嘅練氣功方法係動靜相間嘅。

喺宗教之中，道教嘅道士經常會練習導引、內丹術氣功，而佛教裡面就會練習禪定、靜坐所包含嘅氣功。

＊＊

香港粵語電影。廣東話資料館